LESONI 55

Tokona Nomu iVavakoso

iLavelave e Tabaki

E veiyasa i vuravura, e vica vata na milioni era marautaka nodra qaravi Jiova ena vica vata na udolu na ivavakoso. Era vakavinavinakataka na veivakavulici kei na veidusimaki ena ivavakoso ra qai tokona ena levu na sala. O raica va qori na nomu ivavakoso?

1. O na vakayagataka vakacava nomu gauna kei na nomu kaukaua mo tokona na ivavakoso?

Eda rawa kece ni veitokoni ena ivavakoso. Kena ivakaraitaki, vakacava era tiko ena nomu ivavakoso eso na itabaqase se so na malumalumu? O rawa ni veivuke ena nodra ilakolako ena soqoni, se so tale na ka me vaka na volivoli se na cakacaka e vale? (Wilika Jemesa 1:27.) Eda rawa tale ga ni veivuke ena kena samaki qai vakavinakataki na noda Vale ni Soqoni. E sega ni dua e vakasaurarataki keda meda cakava qori. E uqeti keda noda lomana na Kalou kei ira na tacida meda “yalorawarawa ni cabori [keda].”—Same 110:3.

E levu na sala era na rawa ni tokona kina na ivavakoso o ira na papitaiso. E rawa nira dauveiqaravi na tacida tagane era rawata na kena ivakatagedegede, toso na gauna mera lai veiqaravi vaqase. E rawa nira tokona vakalevu na cakacaka vakavunau na tacida tagane kei na yalewa nira painia. Eso tale e rawa nira veivuke ena kena tara na vale ni sokalou se mera toki ena ivavakoso e gadrevi tu kina na veivuke.

2. Eda na vakayagataka vakacava noda iyau meda tokona na ivavakoso?

Eda rawa ni “rokovi Jiova ena [noda] iyau.” (Vosa Vakaibalebale 3:9) Eda raica me ka dokai noda cau vakailavo kei na noda vakayagataka noda iyau me tokona noda ivavakoso kei na cakacaka vakavunau e veiyasa i vuravura. (Wilika 2 Korinica 9:7.) E vakayagataki tale ga na noda cau ena vakacoko. E levu era vakatulewataka mera “biuta vakatikitiki eso na ka” mera cau kina ena levu na gauna. (Wilika 1 Korinica 16:2.) E rawa nida biuta noda cau ena kato ni cau ena noda vanua ni sokalou, se cau ena Internet ena donate.jw.org. O Jiova e solia vei keda na galala ni vakatulewa meda vakaraitaka noda lomani koya ena sala meda cau kina.

VAKEKELI

Vakasamataka eso na sala mo tokona kina na ivavakoso.

3. Eda rawa ni vakayagataka na noda iyau

O Jiova e taleitaki ira na soli ka ena marau, e va tale ga qori o Jisu. Kena ivakaraitaki, o Jisu e kauaitaka na yada dravudravua e saga me solia nona cau. Wilika Luke 21:1-4, qai veivosakitaka na taro qo:

E tukuni sara meda cautaka e levu na ilavo me marau kina o Jiova?
Na cava nodrau rai o Jiova kei Jisu nida cau mai vu ni lomada?

Mo kila na sala e vakayagataki kina na cau, sarava na VIDIO qai veivosakitaka na taro tarava.

VIDIO: ‘Soli iLoloma Vei Jiova’ (4:47)

E vakayagataki vakacava na cau me yaga ena ivavakoso e veiyasa i vuravura?

E dua na tacida yalewa itabaqase e biuta tiko nona cau ena kato ni cau.

4. Eda rawa ni bolecakacaka

Ena gauna vakaivolatabu, era dau gumatua na dauveiqaravi i Jiova mera taqomaka nodra vanua ni sokalou. E sega ni okati ga kina na cau vakailavo. Wilika 2 Veigauna 34:9-11, qai veivosakitaka na taro qo:

Era dau qarava vakacava na Isireli na vale i Jiova se na vanua ni sokalou?

