“Sa Voleka na Siga Levu i Jiova”
“Sa voleka na siga levu i Jiova, sa voleka mai, io sa kusa sara mai.”—SEFANAIA 1:14, NW.
1, 2. (a) Na siga uasivi cava era namaka tiko na lotu Vakarisito? (b) Na taro cava so e dodonu meda taroga, ena vuku ni cava?
E WARAKA toka e dua na goneyalewa mamarau na siga me na vakamau kina. Na tina e tiko bibi e nanamaki tiko ina gauna me sucu kina na luvena. Na tamata cakacaka e vakila tiko na oca sa waraka toka ga me tekivu nona gade. Na cava eratou namaka kece tiko? Eratou waraka kece tiko e dua na siga marautaki, na siga ena vakilai levu ena nodratou bula. Eratou nanamaki kece tiko ia e duidui na ka eratou vinakata. Ena yaco mai na siga eratou waraka tiko, ia ni sa yaco mai, eratou nuitaka ni ratou sa tu vakarau.
2 Era waraka tale tiko ga na lotu Vakarisito dina nikua na kena yaco mai e dua na siga uasivi. Oya na ‘siga levu i Jiova.’ (Aisea 13:9; Joeli 2:1; 2 Pita 3:12) Na cava na “siga i Jiova” sa roro tiko mai, ena vakila vakacava na kawatamata ni sa yaco mai? Eda vakadeitaka vakacava nida sa nanamaki tiko ina kena yaco mai na siga oya? E dodonu meda kila sara ga ena gauna oqo na isau ni veitaro oqori baleta ni sega ni vakatitiqataki na vosa oqo mai na iVolatabu: “Sa voleka na siga levu i Jiova, sa voleka mai, io sa kusa sara mai.”—Sefanaia 1:14, NW.
“Na Siga Levu i Jiova”
3. Na cava “na siga levu i Jiova”?
3 Na cava na “siga levu i Jiova”? Ena iVolatabu, na matavosa “na siga i Jiova” e dau vakaibalebaletaki ina gauna e tauca kina nona cudru o Jiova vei ira nona meca me vakalagilagi kina na yacana. O ira na tamata tawayalodina e Juta kei Jerusalemi kei ira na kai Papiloni kei Ijipita era vakila na “siga i Jiova” ena gauna e tauci kina vei ira na cudru i Jiova. (Aisea 2:1, 10-12; 13:1-6; Jeremaia 46:7-10) Ia e se bera mai na “siga i Jiova” e levu duadua. Oqo na “siga” ena cudruvi ira kina na vakarogocataka na yacana o Jiova. Ena tekivu na nona cudru ena nona vakarusai “Papiloni na Ka Levu,” oya na lotu lasu kece e vuravura, qai tini ena nona vakarusa vakadua na ivakarau ni bula ca oqo e vuravura ena Amaketoni.—Vakatakila 16:14, 16; 17:5, 15-17; 19:11-21.
4. Na cava e dodonu mera rerevaka kina na tamata na siga i Jiova sa roro voleka mai?
4 Se era vakila se sega, e levu vei ira na tamata e dodonu mera rerevaka na siga sa roro voleka mai oqo. Baleta? E sauma o Jiova ena gusu i Sefanaia na parofita: “A siga ni cudru na siga ko ya, na siga ni ca kei na rarawa, a siga ni veivakacacani kei na veivakarusai, a siga butobuto ka loaloa.” E siga vakarerevaki dina! E kuria na parofita: “Ka’u na vakararawataki ira na tamata . . . ni ra sai valavala ca vei Jiova.”—Sefanaia 1:15, 17.
