Tokona na Matanitu ni Kalou ena Gauna Qo!
Raitayaloyalotaka mada ni sa voleka tiko mai e dua na cagilaba. Era veivakaroti na tabana ni matanitu moni gole ina vanua oni na taqomaki kina. Cava o na cakava? Io, o na muria ga na ivakaro qori.
Eda rawa ni kaya nida donuya tiko qo na gauna eda na vakarau sotava kina e dua na “cagilaba,” e vakatoka o Jisu me “veivakararawataki levu.” (Maciu 24:21) Eda na sega ni drovaka rawa na veivakararawataki levu qori. Ia e tiko na ka meda cakava me rawa nida taqomaki kina. Cava eda rawa ni cakava?
Ena nona iVunau ena Ulunivanua, e vakarota o Jisu: “Dou vakaliuca tiko ga na Matanitu ni Kalou kei na nona yalododonu.” (Maciu 6:33) Eda na cakava vakacava qori?
Vakaliuca tiko ga na Matanitu ni Kalou. Kena ibalebale meda okata me bibi cake vei keda na Matanitu ni Kalou. (Maciu 6:25, 32, 33) Na vuna? Eda sega ni rawa ni walia vakataki keda na noda leqa. Na Matanitu ni Kalou duadua ga ena rawa ni walia kece na noda leqa.
Vakaliuca nona yalododonu. Meda saga vagumatua meda muria na lawa kei na ivakavuvuli ni Kalou. Na vuna? Eda na sotava ga na leqa ke da vakatulewataka vakataki keda na ka e donu kei na ka e cala. (Vosa Vakaibalebale 16:25) Ia ke da muria na ivakatagedegede ni Kalou, eda na marautaka noda bula, ena marau tale ga kina na Kalou.—Aisea 48:17, 18.
Vakaliuca tiko ga na Matanitu ni Kalou kei na nona yalododonu. E kaya o Jisu eso era na vakawelei, era nanuma tale ga nira na taqomaki ke levu nodra ilavo. Eso tale era lomaocaocataka vakalevu na ka ni bula qo, era sega kina ni vakaliuca na Matanitu ni Kalou.—Maciu 6:19-21, 25-32.
Ia e yalataka o Jisu o ira na tokona na Matanitu ni Kalou ena vakarautaki vei ira na ka era gadreva ena gauna qo, era na vakalougatataki tale ga me tawamudu ena veigauna se bera mai.—Maciu 6:33.
Ratou vakaliuca na tisaipeli i Jisu na Matanitu ni Kalou kei na nona yalododonu. Ia ratou sega ni raica ni sa oti na rarawa kei na mosi. Ia na sala cava ratou taqomaki kina?
E taqomaki ratou na nodratou muria na ivakatagedegede savasava ni Kalou era vakalecalecava tu e levu. Na dei ni nodratou vakabauta ni na yaco mai na Matanitu ni Kalou, e vukei ratou me ratou vosota na ituvaki dredre. Na Kalou tale ga e solia vei ratou “na kaukaua e uasivia na kaukaua ni tamata.”—2 Korinica 4:7-9.
O NA VAKALIUCA NA MATANITU NI KALOU?
Era talairawarawa na lotu vaKarisito ena imatai ni senitiuri ena ivakaro i Jisu mera vakaliuca na Matanitu ni Kalou. Era vunautaka na itukutuku vinaka ni Matanitu ni Kalou e veiyasa i vuravura. (Kolosa 1:23) Vakacava e dua e cakava tiko na cakacaka qori nikua?
Io! Era kila na iVakadinadina i Jiova ni sa vakalekalekataki na gauna me mai vakarusa kina na Matanitu ni Kalou na ituvaki ca ni vuravura qo. Era solia gona nodra vinaka taucoko mera muria na vosa i Jisu: “Ena vunautaki mada na itukutuku vinaka qo ni Matanitu ni Kalou ena veiyasa i vuravura me ivakadinadina ina veimatanitu kece, sa na qai yaco na icavacava.”—Maciu 24:14.
Cava o na cakava ni o rogoca na itukutuku vinaka? Keimami uqeti iko mo vakatotomuria nodra ivakaraitaki na lewenivanua ena siti o Peria e Masitonia. Dua na ka na ‘gu ni lomadra’ ena gauna era rogoca kina vua na yapositolo o Paula na itukutuku vinaka ni Matanitu ni Kalou. Oti era sa qai ‘dikeva vinaka na iVolatabu’ mera vakadeitaka kina ni dina na ka era rogoca, ra muria tale ga na ka era vulica.—Cakacaka 17:11, 12.
O rawa tale ga ni cakava qori. Ni o vakaliuca na Matanitu ni Kalou kei na nona yalododonu, o na taqomaki kina nikua, qai vakila na vakacegu kei na sautu ena gauna se bera mai.