“E Vosa ga Vei Ira ena Vosa Vakatautauvata”

1-3. (a) Na cava era kalougata kina na tisaipeli era lako vata kei Jisu, cava e cakava mera nanuma na ka e vakavulica? (b) Na cava e guiguilecavi dredre kina na vosa vakatautauvata?

ERA kalougata na tisaipeli era lako vata kei Jisu nira vuli sara ga vua na Qasenivuli Levu. Era rogoca ni vakamacalataka na ibalebale ni Vosa ni Kalou, qai vakavulici ira ena ka dina. Ia qo mera tugana sara ga i lomadra kei na nodra vakasama nona vosa talei, ni se sega ni kena gauna me volai kina.a E vakarawarawataka o Jisu nona veivakavulici me rawa nira nanuma tiko. Ena sala cava? Ena iwalewale ni nona veivakavulici, vakabibi ni vakayagataka na vosa vakatautauvata.

² Io, na vosa vakatautauvata e veiuqeti e dau dredre me guilecavi. E tukuna e dua na dauvolaivola, ni vosa vakatautauvata e “veisautaka na daliga me mata, mera raitayaloyalotaka na vakarorogo na ka e tukuni tiko.” Ni rawarawa meda kila na ka ni raitayaloyalotaki, na vosa vakatautauvata gona ena kilai rawarawa kina na ka e sega ni laurai. E vakamatatataka na ka e tukuni, ena kasa tale ga ena noda vakasama.

³ E sega ni dua na qasenivuli e vuravura me vakataki Jisu Karisito me kenadau ena vosa vakatautauvata. Eda se nanuma vinaka tu ga nona vosa vakatautauvata nikua. Na cava e dau vakayagataka kina o Jisu na iwalewale ni veivakavulici qori? Na cava e yaga kina nona vosa vakatautauvata? Eda na vakayagataka vakacava na iwalewale ni veivakavulici qo?

Vuna e Vakayagataka Kina na Vosa Vakatautauvata

4, 5. Na cava e vakayagataka kina o Jisu na vosa vakatautauvata?

⁴ E tukuna na iVolatabu e rua na vuna bibi e vakayagataka kina o Jisu na vosa vakatautauvata. Kena imatai, me vakayacori na parofisai. E kaya na Maciu 13:34, 35: “E tukuna vei ira o Jisu na ka kece qori ena vosa vakatautauvata. E vosa ga vei ira ena vosa vakatautauvata, me vakayacori kina na ka e tukuna na parofita: ‘Au na dolava na gusuqu ena vosa vakatautauvata.’” Na parofita e cavuta qori o Maciu a vola na Same 78:2. Ena veiuqeti ni yalo tabu ni Kalou a volavola kina na daunisame qo ni se vo e vica na senitiuri me sucu o Jisu. Na cava e kena ibalebale? Sa tukuna tu mai o Jiova ena vica na drau na yabaki sa oti ni na vakayagataka na vosa vakatautauvata na Mesaia ni veivakavulici. E kila vinaka o Jiova na yaga ni iwalewale ni veivakavulici qo.

⁵ Kena ikarua, e tukuna o Jisu ni vakayagataka na vosa vakatautauvata me wasei ira na “sega ni malele” na lomadra ina nona itukutuku. (Maciu 13:10-15; Aisea 6:9, 10) E vakavotui vakacava na lomadra na vakarorogo ena nona vosa vakatautauvata? Eso na gauna, e vinakata mera taro na rogoci koya mera kila kina na ibalebale ni ka e tukuna. Era dau taro ga na yalomalumalumu, sega ni o ira dokadoka se o ira na sega ni kauai,. (Maciu 13:36; Marika 4:34) O koya gona, na vosa vakatautauvata i Jisu e vakatakila na ka dina vei ira na vinakata; ia e vunitaka vei ira na dokadoka.

