Tu Vakarau Meda Soli Keda Nida Qarava na Kalou

“IA SA yaloqu sara me’u soli au kei na ka sa tu vei au e na vuku ni yalomudou,” e vola na yapositolo o Paula. (2 Korinica 12:15) E uqeti iko vakacava na veivosa oqo ena rai mera bucina na dauveiqaravi i Jiova? E kaya e dua na vuku ni iVolatabu ni oqo na ka e tukuna o Paula ena gauna e vola kina na veivosa oya vei ira na lotu Vakarisito mai Korinica: “Au sa tu vakarau meu solia na noqu kaukaua, noqu gauna, noqu bula, kei na veika kece au taukena vei kemuni, me vaka e dua na tama e marau ni cakava oqo vei iratou na luvena.” E lomasoli o Paula me ‘solia na ka kece e tu vua,’ se me ‘tavoraki koya,’ ke gadrevi vua me cakava vinaka kina na nona cakacaka vakaitalatala vakarisito.

Kena ikuri, a cakava na ka kece oqo o Paula ena ‘mamarau.’ A “lomasoli vakaoti” me cakava na ka oqo, e kaya na Jerusalem Bible. Vakacava o iko? O na lomasoli beka mo solia nomu gauna, kaukaua, taledi, kei na nomu iyau mo qarava kina na Kalou o Jiova kei ira na wekamu, e dina ni o na ‘tavoraki’ iko kina ena so na gauna? O na cakava beka ena ‘mamarau’?

Era Bese Sara ga ni Veiqaravi

Levu era sega wale ga ni tu vakasuka ia era bese sara ga ni qarava na Kalou. Era sega ni dau vakavinavinaka, sega ni veinanumi, qai dau veivorati. E temaki Atama kei Ivi o Setani ena vakasama vata oya. E lasutaki rau ena nona kaya ni rau na “vaka na Kalou, ni drau na kila na ka vinaka kei na ka ca”​—rawa ni rau vakatulewa vakataki rau ena ka e vinaka kei na ka e ca. (Vakatekivu 3:​1-5) O ira era vakaraitaka na yalo vata oya edaidai era nanuma nira sa galala mera cakava ga na ka era vinakata qai sega kina nodra itavi vua na Kalou se me tarova na Kalou na lomadra. (Same 81:​11, 12) Era vakayagataka na ka kece era taukena nira saga mera rawata na ka e baleti ira ga.​—Vosa Vakaibalebale 18:1.

Ena rairai sega sara ni vaka oqo na nomu rai. O rairai vakavinavinakataka dina na isolisoli ni bula o marautaka tiko oqo qai vakauasivi na inuinui totoka ni bula tawamudu ena parataisi e vuravura. (Same 37:​10, 11; Vakatakila 21:​1-4) O rairai vakavinavinaka vakalevu vei Jiova ena nona vinaka vei iko. Ia ena gadrevi vei keda kece meda qarauna na ivadi qaseqase nei Setani ni rawa ni moica na ivakarau ni noda rai me kua kina ni vakadonuya na noda veiqaravi vua na Kalou. (2 Korinica 11:3) E rawa ni yaco vakacava oqo?

Vinakati na Veiqaravi Ena Lomasoli

E vinakata o Jiova meda veiqaravi ena lomasoli qai vu sara ga mai lomada. E sega ni vakasaurarataki keda meda cakava na lomana. Ena cakava o Setani na ka ga e rawata me vakasaurarataki keda se vecei keda meda cakava na lomana. Me salavata kei na noda qarava na Kalou, na iVolatabu e vakamacalataka na itavi, ivakaro, loma ni Kalou kei na levu tale na ka. (Dauvunau 12:13; Luke 1:6) Ia, na inaki bibi ni noda qarava na Kalou na noda lomani koya.​—Lako Yani 35:21; Vakarua 11:1.

Veitalia ga na levu ni nona vakayagataki koya o Paula ena cakacaka ni Kalou, e kila o koya ni ka wale na ka kece oqo ‘ke sega vua na loloma.’ (1 Korinica 13:​1-3) Nira tukuna na dauvola iVolatabu ni o ira na lotu Vakarisito era dauveiqaravi ni Kalou, era sega ni kaya tiko nira tamata bobula ra qai cakava na ka nira vakasaurarataki kina. (Roma 12:11; Kolosa 3:​24) Na ka e vakaibalebaletaki e ke nira tu vakarau ni soli ira ena yalomalumalumu na lotu Vakarisito e yavutaki ena titobu ni nodra lomana na Kalou kei na Luvena, o Jisu Karisito.​—Maciu 22:37; 2 Korinica 5:​14; 1 Joni 4:​10, 11.

