‘Meda Yadra Tiko’—Na Cava e Rui Bibi Kina?

‘NA CAVA na ivakatakilakila e dusia ni oni sa tiko, kei na ivakataotioti ni veika vakavuravura?’ (Maciu 24:3) E sauma o Jisu na taro qori ena nona cavuta eso na ivakatakilakila matata, matailalai, kilai levu qai donu. Qo era volatukutukutaki tu ena Maciu wase 24, Marika wase 13, kei na Luke wase 21. E tomana: “Mo dou yadra tiko.”—Maciu 24:42.

Ke sa matata tu na ivakatakilakila e tukuna o Jisu, cava ga e qai veivakasalataki tale kina? Vakasamataka mada e rua na ka e rawa ni yaco. Kena imatai, na ka e dau veivakawelei e rawa nira raica kina vakamamada eso na ivakatakilakila, yaco sara mera malumu vakayalo ra qai sega ni yadrayadravaki. Kena ikarua, e rawa ni kila na ivakatakilakila e dua na lotu vaKarisito, ia ni sega ni sotava na leqa ena vanua e vakaitikotiko kina, ena sega ni kauai sara. E rawa ni lai nanuma kina ni nona parofisai o Jisu me baleta na “veivakararawataki levu” e se yawa toka qai sega ni gadrevi vua me “yadra tiko.”—Maciu 24:21.

“Era Sega ni Bau Kauai”

E tukuna o Jisu vei ratou na nona imuri na nodra ivakaraitaki o ira era bula ena gauna i Noa. E kilai vinaka ena gauna i Noa na nona vunau, na kena tara na waqa vakaitamera, kei na ivalavala voravora ena gauna oya, ia e levu “era sega ni bau kauai.” (Maciu 24:37-39) Nikua tale ga e levu era sega ni kauai ena veivakasalataki e caka tiko. Me kena ivakaraitaki, e laurai vinaka tu na ivakatakilakila e gaunisala me baleta na iyalayala ni siviti ni motoka, ia e levu era sega ni dau kauaitaka. Levu na gauna era dau biuta na ivakalesilesi eso na ka e gaunisala me rawa nira vakamalua kina na draiva. E rawa ni va tale ga qori e dua na lotu vaKarisito, oya ni rawa ni kila na ivakatakilakila ni otioti ni veisiga, ia e se vakaogai koya ga ena ka e dau veivakawelei. Qori sara ga na ka a sotava o Arielle, e dua na itabagone ena Ra kei Aferika.

E dau taleitaka o Arielle me sarava ena tivi na nodra qitotaka na marama e dua na qito e vakatokai na handball. Ni tuvanaki me dua na nodra timi ni koronivuli, dua na ka na nona via vakaitavi o Arielle, e sega ni liaca ni qori ena vakaleqa na nona veika vakayalo. E digitaki me goalkeeper. Na cava qai yaco? E tukuna: “Eso na nodra itau na noqu lewenitimi era dau vakayagataka na wainimate gaga kei na tavako. Era vakalialia au niu sega ni duavata kei ira ena ka era cakava, ia au nanuma niu na sega ni rawai. E ka ni kidacala, sa tekivu vakamalumalumutaki au vakayalo na qito qori. Au sa vakananuma tu ga e veigauna na qito qo. Ena gauna mada ga ni soqoni, levu na gauna e dau ciri yawa na noqu vakasama ena rara ni qito. E veisau tale ga na noqu itovo vaKarisito. Au sega wale ga ni taleitaka, au sa vinakata sara ga meu qaqa. Au dau tereni vakaukaua meu rawa ni qaqa kina. E tekivu meu lomaocaoca. Au sa sega ni kauaitaki ira vakalevu na noqu itokani, e bibi ga vei au na qito.

“Dua na gauna a totogitaki na neitou timi, a soli vei ratou na timi ka dua me ratou caqe e matamata. Au tu vakarau sara tu ga meu tarova na polo me kua ni curu. Au sega mada ga ni kidava niu sa masuti Jiova tu me vukei au meu tarova me kua ni curu na polo! Au liaca sara ga eke ni sa sega ni vinaka na noqu bula vakayalo. Au qai vakavinakataka vakacava na noqu ka vakayalo?

“Au sa sarava oti na DVD na Young People Ask—What Will I Do With My Life?a Au mani nanuma meu sarava tale mada, ia qo meu vakasamataka vakabibi. Na ka e sotava o André, na cauravou e vakaraitaki tiko ena drama, e tautauvata kei na ituvaki au sotava tiko. Au vakasamataka sara vakabibi na ka e tukuna na qase ni ivavakoso vei André: wilika qai vakasamataka na ka e tukuni ena Filipai 3:8. Qori sara ga na ka au cakava, au sega tale ni via lewena na timi ni koronivuli.

“E dua sara ga na veisau levu! E yali sara ga na yalo ni veisisivi kei na lomaocaoca. Au sa qai vakila na marau dina, au veivolekati tale ga kei ira na noqu itokani vaKarisito. Au raica ni sa qai vakaibalebale vakalevu na veika vakayalo. Sa sega ni veiciriyaki na noqu vakasama ena soqoni, au sa marautaka tale ga na tiko kina. E vinaka na noqu cakacaka vakaitalatala. Au dau painia veivuke tale ga vakalevu.”

