LESONI 03

O Rawa ni Nuitaka na iVolatabu?

iLavelave e Tabaki

E levu na ka e yalataki ena iVolatabu, e levu tale ga na ivakasala e tu kina. De dua o via kila sara ga na ka e vakavulica, ia o via qaqarauni tale ga. Vakacava e dodonu mo nuitaka na vosa ni yalayala kei na ivakasala ena ivola makawa qo? O vakabauta dina na ka e kaya na iVolatabu me baleta na bula marau ena gauna qo kei na veigauna se bera mai? E milioni era vakabauta qori. Dikeva sara mada.

1. E dina se sega na ka e tukuni ena iVolatabu?

E volai ena iVolatabu “na vosa donu, e dina.” (Dauvunau 12:10) E volai tale ga kina na veika e yaco dina me baleti ira na bula dina. (Wilika Luke 1:3; 3:1, 2.) E levu na daunitukutuku makawa kei na daukelikeli era vakadeitaka ni donu na tikinisiga, tamata, vanua kei na veika e yaco ena iVolatabu.

2. Na cava se yaga tiko ga kina na iVolatabu?

Na iVolatabu e vakamacalataka e levu na ka e sega ni kilai tu ena gauna e volai kina. Kena ivakaraitaki, e tukuna vakalekaleka na veika vakasaenisi. E levu na ka e tukuni ena ulutaga qori era sega ni vakabauta e levu ena gauna e volai kina. Ia era vakadeitaka na vuku ena gauna qo ni donu na ka e tukuna na iVolatabu. E “nuitaki tu ga ena gauna qo qai tawamudu.”—Same 111:8.

3. Na cava meda nuitaka kina na iVolatabu me baleta na gauna se bera mai?

E tu ena iVolatabu na parofisaia me baleta “na ka se bera ni yaco.” (Aisea 46:10) E donu na ka e tukuna ni bera nira yaco. E vakamatatataka tale ga na ituvaki ni vuravura ena gauna qo. Ena lesoni qo, eda na dikeva eso na parofisai vakaivolatabu. O na kurabuitaka na kena donu vinaka!

VAKEKELI

Dikeva na kena duavata na veika vakasaenisi ni gauna qo kei na iVolatabu, vulica tale ga eso na parofisai vakasakiti vakaivolatabu.

4. Duavata na ka vakasaenisi kei na iVolatabu

Ena gauna makawa, levu era vakabauta ni dabe toka na vuravura ena dua na ka. Sarava na VIDIO.

VIDIO: Vakaliligi Wale tu na Vuravura (1:13)

Dikeva na ka e tukuna na ivola na Jope rauta na 3,500 na yabaki sa oti. Wilika Jope 26:7, qai veivosakitaka na taro qo:

Na cava e kurabuitaki kina ni tukuni na vuravura e vakaliligi “wale tu”?

Sa qai kilai vinaka ena 200 na yabaki sa oti na italetale ni wai. Ia dikeva na ka e kaya na iVolatabu ena vica na udolu na yabaki sa oti. Wilika Jope 36:27, 28, qai veivosakitaka na taro qo:

Na cava e vakasakiti kina na ivakamacala rawarawa qo me baleta na italetale ni wai?
Vakacava o nuitaka na iVolatabu ena tikinivolatabu o wilika qo?

E vakamacalataka na iVolatabu na italetale ni wai. Na cowiri ni wai e vuravura kei lomalagi.

5. Parofisaitaka na iVolatabu na veika lelevu ena yaco

Wilika Aisea 44:27–45:2, qai veivosakitaka na taro qo:

Na cava e parofisaitaka na iVolatabu ena 200 na yabaki e liu ni bera ni bale o Papiloni?

Sarava na VIDIO.

