Na Parofisai me Tauri Vakabibi
“Ena vunautaki mada na itukutuku vinaka ni matanitu ni Kalou ena veiyasa i vuravura me ivakadinadina ina veimatanitu kece, sa na qai yaco na icavacava.” —MACIU 24:14.
ERA duavata e levu na vuku ni qo e dua na tikinivolatabu e bibi dina. Na vuna, ni cakacaka qo ena kovuta na vuravura taucoko. E bibi tale ga ni dusia na cakacaka e dodonu mera cakava na lotu vaKarisito, mera vunautaka taumada na itukutuku, qai yaco na ka vakatubuqoroqoro e vakatoka o Jisu me “icavacava.”
Na parofisai qori sa vakayacori tiko nikua. O okati tale ga kina, ni itukutuku vinaka qo e baleta na veisureti kei na veivakaroti. E nomu na digidigi, o na tokona na Matanitu ni Kalou se o na saqata. Na nomu vakatulewa ena tara sara ga na nomu bula.
Dikeva mada na ka a yaco. Ni vo e vica na siga me mate o Jisu era tarogi koya na nona tisaipeli se cava ena yaco ena veigauna se bera mai. Eratou via kila na tauyavu ni Matanitu ni Kalou e dau vunautaka vakalevu o Jisu. Eratou via kila tale ga na “ivakataotioti ni veika vakavuravura,” se “nai vakataotioti kei vuravura” e vakadewataki ena Ai Vola Tabu.—Maciu 24:3.
A sauma o Jisu ni parofisaitaka ni na levu na ivalu ena veivanua, leqa ni kakana, tauvimate, kei na uneune lelevu. E tukuna tale ga ni na tubu na ivalavala tawadodonu, era na veivakacalai e levu na iliuliu ni lotu, kei na nodra vakacacani na lotu vaKarisito dina. Era itukutuku rarawataki kece.—Maciu 24:4-13; Luke 21:11.
Ia e tiko na itukutuku vinaka. A vakamacalataka tarava o Jisu na vosa e lavetaki toka ena ulutaga e cake. Na vosa qori era vakasamataka vakatitobu, ra nuitaka qai uqeti ira ena gauna oya vaka kina nikua. Era duavata e levu ni rui bibi na vosa i Jisu, ia era veibataka na kena ibalebale. Na cava sara mada na itukutuku vinaka? Na cava na Matanitu ni Kalou? Ena vakayacori e naica na parofisai qo? O cei era na vakaitavi kina? Na cava “na icavacava”? Meda dikeva mada.
[iYaloyalo ena tabana e 2]
iLavelave ni Washington Manuscript ni va na Kosipeli. E volai ena matanivola kata na Maciu 24:14
[Credit Line]
From the book Facsimile of the Washington Manuscript of the Four Gospels in the Freer Collection 1912