O Tokona na Veiliutaki Cecere i Jiova?

“Kaya ki na veimatanitu, Sa lewa ko Jiova.”​—SAME 96:10.

1, 2. (a) Na ka vakairogorogo cava a yaco ena rauta na Okotova 29 S.K.? (b) Na cava ena gadrevi me vakayacora o Jisu?

E DUA na ka vakairogorogo a yaco rauta na Okotova 29 S.K., a sega mada ni bau laurai vakadua e vuravura. E volaitukutukutaka na dauvola Kosipeli o Maciu: “Ko Jisu, ni sa papitaisotaki oti, sa cabe sara mai na wai: ka raica, sa qai wase rua vua na lomalagi, a sa raica ko koya [Joni na Dauveipapitaiso] na Yalo ni Kalou ni sa lako sobu mai me vaka na ruve, ka sa mai ro toka vua [Jisu]: ka raica, sa dua na domo mai lomalagi, sa kaya, O koya oqo na noqu Gone ni toko, au sa dauvinakata vakalevu.” Oqo e dua na ka ratou volatukutukutaka kece na dauvola Kosipeli.​—Maciu 3:​16, 17; Marika 1:​9-​11; Luke 3:​21, 22; Joni 1:​32-​34.

² Na kena laurai e matanalevu na yalo tabu ni sobuti Jisu e dusia ni O Koya na Lumuti, e kena ibalebale Mesaia, se Karisito. (Joni 1:​33) Sa qai basika tu na “kawa” yalataki! A duri sara tu ga ena mata i Joni na Dauveipapitaiso o koya ena qaqia o Setani na bukubukuniyavana. Ia, ena butuqaqia na kawa yalataki oqo na ulu i koya na meca levu e dau tusaqati Jiova kei na nona veiliutaki cecere. (Vakatekivu 3:​15) Tekivu ena gauna oya, sa matata sara tu ga vei Jisu ni na gadrevi vua me vakayacora na inaki i Jiova me baleta na nona veiliutaki cecere kei na Matanitu ni Kalou.

3. A vakarautaki koya vakacava o Jisu ena nona itavi me tokona na veiliutaki cecere i Jiova?

³ Me vakarautaki koya ena itavi oqori, ‘a sinai o Jisu ena yalo tabu, a biuta na Joritani, qai kauti koya na yalo tabu ina loma ni veikau.’ (Luke 4:1; Marika 1:​12) Ena 40 na siga nona tiko e kea, a vakasamataka vakabibi o Jisu na nona vakalewa o Setani na dodonu ni veiliutaki cecere i Jiova, kei na nona itavi me tokona na veiliutaki cecere oqori. Na ile oqo era vauci kina na ibulibuli vuku kece​—e lomalagi kei vuravura. Bibi gona meda vakasamataka na ivakarau ni bula i Jisu, da qai kila na ka meda cakava me vakaraitaki kina nida via tokona tale ga na veiliutaki cecere i Jiova.​—Jope 1:​6-​12; 2:​2-6.

Vakalewai na Veiliutaki Cecere i Jiova

4. Na cava a cakava o Setani e vakavotui kina na vakalewai ni veiliutaki cecere i Jiova?

⁴ Na veika a yaco oqo a raica vinaka sara tu ga o Setani. A sega tale ni qai vakalusi gauna, ni sa vorati koya na “kawa” ni “yalewa” ni Kalou. (Vakatekivu 3:​15) Nona vinakata o Setani me vakayacora o Jisu na ka ena yaga ga vua, a temaki koya kina vakatolu, qai uqeti koya me kua ni cakava na ka e vinakata o Tamana. Na ikatolu ni veitemaki e laurai votu kina na kena vakalewai na veiliutaki cecere i Jiova. A vakaraitaka o Setani vei Jisu na “matanitu kecega e vuravura, kei na kedrai ukuuku,” sa qai kaya ena qaciqacia vua: “A ka kecega oqori ka’u na solia vei iko, kevaka ko na cuva sobu ka vakarokoroko vei au.” Kila o Jisu ni lewa dina tu na Tevoro na “matanitu kecega e vuravura,” qai vakaraitaka vakamatata na veiliutaki e tokona ni kaya: “Mo lako tani, Setani, ni sa volai, Mo vakarokoroko vei Jiova na nomu Kalou, ia mo qaravi koya duaduaga.”​—Maciu 4:​8-​10.