5. E vakacava na nodra raica e vica na milioni na lako mai ni siga i Jiova, ena vuku ni cava?
5 Ia e vica na milioni era namaka tiko na kena lako mai na siga i Jiova. Ena vuku ni cava? Era kila ni oya e gauna era na vakabulai kina na yalododonu, na siga ena vakacerecerei kina o Jiova qai vakarokorokotaki tale ga kina na yacana. (Joeli 3:16, 17; Sefanaia 3:12-17) Se era na rerevaka se namaka na siga oya na tamata ena vakatau sara ga ena veika era cakava tiko ena gauna oqo. E vakacava na nomu raica na roro mai ni siga oya? O sa namaka tiko? E lewa beka na veika o cakava tiko e veisiga na kena sa roro voleka mai na siga i Jiova?
‘Era na Lako Mai e So na Dauveivakasewasewani’
6. Era raica vakacava na “siga i Jiova” e levu na tamata, na cava era sega ni kurabuitaka kina na lotu Vakarisito dina?
6 Dina ga ni toso totolo sara tiko mai na gauna oya, ia e levu na lewe i vuravura era sega ni bau kauaitaka na “siga i Jiova.” Era vakasewasewani ira ga na kacivaka tiko na kena sa voleka mai na siga oya. Ia era sega ni kurabui kina na lotu Vakarisito dina. Era nanuma ga na ivakasala i Pita na yapositolo: “Ni dou sa kila mada oqo, ni na lako mai e na gauna emuri sara eso na dauveivakasewasewani, era na dauvakadamurimuria na nodra gagadre ca, ka kaya, Evei na vosa ni yalayala ni na lako tale mai ko koya? ni ra sa moce ga na qase, a sa tu dei tiko vakakina na ka kecega me vaka ni sa buli e nai vakatekivu.”—2 Pita 3:3, 4.
7. Na cava ena uqeti keda meda kauaitaka tiko ga na lekaleka ni gauna sa vo?
7 Na cava ena vukei keda meda kua ni vakatitiqa ia meda kauaitaka tiko ga na lekaleka ni gauna sa vo? E tukuna vei keda o Pita: “Au sa vakauqeta kina na yalomudou e savasava mo dou nanuma kina: mo dou vakananuma na vosa era sa vosataka eliu na parofita yalosavasava, kei na neitou vunau nai apositolo ni Turaga nai Vakabula.” (2 Pita 3:1, 2) Na noda kauai ina veika e parofisaitaki ena ‘uqeti kina na yaloda.’ Eda sa rairai rogoca wasoma na ivakasala oqo, ia sa qai gadrevi ga vakalevu ena gauna oqo meda rogoca tiko ga na ivakasala oqori.—Aisea 34:1-4; Luke 21:34-36.
8. Na cava era sega ni via muria kina na ivakasala ena iVolatabu e lewe levu?
8 Na cava era sega ni via rogoca kina na ivakasala oqo e so? E tomana o Pita: “Era sa nakita sara ga vaka i ira me ra vakanadakuya na ka dina oqo, ko ya ni vosa ga ni Kalou a bulia na lomalagi e na gauna makawa sara, ka a bulia kina e dua na vuravura mai na wai. Ia e na wai tale ga e a luvuci ka vakarusai kina na vuravura ka a tu e na gauna ko ya.” (2 Pita 3:5, 6, VV) Io, era tiko e so era sega ni vinakata me lako mai na siga i Jiova. Era sega ni vinakata me vakacacani na ivakarau ni nodra bula. Era sega tale ga ni vinakata me lewai ira o Jiova! Me vaka e tukuna o Pita, ‘era dau muria ga na nodra gagadre.’
9. E vakacava na nodra rai na tamata ena gauna i Noa kei Loti?
9 O ira na dauveivakasewasewani oqo era “nakita” na nodra sega ni via kauaitaka na nona dau curu mai o Jiova ena veika e cakava na tamata ena veigauna sa oti. Rau cavuta ruarua o Jisu Karisito kei na yapositolo o Pita e rua na gauna vaka oqori, oya na “gauna i Noa” kei na “gauna i Loti.” (Luke 17:26-30; 2 Pita 2:5-9) O ira na bula tu ni se bera toka ga na Waluvu era sega ni kauaitaka na ivakasala i Noa. E vaka kina ni bera na kena vakarusai o Sotoma kei Komora, o Loti e “vaka e dua na dauveivakalialiai” vei rau na vugona.—Vakatekivu 19:14.
