iTavi ni Yalo Tabu ena Vakayacori ni iNaki i Jiova

“Na noqu vosa ka’u sa vosataka yani . . . ka daucaka yaco e na ka ka’u a tala kina.”​—AISEA 55:11.

1. Vakamacalataka na duidui ni lalawa kei na inaki.

E RUA na turaga rau dui vakavakarau tiko me rau draiva ena dua na vanua. E dua e lalawataka vakamatailalai na nona ilakolako. Dua tale e sega ni cakava ya ni sa matata tu vua na vanua me gole kina, qai kila tale ga e levu na sala me muria. E tu vakarau tale ga me veisautaka na sala e muria ke yaco eso na ka tawanamaki. Na iwalewale rau dui vakayagataka na turaga qo e vakaraitaka vakamatata na duidui ni lalawa kei na inaki. Na lalawa e rawa ni vakatauvatani ena nomu via kila vakamatailalai na ka, ia na inaki e okati kina nomu kila vinaka na ka o via cakava, qai levu na sala o na cakava kina.

2, 3. (a) Na cava e okati ena inaki i Jiova, cava a cakava o Jiova nirau valavala ca o Atama kei Ivi? (b) Na cava meda kila vinaka kina na inaki i Jiova?

² O Jiova e sega ni dau lalawa, ia e tiko nona inaki, e dau vakayacori ni toso na gauna. (Efeso 3:11) E okati ena nona inaki taumada me baleti keda kei na vuravura​—me vukici na vuravura qo me parataisi era bula kina na tamata uasivi, ra bula veiyaloni qai mamarau. (Vkte. 1:28) A veisautaka o Jiova nona ituvatuva nirau talaidredre o Atama kei Ivi, me vakayacori tiko ga kina nona inaki. (Wilika Vakatekivu 3:15.) A vakadeitaka kina o Jiova ni na vakasucuma na watina vakaivakatakarakara e dua na “kawa” se Luvena me vakarusai Setani e vakavuna tiko na ca, qai vaqeavutaka na nona cakacaka kece.​—Iper. 2:14; 1 Joni 3:8.

³ E sega ni dua e lomalagi se vuravura ena tarova na ka e nakita na Kalou me na vakayacora. (Aisea 46:​9-11) Cava na vuna? Baleta ni cakacaka tiko kina na yalo tabu i Jiova. Na igu kaukaua qo e vakadeitaka ni na “yaco” na inaki ni Kalou. (Aisea 55:​10, 11) E bibi meda kila vinaka na kena vakatakilai tiko mai na inaki ni Kalou, baleta na noda bula ena gauna se bera mai e vakatau sara ga ena kena vakayacori. Nona vakayagataka tale ga o Jiova na yalona tabu e vaqaqacotaka noda vakabauta. Meda raica mada na itavi ni yalo tabu ena vakayacori ni inaki ni Kalou​—ena gauna makawa, ena gauna qo, kei na gauna se bera mai.

iTavi ni Yalo Tabu ena Gauna Makawa

4. E vakaraitaka vakalalai vakacava o Jiova na nona inaki?

⁴ A dau vakatakila vakalalai o Jiova na nona inaki ena gauna vakaivolatabu. Na kena kilai na Kawa yalataki a “ka vuni tabu” tu eliu. (1 Kor. 2:7) Ia rauta e 2,000 na yabaki e tarava, a tukuna tale kina o Jiova e dua na ka me baleta na kawa. (Wilika Vakatekivu 12:7; 22:​15-18.) Qori na yalayala a tukuna vei Eparama ena vakayacori raraba. E kilai ena vosa “e na nomu kawa,” ni na basika mai vakatamata na Kawa yalataki, ena basika mai na yatukawa i Eparama. Eda kila tale ga ni a kauai sara vakalevu o Setani ena kena vakatakilai qo. E sega ni vakabekataki ni o koya na Meca levu qo e vinakata me vakarusa na iyatukawa i Eparama me tarova na vakayacori ni inaki ni Kalou. Ia ena sega ni rawarawa na sasaga qo, baleta ni cakacaka tiko na yalo tabu ni Kalou. Ena sala cava?

5, 6. E vakayagataka vakacava o Jiova na yalona tabu me taqomaka na iyatukawa ena basika kina na Kawa?