Na noda qarava na Kalou me vakaraitaka tale ga nida lomani ira vakalevu na tamata. “Ia keitou a yalovinaka e na kemudou maliwa, me vaka na dau meimei ni sa susugi ira na luvena,” e vola o Paula ina ivavakoso mai Cesalonaika. (1 Cesalonaika 2:7) Ena levu na vanua edaidai, e vakalawataki na nodra qaravi ira na luvedra na tinanigone. Era sega ni cakava oqo e levu na tina baleta wale ga nira talairawarawa ina lawa, se vakaevei? Sega. Era cakava ga baleta nira vakamareqeti ira dina na luvedra. O koya gona, ena vakuai koya mai na levu na ka e dua na tina me qarava ga na luvena! Ni a tautauvata tale ga na “yalololoma” i Paula vei ira a qaravi ira, dua na ka nona “vinakata” (“lomasoli,” King James Version; “marautaka,” New International Version) me solia nona bula me vukei ira. (1 Cesalonaika 2:8) Ena uqeti keda na loloma meda vakatotomuria na ivakaraitaki i Paula.​—Maciu 22:39.

Vakacava na Veiqaravi Ena Voraki?

Meda kua ni vakalaiva na noda lomani keda ga me vakalailaina na noda lomana na Kalou kei ira na wekada. Ke sega, ena rerevaki sara ke da lomalomarua se da voraki ena noda veiqaravi. Sa na tekivu meda bucina na veicati, da qai rarawataka nida sa sega ni cakava na ka me vaka na noda gagadre. A yaco vei ira e so na Isireli oqo nira sa sega ni lomana na Kalou, ia era sa qaravi koya tu ga baleta nira kila ni nodra itavi. Na cava e yaco kina? Nodra qarava na Kalou sa ka ni “veivakaocataki” vei ira.​—Malakai 1:​13.

Na ka kece e cabori vua na Kalou e dodonu me “sega na kena ca,” ia na kena e “vinaka duadua.” (Vunau ni Soro 22:​17-​20; Lako Yani 23:​19, NW) Ena gauna i Malakai, era sega ni cabora vei Jiova na nodra manumanu vinaka duadua, ia era tekivu cabora na manumanu era sa sega ni taleitaka. E raica vakacava o Jiova na ka oqo? E kaya vei ira na bete: “Ni dou sa vakacabora na ka mataboko mei soro [mo kaya], sa sega li ni ca? ka ni dou sa vakacabora na lokiloki kei na tauvi mate, sa na sega li ni ca? Mo cabora mada oqori vua na nomu kovana; ka na vinakati iko beka, se vakadonui iko ko koya? . . . Ia dou a kauta mai na ka e dresulaki, kei na lokiloki, kei na tauvi mate; io, na ka oqo dou a kauta mai mei madrali: me’u vakadonuya li na ka oqo mai na ligamudou?”​—Malakai 1:​8, 13.

E rawa ni yaco tale ga vakacava vei keda na ka oqo? E rawa ni “veivakaocataki” na noda vakacaboisoro ke sega vei keda na lomasoli dina kei na kena yalo. (Lako Yani 35:​5, 21, 22; Vunau ni Soro 1:3; Same 54:6; Iperiu 13:​15, 16) Me kena ivakaraitaki, eda solia beka vei Jiova na ivovo ni noda gauna?

Ena vakasamataka e dua, ena vakadonuya beka na Kalou ke dua na lewenivuvale gugumatua i Livai e vakasaurarataka e dua na Isireli me cabora na nona manumanu vinaka duadua e sega ni vinakata dina me cabori? (Aisea 29:13; Maciu 15:​7, 8) E besetaka o Jiova na isoro vaka oya vaka tale ga kina o ira era vakacabora.​—Osea 4:6; Maciu 21:43.

Marau ni Cakava na Loma ni Kalou

Nida cabora vua na Kalou na veiqaravi ena vakadonuya, e dodonu meda muria na ivakaraitaki i Jisu Karisito. “Ni’u sa sega ni muria na lomaqu,” e kaya o koya, “a loma i Tamaqu ga ko koya sa talai au mai.” (Joni 5:​30) E reki vakalevu o Jisu ena nona lomasoli ni qarava na Kalou. E vakayacora o Jisu na vosa ni parofisai i Tevita: “Au sa reki me’u kitaka na ka ko ni sa vinakata, noqu Kalou.”​—Same 40:8.

E dina ni marautaka o Jisu nona cakava na loma i Jiova, ia e sega ni rawarawa. Vakasamataka mada na ka e yaco ni bera nona vesu, e lewai qai vakamatei. Ni tiko ena were o Kecisemani, e ‘rarawa vakalevu na yalona, e yaluma sara.’ E tarai koya vakabibi na yaluma ni lomana, ia ni gauna e masu kina, “na nona buno sa vaka na titiri ni dra ni sa lutu ki na qele.”​—Maciu 26:38; Luke 22:44.