6. E yaga vakacava na vosa vakatautauvata i Jisu?

⁶ E vica tale na sala e yaga kina na vosa vakatautauvata i Jisu. E vakavure vakasama, e uqeti ira na lewenivanua mera vakarorogo. E vukei ira mera kila se taura rawa na veika e vakamacalataki tiko. Me vaka eda sa raica mai ena itekivu ni wase qo, na vosa vakatautauvata i Jisu e vukei ira na vakarorogo mera nanuma na ka e tukuna. E levu na ivakaraitaki vakasakiti ni vosa vakatautauvata i Jisu e tiko ena iVunau ena Ulunivanua ena Maciu 5:3–7:27. E kaya e dua na itukutuku ni tiko ena ivunau qo e 50 vakacaca na vosa vakatautauvata. Nanuma ni rawa ni wiliki e cake me rauta ni 20 na miniti. Ke va ya, ena cavuti e dua na vosa vakatautauvata ena veiya20 na sekodi! E kila o Jisu na yaga ni vosa vakatautauvata ena kena raitayaloyalotaki na ka e tukuni!

7. Na cava meda vakatotomuri Jisu kina ena vakayagataki ni vosa vakatautauvata?

⁷ Nida imuri i Karisito, eda via vakatotomuria na iwalewale ni nona veivakavulici, okati kina nona dau vakayagataka na vosa vakatautauvata. Ni vakaisaluaki na kakana, eda na taleitaka na kania. Ena va tale ga qori na noda veivakavulici ke da vakayagataka na vosa vakatautauvata e veiuqeti. Na vosa vakatautauvata e vakasamataki vinaka ena vakarawarawataka na kilai ni ka dina. Meda veivosakitaka mada eso na vuna e yaga kina na vosa vakatautauvata i Jisu. Eda na qai kila na sala meda vakayagataka kina na iwalewale qo.

Rawarawa ga Nona Vosa Vakatautauvata

8, 9. A vakayagataka vakacava o Jisu na ivakatautauvata rawarawa, na cava e laulau kina?

⁸ E rawarawa ga qai lekaleka na vosa vakatautauvata e dau vakayagataka o Jisu ni veivakavulici. Io, na vosa rawarawa e matata kina na ka e raitayaloyalotaki qai kilai kina na ka dina me baleti Jiova. Kena ivakaraitaki, ni tukuna vei ira nona tisaipeli mera kua ni lomaocaocataka na ka mera bula kina e veisiga, e vakatauvatana na kedra ituvaki ina “manumanuvuka” kei “na lili ni veikau.” Era sega ni teitei na manumanuvuka se tatamusuki, era sega ni cakacaka se tali na lili ni veikau. Ia se kauaitaki ira ga na Kalou. E kilai rawarawa na kena ibalebale—ke sa kauaitaki ira na manumanuvuka kei na senikau na Kalou, macala ga ni na kauaitaki ira tale ga era “vakaliuca tiko ga na Matanitu ni Kalou.”—Maciu 6:26, 28-33.

⁹ E dau vakayagataka tale ga o Jisu na ivakarau ni vosa laulau na metaphor me vakatauvatana e rua na ka. E rawarawa ga na ivakatautauvata e vakayagataka. Ena dua na gauna a tukuna vei ira nona tisaipeli: “Oni rarama kei vuravura.” E rawarawa sara nira taura na tisaipeli na ibalebale ni ivakatautauvata ya, e laurai ena ka era tukuna kei na ka era cakava nira vakacila na rarama vakayalo ra qai vukea eso tale mera vakalagilagia na Kalou. (Maciu 5:14-16) Raica mada eso na metaphor se ivakatautauvata a vakayagataka o Jisu: “O kemuni na masima kei vuravura,” “O yau na vaini, o kemudou na tabaqu.” (Maciu 5:13; Joni 15:5) Ena yaga dina na ivakarau ni vosa ya ni rawarawa ga.

