Lako Me Vakataki Jisu Karisito

“O koya e kaya ni tu vata kei na [Kalou] e dodonu me lako me vakataki koya [o Jisu].”​—1 JONI 2:6, NW.

1, 2. Na cava e okati ena noda raici Jisu matua tiko?

“MEDA ciciva tiko ga na cere e tu e matada,” e vola na yapositolo o Paula, “meda rai matua tiko vua na noda iTini Levu e Dauvakataucokotaka na noda vakabauta, o Jisu.” (Iperiu 12:1, 2, NW) Me qai rawa nida yalodina tiko ga e dodonu meda rai matua tiko vei Jisu Karisito.

² Na vosa taumada e vakadewataki tiko oqo me “rai matua tiko” me vaka e vakayagataki ena iVolatabu Vakirisi Vakarisito, e kena ibalebale “na raica sara ga vakatabakidua na ka,” se “na rai tani mai na ka e raici tiko me rawa kina ni raici e dua tani na ka.” E kaya e dua na ivola: “Na gauna ga e gole tani kina na matana na daucici ni Kirisi mai na vanua e ciciva tiko me golevi ira na sarasara, sa na berabera na nona cici. E vaka kina vei ira na lotu Vakarisito.” Ni rawa ni vakaleqa na noda toso vakayalo na noda vakamuai tani, e dodonu ga meda rai matua tiko vei Jisu Karisito. Na cava meda raica vua na iTini Levu? Na vosa vakirisi e vakadewataki tiko oqo me “itini levu” e kena ibalebale na “iliuliu levu e rawa ni liutaka na ka kece ga, qai ivakaraitaki vinaka tale ga.” O koya gona ena vinakati meda muria na ivakaraitaki i Jisu me rawa kina nida raici koya matua tiko.

3, 4. (a) Na cava e dodonu meda cakava nida lako me vakataki Jisu Karisito? (b) Na taro cava soti meda vakasamataka?

³ E kaya na iVolatabu: “O koya e kaya ni tu vata kei na [Kalou] e dodonu me lako me vakataki koya [o Jisu].” (1 Joni 2:6, NW) E dodonu meda tu vata kei na Kalou nida muria na ivakaro i Jisu me vaka nona muria tale ga na ivakaro i Tamana.​—Joni 15:10.

⁴ O koya gona, meda lako me vakataki Jisu e vinakati kina meda raici koya me noda iLiuliu Levu da qai muria vinaka na weniyavana. Oqo e vica na taro meda vakasamataka: E liutaki keda tiko vakacava nikua o Karisito? E tarai keda vakacava na noda vakatotomuria na ivalavala ni nona lako? E yaga vakacava na noda muria na ivakaraitaki i Jisu Karisito?

Sala e Liutaki Ira Kina Nona iMuri o Karisito

5. Na cava e yalataka o Jisu vei ira na nona imuri ni bera ni lako cake i lomalagi?

⁵ Ni bera ni lako cake i lomalagi, e rairai vei ira nona tisaipeli o Jisu Karisito qai lesia vei ira e dua na cakacaka bibi. E kaya: “Dou lako yani ka qisi ira me ra noqu tisaipeli na lewe ni veivanua kece ga.” E yalataka tale ga ena gauna oqori na iLiuliu Levu ni na tiko kei ira nira vakayacora na itavi oya, e kaya: “Mo dou kila, au sa tiko vata kei kemudou e na veisiga kece ga me yacova na i vakataotioti kei vuravura.” (Maciu 28:19, 20, VV) E tiko vata vakacava o Jisu Karisito kei ira na nona imuri ena gauna ni ivakataotioti?

6, 7. E liutaki keda tiko vakacava o Jisu ni vakayagataka na yalo tabu?

⁶ “E na qai vakatavulici kemudou e na ka kece ga na Dauveivuke, na Yalo Tabu, o koya e na tala mai ko Tamaqu e na yacaqu,” e kaya o Jisu, “ka na vakananuma lesu tale ga vei kemudou ko koya na veika kece ga au sa dau tukuna vei kemudou.” (Joni 14:26, VV) E dusimaki keda qai vakaukauataki keda tiko nikua na yalo tabu e soli mai ena yaca i Jisu. E vakararamataki keda vakayalo me rawa kina nida kila “na veika titobu ni Kalou.” (1 Korinica 2:10) Kuria oqori, na itovo vakalou na “loloma, na reki, na vakacegu, na vosota vakadede, na cakacaka loloma, na yalovinaka, na yalodina na yalomalumalumu, na lewai koya rawa vaka i koya” e “vua ni Yalo Tabu.” (Kalatia 5:22, 23, VV) E rawa ni vukei keda na yalo tabu meda vakaitovotaka na itovo oqori.

