E Dodonu Beka Mo Veivala?

O KILAI ira beka e so na gonetagane se goneyalewa e voravora na nodra ivakarau?— O vinakata mo veimaliwai kei ira? Se o vinakata cake mo maliwai koya e yalololoma qai vinakata meda dau veivinakati?— E kaya na Qasenivuli Levu: “Sa kalougata ko ira era dau sasagataka na veivinakati, ni ra na vakatokai me ra luve ni Kalou.”​—Maciu 5:9, VV.

Ia so na gauna era vakacudrui keda e so. E dina beka oya?— Eda dau via sauma sara ga na ka era cakava. E yaco tale ga na ka vaka oqori vei iratou na tisaipeli i Jisu ni ratou lako tiko i Jerusalemi. Meu talanoataka mada vei iko.

Ena nodratou ilakolako oqo e qai talai iratou e so na nona tisaipeli o Jisu ina dua na nodra koro na kai Samaria me ratou lai vaqara rawa tiko mai e dua na vanua me ratou vakacegu kina. Ia era sega ni vinakati iratou na koro oya baleta ni dua tani na nodra lotu na kai Samaria. Era sega ni dau ciqomi ira na lako ina koro o Jerusalemi mera lai sokalou kina.

Ke caka vei iko oya, na cava o na cakava? O na cudru beka? O na via sauma na ca era cakava oya?— Oqori sara ga na ka erau via cakava na tisaipeli o Jemesa kei Joni. Rau kaya vei Jisu: ‘O ni vinakata me keirau kaciva na buka waqa mai lomalagi me vakamai ira?’ Sa rauta me vakatokai rau o Jisu me rau Luve ni Kurukuru! Ia e tukuna vei rau o Jisu ni sega ni dodonu me rau cakava na ka oya.​—Luke 9:51-56; Marika 3:17.

So na tamata era dau cakava vei keda na ka e sega ni dodonu. So na gone era sega ni vinakata meda qito kei ira. E rawa sara ga mera kaya: “Lako tani, keitou sega ni taleitaki iko.” Eda rarawa ni tukuni vei keda na vosa vaka oya, se vakaevei? Eda na dau via sauma sara ga. Ia e dodonu beka oya?—

Kauta mada mai na nomu iVolatabu. Daru cega mada na Vosa Vakaibalebale wase 24, tikina e 29. E kaya: “Kakua ni ko kaya, me vaka na nonai valavala vei au, ka’u na kitaka vakakina vua; ka’u na sauma vua na tamata ko ya me vaka na nona cakacaka.”

Na cava e kena ibalebale na vosa oqo?— Meda kua ni sauma na ca. Meda kua ni cakava na ka e ca vua e dua ke cakava vei keda na ka ca. Ia vakacava ke dua e via veivala kei iko? De rulaki iko. De dredrevaki iko qai tukuna ni o ravarava. Vakacava ke tukuna ni o dadatuvu? Na cava e dodonu mo cakava? E dodonu beka mo drau sa veivala?—

Daru raica tale mada na ka e kaya na iVolatabu. Cega mada na Maciu wase 5, tikina e 39. E kaya kina o Jisu: “Dou kakua ni veisausaumitaka na ca: ia kevaka e dua sa sabica na balumu i matau, golea talega vua na kenai karua.” Na cava o nanuma e kaya tiko o Jisu? E kaya beka ni kevaka e dua e sabica e dua na yasa ni balumu, e dodonu mo solia tale ga na yasana kadua?—

Sega, e sega ni kaya tiko o Jisu oqori. Na isaba e sega ni vaka na ivacu. E vaka beka ga ni o biligi mo vakacudrui. E rawa ni biligi keda e dua meda veivala. Kevaka eda cudru tale ga da qai biligi ira, na cava ena yaco?— De dua eda na tini veivala.

Ia e sega ni vinakata o Jisu mera veivala na nona imuri. Oya na vuna e kaya kina ni kevaka e dua e sabici keda, meda kua ni sabici koya lesu. Meda kua ni cudru da qai veivala. Ia kevaka eda veivala, eda sega ni duidui kei koya e vakavuna meda veivala.

Ke o vakacudrui, na cava o nanuma e vinaka mo cakava?— Lako tani. De dua o na laubili tale tiko vakavica. Ia de sa na oti tale ga e kea. Ke o vakanadakui koya, e sega ni kena ibalebale oya ni o malumalumu. O kaukaua ga baleta ni o dei tiko ina veika e dodonu.

Ia vakacava ke o veivala o qai vakamalumalumutaki koya? Na cava e rawa ni yaco?— Ena rawa ni kauti ira mai na nona ilala o koya o vakamalumalumutaka. E rawa nira buturaki iko nira vakayagataka na kau se na isele. O sa raica na vuna e sega ni vinakata kina o Jisu mo veivala?​—

Ke rau veivala tiko e rua, na cava meda cakava? E dodonu beka meda tovaka e dua?— E tukuna vei keda na iVolatabu na ka meda cakava. Cega mada na Vosa Vakaibalebale wase 26, tikina e 17. E kaya: “O koya sa lako voli tu, ka leleca me nona na nodra veileti na tani, sa vaka e dua sa taura na daligana e dua na koli.”

Na cava ena yaco ke o dreta na daliga ruarua ni koli? Ena cudru na koli, ena via kati iko, se vakaevei? Na kaukaua ga ni nona moqe kei na kaukaua ni nomu dreta tiko na daligana, na levu tale ga ni nona cudru. Ke o sereki koya, ena rairai kati iko sara ga. Ena rawa beka mo dreta tu ga na daligana?—

Oqori na mataqali leqa eda na sotava kevaka eda lai veitovaki ena nodra veivala e so. Eda rairai sega ni kila se o cei e vakavuna na veivala se na cava era valataka. De vakamavoataki tiko beka e dua, ia e rairai butakoca mai e dua na ka. Ke da vukei koya, eda sa vukea tiko na daubutako. Ena cala oya, se vakaevei?

Na cava gona mo cakava ke o raica na veivala?​— Ke yaco e koronivuli, cici mo lai tukuna vei qasenivuli. Ke sega ni yaco mai koronivuli, tukuna vei rau na nomu itubutubu se dua na ovisa. Io, ke ra via veivala mada ga e so, meda kua o keda.

Era na saga vakaukaua na tisaipeli dina i Jisu mera kua ni veivala. Oqo na sala eda vakaraitaka kina nida via cakava dina na veika e dodonu. E kaya na iVolatabu ni ‘sega ni dodonu me dauveivala,’ na tisaipeli i Jisu, ‘ia me yalovinaka ga vei ira na tamata kece ga.’​—2 Timoci 2:24, VV.