Ra iTabagone​—Me Kua ni Seavu Nomuni Qaravi Jiova

“Mo nanumi koya ka Buli iko ni ko sa cauravou tiko.”​—DAUV. 12:1.

1. Era sureti ena cava na gone e Isireli?

RAUTA na 3,500 na yabaki sa oti, e vakarota o Mosese na parofita i Jiova vei ira na bete kei ira na qase e Isireli: “Ni vakasoqoni ira na tamata, na tagane kei na yalewa, kei na gone lalai, . . . , me ra rogoca, ka me ra vuli kina, ka rerevaki Jiova na nomuni Kalou, ka vakabauta me ra cakava na vosa kecega ni vunau oqo.” (Vkru. 31:12) Raica mada o cei e vakaroti mera soqoni vata mera sokalou: o ira na tagane, yalewa, kei ira na lalai. Io, era vakaroti tale ga na gone mera rogoca, vuli, ra qai muria na veidusimaki i Jiova.

2. E kauaitaki ira vakacava na itabagone o Jiova ena ivavakoso vaKarisito taumada?

² Ena imatai ni senitiuri, a vakaraitaka tiko ga o Jiova nona kauaitaki ira na itabagone era qaravi koya. Kena ivakaraitaki, a uqeti vaKalou na yapositolo o Paula me okata ena nona ivola vei ira na ivavakoso na idusidusi e baleti ira sara ga na itabagone. (Wilika Efeso 6:1; Kolosa 3:20.) Era toso vakayalo na itabagone era muria na idusidusi qo nira vakavinavinakataka na nona loloma na Tamadra vakalomalagi ra qai vakalougatataki tale ga.

3. Era vakaraitaka vakacava na itabagone nikua ni sega ni seavu nodra qarava na Kalou?

³ Vakacava o ira na itabagone lotu vaKarisito nikua, era sureti tale ga mera dau soqoni vata mera qaravi Jiova? Io! Era marautaka kece na dauveiqaravi ni Kalou nodra muria tiko e levu na itabagone na vosa i Paula: “Meda dau veinanumi, meda veivakauqeti, meda veilomani, meda caka vinaka tale ga, meda kua ni vakawaletaka na soqoni me vaka e nodra ivalavala eso, ia meda veivakayaloqaqataki, vakabibi nida raica ni sa voleka mai na siga.” (Iper. 10:​24, 25) E levu na gone era tomani ira nodra itubutubu ena vunautaki ni itukutuku vinaka ni Matanitu ni Kalou. (Maciu 24:14) Ena nodra lomani Jiova, e vica vata na udolu na itabagone era papitaiso e veiyabaki ra qai marautaka na veivakalougatataki ena nodra tisaipeli i Karisito.​—Maciu 16:24; Mari. 10:​29, 30.

Ciqoma Sara ga Qo na Veisureti

4. Gauna cava mera ciqoma kina na itabagone na veisureti mera qarava na Kalou?

⁴ E tukuna na Dauvunau 12:1: “Mo nanumi koya ka Buli iko ni ko sa cauravou tiko.” Ke o itabagone, mo yabaki vica mo qai ciqoma na veisureti i Jiova mo qaravi koya? E sega ni tukuni ena iVolatabu na yabaki ni bula mo qaravi Jiova kina. Koya gona, kua ni tu suka mo nanuma ni o na sega ni rawa ni talairawarawa vei Jiova se qaravi koya ni o se rui gone. Se mani o yabaki vica, o uqeti mo ciqoma sara ga qo na veisureti i Jiova.

5. E rawa vakacava nira vukei luvedra na itubutubu mera toso vakayalo?

⁵ Levu vei kemuni a veivuke e dua se o rau ruarua nomuni itubutubu moni toso kina vakayalo. Oni tautauvata sara ga kei Timoci ena gauna vakaivolatabu. Ena gauna se gonedramidrami kina, a vakavulici koya ena iVolatabu o tinana o Unaisi kei na buna o Loi. (2 Tim. 3:​14, 15) De dua rau tuberi iko tale ga nomu itubutubu ena sala vata ga ya ena nodrau vakavulici iko ena iVolatabu, dou masu vata, gole ina soqoni kei na soqo lelevu era soqo kina na dauveiqaravi ni Kalou, kei na nomudou veitomani ena cakacaka vakavunau. Koya gona, na nomu vakavulici ena sala i Jiova e itavi bibi duadua e vakacolata o Jiova vei rau nomu itubutubu. O dau vakavinavinakataka nodrau loloma kei na nodrau kauai?​—Vkai. 23:22.

6. (a) Me vaka e cavuti ena Same 110:​3, na ivakarau ni sokalou cava e marautaka o Jiova? (b) Na cava eda na veivosakitaka?