⁷ Nida vulica na iVolatabu da qai bulataka na veika eda vulica, ena vukei keda na yalo i Jiova meda tubucake ena vuku, yalomatua, lomavuku, kila, kei na caka dodonu. (Vosa Vakaibalebale 2:1-11) E vukei keda tale ga na yalo tabu meda vosota na veivakatovolei kei na veivakacacani. (1 Korinica 10:13; 2 Korinica 4:7; Filipai 4:13) Era vakauqeti na lotu Vakarisito mera ‘vakasavasavataki ira mai na dukadukali kece ga ni yago kei na yalo.’ (2 Korinica 7:1) Ena rawa beka nida bulataka na bula savasava ke sega ni vukei keda na yalo tabu? Na yalo tabu e dua vei ira na ka e vakayagataka tiko o Jisu ena nona liutaki keda tiko nikua, na yalo e vakadonuya na Kalou o Jiova me vakayagataka o Luvena.​—Maciu 28:18.

8, 9. E vakayagataka tiko vakacava o Karisito “na dauveiqaravi yalo dina ka vuku” me veiliutaki?

⁸ Oqo e dua tale na ka e vakayagataka tiko o Karisito me liutaka kina na ivavakoso nikua. Ni vosa tiko me baleta na nona tiko tawarairai kei na gauna ni ivakataotioti, e kaya o Jisu: “O cei mada na dauveiqaravi yalo dina ka vuku, ko koya e na lesia na nona turaga me lewa na nona matavuvale, me solia vei ira na kedra kakana e na kena gauna dodonu? Sa kalougata na tamata e kunei koya na nona turaga e na gauna e yaco mai kina ni sa cakava tiko vaka kina. Au sa kaya vakaidina vei kemudou, e na lesi koya me lewa na veika kece e tu vua.”​—Maciu 24:3, 45-47, VV.

⁹ O Jisu Karisito e “turaga” oya. Na “dauveiqaravi” e vakatakarakarataki ira na ilawalawa lotu Vakarisito lumuti e vuravura. E soli vua na ilawalawa dauveiqaravi oqo me cakava na veika e vinakata o Jisu me caka e vuravura, me vakarautaka tale ga na kakana vakayalo ena kena gauna dodonu. E dua ga na ilawalawa lailai era ivakatawa era vakatokai me iLawalawa Dauvakatulewa e matataka tiko “na dauveiqaravi yalo dina ka vuku.” Na ilawalawa oqo e liutaka tiko na kena vunautaki na Matanitu ni Kalou e vuravura kei na kena veisoliyaki na kakana vakayalo ena kena gauna dodonu. E liutaka tiko gona o Karisito na ivavakoso ena nona vakayagataka na “dauveiqaravi yalo dina ka vuku” e lumuti ena yalo tabu kei na kena iLawalawa Dauvakatulewa.

10. Meda raici ira vakacava na qase ni ivavakoso, ena vuku ni cava?

¹⁰ E vakilai tale ga na veiliutaki i Karisito ena nodra soli mai na “i solisoli vei ira na tamata,” oqo o ira na qase ni ivavakoso, se ivakatawa lotu Vakarisito. Era lesi “me ra vakarautaki ira na tamata lotu me ra cakava na cakacaka vakarisito, me tara cake kina na yago i Karisito.” (Efeso 4:8, 11, 12, VV) E kaya na Iperiu 13:7 me baleti ira: “Dou nanumi ira era a liutaki kemudou, era a tukuna vei kemudou na vosa ni Kalou; vakadamurimuria na nodra vakabauta.” Era veiliutaki tiko ena ivavakoso o ira na qase oqo. Nira vakatotomuri Jisu Karisito tiko, ena yaga sara na noda vakatotomuria na nodra vakabauta. (1 Korinica 11:1) Eda vakaraitaka na noda vakavinavinakataka na ivakarau ni nodra veiqaravi na qase ni ivavakoso nida talairawarawa vei ira na ‘isolisoli tamata’ oqo.​—Iperiu 13:17.