5. Na ilesilesi dredre cava me na vakayacora o Jisu?

⁵ A laurai votu ena ivakarau ni bula i Jisu ni bibi duadua vua nona tokona na veiliutaki cecere i Jiova. A kila vinaka o Jisu ni na gadrevi me yalodina tiko ga me yacova sara nona mate ena liga i Setani​—a parofisaitaki ena kena qaqi na bukubukuniyava i koya na “kawa” ni yalewa​—me vakadinadinataki kina na dodonu ni veiliutaki cecere ni Kalou. (Maciu 16:21; 17:12) Me na vakaraitaka tale ga o Jisu ni na vakayagataka o Jiova na Matanitu ni Kalou me vakamalumalumutaki Setani na dauveivorati, qai vakalesuya mai na bula sautu vei ira na nona ibulibuli kece. (Maciu 6:​9, 10) Na cava a cakava o Jisu me vakayacora kina na ilesilesi dredre oqo?

“Sa Voleka na Matanitu ni Kalou”

6. A vakaraitaka vakacava o Jisu ni na vakayagataka o Jiova na Matanitu ni Kalou me “vaqeavutaka na cakacaka ni tevoro”?

⁶ Taumada, “sa lako mai ki Kalili ko Jisu, a sa dauvunautaka nai tukutuku vinaka ni matanitu ni Kalou, ka kaya, Sa qai yaco na gauna, a sa voleka na matanitu ni Kalou.” (Marika 1:​14, 15) A kaya ena dua na gauna o Jisu: “Sa dodonu me’u lako me’u tukuna nai tukutuku-vinaka ni matanitu ni Kalou . . . ni sa ka oqo ka’u sa talai mai kina.” (Luke 4:​18-​21, 43) Dau taubale vakalevu me “vunau, ka tukuna nai tukutuku-vinaka ni matanitu ni Kalou.” (Luke 8:1) Levu tale ga nona cakacaka mana o Jisu​—e vakani ira na lewe vuqa, e vakamaravutaka na draki ca, vakabula na tauvimate, kei na nona vakaturi ira na mate. E vakadinadinataka o Jisu ena cakamana oqo ni na vakaotia na Kalou na ca kei na rarawa a tekivu ena veivorati mai Iteni, me ‘vaqeavutaka tale ga kina na cakacaka ni tevoro.’​—1 Joni 3:8.

7. Na cava e vakavulica o Jisu vei ira na nona imuri mera cakava, na cava e laurai kina?

⁷ Me qaravi vinaka na cakacaka ni kena vunautaki na Matanitu ni Kalou, a vakarautaka o Jisu e dua na ilawalawa imuri yalodina qai vakavulici ira ena itavi oqo. Taumada, a lesi ratou na nona yapositolo le 12 qai “talai ira ko koya me ra vunautaka na matanitu ni Kalou.” (Luke 9:​1, 2) Oti, sa qai tala e 70 tale mera kacivaka: “Sa volekati kemudou na matanitu ni Kalou.” (Luke 10:​1, 8, 9) Nira mai tukuna vei Jisu ni vuavuaivinaka na cakacaka vakavunau, e kaya o koya: “Au a raici Setani ni sa lutu sobu mai lomalagi me vaka na livaliva.”​—Luke 10:​17, 18.

8. Na cava e vakadinadinataki ena bula i Jisu?

⁸ E dau gugumatua qai dau tu vakarau o Jisu me kacivaka na Matanitu ni Kalou. A cakacaka vakaukaua ena siga kei na bogi, sega mada ga ni kauaitaka na taukeni ni veika vakayago. “Sa vaqara na fokise, a sa vakairoro na manumanu vuka; ia na Luve ni tamata, sa sega vua na tikina me vakadavora kina na uluna,” e kaya. (Luke 9:​58; Marika 6:​31; Joni 4:​31-34) Ni bera nona mate, a tukuna ena doudou o Jisu vei Ponitio Pailato: “Na ka oqo ka’u sa lako mai kina ki vuravura oqo, me’u dautukuna na ka dina.” (Joni 18:37) E vakadinadinataki ena bula i Jisu ni sega wale ga ni qasenivuli levu, se dau cakamana, se noda iVakabula, ia e tokona na lewa cecere i Jiova, me vakadinadinataka tale ga ni na yaco dina na inaki ni Kalou ni vakayagataka na nona Matanitu.​—Joni 14:6.