Na cava e sa rui yaluma kina? Sega ni nona nanumi koya ga se voraki ni cakava na loma ni Kalou. A tu vakarau me mate, e besetaka sara mada ga na vosa i Pita: “Me vakayawa vei kemuni na Turaga: na ka oqo ena sega sara ni yaco vei kemuni.” (Maciu 16:​21-​23) Na ka e leqataka o Jisu na sala ena tarai Jiova kina kei na irogorogo ni yacana tabu na nona mai mate me vaka e dua na dau basulawa beci. E kila vinaka o Jisu ni mosi dina vei Tamana me raica na Luvena lomani me vakararawataki vakamanumanu.

E kila tale ga o Jisu ni sa volekata yani na gauna bibi me vakacavara kina nona vakayacora na loma i Jiova. Nona kubeta ena yalodina na lawa ni Kalou e vakaraitaka ni a rawa tale ga vei Atama me a cakava na digidigi vata ga oya. Na yalodina i Jisu e vakaraitaka vakamatata ni lasu na ile i Setani ena nona kaya ni o ira era vakararawataki era na sega ni lomasoli se ra yalodina ena qarava na Kalou. Ena vuku i Jisu, ena qai vakarusai Setani vakadua o Jiova qai vagalalataka tale ga na revurevu ni nona veivorati.​—Vakatekivu 3:​15.

Sa dua dina na itavi vakaitamera e vakacolati vei Jisu! Na irogorogo ni yaca i Tamana, na sautu e vuravura raraba, kei na nona vakabula na vuvale ni kawatamata e vakatau kece ena yalodina i Jisu. Ni kila oqo, e masuta: “I Tamaqu, kevaka e rawarawa, me lako tani mada vei au na bilo oqo, ia me kakua ga ni vaka na noqu lewa, me vaka ga na nomu lewa.” (Maciu 26:39) Ena gauna e sotava sara tu mada ga kina na rarawa levu, e sega vakadua ni bau luluqa nona lomasoli me vakamalumalumu tiko ga ni cakava na loma i Tamana.

‘Sa Gu na Yalo, ia sa Malumalumu na Yago’

Me vaka ga ni sotava na rarawa o Jisu ena nona qaravi Jiova voli, meda namaka ni o Setani ena sagai keda tiko ga na tamata ni Kalou. (Joni 15:20; 1 Pita 5:8) Kena ikuri, eda tamata ivalavala ca. E dina nida na lomasoli meda qarava na Kalou, ena sega ni ka rawarawa noda vakayacora. E raica o Jisu na nodratou sasaga vakaukaua na nona yapositolo me ratou cakava na ka kece e tukuna me ratou cakava. Oqori na vuna e kaya kina: “E dina ga sa gu na yalo, ia na yago sa malumalumu.” (Maciu 26:41) E sega ni dua na malumalumu e kune ena yagona uasivi vakatamata. Ia e vakasamataka na malumalumu ni yagodratou na nona tisaipeli, na ivalavala ca eratou sucukaya mai vei Atama. E kila o Jisu ni ratou ivalavala ca qai vakaiyalayala ga na ka e rawata na tamata, sa bau dua na sasaga eratou na cakava me ratou cakava kece na ka eratou vinakata ena veiqaravi vei Jiova.

Eda na rairai vaka na yapositolo o Paula, ena nona rarawataka vakalevu na nona ivalavala ca qai sega ni rawa vua me qarava sara kina vakavinaka na Kalou. “Ni sa tiko ga vei au na vinakata na ka vinaka,” e vola o Paula, “ia na kaukauwa me’u kitaka kina, ka’u sa sega ni kunea.” (Roma 7:​18) O keda tale ga eda vakila nida sega ni rawa ni cakava sara vakavinaka na ka vinaka kece eda vinakata meda cakava. (Roma 7:19) E sega ni vu oqo nida voraki ni cakava. E baleta ga na malumalumu ni yago e vakataotaka meda cakava na noda vinaka kece.

Meda kua ni yalolailai. Ke da tu vakarau meda cakava mai vu ni lomada na ka eda rawa ni cakava, ena vakadonuya dina na noda veiqaravi na Kalou. (2 Korinica 8:​12) Meda ‘gumatua sara’ ni vakatotomuria na yalo ni nona vakamalumalumutaki koya o Jisu ina loma ni Kalou. (2 Timoci 2:​15; Filipai 2:​5-7; 1 Pita 4:​1, 2) Ena vakaicovitaka qai tokona tale ga o Jiova na yalo ni noda lomasoli. Ena solia vei keda na “kaukauwa mana levu” meda valuta rawa kina na noda malumalumu. (2 Korinica 4:​7-​10) Ena veivuke i Jiova, eda na vakataki Paula, nida na ‘soli keda kei na ka sa tu vei keda’ ena nona cakacaka vakamareqeti.

[iYaloyalo ena tabana e 21]

A lomasoli o Paula me qarava na Kalou ena kena vinaka duadua e rawata

[iYaloyalo ena tabana e 23]

Ena gauna e sotava sara tu mada ga kina na rarawa levu, a cakava tiko ga na loma i Tamana o Jisu