10. Na ivakatautauvata cava soti o rawa ni vakayagataka ni o veivakavulici?

¹⁰ Eda na vakayagataka vakacava na ivakatautauvata nida veivakavulici? Meda kua ni talanoa balavu qai vereverea, vakasamataka ga e dua na ivakatautauvata rawarawa. Kaya mada nida veivosakitaka tiko na ulutaga ni veivakaturi da qai via vakaraitaka ni sega ni dredre vei Jiova me cakava ya. Na ivakatautauvata cava o na vakasamataka? Na iVolatabu e vakatauvatana na mate ina moce. O rawa ni kaya, “E rawarawa sara vua na Kalou me vakaturi ira na mate, me vaka ga noda rawa ni vakayadrata e dua mai na moce.” (Joni 11:11-14) Kaya mada ke o via vakaraitaka ni bibi mera lomani na gone, mera kauaitaki mera bulabula kina qai marau. Na ivakaraitaki cava o na vakayagataka? E tukuni ena iVolatabu na ivakatautauvata qo: Ira na gone era “vaka na vu ni olive gone.” (Same 128:3) O rawa ni tukuna, “Na gone ena gadreva me lomani qai kauaitaki, vaka ga e dua na vunikau e gadreva na wai kei na siga.” Ni rawarawa ga noda vosa vakatautauvata, ena totolo nodra kila na kena ibalebale na vakarorogo.

Vakayagataka na ka e Raica e Veisiga

11. Tukuna eso na vosa vakatautauvata i Jisu me baleta na veika e raica ena nona bula voli e Kalili.

¹¹ E kenadau o Jisu ena vosa vakatautauvata me baleta na bula ni tamata. Ni bula voli e Kalili e rairai raica na ivakarau ni bula e veisiga, e levu gona na nona vosa vakatautauvata e baleta na ka qori. Vakasamataka mada na ka e raica ni se gone. Vakacava mada na levu ni gauna e raici tinana kina ni qaqia na witi me valawa qai vakalevenitaka, waqara na cina, se taviraka na vale? (Maciu 13:33; 24:41; Luke 15:8) Vakacava na levu ni gauna e dau raici ira kina na dauqoli nira balata nodra lawa ena Wasa o Kalili? (Maciu 13:47) Nodra dau qito na gone ena rara ni volivolitaki? (Maciu 11:16) E macala ga ni vakatauvatana o Jisu eso tale na ka e raica e veisiga—me vaka na kaburaki ni itei, na kana ni vakamau, kei na matua ni itei.—Maciu 13:3-8; 25:1-12; Marika 4:26-29.

12, 13. Na cava e vakasakiti kina nona tukuna o Jisu na gaunisala mai ‘Jerusalemi i Jeriko’ me matata kina nona vosa vakatautauvata me baleta na kai Samaria?

¹² E tukuna o Jisu ena nona vosa vakatautauvata na ka era kila vinaka na vakarorogo. Kena ivakaraitaki, e tekivuna na vosa vakatautauvata me baleta na kai Samaria ni kaya: “E biuti Jerusalemi e dua na turaga me gole sobu i Jeriko, e qai sotavi ira na daubutako. Era luvata na nona isulu qai mokulaki koya me voleka ni mate, ra qai lako yani.” (Luke 10:30) E tukuna o Jisu na gaunisala mai ‘Jerusalemi i Jeriko’ me matata kina na ka e tukuna. Ena gauna e cavuta kina na vosa vakatautauvata qori a tiko e Jutia o koya, e veivolekati ga kei Jerusalemi, era kila vinaka gona na vakarorogo na gaunisala ya. E kilai ni rerevaki sara, vakabibi ke taubaletaki duadua. Ni tatakelokelo qai lala eso na vanua, e dau nodra ivunivuni vinaka na daubutako.