11. E liutaki ira tiko vakacava na nona imuri nikua o Karisito? Na cava e okati ena noda lako me vakataki koya?

¹¹ Io, e liutaki ira tiko na nona imuri nikua o Jisu Karisito ena nona vakayagataka na yalo tabu, “na dauveiqaravi yalo dina ka vuku,” kei ira na qase ni ivavakoso. E okati ena noda lako me vakataki Karisito na noda kila na ivakarau ni nona veiliutaki kei na noda talairawarawa kina. E vinakati tale ga meda muria na weniyavana. “Ni dou sa kacivi,” e vola na yapositolo o Pita, “ni sa vosota talega na Karisito na rarawa e na vukumudou, a sa laiva vei kemudou nai vakarau, mo dou muria na we ni yavana.” (1 Pita 2:21) Ena tarai keda vakacava na noda muria na weniyava i Jisu?

Yalomalumalumu ni O Veiliutaki

12. Na ivakaraitaki cava i Karisito era na kauaitaka vakalevu na qase ni ivavakoso?

¹² Dina ni solia o Tamana vei Jisu na lewa cecere duadua, ia e vakayagataka ga ena yalomalumalumu. E dodonu vei ira kece na lewe ni ivavakoso, vakauasivi o ira na ivakatawa, ‘me kilai na nodra yalomalumalumu vei ira na tamata kece ga.’ (Filipai 4:5; 1 Timoci 3:2, 3, VV) Nira dau lewa na qase ena ivavakoso, e dodonu vei ira mera muria na weniyava i Karisito ena gauna era tauca kina na nodra lewa.

13, 14. Era na vakatotomuri Karisito vakacava na qase ni ivavakoso nira veiuqeti ina nona qaravi na Kalou?

¹³ A kila o Jisu na nodra malumalumu na nona tisaipeli. A sega ni namaka vei ira na ka era sega ni rawa ni cakava. (Joni 16:12) A sega ni vakasaurarataki ira na nona imuri o Jisu, e uqeti ira ga mera “gumatua sara” ena nodra cakava na loma ni Kalou. (Luke 13:24) E cakava oqo ena nona dau liu sara ga ena cakacaka kei na nona vakauqeta na lomadra. Era na sega tale ga ni veivakarerei se veivakamadualaki o ira na qase ni ivavakoso vakarisito. Ia, era na dau vakauqeti ira tale e so me vu ni nodra qaravi Jiova na nodra lomani koya kei Jisu, vaka kina nodra lomani ira na wekadra.​—Maciu 22:37-39.

¹⁴ E sega ni vakayagataka vakatani o Jisu na lewa e soli vua me lai lewa na nodra bula na tani. E sega ni kelea na isausau e dredre me rawati se vakatura e levu na lawa. E dau uqeti ira ga na tamata mera biuta i lomadra na yavu ni veilawa e soli vei Mosese. (Maciu 5:27, 28) Nira vakatotomuri Jisu Karisito, era na sega ni bulia ga na nodra lawa na qase ni ivavakoso se usuraka na veika ga era nanuma. Ena veika me baleta na isulusulu kei na sasauni se gade kei na veivakamarautaki, era na saga na qase ni ivavakoso mera tara na lomadra na mataveitacini ena nodra vakayagataka na ivakavuvuli vakalou, me vaka e volai ena Maika 6:8; 1 Korinica 10:31-33; kei na 1 Timoci 2:9, 10.

Veinanumi Qai Veivosoti

15. E raica vakacava o Jisu na nodra sega ni dau cakava na ka dodonu na nona tisaipeli?

¹⁵ E ivakaraitaki tale ga vei keda o Karisito ena ivalavala ni nona raici ira na nona tisaipeli nira sega ni cakava na ka dodonu kei na nodra dau cala. Vakasamataka mada e rua na ka e yaco ena iotioti ni bogi e tiko kina kei ira na tamata. Ni ratou yaco yani i Kecisemani, a “kauti Pita vata kaya ko koya, kei Jemesa kei Joni” o Jisu qai tukuna vei iratou, “dou tiko ga e ke, ka vakatawa.” E qai “lako vakalailai kiliu ko koya, a sa cuva ki na soso, a sa masu.” Ni lesu mai e ‘ratou sa moce tu.’ Na cava e cakava o Jisu? E tukuna ga: “Sa gu na yalo, ia na yago sa malumalumu.” (Marika 14:32-38) E sega ni karaci Pita, Jemesa, kei Joni, e lomani iratou ga! Ena bogi vata oya, e cakitaki Jisu vakatolu o Pita. (Marika 14:66-72) E qai raici Pita vakacava o Jisu? “Sa tu cake tale na Turaga, ka sa rairai vei Saimoni [Pita].” (Luke 24:34) “Sa rairai talega vei Kifa,” e kaya na iVolatabu, “vei ira emuri na le tinikarua.” (1 Korinica 15:5) A sega ni cudruva na yapositolo e qai veivutuni oya o Jisu, e vosoti koya ga qai vakaukauataki koya. E muri, e qai solia vei Pita o Jisu e so na itavi lelevu.​—Cakacaka 2:14; 8:14-17; 10:44, 45.

