LESONI 36

Meda Daudina ena ka Kece

iLavelave e Tabaki

Eda dau vinakata mera daudina na noda itokani. E namaka tale ga qori o Jiova vei ira na nona itokani. Ia e sega ni rawarawa meda daudina ena vuravura e levu kina na tamata lasulasu. Na cava na yaga ni noda daudina ena ka kece?

1. Na cava e bibi kina meda daudina?

Nida daudina, eda vakaraitaka vei Jiova nida lomani koya, eda dokai koya tale ga. Nanuma tiko: O Jiova e kila vinaka na ka kece eda vakasamataka qai cakava. (Iperiu 4:13) E kila vinaka nida vakatulewataka meda daudina, e marautaka qori. E kaya na nona Vosa: “Ni sevaka o Jiova na tamata lawakica, ia e veitokani voleka kei ira na yalododonu.”—Vosa Vakaibalebale 3:32.

2. Na cava eso na sala meda daudina kina e veisiga?

E vinakata o Jiova meda “dui tukuna na ka dina.” (Sakaraia 8:16, 17) Na cava na kena ibalebale? Nida vosa tiko vei ira noda vuvale, ira eda cakacaka vata, ira na tacida, se vakailesilesi vakamatanitu, meda kua ni lasu se solia na itukutuku veivakacalai. O ira na daudina era sega ni daubutako se lawaki. (Wilika Vosa Vakaibalebale 24:28 kei na Efeso 4:28.) Era sauma tale ga na ivakacavacava kece. (Roma 13:5-7) Qori na sala eda na ‘dina kina ena ka kece.’—Iperiu 13:18.

3. Na cava na yaga ni daudina?

Ni kilai nida daudina, eda na nuitaki. Ena taqomaki kina na ivavakoso, vaka e dua na vuvale dau veilomani. Eda na marautaka na lewaeloma savasava. Na noda daudina ena vakacaucautaki tale ga kina na “ivakavuvuli ni noda iVakabula na Kalou, ena ka kece ga.”—Taito 2:10.

VAKEKELI

Dikeva na rai i Jiova ni o daudina kei na kena yaga vei iko, qai vulica na sala mo daudina kina ena ituvaki o sotava.

4. E marautaka o Jiova na daudina

Wilika Same 44:21 kei na Malakai 3:16, qai veivosakitaka na taro qo:

Na cava e ka vakayalomatua kina meda kua ni vunitaka na ka dina?
Na cava na rai i Jiova ni o tukuna na ka dina ke dredre mada ga ni o cakava?

E tekiduru tiko e dua na tama qai vosa tiko vua o luvena. E tasova na mena wainimoli ena yasa ni desi. — Nira daudina na gone, era na marau na nodra itubutubu. Nida daudina, ena marau o Jiova

5. Mo daudina ena veigauna kece

E levu era vakabauta ni sega ni bibi meda daudina. Ia dikeva mada na vuna meda daudina kina ena veigauna. Sarava na VIDIO.

VIDIO: Na Cava e Vakavu Marau?—Me Savasava Noda Lewaeloma (2:32)

Na iyaloyalo mai na vidio ‘Na Cava e Vakavu Marau?—Savasava ni Lewaeloma.’ Ni tukuna oti o Peni vei nona boso ni cakava e dua na cala levu, erau lululu sara.

Wilika Iperiu 13:18, qai veivosakitaka na sala meda daudina kina . . .

vei ira noda vuvale.
e vanua ni cakacaka se koronivuli.
ena so tale na ituvaki.

6. E yaga meda daudina

Nida saga meda daudina, ena rawa ni basika eso na leqa. Ia qori na ka vinaka duadua meda cakava. Wilika Same 34:12-16, qai veivosakitaka na taro qo:

Ena yaga vakacava vei iko na daudina?

A. Rau veitalanoa tiko e dua na veiwatini ni rau gunu kofi.

B. E dua na boso e vakacaucautaka tiko nona tamata cakacaka.

Ni rau daudina na veiwatini, ena qaqaco nodrau bula vakawati
Nira daudina na tamata cakacaka, era na nuitaki vei nodra boso
Nira daudina na lewenivanua, ena vinaka na kedra irogorogo vei ira na vakailesilesi vakamatanitu

KA ERA KAYA ESO: “Qori e lasu lailai ga, e sega tu ni dua na ka.”