Taro na Dauwiliwili

Na cava e duidui kina na veika rau vola o Maciu kei Luke me baleti Jisu ni se gone?

E vakabibitaka o Maciu na veika me baleti Josefa. Kena ivakaraitaki, na ka e cakava o Josefa ni sa bukete o Meri, nona tadra na ka e vakamacalataka na agilosi, kei na nona ciqoma. (Maciu 1:19-25) E vakamacalataka tale ga o Maciu nona tadra o Josefa ni uqeti koya tiko e dua na agilosi me dro i Ijipita, nodratou dro vakavuvale, nona tadra ni tukuna na agilosi me lesu tale ina vanua o Isireli, nona lesu, kei na nona vakatulewataka me ratou tiko mada ga e Nasareci. (Maciu 2:13, 14, 19-23) E cavuti vakawalu na yaca i Josefa ena itekitekivu ni wase ni Kosipeli i Maciu, o Meri e cavuti ga vakava.

Ia o Luke e vakabibitaka na veika me baleti Meri. Kena ivakaraitaki, nona rairai vei koya na agilosi o Keperieli, nona lai sikova na wekana o Ilisapeci, kei na veika e cavuta me vakacaucautaki Jiova kina. (Luke 1:26-56) E cavuta tale ga o Luke na ka e tukuna o Simione vei Meri me baleta na veika rarawa ena sotava. Na itukutuku mada ga ni nodratou lako vakavuvale ina valenisoro ni sa yabaki 12 o Jisu, e vola o Luke na ka e cavuta o Meri, e sega ni vola na ka e cavuta o Josefa. E kuria o Luke ni tarai Meri sara ga na ka kece qori. (Luke 2:19, 34, 35, 48, 51) Na yaca i Meri e cavuti vaka12 ena imatai ni rua na wase ena Kosipeli i Luke, o Josefa e cavuti ga vakatolu. Koya gona, e vakamacalataka o Maciu na ka e cakava o Josefa kei na ka e lomaleqataka, ia o Luke e vakamatatataka na itavi i Meri kei na veika e sotava.

E duidui tale ga na iyatukawa erau vola na dauvola Kosipeli qo. O Maciu e vakamacalataka na iyatukawa i Josefa, e vola ni o Jisu na luvei Josefa vakacabecabe e dodonu ga vakalawa me nona na idabedabe vakatui i Tevita. Na vuna? Ni kawa i Tui Tevita o Josefa e basika ena iyatukawa i Solomoni na luvena. (Maciu 1:6, 16) Ia o Luke e vakamacalataka vakamatata na iyatukawa i Meri, e vola ni o Jisu ga na kawa “a sucu vakatamata,” ena idabedabe vakatui i Tevita. (Roma 1:3) Na vuna? Ni kawa i Tui Tevita o Meri e basika ena iyatukawa i Necani na luvena. (Luke 3:31) Ia na cava e sega kina ni volai Meri o Luke me luvei Ili, na tamana? Baleta e dau kena ivakarau ga me volai na yacadra na tagane ena iyatukawa. Ni volai Josefa gona o Luke qai vakamacalataka ni luvei Ili, e kena ibalebale ga ni o Josefa e vugoi Ili.—Luke 3:23.

E matata ena iyatukawa rau vola o Maciu kei Luke ni o Jisu ga na Mesaia e parofisaitaki. Na kena volatukutukutaki vakadodonu nona iyatukawa e kilai levu kina, era sega ni vakacala rawa na Farisi kei na Setoki. Nikua, na iyatukawa e vola o Maciu kei Luke se okati tiko ga me yavu ni noda vakabauta, e vakadeitaka tale ga na dina ni vosa ni yalayala ni Kalou.