“Sa Oti”!

9. E butuqaqia vakacava o Setani na “kawa” ni yalewa ni Kalou?

⁹ Na veika kece a cakava o Jisu me baleta na Matanitu ni Kalou a sega ni marau kina na Meca, o Setani na Tevoro. A sega ni cegu na meca oqo ena nona saga me vakamatea na “kawa” ni yalewa ni Kalou, ena nona vakayagataka na isoqosoqo vakapolitiki kei na lotu​—na “kawa” i Setani e vuravura. Me tekivu mai na siga a sucu kina o Jisu me yacova nona mate, dau sagai koya o Setani kei na nona ilala. Kena itinitini, ena vulaitubutubu ni yabaki 33 S.K., sa qai kena gauna vua na Meca me butuqaqia na bukubukuniyava i koya na Luve ni tamata. (Maciu 20:​18, 19; Luke 18:​31-​33) E vakaraitaka vakamatata na itukutuku ena Kosipeli na nona vakamua e levu o Setani​—wili kina o Jutasa Isikarioti, ira na iliuliu ni bete, ira na vunivola, ira na Farisi, kei ira na kai Roma​—mera vakacalai Jisu qai vakamatei koya ena kaunirarawa.​—Cakacaka 2:​22, 23.

10. Na itavi uasivi cava a vakayacora o Jisu ni sa mate ena kaunirarawa?

¹⁰ Na cava o vakasamataka ni o raitayaloyalotaki Jisu ni vakararawataki tu vakabalavu ena kaunirarawa qai tini ena mate mosimosi? De dua, o vakasamataka na nona isoro e voli keda kina vakayalololoma na kawatamata ivalavala ca. (Maciu 20:28; Joni 15:13) O na rairai qoroqoro sara ga ena loloma levu i Jiova ena nona vakarautaka na isoro oqori. (Joni 3:​16) De dua, o na duavata kei na sotia ni Roma a kaya: “E dina ga sa Luve ni Kalou ko koya oqo.” (Maciu 27:54) Io, e donu vinaka na veika e tukuni oqori. Ena yasana adua, nanuma na iotioti ni vosa a tauca o Jisu ena kaunirarawa: “Sa oti”! (Joni 19:30) Na itavi cava sa vakayacora? E levu sara na ka a vakavatukanataki ena bula kei na mate i Jisu, ia vakauasivi ga ni a vakadodonutaka kina na ile e vauca na veiliutaki cecere i Jiova. Me vaka ni “kawa” o Jisu, a parofisaitaki ni na vosota na veivakararawataki i Setani, me na kua ni beci tale kina na yaca ni Kalou o Jiova. (Aisea 53:​3-7) Era itavi bibi dina oqo, ia a yalodina kina. Vakasakiti dina na nona vakayacora na itavi kece oqori!

11. Na cava ena cakava o Jisu me taucoko kina na kena vakayacori na parofisai a cavuti mai Iteni?

¹¹ Ena vuku ni nona yalodina, a sega ni vakaturi o Jisu me tamata ia me “yalo sa vu ni bula.” (1 Korinica 15:45; 1 Pita 3:​18) A yalataka o Jiova vua na Luvena sa vakalagilagi: “Mo tiko e ligaqu i matau, me’u vakamalumalumutaki ira mada na nomu meca mei tutu-ni-yavamu.” (Same 110:1) Na “meca” e okati kina o Setani na dau vakavu ca kei ira kece na nona “kawa.” Na Matanitu i Jiova ena Tui kina na Mesaia o Jisu Karisito, ena liutaka sara ga na nodra vakarusai na meca taucoko. (Vakatakila 12:​7-9; 19:​11-​16; 20:​1-3, 10) Sa na qai taucoko na kena vakayacori na parofisai ena Vakatekivu 3:​15, kei na masu a vakavulica o Jisu vei ira na nona imuri: “Me yaco na nomuni lewa. Me caka na lomamuni e vuravura me vaka sa caka mai lomalagi.”​—Maciu 6:​10; Filipai 2:​8-​11.

Meda Muria na iVakaraitaki i Jisu

12, 13. (a) Na cava e laurai ena gauna oqo ni kacivaki na itukutuku vinaka ni Matanitu ni Kalou? (b) Na cava meda vakasamataka kevaka eda via muria na ivakaraitaki i Karisito?