16. Eda na lako vakacava me vakataki Jisu nira sega ni cakava rawa na ka eda namaka se ra vakaleqai keda o ira eda vakabauta vata?

¹⁶ Ke ra sega ni cakava rawa na ka eda namaka se ra vakaleqai keda o ira eda vakabauta vata baleta nira tamata ivalavala ca ga, e sega li ni dodonu meda lomani ira da qai vosoti ira me vaka e cakava o Jisu? E uqeti ira era vakabauta vata o Pita: “Ni yalovata kece, ni veinanumi, ni veilomani me vaka na veitacini, ni yalo vinaka ka yalo malua. Ni kua ni sauma na ca e na ca, se sauma na veivakasewasewani e na veivakasewasewani, ia mo ni sauma ga na ka e caka vei kemuni e na vosa veivakalougatataki ni ko ni kila ni a kacivi kemuni na Kalou mo ni na vakalougatataki.” (1 Pita 3:8, 9, VV) Vakacava ke dua e sega ni cakava vei keda na ka e cakava o Jisu, me sega ni lomani keda se vosoti keda? E se vinakati tiko ga vei keda meda vakatotomuri Jisu, meda cakava na ka e cakava.​—1 Joni 3:16.

Vakaliuca na Matanitu ni Kalou

17. E vakaliuca vakacava nona cakava na loma ni Kalou o Jisu?

¹⁷ Oqo e dua tale vei ira na ka e gadrevi me rawa kina nida lako me vakataki Jisu Karisito. E vakaliuca o Jisu ena nona bula na vunautaki ni itukutuku vinaka ni Matanitu ni Kalou. Ni vunau oti vua na yalewa ni Samaria volekata na koro o Saika, e Samaria, e qai tukuna vei iratou na nona tisaipeli o Jisu: “A qau kakana me’u kitaka na loma i koya sa talai au mai; ka me’u vakaotia na nona cakacaka.” (Joni 4:34) E vakabulai Jisu na nona cakava na loma i Tamana; e vakamamautaki koya qai vakacegui koya me vaka ga na kakana. Nida vakatotomuri Jisu da qai gumatua ena noda cakava na loma ni Kalou ena sega li ni vakainaki qai marautaki na noda bula?

18. E yaga vakacava na noda uqeti ira na luveda me nodra cakacaka tudei na cakacaka vakapainia?

¹⁸ Nira uqeti ira na luvedra na itubutubu me nodra cakacaka tudei na cakacaka vakavunau, era na vakalougatataki vakalevu vata kei luvedra. E dua na tama e vakauqeti rau nona drua ivalu me rau vakasamataka tiko na cakacaka vakapainia ena gauna erau se gonelalai kina. Ni rau vakaotia na nodrau vuli, rau sa painia sara na drua. Ni raica lesu na marau e vakila, e vola o tamadrau: “Rau sega ni bau vakararawataki keirau na luve i keirau. Keirau kaya rawa ga ena vakavinavinaka, ‘O ira na gone era isolisoli i Jiova.’” (Same 127:3) E yaga vakacava vei ira na gone na nodra cakacaka tudei ena cakacaka vakavunau? E kaya e dua na tina e lima na luvena: “Na cakacaka vakapainia e vukei iratou kece na luvequ me ratou veiwekani voleka kei Jiova, e vinaka cake kina na nodratou vuli vakataki iratou, e vukei iratou me ratou vakayagataka vakavuku na nodratou gauna, qai vukei iratou tale ga me ratou vakaliuca na veika vakayalo. Dina ni ratou veiveisautaka kece na ivakarau ni nodratou bula, ia eratou sega ni veivutunitaka na sala eratou lakova.”

