Mo Yalomatua Qara na ‘iVakasala Vuku’

Na bula e vakatauvatani kei na soko. E vakadinadinataki ni tawayaga na vuku ni tamata ke dua e via sokotaka vakamaqosa na nona bula. E levu e voca nodra waqa ena voravora ni bula nikua. (Same 107:23, 27) Na cava e veiganiti kina na ivakatautauvata qo?

Ena gauna makawa, e sega ni cakacaka rawarawa na veisokoyaki e takali, ni gadrevi kina o ira na kenadau. Na kila qori e vulici ga vua e dua e sa qaseta na soko, rairai vua sara ga na kavetani. (Caka. 27:9-11) E levu na droini ena gauna makawa e laurai levu kina o koya na kavetani, qori e dusia na bibi ni nona itavi. Me rawa nira soko e takali na dausoko, era na vakadikeva matua na kalokalo, na liwa ni cagi kei na veika tale va ya me vukei ira. Na iVolatabu e tukuni ira na dausoko qori mera “vuku,” e kena ibalebale tale ga na “yalomatua.”​—Isik. 27:8.

Na noda via walia na leqa nikua e vaka ga na dredre ni soko e wasawasa ena gauna makawa. Na cava ena vukei keda?

E RAWATI VAKACAVA NA ‘IVAKASALA VUKU’?

Nida se nanuma toka ga na ivakatautauvata ni bula kei na soko, dikeva mada na ka dina vakaivolatabu qo: “Ena vakarorogo na lomavuku, ka na tubu cake kina na nona vuku; Ia na tamata daukila ka, ena rawata nai vakavuvuli vuku.” (Vkai. 1:5, 6) Na vosa vakaIperiu ni “ivakavuvuli vuku” e dusia na ka e dau cakava na komada ni waqa ena gauna makawa. E tiko vua na ivakatagedegede ni kila kei na vuku me rawa ni soli ivakasala se veidusimaki.

Eda na rawata na ‘ivakasala vuku’ ke da sasagataka, ena qai maravu kina noda soko ena wasawasa ni bula qo. Me vaka e vakamacalataki ena Vosa Vakaibalebale, meda vakalaiva me ratou cakacaka vata na “vuku,” “yalomatua” kei na “kila ka.” (Vkai. 1:2-6; 2:1-9) Ia meda kua tiko ga ni guilecava na veidusimaki vakalou, ni o ira mada ga na tamata ca era rawa ni veidusimaki ina ka e ca.​—Vkai. 12:5.

E bibi gona meda gonevuli gugumatua ni Vosa ni Kalou. Ni toso noda vuli eda na kila na veika talei me baleti Jiova kei na luvena o Jisu Karisito, e dua e ucui Tamana vinaka. (Joni 14:9) Nida tiko ena soqoni, eda rogoca kina e levu sara na ‘ivakasala vuku.’ Eda rawa tale ga ni vuli ena nodra ivakaraitaki eso na tacida se o ira sara ga na noda itubutubu.​—Vkai. 23:22.

NAMAKA QAI LALAWATAKA

Ena yaga vakalevu na ‘ivakasala vuku’ ni voravora na bula. Ke da lomalomaruataka na ka me caka ena gauna dredre qori, ena veivakayalolailaitaki qai veivakaleqai sara ga.​—Jeme. 1:5, 6.

E dau vakayagataki tale ga na ‘ivakasala vuku’ ena ivalu. Eda wilika: “Ko sa bosea vakavuku [‘ivakasala vuku,’ The Revised English Bible] ko na qai ia rawa kina na nomui valu: Ka sa rawa na tiko vinaka ni ra lewe vuqa na daubose.”​—Vkai. 20:18; 24:6.

Me vaka na nona ituvatuva maqosa e dua e liutaka na ivalu, meda kila tiko na ka e rawa ni vakaleqai keda vakayalo. (Vkai. 22:3) Kena ivakaraitaki, de dua mo na vakatulewataka mo ciqoma e dua na cakacaka vou, se me tosoi cake nomu itutu vakacakacaka. Sega ni vakabekataki ni o vakasamataka tiko na isau, gauna ni nomu veitosoyaki, kei na so tale na ituvaki. Ena yasana adua, e tiko eso tale na tikina mo nanuma: Vakacava e duavata kei na ivakavuvuli vakaivolatabu na cakacaka qo? Ke mani veiveisau na noqu gauna ni cakacaka, ena vakataotaka na noqu veika vakayalo?​—Luke 14:28-30.

E dua na tacida yalewa o Loretta, a cakacaka vinaka tu ena dua na kabani ni vakarau kakana. Ni toki na nodratou kabani, a tukuni vua ni sa tosoi cake na nona itutu: “Qo na nomu kalougata” a kaya vua o nona dairekita. “Keitou kila tale ni voleka kina e dua na nomudou Vale ni Soqoni.” Ia e via bula rawarawa ga o Loretta me vakalevutaka nona veiqaravi vua na Kalou. E raica rawa ni itutu oya ena kania nona gauna qai sega ni rawa ni vakaitavi ena cakacaka vaKarisito. A mani solia na nona ivola ni kere vakacegu, dina ni tukuna vua o nona dairekita ni o koya duadua ga eratou vinakata. Sa oti qo e 20 na yabaki nona painia tudei tiko o Lorretta. A kaya ni rawa ga ni vinaka nona vakatulewa baleta ni lalawataka me muria na ‘ivakasala vuku,’ oya me salavata kei na ivakasala ena iVolatabu. E vakadinadinataka o Lorreta ni sa qai dei ga nodrau veiwekani kei Jiova qai marau ni vukei ira e levu mera mai kila na ka dina ena iVolatabu.

E bibi dina ena bula ni vuvale na ‘ivakasala vuku.’ Nodra susugi na gone e ka ni dua na gauna balavu, ena tara gona na nodratou bula na lewenivuvale na vakatulewataki ni veika vakayago kei na veika vakayalo. (Vkai. 22:6) Me kena ivakaraitaki, era na rairai taroga na itubutubu lotu vaKarisito: ‘Vakacava na veika keirau veitalanoataka kei na ka keirau cakava, eratou sa vulica tiko kina na gone na itovo vakayalo ena yaga vei ratou ni ratou sa qase? Vakacava eratou sa raica tiko ni keitou bula rawarawa ga qai vakaliuca na cakacaka vakaitalatala?’​—1 Tim. 6:6-10, 18, 19.

Na rawaka dina e sega ni vakatau ena iyau kei na bula vinaka me vaka era qara tu e levu nikua. E kila qori o Tui Solomoni. A uqeti me vola: “Ni ra na vinaka ko ira era sa rerevaka na Kalou, ko ira era sa rere e matana.” (Dauv. 8:12) Qori na ivakadinadina ni uasivi duadua ga me qarai na ‘ivakasala vuku’ e yavutaki qai salavata kei na Vosa ni Kalou.​—2 Tim. 3:16, 17.

[iYaloyalo ena tabana e 30]

E laurai levu na kavetani, qori e dusia ni bibi na nona itavi ni vakatauvatani kei ira na vo ni kaiwaqa

[Credit Line]

Su concessione del Ministero per i Beni e le Attività Culturali. Me kua ni tabaki se lavetaki na iyaloyalo qo.