⁵ E vakayagataka o Jiova na yalona tabu me taqomaka na iyatukawa ena basika kina na Kawa. E tukuna kina o Jiova vei Eparama: “Koi au na nomui sasabai.” (Vkte. 15:1) E dina sara ga na vosa qo. Vakasamataka mada na ka a yaco rauta na 1919 B.S.K. ena nodrau a lai vakaitikotiko vakalailai o Eparama kei Sera e Kira. A sega ni kila o Apimeleki na tui Kira ni o Sera e wati Eparama, mani kauti Sera me lai watina. A vakavuna beka qori o Setani me kua ni vakasucuma kina o Sera na kawa i Eparama? E sega ni tukuni qori ena iVolatabu. Ia e tukuna ni a qai cakava kina e dua na ka o Jiova. Qori ena nona vakasalataki Apimeleki ena dua na tadra me kua ni tarai Sera.​—Vkte. 20:​1-18.

⁶ E sega ni taqomaki rau ga ena gauna qori o Jiova. A dau vakabulai Eparama kei na nona matavuvale ena levu tale na ituvaki. (Vkte. 12:​14-20; 14:​13-20; 26:​26-29) E tukuna kina na daunisame me baleti Eparama kei ira na nona kawa: “Sa sega ni laiva [o Jiova] e dua na tamata me vakasaurarataki ira: Ia sa vunauci ira na tui e na vukudra; A sa kaya ko koya, Dou kakua ni tarai ira ka’u sa lumuta, Ia dou kakua ni vakacacani ira na noqu parofita.”​—Same 105:​14, 15.

7. A taqomaka vakacava o Jiova na matanitu o Isireli?

⁷ Na yalo tabu i Jiova a taqomaka na matanitu o Isireli ni na basika kina na Kawa yalataki. A veidusimaki na yalona tabu ena Lawa a soli vei ira na Isireli, baleta e vauci tiko kina na sokalou dina, e taqomaki ira tale ga mai na duka vakayalo, vakayago, kei na itovo dukadukali. (Lako 31:18; 2 Kor. 3:3) Ena nodra gauna na Dauveilewai, na yalo tabu a vakaukauataka eso na tagane mera vakabulai kina na Isireli vei ira nodra meca. (Dvei. 3:​9, 10) Ena veisenitiuri me yacova nona sucu o Karisito, o koya na tiki bibi ni kawa i Eparama, a rairai veitaqomaki na yalo tabu e Jerusalemi, Peceliema, kei na valenisoro​—qo na vanua era na vakayacori kina na parofisai me baleti Jisu.

8. Eda kila vakacava ni a veidusimaki na yalo tabu ena bula kei na cakacaka vakaitalatala ni Luve ni Kalou?

⁸ Na yalo tabu a dusimaki Jisu ena nona bula taucoko vaka kina nona cakacaka vakaitalatala. A sega ni se taratagane o Meri, na ka a cakava na yalo tabu ena nona katonigone a se bera vakadua ni yaco. E ivalavala ca o Meri, ia ena kunekunetaka qai vakasucuma e dua na Luvena e uasivi, qai sega ni dodonu me totogi mate. (Luke 1:​26-31, 34, 35) A taqomaki Jisu tiko na yalo tabu ni se gone me kua ni mate dole. (Maciu 2:​7, 8, 12, 13) Ena gauna sa voleka ni yabaki 30 kina o Jisu, a lumuti koya na Kalou ena yalo tabu, solia vua na idabedabe vakatui i Tevita, lesi koya tale ga me vunau. (Luke 1:​32, 33; 4:​16-21) Na yalo tabu a vakaukauataki Jisu me cakamana, wili kina nona vakabulai ira na tauvimate, vakani ira na lewevuqa, vakaturi ira tale ga na mate. Na veika e cakava qo o Jisu e ivakaraitaki lailai wale ga ni veivakalougatataki eda rawa ni namaka ena gauna ena veiliutaki kina vakatui.

9, 10. (a) E kilai vakacava ni cakacaka na yalo tabu vei ratou na tisaipeli i Jisu ena imatai ni senitiuri? (b) Na veisau cava a yaco ena vakayacori ni inaki ni Kalou ena imatai ni senitiuri S.K.?