¹² Ena gauna oqo, sa kacivaki tiko na itukutuku vinaka ni Matanitu ni Kalou ena levu na vanua, me vaka a parofisaitaka o Jisu. (Maciu 24:14) E laurai gona nira sa yalataka na nodra bula vua na Kalou e vica na milioni. Sa ra marautaka tiko na nodra na vakalougatataki ena Matanitu ni Kalou. Era vakanamata mera bula tawamudu ena sautu ena parataisi e vuravura, ra qai tukuna yani vei ira tale e so na nodra inuinui totoka oqo. (Same 37:11; 2 Pita 3:​13) O sa kacivaka tiko beka na itukutuku vinaka oqo? Ke vaka kina, oni vakacaucautaki ena nomuni cakacaka. Ia, e dua tale na ka meda na dikeva yadudua.

¹³ A vola na yapositolo o Pita: “Sa vosota talega na Karisito na rarawa e na vukumudou, a sa laiva vei kemudou nai vakarau, mo dou muria na we ni yavana.” (1 Pita 2:​21) Dikeva ni a vola o Pita na rarawa i Jisu, a sega ni tukuna na nona gugumatua na vunau se na maqosa ni nona veivakavulici. Kila vinaka o Pita ena ka e raica ni dau tu vakarau o Jisu me vosota na veika dredre, me talairawarawa ga kina vei Jiova qai vakavotuya na lasu mamaca i Setani. O koya gona, eda na vakatotomuria vakacava na ivakaraitaki i Jisu? Meda tarogi keda: ‘Au tu vakarau beka meu vosota na ka dredre meu tokona qai doka kina na veiliutaki cecere i Jiova? E laurai beka ena ivakarau ni noqu bula kei na noqu cakacaka vakavunau ni bibi duadua vei au noqu tokona na veiliutaki cecere i Jiova?’​—Kolosa 3:​17.

14, 15. (a) Na cava a cakava o Jisu ni cala na ka e vakaturi me cakava? Na vuna? (b) Na usutu cava meda dau vakasamataka? (Okata na ivakamacala ena kato “Meda Tokoni Jiova.”)

¹⁴ Eda vakatovolei ena veisiga, eda vakatulewa tale ga, so era lelevu so era lalai. Ni yaco oqori, me vakatau ena cava na ka eda cakava? Me kena ivakaraitaki, cava eda na cakava ke da temaki meda cakitaka noda vakabauta vakarisito? Na cava a kaya o Jisu ni tukuna vua o Pita ni na sega ni yaco vua na ka ca? “Lako tani ki dakuqu, Setani,” e kaya o Jisu. “Ni ko sa sega ni vakananuma na ka ni Kalou, na ka ga ni tamata.” (Maciu 16:​21-​23) Eda na vakatotomuri Jisu beka ke soli vei keda na cakacaka eda na rawa ilavo qai tosoi kina noda itutu vakacakacaka, ia e veivakaleqai vakayalo? Ni siqema o Jisu nira nakita tiko mera “lako mai” o ira na raica nona cakamana mera “tauri koya vakaukauwa me ra bulia me tui,” e totolo ga nona biuti ira.​—Joni 6:​15.

¹⁵ E sega ni raica vakamamada o Jisu na gauna vaka oqori. Na cava na vuna? Ni kila ni sega soti ni bibi na nona taqomaki koya se na ka e nanuma ni vinaka vua. E bibi ga vua me cakava na loma i Tamana, me tokona tale ga na veiliutaki cecere i Jiova, dina ni na sega ni rawarawa. (Maciu 26:​50-54) O koya gona, a matata tu vei Jisu na usutu oqori. Ke sega ni matata vei keda na usutu oqo ena veigauna, eda na rawa ni sikalutu. Na vuna? Ni rawarawa sara meda coriti ena ilawaki i Setani, ni matai me veisautaka na ka e cala me rairai vinaka, me vaka ga nona a temaki Ivi.​—2 Korinica 11:14; 1 Timoci 2:​14.