10. Na cava ena cakava o Jiova vei ira na sega ni kauai?
10 E vakatale ga kina ena gauna oqo. Ia oqo na ka e kaya o Jiova vei ira na sega ni kauai: “Ka’u na . . . cudruvi ira na tamata era vaka na waini sa cevata tu e na kena soko, era kaya e lomadra, Ena sega ni cakava na ka vinaka ko Jiova, ena sega talega ni cakava na ka ca. Ia na nodrai yau ena tauri mei toki ni valu, kei na nodra veivale sa na rusa: ka ra na tara vale, ka ra na sega ni tiko kina; ka ra na tea na veiwere-ni-vaini, ka ra na sega ni gunuva na kena waini.” (Sefanaia 1:12, 13) Era na vakaliuca tu ga na nodra cakacaka ni veisiga na tamata, ia ena sega ni tudei na yaga ni nodra cakacaka oya. Baleta? Ni na lako vakasauri mai na siga i Jiova, ena sega ni vakabulai ira na iyau vakayago era kumuna tiko.—Sefanaia 1:18.
“Mo Waraka Ga”
11. Na ivakasala cava meda nanuma vinaka tiko?
11 Meda kua ni vakataki ira na tu yavoliti keda ena vuravura ca oqo, meda nanuma dei tiko ga na ivakasala e vola na parofita o Apakuki: “Ni na dede mada na raivotu me qai yaco na gauna sa loku, ia ni sa yaco nai otioti ni gauna, ena qai vosa, ena sega ni lasu: kevaka ena berabera, mo waraka ga; ena yaco vakaidina ga, ena sega ni berabera sara.” (Apakuki 2:3) Kevaka ena noda rai na tamata ivalavala ca e vaka e berabera tiko na siga oya, meda nanuma tiko ni sega ni dau bera o Jiova. Ena yaco mai na nona siga ena kena gauna dodonu, ena gauna eda sega ni namaka na tamata.—Marika 13:33; 2 Pita 3:9, 10.
12. Na cava e vakasalataka o Jisu, e duidui vakacava kei na ka era cakava na imuri yalodina i Jisu?
12 Me vakaraitaka na kena bibi ni noda namaka tiko na siga i Jiova, e tukuna o Jisu ni na so mada ga na nona imuri era na wele. E parofisaitaka me baleti ira: “Kevaka e mani kaya ga e lomana na dauveiqaravi ca ko ya, ‘E na yaco vakaberabera toka mai na noqu turaga,’ ka sa mani tekivu kina me vakayaviti ira na nona i tokani, ka kana, ka gunu, ka mateni. Ni na qai yaco mai na nona turaga na tamata ko ya e na dua na siga e sega ni bau namaki koya kina, e na dua na gauna e sega ni kila, ka na totogitaki koya.” (Maciu 24:48-51, VV) Me kena veibasai, e kauaitaka tiko ga na dauveiqaravi yalodina ka vuku na lekaleka ni gauna sa vo. E yadra tiko ga qai vakavakarau vinaka tiko. Sa lesi koya gona o Jisu me “lewa na nona ka kecega” e vuravura.—Maciu 24:42-47, VV.
Gadrevi Meda Kua ni Vakawelewele
13. E vakabibitaka vakacava o Jisu me kua na vakawelewele?
13 A dodonu vei ira na lotu Vakarisito ena imatai ni senitiuri mera kua ni vakawelewele. A vinakati mera dro tani vakatotolo mai na koro o Jerusalemi ena gauna era sa raica kina “ni ra sa vakavolivoliti Jerusalemi na veimataivalu.” (Luke 21:20, 21, VV) E yaco oqori ena yabaki 66 S.K. Dikeva na nona vakabibitaka o Jisu mera kua ni vakawelewele na lotu Vakarisito ena gauna oya: “Me kakua ni siro mai ko koya sa toka e dela ni vale me mai kauta tani na veika e nona vale; ka me kakua ni lesu ko koya sa tiko e na i teitei, me la’ki kauta mai na nona i sulu.” (Maciu 24:17, 18, VV) E vakaraitaka na ivolaitukutuku ni a se tu ga o Jerusalemi me va tale na yabaki, ia na cava a vinakati kina vei ira na lotu Vakarisito mera muria na vosa i Jisu oya ena 66 S.K.?