19. Na cava mera lalawataka vakavuku na itabagone me baleta na gauna e se bera mai?

¹⁹ Ra itabagone, na cava oni sa lalawataka tiko me baleta na gauna e se bera mai? Oni via rogo ena dua na cakacaka saumi? Se oni sa lalawataka tiko me nomuni cakacaka tudei na cakacaka vakavunau? “Mo ni qarauna matua sara kina na nomuni i valavala me kakua ni vakataki ira na lialia,” e vakarota o Paula, “vakayagataka vinaka na gauna ka ni sa gauna ca na veisiga oqo.” E kuria: “Ni kakua ni yalowai, ia ni vaqara na ka e vinakata na Turaga [o Jiova] mo ni cakava.”​—Efeso 5:15-17, VV.

Mo Yalodina Tiko

20, 21. E yalodina vakacava o Jisu, eda na vakatotomuria vakacava na nona yalodina?

²⁰ Na lako me vakataki Jisu e gadrevi kina meda vakatotomuria na nona yalodina. Me baleta na yalodina i Jisu, e kaya na iVolatabu: “Dina ga ni tiko vua e na veigauna kece ga na bula va-Kalou, e a sega ni bau nanuma me vakaukauwataka me rau tautauvata tiko ga kei na Kalou. Ia e a nakita ga vaka i koya me laiva tu mada yani na veika kece e a tu vua, ka mai taura na i vakarau ni bula vakatamata bobula. A sa yaco me vakataki ira na tamata ka sa rairai mai e na yago vakatamata. Ia ni sa rairai e na yago vakatamata sa vakayalomalumalumutaki koya ka sa talairawarawa me yacova sara na mate, io na mate e na kauveilatai.” E vakaraitaka nona yalodina o Jisu ina veiliutaki cecere i Jiova ena nona talairawarawa ina veika e lewa na Kalou me cakava. E yalodina tiko me yacova ni mate ena kaunirarawa. Me tiko vei keda “na i tovo ni yalo” oqori ena noda yalodina tale ga ni cakava na loma ni Kalou.​—Filipai 2:5-8, VV.

²¹ E yalodina tale ga o Jisu vei iratou na nona yapositolo. Dina ga nira malumalumu ra qai tamata ivalavala ca, ia o Jisu e lomani ira “ki nai otioti.” (Joni 13:1) Meda kua tale ga ni vakalewai ira na tacida baleta nira dau valavala ca tale ga.

Muria na iVakaraitaki i Jisu

22, 23. E yaga vakacava na noda muria na ivakaraitaki i Jisu?

²² Ena sega ni rawa nida muria vakavinaka sara na noda iVakaraitaki uasivi baleta nida tamata ivalavala ca. Ia e rawa ga nida saga meda muria voleka na weniyavana. E kena ibalebale oqo meda kila da qai muria na ivakarau ni nona veiliutaki o Karisito kei na nona ivakaraitaki.

²³ Eda na kalougata vakalevu ke da vakatotomuri Karisito. Ena vakainaki da qai marautaka tale ga na noda bula baleta nida na gumatua ni vakayacora na loma ni Kalou, sega ni ka e lomada. (Joni 5:30; 6:38) Ena vinaka na noda lewaeloma qai ivakaraitaki vinaka tale ga na noda ilakolako. O Jisu e sureti ira kece era oca ra qai colata tiko na icolacola bibi mera lako vua mera vakacegui. (Maciu 11:28-30) Nida muria na ivakaraitaki i Jisu, eda na rawa tale ga ni vakacegui ira na tani nida veimaliwai kei ira. O koya gona, meda lako tiko ga me vakataki Jisu.

O se Nanuma Tiko?

• E liutaki ira tiko vakacava na nona imuri o Karisito nikua?

• Era vakatotomuria vakacava na veiliutaki i Karisito na qase ni ivavakoso nira veiliutaki ena ilesilesi vakalou?

• Eda muria vakacava na ivakaraitaki i Jisu nida vosota nodra malumalumu e so tale?

• Era vakaliuca vakacava na Matanitu ni Kalou na itabagone?

[iYaloyalo ena tabana e 23]

Era vukei keda na qase ni ivavakoso meda muria na ivakarau ni nona veiliutaki o Karisito

[iYaloyalo ena tabana e 24, 25]

Ra itabagone lotu vakarisito, na cava oni sa lalawataka tiko me rawa kina ni yaga na nomuni bula?