16. Na cava me noda inaki bibi duadua nida tubera tiko e so?

¹⁶ Eda na gumatua ena cakacaka vakavunau meda veivosaki kei ira na tamata ena ka ra kauai kina, qai vakaraitaka na kena isau ena iVolatabu. Oqo e dua na iwalewale vinaka meda uqeti ira kina mera vulica na iVolatabu. Ia, e sega ni noda inaki wale ga mera kila na ka e tukuna na iVolatabu se na veivakalougatataki ni Matanitu ni Kalou. Na noda inaki bibi duadua oya mera kila vinaka na vakalewai ni veiliutaki cecere i Jiova. Vakacava, era na tu vakarau mera mai lotu Vakarisito dina, ra qai colata na nodra “kaunirarawa,” mera vakararawataki tale ga ena vuku ni Matanitu ni Kalou? (Marika 8:​34, NW) Era na tu vakarau beka mera duavata kei ira na tokona na veiliutaki cecere i Jiova, mera vakadinadinataka kina ni lasulasu qai dauveivorati o Setani? (Vosa Vakaibalebale 27:11) E ka dokai meda tokona na veiliutaki cecere i Jiova kei na noda tuberi ira tale e so mera cakava vaka kina.​—1 Timoci 4:​16.

Sa na ‘Lewa Duadua ga na Kalou na Ka Kece Ga’

17, 18. Na gauna lagilagi cava eda na vakanamata kina kevaka eda tokona na veiliutaki cecere i Jiova?

¹⁷ Nida tokona na veiliutaki cecere i Jiova ena noda ivalavala kei na noda cakacaka vakavunau, eda na vakanamata ina gauna ena “solia ko koya [Jisu Karisito] na lewa vua na Kalou, ko Tamana.” Na gauna cava oqori? E kaya na yapositolo o Paula: “Ni sa vakaotia ko koya na lewa kecega kei na veitalia kecega, kei na kaukauwa. Sa na lewa tikoga ko koya me vakamalumalumutaki sobu mada na meca kecega e ruku ni yavana. . . . Ena qai vakamalumalumutaki talega na Luvena vei koya sa vakamalumalumutaka na ka kecega vei koya, me sa lewa duaduaga na Kalou e na ka kecega.”​—1 Korinica 15:​24, 25, 28.

¹⁸ Sa na gauna lagilagi dina ni sa na ‘lewa duadua ga na Kalou na ka kece ga’! Sa na vakacavara vinaka na nona itavi na Matanitu ni Kalou. Era na rusa kece na dau tusaqata na veiliutaki cecere i Jiova. Sa na vakilai tale e vuravura kei lomalagi na vakacegu kei na tiko vinaka. Era na lagata na veika bula kece na vosa i koya na daunisame: “Dou ia vei Jiova na vakarokoroko sa kilikili kei na yacana . . . Dou kaya ki na veimatanitu, Sa lewa ko Jiova.”​—Same 96:​8, 10.

O Rawa ni Sauma?

• E vakaraitaka vakacava o Jisu ni bibi duadua vua na tokoni ni veiliutaki cecere ni Kalou?

• Na itavi uasivi cava a vakacavara o Jisu ena nona cakacaka vakavunau kei na nona mate?

• Eda na vakatotomuria vakacava na ivakaraitaki i Jisu nida tokona na veiliutaki cecere i Jiova?

[Kato/​iYaloyalo ena tabana e 29]

MEDA TOKONI JIOVA

Era kila vinaka na mataveitacini e Korea kei na veivanua tale e so, ni yaga vakalevu na nodra kila na lotu Vakarisito na vuna era vakatovolei tiko kina ena veika dredre.

E kaya e dua na iVakadinadina i Jiova a vesu ena gauna ni veiliutaki ni matanitu makawa kei Rusia: “Keimami vosota baleta ni matata tu vei keimami na ile a basika mai Iteni, oya na dodonu ni veiliutaki ni Kalou. . . . Keimami kila ni gauna veiganiti oya me keimami vakaraitaka kina na neimami tokona na veiliutaki i Jiova. . . . Oqo e vakaukauataki keimami me keimami yalodina tiko ga.”

E vakamacalataka e dua na iVakadinadina na ka e vakaukauataki koya kei ira na tacina vakayalo ena keba ni veivakararawataki. “E tokoni keimami o Jiova,” e kaya. “Dina ga ni dredre na ituvaki, keimami yadrayadravaki vakayalo. Keimami dau veivakauqeti ena neimami veitalanoataka na neimami tokoni Jiova ena kena vakalewai na nona veiliutaki cecere.”

[iYaloyalo ena tabana e 26]

E tokona vakacava o Jisu na veiliutaki cecere i Jiova ni temaki koya o Setani?

[iYaloyalo ena tabana e 28]

Na cava e rawati ena mate i Jisu?