14, 15. Na cava e vinakati kina vei ira na lotu Vakarisito ena imatai ni senitiuri mera dro totolo ena gauna era raica kina nira sa keba wavokiti Jerusalemi na mataivalu?
14 Era qai vakarusai Jerusalemi na mataivalu ni Roma ena 70 S.K., ia sa bau dua na ka na leqa kei na rarawa e sotavi ni bera na yabaki oya. E vakayacori vakalevu ena loma ni gauna oqori na itovo voravora kei na veivakamatei. E vakamacalataka e dua na daunitukutuku ni a yaco tiko e Jerusalemi na “veivaluvaluti rerevaki sara kei na veivakalolomataki levu.” Era vakacurumi ena mataivalu na cauravou ra qai vakaiyaragi mera taqomaka na koro. Era vuli ivalu e veisiga. O ira na sega ni tokona na sasaga oya era okati mera meca. Ke ra tu voli ena koro oya na lotu Vakarisito, ke ra sotava e dua na gauna rerevaki sara.—Maciu 26:52; Marika 12:17.
15 Meda nanuma tiko ni a kaya o Jisu mera dro o ira na “tiko e Jutia,” sega ni o ira ga na tiko e Jerusalemi. A bibi me muri na vosa oya baleta ni oti ga e vica na vula na nodra biuti Jerusalemi, era suka tale mai na mataivalu ni Roma mera mai vakacibivalu. Era vakavuai Kalili ena 67 S.K., ra qai valuta veitaravi na vanua o Juta ena yabaki e tarava. Era leqa vakaca sara kina na lewenivanua. Sa dredre tale ga vei ira na Jiu mera dro tani mai Jerusalemi. E yadravi tiko na kena matamata, ke dua e dro e kena ibalebale ni sa lai to vata mai kei ira na kai Roma.
16. Na cava e vinakati mera cakava na lotu Vakarisito ena imatai ni senitiuri me rawa kina nira vakabulai mai na rarawa?
16 Nida vakasamataka na veika e yaco oya, eda rawa ni raica kina na vuna a kaya kina o Jisu mera kua ni vakawelewele. A vinakati vei ira na lotu Vakarisito mera vakuai ira ena veika e so, mera kua ni vakawelei ena taukeni ni iyau vakayago. A gadrevi mera yalorawarawa mera ‘biuta na nodra ka kece ga’ me rawa kina nira muria na ivakasala i Jisu. (Luke 14:33) O ira kece na talairawarawa ra qai dro totolo ina tai kadua ni Joritani era vakabulai.
Kua Sara ni Wele
17. Na cava meda kua sara ga kina ni vakawelewele?
17 E vakaraitaka na parofisai ena iVolatabu nida sa bula tiko oqo ena gauna ni ivakataotioti. Sa qai vinakati vakalevu ga ena gauna oqo meda kua ni vakawelewele. Na sotia e curu ena gauna ni veisaututaki e sega ni kila na rerevaki ni ivalu. Ia kevaka e wele tu ga qai kacivi vakasauri me lako ina ivalu, ena rawa ni sotava na leqa baleta ni a wele voli. E vaka kina ena veika vakayalo. Kevaka eda vakawelewele tu ga, eda na sega ni rawa ni taqomaki keda nida valuti qai rawa tale ga ni yaco vakidacala vei keda na siga i Jiova. (Luke 21:36; 1 Cesalonaika 5:4) Ke so era sa “vuki tani vei Jiova,” oqo sara ga na gauna mera lesu kina vua.—Sefanaia 1:3-6; 2 Cesalonaika 1:8, 9.