VIDIO: Parofisaitaka na iVolatabu na Bale kei Papiloni (0:58)

E vakadeitaka na itukutuku makawa ni ravuta na koro o Papiloni ena 539 B.G.V.b o Sairusi, na Tui Perisia kei na nona mataivalu. Era vakadrodroya tani na uciwai e taqomaka tiko na koro. Era curu ena matamata ni koro e dola tu qai sega ni dua e tarova nodra ravuravu. Sa sivia qo e 2,500 na yabaki se tu ga na irusarusa kei Papiloni. Dikeva na ka e parofisaitaka na iVolatabu.

Wilika Aisea 13:19, 20, qai veivosakitaka na taro qo:

E vakayacori vakacava na parofisai me baleti Papiloni ena tikinivolatabu qo?

Na irusarusa kei Papiloni e Iraki ena gauna qo

iYaloyalo: iYaloyalo ni ituvaki e parofisaitaka na iVolatabu me baleta ‘na iotioti ni veisiga.’ 1. Kama tiko e dua na tabavale. 2. Vanavana tiko e dua na sotia. 3. Era veivala na lewenivanua kei ira na ovisa. 4. Rau butako e rua na tagane ena sitoa. 5. Vakacaca na taqe ni ivalu ena dua na koro. 6. Era waraka tiko na kakana eso ni ubi tu na gusudra. 7. Kakaca na vanua mamaca me vica vata na maile. 8. Vakacacani e dua na vale ni oti na uneune.

6. Parofisaitaka na iVolatabu na ka eda raica tu nikua

E tukuna na iVolatabu nida sa bula tu qo ena “iotioti ni veisiga.” (2 Timoci 3:1) Dikeva na ka e parofisaitaka na iVolatabu me baleta na gauna qo:

Wilika Maciu 24:6, 7, qai veivosakitaka na taro qo:

E vakamacalataka vakacava na iVolatabu na ituvaki ena iotioti ni veisiga?

Wilika 2 Timoci 3:1-5, qai veivosakitaka na taro qo:

Na cava e tukuna na iVolatabu me baleta na itovo ni tamata ena iotioti ni veisiga?
Na itovo cava o raica?

KA ERA KAYA ESO: “Na iVolatabu e ivola ni tukuni kei na italanoa makawa.”

Na cava na ivakadinadina matata ni nuitaki na iVolatabu?

KA O VULICA

Na itukutuku makawa, veika vakasaenisi kei na parofisai e dusia ni o rawa ni nuitaka na iVolatabu.

Railesuvi

E dina se sega na ka e tukuni ena iVolatabu?
Na cava eso na tikina e duavata kina na ka vakasaenisi kei na iVolatabu?
O vakabauta ni tukuna na iVolatabu na veika e se bera mai? Na vuna?

Vakaoti na lesoni ena

iSausau

Me dei nomu nuitaka na iVolatabu, wilika se sarava e dua na ka ena iKuri.

Eso tale:

Dua tale nomu isausau

IKURI

E donu na ka vakasaenisi ena iVolatabu?

“E Duavata na ka Vakasaenisi kei na iVolatabu?” (Ulutaga ena jw.org)

Na cava ena yaco ena “iotioti ni veisiga”?

“6 na Parofisai Vakaivolatabu sa Yaco Tiko” (Na Vale ni Vakatawa, 1 Me, 2011)

Vulica na kena yaco dina na parofisai vakaivolatabu me baleta na matanitu o Kirisi.

Veivakayaloqaqataki na “Vosa ni Parofisai” (5:22)

Raica na nona veisautaka nona rai e dua na turaga me baleta na iVolatabu na parofisai vakaivolatabu.

“Au Sega ni Vakabauta na Kalou” (Na Vale ni Vakatawa Nb. 5 2017)

a E okati ena parofisai na itukutuku ni Kalou me baleta na veika ena yaco ena veigauna se bera mai.

b B.G.V. kena ibalebale “Bera na Gauna vaKarisito,” kei na G.V. kena ibalebale “Gauna vaKarisito.”