⁹ Tekivu ena Penitiko 33 S.K., a vakayagataka o Jiova na yalona tabu me lumuti kina na ikarua ni wase ni kawa i Eparama, e levu vei ira qori era sega ni kawa i Eparama. (Roma 8:​15-17; Kala. 3:29) E vakadinadinataki sara ga na cakacaka ni yalo tabu vei ratou na tisaipeli i Jisu ena imatai ni senitiuri, eratou vunau kina ena gugumatua ratou qai vakaukauataki me ratou cakava e levu na cakamana. (Caka. 1:8; 2:​1-4; 1 Kor. 12:​7-11) E vakaraitaka na yalo tabu ena isolisoli ni cakamana qori e dua tale na ka vakasakiti me baleta na sala ena cakava kina o Jiova nona inaki. Sa sega ni vakayagataka tale tiko o Jiova na ituvatuva ni sokalou ena senitiuri makawa, a dau vakayacori tu e liu ena valenisoro e Jerusalemi. Sa veitokoni ga o koya ena ivavakoso vaKarisito vou. Me tekivu mai na gauna ya, sa vakayagataka tiko o Jiova na ivavakoso lumuti me cakava nona inaki.

¹⁰ E vica mada ga na sala e vakayagataka kina o Jiova nona yalo tabu ena gauna vakaivolatabu, ya me veitaqomaki, veivakaukauataki qai veilumuti. A caka qori me vakayacori dina kina nona inaki. Vakacava nikua? E vakayagataka tiko vakacava o Jiova na yalona tabu me salavata kei na nona inaki? E vinaka meda kila baleta nida na via cakacaka vata kei na yalo tabu. Meda veivosakitaka mada e va na sala e vakayagataka kina o Jiova na yalona tabu nikua.

iTavi ni Yalo Tabu Nikua

11. Na cava e vakaraitaka ni yalo tabu e vakasavasavataki ira na tamata ni Kalou, o na vakaraitaka vakacava ni o tokona tiko na veidusimaki ni yalo tabu?

¹¹ Kena imatai, na yalo tabu e uqeti ira na tamata ni Kalou mera savasava. O ira era vakaitavi tiko ena vakayacori ni inaki i Jiova e dodonu me savasava nodra ivalavala. (Wilika 1 Korinica 6:​9-11.) Eso era dau cakava tu eso na ivalavala tawakilikili me vaka na veidauci, veibutakoci, kei na veimoceri vakamataqali vata, ia era yaco mera lotu vaKarisito dina. E rawa ni dau kaukaua dina na gagadre me vakayacori kina na valavala ca. (Jeme. 1:​14, 15) Ia nodra “sa vakasavasavataki” eso, e vakaraitaka nira sa cakava na veiveisau ena nodra bula mera vakamarautaka kina na Kalou. E rawa ni vorata vakacava na gagadre ca e dua e lomana na Kalou? E tukuna na 1 Korinica 6: 11 ni vakavuna qo “na yalo tabu ni Kalou.” Ni savasava tiko ga nomu ivalavala, o vakaraitaka kina ni sa dusimaki iko tiko na yalo tabu.

12. (a) Me vaka e laurai ena raivotu i Isikeli, e dusimaka tiko vakacava nona isoqosoqo o Jiova? (b) O na vakaraitaka vakacava ni o cakacaka vata tiko kei na yalo tabu?

¹² Kena ikarua, o Jiova e vakayagataka na yalona tabu me dusimaka nona isoqosoqo ena sala e vinakata me toso kina. Ena raivotu i Isikeli, e vakatayaloyalotaka na isoqosoqo vakalomalagi i Jiova na qiqi vakalomalagi, e toso tiko ga me vakayacori kina nona inaki. Na cava e dusimaka tiko na qiqi me gole ena vanua e via mua kina ? Na yalo tabu. (Isik. 1:​20, 21) Meda nanuma tiko ni isoqosoqo i Jiova e rua tiko na kena iwasewase, e dua mai lomalagi, dua tale e vuravura. Ke dusimaki ena yalo tabu na kena e tiko mai lomalagi, ena vaka tale ga kina na kena e vuravura. Nomu talairawarawa kei na nomu yalodina ena veidusimaki ni isoqosoqo i Jiova e vuravura, e vakaraitaka ni o toso vata tiko kei na qiqi vakalomalagi i Jiova, o cakacaka vata tale tiko ga kei na nona yalo tabu.​—Iper. 13:17.