18, 19. Na cava ena vukei keda meda waraka tiko ‘na kena yaco mai na siga i Jiova’?
18 Sa rauta me vakaroti keda na yapositolo o Pita meda waraka tiko ‘na kena yaco mai na siga i Jiova’! Eda na waraka tiko vakacava? Dua, ena noda “[i]valavala savasava kei na daulotu.” (2 Pita 3:11, 12) Noda ogaoga tiko ena veicakacaka oqori ena vukei keda meda namaka tiko na ‘siga i Jiova.’ Na vosa vaKirisi e vakadewataki tiko oqo me ‘waraka tiko’, e kena ibalebale na “vakatotolotaka.” E sega ni rawa meda vakatotolotaka na gauna me na yaco mai kina na siga i Jiova. Ia, nida waraka tiko na siga oya, ena vaka e toso totolo na gauna kevaka eda ogaoga tiko ena cakacaka ni Kalou.—1 Korinica 15:58, VV.
19 Noda vakananuma na veika e tukuna na Vosa ni Kalou da qai vakasamataka vinaka na kena ivakasala ena rawa kina meda “waraka tiko ka vakusakusataka tiko na yaco mai” ni siga oya, io, meda ‘waraka tiko ga.’ (2 Pita 3:12 VV) Era okati ena ivakasala oqo na vica vata na parofisai era parofisaitaka na yaco mai ni siga i Jiova kei na veivakalougatataki lelevu era na vakila o ira na ‘waraki Jiova tiko ga.’—Sefanaia 3:8.
20. Na ivakasala cava meda katona i lomada?
20 Oqo sara ga na gauna meda katona vinaka kina i lomada na ivakasala a soli vua na parofita o Sefanaia: “Ni sa bera ni yacovi kemudou na cudru waqawaqa i Jiova, ni sa bera ni yacovi kemudou na siga ni cudru i Jiova. Dou vakasaqarai Jiova, oi kemudou kece sa yalomalumalumu e na vanua, oi kemudou sa cakava na nona lewa; dou qara mada na yalododonu, vakasaqara na yalomalumalumu: dou na vuni beka kina e na siga ni cudru i Jiova.”—Sefanaia 2:2, 3.
21. Na cava e nodra inaki na tamata ni Kalou ena yabaki 2007?
21 E veiganiti kina na kena digitaki me tikinivolatabu ni yabaki 2007: “Sa voleka na siga levu i Jiova.” Era sega ni vakabekataka na tamata ni Kalou ni “sa voleka mai, io sa kusa sara mai.” (Sefanaia 1:14, NW) “Ena sega ni berabera sara.” (Apakuki 2:3) Nida waraka tiko na siga oya, meda vakasamataka tiko na gauna eda bula tiko kina oqo, ni sa voleka sara oqo na gauna me vakayacori kina na veiparofisai oqori!
O Rawa ni Sauma?
• Na cava “na siga levu i Jiova”?
• Na cava era sega ni kauaitaka kina e lewe levu na lekaleka ni gauna sa vo?
• Na cava a vinakati kina mera kua ni vakawelewele na lotu Vakarisito ena imatai ni senitiuri?
• Eda na sega ni vakawelewele vakacava o keda?
[Tikina bibi ena tabaan e 19]
Oqo na tikinivolatabu ni yabaki 2007: “Sa voleka na siga levu i Jiova.”—Sefanaia 1:14, NW.
[iYaloyalo ena tabana e 17]
Me vaka ena gauna i Noa, era na kidacala na dauveivakasewasewani ni sa yavala o Jiova
[iYaloyalo ena tabana e 18]
Era sega tale ni vakawelewele na lotu Vakarisito nira raica “ni ra sa vakavolivoliti Jerusalemi na veimataivalu”