¹³ Eso tale na itukutuku e okata o Jisu me baleta na gaunisala mai ‘Jerusalemi i Jeriko.’ E tukuni ena vosa vakatautauvata ni a liu e dua na bete qai muri yani e dua na Livai, ia erau sega ni bau vukei koya e vakaleqai. (Luke 10:31, 32) E dau veiqaravi na bete ena valenisoro e Jerusalemi, o ira na Livai era dauveivuke. Na gauna era sega ni veiqaravi kina ena valenisoro, era lai tiko e Jeriko, ni 23 ga na kilomita na kena yawa mai Jerusalemi. Era dau laurai gona vakalevu ena gaunisala ya. Vakasamataka tale ga ni rau a “gole sobu” tiko mai “Jerusalemi” na bete kei na Livai. Era kila vinaka qori na rogoci Jisu. Ni toka ena vanua cere o Jerusalemi ni vakatauvatani kei Jeriko. O koya gona, ni biubiu mai Jerusalemi e dua me lako i Jeriko, ena “gole sobu.”b E kauaitaki ira dina na rogoci koya o Jisu.

14. Eda na nanumi ira vakacava na vakarorogo nida vakayagataka na vosa vakatautauvata?

¹⁴ Meda nanumi ira tale ga na vakarorogo nida tukuna na vosa vakatautauvata. Cava eso na ka ena vakatau kina noda vosa vakatautauvata? Eda na rairai vakasamataka nodra yabaki ni bula, itovo vakavanua se isususu, kei na nodra cakacaka. Kena ivakaraitaki, na ivakatautauvata me baleta na teitei ena kilai vakalevu ena vanua ni teitei, sega ena siti. Eda rawa sara ga ni vakayagataka na ivakatautauvata veiganiti e vauca nodra bula na vakarorogo kei na ka era cakava e veisiga—​na luvedra, nodra vale, ka era taleitaka na cakava, kei na kedra.

Vakayagataka na Kabuli

15. Na cava e sega ni kurabuitaki kina nona kila vinaka o Jisu na kabuli?

¹⁵ E laurai ena levu na vosa vakatautauvata i Jisu ni kila vinaka na ka e tu e vuravura, me vaka na kau, manumanu, kei na draki. (Maciu 16:2, 3; Luke 12:24, 27) E kila vakacava? Ni dau dikeva na kabuli ena gauna e bula voli kina e Kalili. O Jisu “na ulumatua ni kabuli kece,” e vakayagataki koya tale ga o Jiova me “matai ligamaqosa” ena buli ni ka kece. (Kolosa 1:15, 16; Vosa Vakaibalebale 8:30, 31) Sa rauta me kila vinaka o Jisu na kabuli. Meda raica mada nona vakayagataka vinaka na kila qori ena veivakavulici.

16, 17. (a) Na cava e vakaraitaka ni kila vinaka o Jisu na nodra ivalavala na sipi? (b) Na ivakaraitaki cava eda kila kina nira dau rogoca na sipi na domoi kedra ivakatawa?

¹⁶ Vakasamataka ni tukuna o Jisu ni o koya “na ivakatawa vinaka,” era “sipi” na nona imuri. Eda raica ena ka e tukuna ni kilai ira vinaka na sipi. E kila ni duatani sara nodra veivolekati na sipi kei na kedra ivakatawa. E raica nira nuitaka na kedra ivakatawa, era sega ni vakaunodra, ra qai muri koya vinaka. Na cava era muria kina na kedra ivakatawa na sipi? E tukuna o Jisu “nira kila na domona.” (Joni 10:2-4, 11) Vakacava, era kila dina na sipi na domoi kedra ivakatawa?

¹⁷ E vola o George A. Smith ena nona ivola The Historical Geography of the Holy Land: “Eso na gauna, keitou lai vakacegu volekata e dua na toevu e Jutia, na vanua eratou na kauti ira mai kina nodratou qelenisipi e tolu se va na ivakatawa. Nira veicurumaki na sipi, keitou vaqaqa se ratou na wasei ira vakacava na ivakatawa. Era na gunu vata na sipi ra qai veiqitori, ia ni oti qori eratou dui gole na ivakatawa . . . , ratou kacivi ira yani na nodratou dui sipi. Era tawase sara mera yatuni vua na kedra ivakatawa.” Qo na vosa vakatautauvata veiganiti e vakayagataka o Jisu me matata kina na ka e tukuna, oya ni na karoni keda “na ivakatawa vinaka” ke da vakabauta qai muria nona ivakavuvuli.

