Yalo ni Kirisimasi e Vakilai ena Loma ni Yabaki?

“Sa nona na Kalou na vakarokoroko e na veiyasana ecake sara! A sa veivinakati rawa ko ira e vuravura: sa lomani [“vakadonui,” NW] ko ira na tamata.”​—Luke 2:14.

ERA kila vinaka tu e vica vata na milioni na itukutuku era vakarogoya oqori na agilosi ni Kalou vei ira na ivakatawanisipi era vakatawa tiko ena bogi oya. Na itukutuku oqo e baleta tiko na sucu i Jisu. Levu gona era kaya nira lotu Vakarisito era dau saga mera veisautaka na nodra ivakarau ni bula ni donuya na tikinisiga era kaya e so na lotu ni a sucu kina o Jisu. Vaka me sa dau ivakarau matau tu ni Kirisimasi na marau, veikauaitaki, kei na veilomani, na itovo se ivalavala era vakarogoya na agilosi ena bogi oya.

E so sara mada ga e sega ni nodra soqo ni lotu na Kirisimasi era sa bau mai uqeti tu ena ivakarau ni bula e dau vakavotui ena gauna oqori. Era taleitaka na yalo ni veikauaitaki e dau laurai ena siga oya. Dau sega na cakacaka se vuli ena olodei ni Kirisimasi, qai gauna vinaka ni nodra vakacegu na tamata, ra veimaliwai kina vakavuvale, vakaveitokani, se ra marau ga vakataki ira. Ia, e levu na tamata e vinaka na inaki ni lomadra era dau raica na Kirisimasi me gauna e vakarokorokotaki kina o Jisu Karisito.

Se mani cava era tukuna me baleta na Kirisimasi, e levu era duavata ni ivakarau ni bula e dau votu ena gauna ni olodei oqo e dau lekaleka wale ga. Ni oti ga, sa ra dui suka tale ina nodra ivakarau ga ni bula e liu. Ena dua na ivola e kena ulutaga “Na Yalo ni Kirisimasi,” e tabaka na Royal Bank of Canada, e kaya: “Levu vei ira na kaya tiko nira ‘lotu Vakarisito’ era na vakaitovotaki ira ga me vaka na lotu Vakarisito ena loma ni dua wale ga macawa ena veiyabaki, nira lomani ira na nodra itokani, ia ni oti ga na vakatawase, sa ra lesu tale ina nodra ivakarau ni bula e liu ni tawaveinanumi, oti tale ga nodra veikauaitaki.” E kaya tale na ivola oqo ni “kena leqa wale ga” ni yalo ni Kirisimasi e dau “vagauna ga.”

Se o duavata kei na tikina oqo se sega, e votu kina e so na taro bibi. Era na rawa beka ni dau veikauaitaki se veinanumi tu ga na tamata? E tiko beka na inuinui ni na yaco dina na itukutuku a vakarogoya na agilosi ena bogi a sucu kina o Jisu? Se tadra wale ga na inuinui ni bula veisaututaki a tukuni oya?