LESONI 20
E Tuvanaki Vakacava na iVavakoso?
E Kalou ni tuvatuvanaki o Jiova. (1 Korinica 14:33) Eda namaka gona mera va tale ga qori na nona tamata. E tuvanaki vakacava na ivavakoso vaKarisito? Eda na tokona vakacava na ituvatuva qori?
1. O cei na ulu ni ivavakoso?
E “ulu ni ivavakoso na Karisito.” (Efeso 5:23) E liutaka tiko mai lomalagi na nodra cakacaka na tamata i Jiova e veiyasa i vuravura. E lesia o Jisu “na dauveiqaravi yalodina e vuku,” qori e dua na ilawalawa lailai ratou lewena eso na qase ni ivavakoso matua, ratou kilai tale ga me iLawalawa Dauvakatulewa. (Wilika Maciu 24:45-47.) Me vakataki ratou ga na yapositolo kei ira na qase ni ivavakoso ena imatai ni senitiuri, e dusimaka tale ga na iLawalawa Dauvakatulewa na cakacaka ena ivavakoso e vuravura raraba. (Cakacaka 15:2) Ia eratou sega ni noda iliuliu. Eratou nuitaki Jiova kei na nona Vosa me dusimaki ratou, qai vakamalumalumu ena veiliutaki i Jisu.
2. Cava na nodra itavi na qase ni ivavakoso?
Era tagane lotu vaKarisito matua na qase ni ivavakoso, ra qai veivakavulici ena iVolatabu. Era vakatawani ira tale ga na tamata i Jiova ena nodra veivakayaloqaqataki kei na nodra veitokoni. Era sega ni saumi. Era veiqaravi ga ‘ena yalo e vinakata ena mata ni Kalou, sega ena yalokocokoco, ena yalo ga e marautaka.’ (1 Pita 5:1, 2) Era tokoni ira na qase na dauveiqaravi ni ivavakoso. Ni toso na gauna, era na rawa ni dua tale ga na qase ni ivavakoso ke ra rawata na kena ivakatagedegede.
Na iLawalawa Dauvakatulewa e lesia eso na qase ni vavakoso mera ivakatawa ni tabacakacaka. Era dau veisiko na ivakatawa ni tabacakacaka ena ivavakoso, mera veidusimaki qai veivakayaloqaqataki. E nodra itavi tale ga mera lesi ira na tagane mera qase ni ivavakoso kei na dauveiqaravi era rawata na kena ivakatagedegede vakaivolatabu.—1 Timoci 3:1-10, 12; Taito 1:5-9.
3. Na cava na nodra itavi yadua na iVakadinadina i Jiova?
O ira kece na lewe ni ivavakoso era na “vakacaucautaka na yaca i Jiova” nira vakaitavi ena soqoni, ra qai vunau me vakatau ena kedra ituvaki.—Wilika Same 148:12, 13.
VAKEKELI
Vulica se iliuliu vakacava o Jisu, na sala mera vakatotomuri koya kina na qase, kei na sala meda tokoni Jisu kina kei ira na qase ni ivavakoso.
4. O Jisu na iliuliu e dauveivakacegui
E veivakacegui na veisureti i Jisu. Wilika Maciu 11:28-30, qai veivosakitaka na taro qo:
Na cava e vinakata o Jisu meda vakila ena ivakarau ni nona veiliutaki?
Era vakatotomuri Jisu vakacava na qase ni ivavakoso? Sarava na VIDIO.
E vakamatatataka na iVolatabu na sala mera veiqaravi kina na qase.
Wilika Aisea 32:2 kei na 1 Pita 5:1-3, qai veivosakitaka na taro qo:
Cava nomu rai ni o mai kila nodra sasaga na qase mera veivakacegui me vakataki Jisu?
Cava eso na sala era na vakatotomuri Jisu kina na qase?
5. Era veivakavulici na qase ena nodra ivakaraitaki
Na cava e vinakata o Jisu mera kila na qase me baleta na nodra itavi? Sarava na VIDIO.
O Jisu e biuta e dua na ivakaraitaki vei ira na lesi mera veiqaravi ena ivavakoso. Wilika Maciu 23:8-12, qai veivosakitaka na taro qo:
Na cava o qoroya me baleta na ivakatagedegede vakaivolatabu ena vinakati vei ira na qase ni vakatauvatani kei ira na iliuliu ni lotu nikua?
Era saga na qase mera kaukaua vakayalo kei ira na nodra vuvale
Era kauaitaki ira na lewe ni ivavakoso na qase
Era vunau wasoma e veivale na qase
Era veivakavulici na qase, era veivuke tale ga ena sasamaki kei na so tale na itavi lalai
6. Eda rawa ni tokoni ira na qase
E tukuna vei keda na iVolatabu na vuna e bibi kina meda tokoni ira na qase. Wilika Iperiu 13:17, qai veivosakitaka na taro qo:
Vakacava e veiganiti na ka e tukuna na iVolatabu meda talairawarawa qai vakamalumalumu vei ira na tacida tagane era lesi mera veiqaravi? Na vuna?
Wilika Luke 16:10, qai veivosakitaka na taro qo:
Na cava e bibi kina meda tokoni ira na qase ena ka lalai mada ga?
KA ERA KAYA ESO: “Sega ni tukuni sara mo lewena e dua na lotu, o rawa ni lotu ga i vale.”
Na cava o nanuma, ena yaga vakacava ni o qarava na Kalou ke o lewena e dua na ivavakoso?
KA O VULICA
E ulu ni ivavakoso o Jisu. Ni dusimaki ira na qase o Jisu, eda marau ni tokoni ira nira dau vakacegui keda qai vuli ena nodra ivakaraitaki.
Railesuvi
O cei na ulu ni ivavakoso?
Na cava nodra itavi na qase ena ivavakoso?
Na cava noda itavi na lewe ni ivavakoso?
IKURI
Raica na nodratou kauaitaki ira vakalevu na lotu vaKarisito nikua na iLawalawa Dauvakatulewa kei ira na qase.
Vulica na nodra itavi na ivakatawa ni tabacakacaka.
Veisiko ni iVakatawa ni Tabacakacaka ena Veivanua Yawa (4:51)
Wilika na nodra itavi na yalewa ena ivavakoso.
“E Tiko na iTalatala Yalewa ni iVakadinadina i Jiova?” (Na Vale ni Vakatawa, 1 Seviteba, 2012)
Dikeva na nodra cakacaka vakaukaua na qase mera vakayaloqaqataki ira na lewe ni ivavakoso.