18. Eda na raica e vei na itukutuku me baleta na ibulibuli i Jiova?

¹⁸ Eda na vakayagataka vakacava na kabuli ena vosa vakatautauvata? E rawarawa qai yaga na ivakatautauvata me baleta nodra itovo vakasakiti na manumanu. Eda na raica e vei na itukutuku ni ibulibuli i Jiova? E levu tu ena iVolatabu na itukutuku me baleta na veimataqali manumanu, so na gauna e vakatauvatana na nodra itovo ina so tale na ka. E tukuni ena iVolatabu na totolo ni me kila kei na lepate, na qaseqase ni gata, kei na maloku ni ruve.c (1 Veigauna 12:8; Apakuki 1:8; Maciu 10:16) Levu tale ga na itukutuku era tu ena Vale ni Vakatawa, na Yadra!, kei na so tale na ulutaga kei na vidio ena iwasewase “Bula Vakaidewadewa se Buli?” ena jw.org. O na rawa ni vulica na sala e vakayagataki kina na ibulibuli vakatubuqoroqoro i Jiova ena vosa vakatautauvata rawarawa.

Vakayagataka na iVakaraitaki e Kilai Levu

19, 20. (a) Me vakavotui na ivakavuvuli lasu, e yaga vakacava nona vakayagataka o Jisu e dua na ka se qai yaco ga? (b) Eda na vakayagataka vakacava na ivakaraitaki kei na veika e yaco dina nida veivakavulici?

¹⁹ E dau yaga na vosa vakatautauvata e okati kina na veika e yaco dina. Dua na gauna e tukuna o Jisu e dua na ka se qai yaco ga me vakacala kina na ivakavuvuli lasu ni dau yacovi ira ga na dau cakaca na ka ca. E kaya: “O ira na le 18 e baleti ira na vale cecere mai Sailoama, ra mani mate kina. Oni nanuma ni levu cake nodra ivalavala ca ni vakatauvatani kei ira na uabula kece e Jerusalemi?” (Luke 13:4) Era sega ni mate na le 18 ya ni cudruvi ira na Kalou ena nodra ivalavala ca. Ia e yaco qori ena vuku ni “gauna kei na ka e sega ni namaki.” (Dauvunau 9:11) E vakacala gona o Jisu na ivakavuvuli lasu ya ni tukuna e dua na ka era kila vinaka na vakarorogo.

²⁰ Eda na vakayagataka vakacava na veika e yaco dina kei na ivakaraitaki eso nida veivakavulici? Ke o vakamacalataka tiko na vakayacori ni parofisai i Jisu me baleta na ivakatakilakila ni nona tiko. (Maciu 24:3-14) O rawa ni talanoataka na itukutuku vou me baleta na veivaluvaluti, dausiga, se na uneune me dusia ni sa yaco tiko na ivakatakilakila. Ke o via tukuna e dua na ivakaraitaki mo vakatauvatana kina na veisau e vinakati ena kena tokari na tamata vou. (Efeso 4:20-24) O na raica e vei? O rawa ni vakasamataka na duidui ituvaki era sotava na tacida, se na nodra itukutuku ni bula eso ena dua nodra ivola na iVakadinadina i Jiova. O rawa ni wilika eso na kedra italanoa ena ulutaga “E Veisautaka na Bula na iVolatabu” ena jw.org.

21. Na cava na icovi ni qasenivuli maqosa ni Vosa ni Kalou?

²¹ O Jisu ga na Qasenivuli Levu! Eda sa vulica ena iwasewase qo ni nona itavi me ‘veivakavulici qai vunautaka na itukutuku vinaka.’ (Maciu 4:23) E noda itavi tale ga qori. E sega ni tukuni rawa na icovi ni qasenivuli vinaka. Eda sa soli ka tiko nida veivakavulici, e vakavu marau tale ga. (Cakacaka 20:35) Eda marau ni veika dina eda tukuna me baleti Jiova e yaga tawamudu. Eda na lomavakacegu tale ga nida vakatotomuri Jisu, na Qasenivuli levu a bula e vuravura!