13, 14. (a) O cei e okati ena “itabatamata qo” a cavuta o Jisu? (b) Tukuna e dua na ivakaraitaki ni cakacaka tiko na yalo tabu ena kena vakatakilai tiko mai na ka dina ena iVolatabu. (Raica na kato “O Toso Vata Tiko Kei na Rarama e Serau Cake Tiko ga?”)

¹³ Kena ikatolu, e cakacaka tiko na yalo tabu ena kena vakatakilai na rarama ni ka dina ena iVolatabu. (Vkai. 4:18) E dau vakayagataka makawa tu mai “na dauveiqaravi e yalodina e vuku” na mekesini qo, me vakatakila tiko mai kina vakalalai na ka dina ena iVolatabu. (Maciu 24:45) Me kena ivakaraitaki, vakasamataka mada se o cei era wili ena “itabatamata qo” a cavuta o Jisu. (Wilika Maciu 24:​32-34.) Na itabatamata cava a tukuna tiko qo o Jisu? Na ulutaga “Nona Tiko Tawarairai na Karisito​—Cava mo Cakava Kina?” e vakamacalataka ni o Jisu e tukuni ira tiko nona tisaipeli era na vakarau lumuti ena yalo tabu, sega ni o ira na daucaka ca.a O ira na imuri lumuti i Jisu ena imatai ni senitiuri kei ira nikua, era sega ni raica wale ga na ivakatakilakila, ia era kila tale ga na kena ibalebale, vakabibi ‘ni sa voleka, sa tu sara ga e katuba’ o Jisu.

¹⁴ Na cava e kena ibalebale qo vei keda? Eda sega ni kila na dede ni bula ni “itabatamata qo,” ia e bibi meda kila e vica na ka qo me baleta na vosa “itabatamata.” E dau vakaibalebaletaki vei ira na tamata e duidui nodra yabaki ni bula, ia era bulavata ena dua na itabagauna; e sega ni dede sara nodra bulavata qai tiko na kena itinitini. (Lako 1:6) Koya gona, eda na qai kila vakacava na vosa i Jisu me baleta na vosa “na itabatamata qo”? E vakaibalebaletaka tiko o koya na nodra bulavata ena dua na itabagauna na lumuti era a raica na gauna a tekivu kina na ivakatakilakila ena 1914, kei ira na vo ni lumuti era na qai raica na itekitekivu ni veivakararawataki levu. E tiko na itekitekivu ni itabatamata ya, e tiko tale ga na gauna ena cava kina. Na kena vakayacori na veika e okati ena ivakatakilakila, e vakaraitaka vakamatata ni sa voleka na veika rarawa. Nomu raica vakabibi qo o qai yadra tiko ga, e vakaraitaka ni o sa muria voleka sara tiko na veiveisau ni kena vakatakilai tiko mai na ka dina ena iVolatabu, o qai muria tale tiko ga na veidusimaki ni yalo tabu.​—Mari. 13:37.

15. Na cava e vakaraitaka ni yalo tabu e vakaukauataki keda meda kacivaka na itukutuku vinaka?

¹⁵ Kena ikava, na yalo tabu e vakaukauataki keda meda kacivaka na itukutuku vinaka. (Caka. 1:8) E rawa ni vunautaki vakacava na itukutuku vinaka e vuravura raraba? Vakasamataka mada ya. Rairai o dua vei ira na mamadua se rerere, o nanuma kina, ‘Au na sega tu ga ni rawa ni vunau e veivale!’ Ia ena gauna qo o sa gumatua sara tiko ena cakacaka ya.b Levu vei ira na iVakadinadina i Jiova yalodina era vunau tiko ga nira tusaqati se vakacacani. Na yalo tabu duadua ga ni Kalou e rawa ni vakaukauataki keda meda vosota na ituvaki rarawataki, da cakava rawa tale ga eso na ka ena dredre ena noda kaukaua ga. (Maika 3:8; Maciu 17:20) Ni o vakaitavi vakalevu ena cakacaka vakavunau, o vakaraitaka kina ni o sa tokona tiko na yalo tabu.