⁶ Ni o sa qase cake, e vinakata o Jiova mo ‘vakadinata ni vinaka na inaki ni Kalou, e totoka, qai uasivi’ me vaka ga a cakava o Timoci. (Roma 12:2) Ni o cakava qori, o na vakaitavi ena cakacaka ni ivavakoso, o sega ni cakava qo nirau vinakata nomu itubutubu, ia o vinakata ga mo cakava na loma ni Kalou. E marautaka o Jiova ke o qaravi koya mai vu ni lomamu. (Same 110:3) O na vakaraitaka vakacava ni na sega ni seavu nomu qaravi Jiova, o qai muria nona veidusimaki? Ena veivosakitaki e tolu na sala o rawa ni cakava kina qo. Qo na vuli, masu kei na itovo. Meda dikeva yadudua mada.

Veiwekani kei Jiova

7. E ivakaraitaki vinaka vakacava o Jisu ni dua na gonevuli ni iVolatabu, a cakava rawa vakacava qo?

⁷ Na imatai ni ikalawa o na vakaraitaka kina ni sega ni seavu nomu qaravi Jiova, oya nomu wilika e veisiga na iVolatabu. Ni o wilika vakawasoma na Vosa ni Kalou, o na gadreva mo volekata na Kalou, o na kila tale ga na iVolatabu. (Maciu 5:3) E ivakaraitaki vinaka eke o Jisu. Donuya na gauna e yabaki 12 kina, rau kunei koya nona itubutubu ena valenisoro, “ni dabe tiko ena kedra maliwa na ivakavuvuli. E vakarogoci ira e vakatarogi ira tale ga.” (Luke 2:​44-46) Ni se gone o Jisu, e dau taleitaka na iVolatabu qai gu na lomana me kila. A cakava rawa vakacava qo? Erau veivuke sara kina vakalevu o Meri na tinana, kei na tamana vakacabecabe o Josefa. Ni rau dauveiqaravi ni Kalou, rau vakavulici Jisu me baleta na Kalou ni se gonedramidrami.​—Maciu 1:​18-20; Luke 2:​41, 51.

8. (a) Mera tekivu bucina ena gauna cava na itubutubu vei luvedra mera taleitaka na Vosa ni Kalou? (b) Tukuna e dua na ivakaraitaki ena yaga ni nodra tuberi na gone nira se gonedramidrami.

⁸ Nikua tale ga, era kila na itubutubu daurerevaka na Kalou ni bibi me bucini e lomadra na gone nira se gonedramidrami mera taleitaka na ka dina vakaivolatabu. (Vkru. 6:​6-9) Qori na ka e cakava o Rubi e dua na tacida yalewa, ni sucu oti ga na imatai ni luvena tagane o Joseph. E wilika vua e veisiga na iTalanoa Mai na iVolatabu. Ni tubu cake tiko, a vukei koya o tinana me wiligusutaka eso na tikinivolatabu. A yaga beka vei Joseph na veituberi qo? Ena gauna e kilavosa kina, a rawa ni vakamacalataka ena nona vosa ga eso na italanoa vakaivolatabu. Ni yabaki lima, a vakaitavi ena imatai ni gauna ena Koronivuli ni Vuli Vunau.

9. Na cava e rui bibi kina mo wilika na iVolatabu, o qai vakasamataka vakabibi na ka o wilika?

⁹ Mo toso vinaka vakayalo, e dodonu me ivakarau ni nomu bula taucoko na wiliki ni iVolatabu e veisiga. (Same 71:17) Ena yaga vakacava na wili iVolatabu ena nomu toso vakayalo? Nanuma na ka e tukuna o Jisu ena nona masu vei Tamana: “Ena rawata na bula tawamudu o koya e vulica tiko ga na veika e baleti kemuni na Kalou dina duadua ga.” (Joni 17:3) Ni levu na ka o kila me baleti Jiova, o na kilai koya vinaka qai titobu nomu lomani koya. (Iper. 11:27) Ni o wilika e dua na wase ni iVolatabu, vakayagataka na gauna qori mo kila kina e levu tale na ka me baleti Jiova. Tarogi iko: ‘Na cava e tukuna vei au na tikinivolatabu qo me baleti Jiova? E vakaraitaka vakacava na tikinivolatabu qo nona lomani au kei na nona kauaitaki au na Kalou?’ Ni o dau vakananuma na taro va qori, o na kila na nanuma i Jiova, nona rai, kei na lomana. (Wilika Vosa Vakaibalebale 2:​1-5.) Me vakataki Timoci ga, o na “vakabauta” na ka o vulica mai na iVolatabu “ena gauna e vakadeitaki kina vei iko,” ena uqeti iko mo qaravi Jiova mai vu ni lomamu.​—2 Tim. 3:14.