Mo kila na sala era vakatotomuria kina na iVakadinadina i Jiova na nodra ivakaraitaki ena gauna vakaivolatabu, sarava na VIDIO qai veivosakitaka na taro tarava.

VIDIO: Qaravi ni Noda Vanua ni Sokalou (3:31)

Na iyaloyalo mai na vidio ‘Qaravi ni Noda Vanua ni Sokalou.’ Era samaka tiko na Vale ni Soqoni na tagane, yalewa kei na gone.

Na cava e bibi kina me savasava tiko ga na Vale ni Soqoni qai vakavinakataki?
Na cava eso na sala o rawa ni veivuke kina?

Eso na tacida era bole ena tara Vale ni Soqoni.

5. Na itavi e rawa nira qarava na tacida tagane

Na iVolatabu e uqeti ira na tagane lotu vaKarisito mera solia na nodra vinaka taucoko mera tokona na ivavakoso. Mo raica e dua na kena ivakaraitaki, sarava na VIDIO qai veivosakitaka na taro tarava.

VIDIO: Kemuni na Tagane—Moni Qarava na Cakacaka Vinaka (5:19)

Ena vidio, na cava e cakava o Ryan me tokona vakalevu na ivavakoso?

E tukuni ena iVolatabu na ivakatagedegede mera rawata na tacida tagane mera dua na dauveiqaravi kei na qase ni ivavakoso. Wilika 1 Timoci 3:1-13, qai veivosakitaka na taro qo:

Na cava e namaki vei ira na tacida tagane era dauveiqaravi ni ivavakoso kei ira na qase?
Na cava e namaki vei ira nodra lewenivuvale?—Raica na tikina e 4 kei na 11.
Nira saga na tacida tagane mera rawata na ivakatagedegede qori, ena yaga vakacava vei ira kece ena ivavakoso?

E biliga tiko e dua na tacida itabagone na nona idabedabe qiqi e dua na tacida itabaqase ni rau vunau e veivale.

KE TAROGA E DUA: “E kau mai vei nodra ilavo na iVakadinadina i Jiova?”

O na sauma vakacava?

KA O VULICA

E marautaka vakalevu o Jiova noda sasaga nida tokona na ivavakoso nida vakayagataka noda gauna, kaukaua kei na noda iyau.

Railesuvi

Eda na vakayagataka vakacava na noda gauna kei na noda kaukaua meda tokona na ivavakoso?
Eda na vakayagataka vakacava na noda iyau meda tokona na ivavakoso?
Na cava eso tale na sala o via tokona kina na ivavakoso?

Vakaoti na lesoni ena:

iSausau

Saga mo veivuke ena kena samaki qai vakavinakataki na vanua era soqoni kina nomu ivavakoso.

Eso tale:

Dua tale nomu isausau

IKURI

Dikeva na vuna sa sega ni lavaka kina na Kalou e dua na ikatini vei ira na nona dauveiqaravi.

“Cava e Kaya na iVolatabu me Baleta na iKatini?” (Ulutaga ena jw.org)

E vakamacalataka na iVolatabu eso nodra itavi na tagane papitaiso. Ia vakacava ke vinakati me qarava na itavi qori e dua na tacida yalewa papitaiso?

“Me Matata Vei Keda Nodra iTavi na Qase ni iVavakoso?” (Na Vale ni Vakatawa, Feperueri 2021)

Sarava na nodra yaloqaqa eso na tacida tagane nira kauta na ivola vei ira era vakabauta vata.

Veisoliyaki na iVola Vakaivolatabu e Congo (4:25)

Dikeva na sala e duatani kina na kena vakailavotaki na noda cakacaka ni vakatauvatani kei na vo ni lotu.

“E Vakailavotaki Vakacava Nodra Cakacaka na iVakadinadina i Jiova?” (Ulutaga ena jw.org)