iTavi ni Yalo Tabu ena Gauna se Bera Mai

16. Na cava eda nuidei kina ni o Jiova ena taqomaki ira nona tamata ena veivakararawataki levu?

¹⁶ E levu na sala vakasakiti ena qai vakayagataka kina o Jiova nona yalo tabu ena dua na gauna se bera mai me vakayacori rawa kina nona inaki. Da raica mada eliu na sala ena veitaqomaki kina. Me vaka sa veivosakitaki oti mai, o Jiova a dau vakayagataka na yalona tabu me taqomaki ira yadudua nona tamata vaka tale ga kina na matanitu o Isireli. Koya gona, eda nuidei ni na vakayagataka tale ga o koya na yalo tabu vata ga ya me taqomaki ira kina nona tamata ena veivakararawataki levu sa roro voleka mai qo. Meda kua gona ni via kila sara vakamatailalai na sala ena taqomaki keda kina o Jiova ena gauna ya. Ia e rawa ni dei noda vakanamata ena gauna se bera mai nida kila ni kauaitaki ira kece nona tamata o Jiova, ena sega tale ga ni bureitaka vei ira na yalona tabu.​—2 Vei. 16:9; Same 139:​7-12.

17. Ena vakayagataka vakacava o Jiova na yalona tabu ena vuravura vou?

¹⁷ Ena vakayagataka vakacava o Jiova na yalona tabu ena vuravura vou sa voleka? Na yalo tabu ena veidusimaki ena kena vakarautaki na ivola vivigi vou ena qai dola ena gauna ya. (Vkta. 20:12) Na cava e tiko ena ivola vivigi qo? Na veika sara ga e vinakata vei keda o Jiova ena loma ni duanaudolu na yabaki. Vakacava o vakanamata tu mo kila na ka e volai ena ivola vivigi ya? Eda nanamaki tu gona vakalevu ena vuravura vou ya. Sa na wacava na totoka ni bula ena gauna ya, ena vakayagataka kina o Jiova na yalona tabu me vakayacora nona inaki me baleta na vuravura kei na kawatamata.

18. Na cava o vakadeitaka mo cakava?

¹⁸ Meda kua ni guilecava ni na vakayacori dina ga na inaki i Jiova, baleta ena vakayagataki kina na yalona tabu, na igu kaukaua duadua e vuravura taucoko. O wili tale tiko ga ena inaki qo. Koya gona, mo vakadeitaka mada ga mo masuta na yalo tabu i Jiova o qai tokona na kena veidusimaki. (Luke 11:13) Ni o cakava qo, o na vakadinadinataka na inaki taumada i Jiova​—mo bula tawamudu ena Parataisi e vuravura.

[iVakamacala e ra]

O se Nanuma Tiko?

• Ena sala cava e vakayagataka kina o Jiova na yalona tabu ena gauna vakaivolatabu, me vakayacori tiko ga kina nona inaki?

• E vakayagataka tiko vakacava o Jiova na yalona tabu nikua?

• Ena vakayagataka vakacava o Jiova na yalona tabu ena gauna se bera mai, me vakayacori kina nona inaki?

[Kato ena tabana e 10]

O Toso Vata Tiko Kei na Rarama e Serau Cake Tiko ga?

E vakatakila tiko ga o Jiova na ka dina ena iVolatabu vei ira nona tamata. Na veiveisau cava e sa tabaki tiko ena Vale ni Vakatawa?

▪ Na ka vinaka cava eda vulica me baleta na toso vakayalo e vakamacalataki ena ivakatautauvata i Jisu me baleta na leveni? (Maciu 13:33)​—15 Julai, 2008, tabana e 19-20.

▪ Ena oti ena gauna cava na nodra kacivi na lotu vaKarisito era nuitaka na bula i lomalagi?​—1 Me, 2007, tabana e 30-31.

▪ Na cava e kena ibalebale meda sokaloutaki Jiova “vakayalo”? (Joni 4:24)​—15 Julai, 2002, tabana e 15.

▪ Na lomanibai cava era veiqaravi tiko kina na isoqosoqo levu? (Vkta. 7:15)​—1 Me, 2002, tabana e 30-31.

▪ Era na tawasei ena gauna cava na sipi kei na me? (Maciu 25:​31-33)​—15 Okotova, 1995, tabana e 18-28.