Kua ni Seavu Nomu Qaravi Jiova ena Nomu Masu

10, 11. E yaga vakacava na masu me kua ni seavu kina nomu qarava na Kalou?

¹⁰ Na ikarua ni sala ena sega ni seavu kina nomu qaravi Jiova, oya nomu masu. Eda wilika ena Same 65:2: “Oi kemuni sa daurogoca na masu, ena toro mai vei kemuni na tamata kecega.” Donuya na gauna era veiyalayalati kina kei na Kalou na Isireli, a rawa tale ga nira torovi Jiova ena masu o ira na kaitani era gole ena nona valenisoro. (1 Tui 8:​41, 42) E sega ni veivakaduiduitaki na Kalou. O ira era muria nona ivunau mera nuidei ni na rogoci ira o koya. (Vkai. 15:8) Ni tukuni na “tamata kecega,” oni wili tale ga kina ra itabagone.

¹¹ Macala ga ni o kila ni yavu ni veitokani vinaka, na veivosaki vinaka. Rairai o dau taleitaka mo tukuna vua na nomu itokani voleka na nomu nanuma kei na ka o leqataka​—o talaucaka sara ga na lomamu vua. E tautauvata vinaka ni o masu mai vu ni lomamu, nomu veivosaki kei na Dauveibuli Cecere. (Fpai. 4:​6, 7) Mo vosa vei Jiova me vaka ga o talaucaka tiko na lomamu vua e dua na itubutubu dauloloma se dua nomu itokani voleka. Erau veisemati vinaka na ivakarau ni nomu masu kei na nomu rai me baleti Jiova. O na vakadinata ni na vakaibalebale cake nomu masu ke dei tiko ga nomu veiwekani kei Jiova.

12. (a) Me vakaibalebale nomu masu, na cava e sega ni bibi ga kina na ka o tukuna? (b) O na kila vakacava ni dau volekati iko o Jiova?

¹² Nanuma tiko me vakaibalebale nomu masu, e sega ni bibi ga na ka o tukuna. E bibi tale ga na ka e tu e lomamu. Ni o masu, vakaraitaka ni o lomani Jiova, o dokai koya dina, o qai nuitaki koya vakatabakidua. Ni o kila na sala ena rogoci kina nomu masu, o na qai kila ni “voleka ko Jiova vei ira kecega era sa masu vua.” (Same 145:18) Io, ena volekati iko o Jiova, ena vakaukauataki iko mo vorata na Tevoro, o qai cakava na ka e dodonu.​—Wilika Jemesa 4:​7, 8.

13. (a) E yaga vakacava vua e dua na tacida yalewa nona veiwekani kei na Kalou? (b) Ena yaga vakacava nomu veiwekani kei na Kalou mo vorata kina na idre ni veimurimuri?

¹³ Raica mada nona vakaukauataki o Cherie ena nona veiwekani voleka kei Jiova. Ena nona vuli tiko ena sekeneri, e vakaicovitaki ni vinaka nona rawaka vakavuli kei na qito. Ni oti nona vuli, e soli vua e dua na sikolasivi ni vuli torocake. “E veitemaki na ka e soli mai ya,” e kaya o Cherie, “era dau uqeti au o ira na dauveivakatavulici ena qito kei na noqu icaba e koronivuli meu ciqoma na sikolasivi qo.” A qai vakasamataka ke sasagataka na vuli torocake, ena taura vakalevu nona gauna na vuli lesoni kei na nona vakavakarau ena qito​—sega ni levu na gauna me vakayagataka vei Jiova. Na cava e qai cakava o Cherie? E tukuna, “Ni’u masu oti vei Jiova, au vakasuka na sikolasivi qai tekivu veiqaravi vakapainia tudei.” Sa lima na yabaki nona veiqaravi voli mai vakapainia. E tukuna: “Au sega sara ga ni veivutunitaka, au marau niu kila ni vakatulewa qo e vakamarautaki Jiova. Ke o vakaliuca na Matanitu ni Kalou, ena soli vei iko na ka kece.”​—Maciu 6:33.

iTovo Vinaka e Vakaraitaka ni o “Yalosavasava”

14. Na cava e bibi kina vei Jiova me vinaka nomu itovo?

¹⁴ Na ikatolu ni sala o na vakaraitaka kina ni sega ni seavu nomu qaravi Jiova, oya nomu itovo. O Jiova e vakalougatataki ira na itabagone e savasava nodra itovo. (Wilika Same 24:​3-5.) O Samuela a sega ni via vakatotomuria na itovo vakasisila rau cakava na luve i Ilai na Bete Levu. A laurai votu na nona itovo vinaka o Samuela. E volatukutukutaka na iVolatabu: “A sa tubu tiko na gone ko Samuela, a sa vinakati koya ko Jiova, kei ira talega na tamata.”​—1 Sam. 2:26.

