Taro na Dauwiliwili
E tolu na leqa e veivakaroti kina o Jisu ena Maciu 5:22, na cava beka oya?
Ena nona Vunau ena Ulunivanua, a vakaroti iratou nona imuri o Jisu Karisito: “[A]u sa kaya vei kemudou, O koya yadua sa cudru walega vua na wekana, ena cudruvi koya na mataveilewai: ia ko koya ena vosavakacacataka na wekana, ni sa beitaka me ca, ena cudruvi koya na mataveilewai levu: ia ko koya ena rurulialiataki koya, ena cudruvi e na buka waqa mai eli [“Qiena,” NW].”—Maciu 5:22.
A cavuta o Jisu na veika era kila vinaka na Jiu—na mataveilewai, na mataveilewai levu, kei na bukawaqa mai Qiena—me vakarogoya kina na levu ni itotogi e tau ena cala bibi e vakayacori.
Taumada, e kaya o Jisu ni o koya e cudruva tiko ga na wekana ena saumitaro “e na mataveilewai” ena vanua oya. E tukuni ni mataveilewai vaka oqo a tauyavutaki ena siti, ra qai lewena e 120 se sivia na tagane uabula. (Maciu 10:17; Marika 13:9) O ira na turaganilewa ena mataveilewai vaka oqo e tu vei ira na lewa mera vakatauitotogi, ena kisi sara mada ga ni laba. (Vakarua 16:18; 19:12; 21:1, 2) A vakaraitaka gona o Jisu ni cala bibi ke dua e dau sevaka na wekana.
Sa qai kaya tarava o Jisu ke dua e “vosavakacacataka na wekana, ni sa beitaka me ca, ena cudruvi koya na mataveilewai levu.” Na vosa vakirisi na rha·kaʹ e vakadewataki me “vosavakacacataka” e kena ibalebale na “lala” se “ululala.” Me vaka e kaya na New Thayer’s Greek-English Lexicon of the New Testament, ni vosa oya “era dau vakayagataka na Jiu ena gauna i Karisito mera cudruva kina e dua.” E veivakaroti tiko kina o Jisu ni cala bibi na vosa ni veibeci e tau me vakaraitaki kina noda cata na wekada. E kaya tiko o Jisu ni dua e cavuta na vosa vaka oya ena sega ni lewai ga ena mataveilewai ia ena mataveilewai levu, e matadra na lewe ni Sanadrini—na mataveilewai cecere e tiko e Jerusalemi era lewena na bete levu kei na 70 na qase kei ira na vunivola.—Marika 15:1.
Kena itinitini, e vakamacalataka o Jisu kevaka e dua e ‘rurulialiataka’ e dua tale, sa rawa ni bala ina bukawaqa i Qiena. Na vosa “Qiena” e kau mai na vosa vakaiperiu geh hin·nomʹ, kena ibalebale “na buca o Inomi,” e koto ena ra kei na ceva kei Jerusalemi makawa. Ena gauna i Jisu na buca oqo e dau kama kina na benu, okati kina na yagodra na daubasulawa torosobu e sega ni ganiti ira mera bulu vakavinaka. O koya gona na vosa “Qiena” e ivakatakarakara vinaka ni rusa vakadua.
Ia na cava na ibalebale ni vosa ‘rurulialiataka’? Na vosa a vakayagataki e ke e tautauvata na kena irorogo kei na dua na vosa vakaiperiu e kena ibalebale “be,” se “vakaduduile.” Oqo e vakatakilakilataka e dua e tawayaga, e dua e vukitani qai tusaqata na Kalou. Na tamata gona e ‘rurulialiataka’ na wekana e vaka ga e kaya tiko ni dodonu me totogitaki na wekana me vaka ga nona totogitaki e dua e tusaqata na Kalou, oya na rusa tawamudu. Ena rai ni Kalou, o koya e cavuta na vosa ni veibeci vaka oqori vua e dua tale, ena tau vua na itotogi bibi—na rusa tawamudu.—Vakarua 19:17-19.
O koya gona e kotora o Jisu e dua na ivakatagedegede cecere vei ira nona imuri, ni vakatauvatani kei na ivakavuvuli e kune ena Lawa a soli vei Mosese. Dina nira vakabauta na tamata ni o koya e laba ena “cudruvi koya na mataveilewai,” ia o Jisu e sega ni vakabibitaka ga na ka e vakayacori ia na ivakarau ni lomadra tale ga na nona imuri. E vakavuvulitaka gona ni o ira na nona imuri mera kua sara mada ga ni dau sevaki ira na wekadra.—Maciu 5:21, 22.