‘O Solomoni sa Sega ni Vakaisulu me Vaka e Dua Vei Ira Oqo’
NA VEISENIKAU o raica e ke e dau laurai vakalevu ena veitolonisala mai na ceva kei Aferika. Na yacadra na cosmos ra qai senikau ni vanua tunumaka e Mereke. Nida raica na senikau rairai totoka oqo eda nanuma sara kina e dua na lesoni a vakatavuvulitaka o Jisu. E levu vei ira na vakarogoci koya tiko era dravudravua, ra qai lomaocaocataka na nodra veika vakayago, na kedra kakana vaka kina na isulu.
E kaya o Jisu: “Dou sa lomaocaoca vakacava e na vuku ni sulu? Dou vakananuma na viavia ni veikau, era sa tubu vakaevei: era sa sega ni daucakacaka, se dautali: ia ka’u sa kaya vei kemudou, O Solomoni e na nonai ukuuku kecega sa sega ni vakaisulu me vaka e dua vei ira oqo.”—Maciu 6:28, 29.
E levu sara na ivakamacala ni senikau a kaya tiko o Jisu. Ia, a vakatauvatana kei na co ena nona kaya: “Ia kevaka sa vakasuluma vakaoqo na Kalou na co ni veikau, ka tu edaidai, a sa biu ki na lovo e na mataka ena sega li ni gu vakalevu cake me vakasulumi kemudou, koi kemudou sa lailai na nomudou vakabauta?”—Maciu 6:30.
E dina ni sega ni nodra senikau na Isireli na cosmos, ia e vakadinadinataka na senikau oqori na lesoni e vakavuvulitaka o Jisu. Ni raici tu yani vakayawa se vakavoleka, era rairai totoka dina qai taleitaki vakalevu vei ira na daudroini kei ira na dauveitaba. O koya gona e dina taucoko na nona kaya o Jisu ni “o Solomoni e na nonai ukuuku kecega sa sega ni vakaisulu me vaka e dua vei ira oqo.”
Na cava eda vulica kina? Era rawa ni vakadeitaka na tamata ni Kalou ni na vukei ira o koya ena ka mera bula kina e veisiga dina ga nira sotava tu na veika dredre. E vakamacalataka o Jisu: “Mo dou dauvakasaqara ga na nona matanitu: [Matanitu ni Kalou] ia ena soli [na kakana kei na isulu e gadrevi] me kenai kuri vei kemudou.” (Luke 12:31) Ena yaga dina na vakasaqarai ni Matanitu ni Kalou. Ia, o kila se cava sara mada na Matanitu ni Kalou kei na veika ena vakayacora vua na ka kawatamata? Era marau na iVakadinadina i Jiova mera vukei iko mo kunea na kena isau ena iVolatabu.