15. Na cava me vinaka tiko ga kina nomu itovo?

¹⁵ Eda bula tu ena vuravura e levu kina na tamata era dau lomani ira ga, qaciqacia, talaidredre vei ira nodra itubutubu, era sega ni dau vakavinavinaka, era sega ni yalodina, era voravora, dokadoka, era lomana ga na marau era sega ni lomana na Kalou​—qori eso ga na itovo e cavuta o Paula. (2 Tim. 3:​1-5) Nida bula maliwai ira na tamata ca, e sega ni rawarawa meda saga me vinaka tiko ga noda itovo. Ia ni o cakava na ka e dodonu ena nomu sega ni vakaitavi ena ka e sega ni vaKalou, o sa tokoni Jiova sara tiko ga kei na nona veiliutaki cecere. (Jope 2:​3, 4) O na lomavakacegu tale ga ni o kila ni o muria tiko na veivakamasuti i Jiova: “Mo vuku, na luvequ, ka vakamarautaka na lomaqu, me dua na vosa me’u tauca vua sa beitaki au.” (Vkai. 27:11) Koya gona, nomu kila ni na vakadonui iko o Jiova ena uqeti iko tiko ga mo qaravi Jiova.

16. A vakamarautaki Jiova vakacava e dua na tacida yalewa?

¹⁶ O Carol e dua na tacida yalewa, a dei tiko ga ena ivakavuvuli vakaivolatabu ena gauna a se vuli kina, ra qai raica eso na nona itovo vinaka. Na cava e yaco? Era vakalialiai koya nona itokani era vuli vata ni sega ni vakadonuya nona lewaeloma e vakavulici ena iVolatabu, me vakaitavi ena marautaki ni olodei kei na soqo ni boletaki vanua. Ena gauna va qori, a vakamacalataka kina nona vakabauta vei ira tale eso. Ena vica tale na yabaki, a taura o Carol nona ivola e dua erau a vuli vata, a volai kina: “Au vinakata sara tiko ga me daru sota meu vakavinavinakataki iko. A laurai votu nomu itovo vinaka kei na nomu ivakaraitaki vinaka ni dua na lotu vaKarisito kei na nomu doudou ni tutaka na ka o vulica me baleta na olodei. O imatai sara ga ni iVakadinadina i Jiova au sotava.” Na ivakaraitaki i Carol a uqeti koya sara ga nona itokani ya me vulica na iVolatabu. Ena nona ivola vei Carol, a tukuna kina ni sa 40 na yabaki nona dua na iVakadinadina yalayala! Me vakataki Carol ga, nomuni doudou ra itabagone moni tutaka na ivakavuvuli vakaivolatabu ena rawa ni uqeti ira tale ga na yalomalumalumu mera kilai Jiova.

iTabagone Era Vakacaucautaki Jiova

17, 18. (a) O raici ira vakacava na itabagone ena ivavakoso? (b) Era na vakaicovitaki vakacava na itabagone era rerevaka na Kalou?

¹⁷ Eda marautaka kece na tiko ena isoqosoqo i Jiova nodra gugumatua ena sokalou dina na vica vata na udolu na itabagone! E dei nodra qaravi Jiova nira wilika e veisiga na iVolatabu, ra masu qai salavata kei na loma ni Kalou na nodra itovo. O ira na itabagone ivakaraitaki vinaka qo era isakisaki vei ira nodra itubutubu kei ira kece na dauveiqaravi i Jiova.​—Vkai. 23:​24, 25.

¹⁸ Ena gauna se bera mai, o ira na itabagone yalodina era na okati tale ga kei ira era bula yani ena vuravura vou e yalataka tu na Kalou. (Vkta. 7:​9, 14) Era na vakalougatataki vakalevu ena nodra vakavinavinaka tiko ga vei Jiova, ra qai vakacaucautaki koya me tawamudu.​—Same 148:​12, 13.

O Rawa ni Vakamacalataka?

• E rawa vakacava nira vakaitavi ena sokalou dina na itabagone?

• Me yaga nomu wili iVolatabu, cava e bibi kina me vakasamataki vakatitobu na ka e wiliki?

• E yaga vakacava na masu mo toro voleka kina vei Jiova?

• Ena yaga vakacava nona itovo vinaka na lotu vaKarisito?

[iYaloyalo ena tabana e 5]

E ivakarau ni nomu bula mo wili iVolatabu e veisiga?