Ke dua na ka e vakawelei iko tiko mo sega kina ni raica vakabibi na ivakatakilakila e tukuna o Jisu, mo vakatotomuri Arielle, oya mo cakava eso na veiveisau. O rawa ni tovolea eso na vakatutu qo. Raica na Watch Tower Publications Index, e dau vakatokai tu me idusidusi ina iyau talei era vuni tu. Ena dusia vei iko na ivola e tu kina na ivakasala yaga kei na nodra italanoa eso era sotava na veitemaki. Ena yaga na soqoni vaKarisito ke o dau vakavakarau vinaka kei na nomu dau vakavola eso na tikina yaga. Eso era raica ni vinaka mera dau dabe sara ga e liu. Ni dau caka na veitarotarogi ena soqoni, tovolea mo saumitaro e liu. Kuria qo, mo yadra tiko ga vakayalo ena nomu veidutaitaka na itukutuku vovou kei na ivakatakilakila e vakaraitaka ni sa “iotioti ni veisiga.”—2 Tim. 3:1-5; 2 Pita 3:3, 4; Vkta. 6:1-8.

“Dou Vakarau”

E yaco tiko e “veiyasa i vuravura” na ivakatakilakila ni iotioti ni veisiga. (Maciu 24:7, 14) E milioni era bula ena vanua e yaco tu kina vakalevu na matedewa, na leqa ni kakana, uneune kei na so tale na ka e parofisaitaki tu. Ia e levu era tu ena vanua e sega kina ni vakilai qori. Ke o se bera ni donuya e dua na ivakatakilakila a parofisaitaki, vakacava o nanuma ni se yawa na gauna ni veivakararawataki levu? E sega ni ka vakayalomatua qori.

Vakasamataka mada na parofisai i Jisu me baleta na ‘matedewa kei na leqa ni kakana.’ (Luke 21:11) Kena imatai, e sega ni tukuna o Jisu ni na yaco qo ena dua ga na gauna se me tautauvata na kaukaua ni kena vakilai. Ia e tukuna ga ni yaco qo “ena levu na vanua.” Koya gona, meda kua ni nanuma ni na yaco e dua ga na ituvaki ena dua ga na gauna. Kena ikarua, ni oti ga na nona cavuta o Jisu na leqa ni kakana, e dusia ni na vinakati vei ira eso na nona imuri mera qarauna mera kua ni kana sivia: “Dou qarauni kemudou de bibi na lomamudou ena kana vakasivia kei na gunu vakasivia.” (Luke 21:34) Meda kua ni nanuma na lotu vaKarisito nida na vakila kece na ivakatakilakila. E tukuna ga o Jisu: “Ni dou raica ni sa yaco na ka kece qo, dou kila sara ni sa voleka na matanitu ni Kalou.” (Luke 21:31) Na sala ni vakauitukutuku nikua e vakarawarawataka na noda raica na ivakatakilakila kece qori, se mani vakacava na ka eda sotava ena noda dui vanua.

Mo nanuma tale ga ni o Jiova e sa lokuca tu na ‘siga kei na aua’ me tekivu kina na gauna ni veivakararawataki levu. (Maciu 24:36) Ena sega ni veisautaka na tikinisiga oya na kena yaco veitaravi tiko na ivakatakilakila kece qori.

E vakasalataki ira na lotu vaKarisito ena veivanua o Jisu: “Dou Vakarau.” (Maciu 24:44) E dodonu meda vakarau tu e veigauna. E sega ni kena ibalebale qori nida na cakava tu ga ena loma ni dua na siga taucoko na noda cakacaka vakaitalatala. Eda sega tale ga ni kila na ka eda na cakava ena siga e yaco kina na veivakararawataki levu. De dua eso era na teitei tiko ena gauna oya se ra qarava tiko eso na cakacaka ni vale. (Maciu 24:40, 41) Na cava gona eda rawa ni cakava meda vakadeitaka kina nida sa vakarau tu?

O Emmanuel kei Victorine, e ono na luvedrau yalewa, eratou vakaitikotiko ena dua na vanua e Aferika e sega ni vakilai kina e dua na ivakatakilakila a parofisaitaki. Eratou nanuma me ratou dau veitalanoataka na veika vakayalo e veisiga me ratou vakarau tu kina. E tukuna o Emmanuel: “E sega ni rawarawa me tiko e dua na gauna me keitou tiko kece kina na lewenivuvale. Keitou sa mani digia kina me ono ina veimama ni ono ena veimataka. Ni sa dau dikevi oti na tikinivolatabu ni veisiga, keitou na vakarautaka e vica na parakaravu ena dua na ivola ena vulici ena ivavakoso ena macawa oya.” Vakacava, e yaga qori me ratou yadra tiko kina? Io, e yaga dina! Sa kodineita tiko ni ilawalawa qase ni ivavakoso o Emmanuel ena nodratou ivavakoso. O Victorine e dau painia veivuke, e sa vukea tale ga e levu mera mai kila na ka dina. Eratou toso vinaka tale ga vakayalo na luvedrau yalewa.

E uqeti keda o Jisu: ‘Ni vakatawa, ni yadra tiko.’ (Mari. 13:33) Mo kua ni vakalaiva e dua na ka e veivakawelei me vakaleqa nomu yadra vakayalo. Me vakataki Arielle ga, mo raica tale ga vakabibi na ivakasala yaga era tu ena noda ivola vakaivolatabu kei na kena eda rogoca ena gauna ni soqoni. Me vaka ga na vuvale i Emmanuel, saga mo cakava e dua na ka e veisiga mo vakadeitaka kina ni o sa vakarau tu, o qai “yadra tiko.”

[iVakamacala e ra]

[iYaloyalo ena tabana e 4]

Na kena veitalanoataki na veika vakayalo ena vuvale i Emmanuel, e vukei ratou me ratou ‘vakarau tu’