Wase 17
Lesu Mai i Karisito—Ena Raici Vakacava?
1. (a) Na cava a yalataka na Karisito? (b) Ena vuku ni cava e gadrevi kina na lesu mai i Karisito?
“AU NA LAKO TALE MAI.” (Joni 14:3) A yalataka oqo o Jisu Karisito vei iratou na nona i apositolo ena bogi ni se bera ni mate. O na rairai vakadinata ni sa qai gadrevi ga vakalevu na bula vakacegu, na bulabula ni yago, kei na bula ena kauta mai ki na kawatamata na lesu mai i Karisito ena lewa ni Matanitu. Ia e lesu mai vakacava na Karisito? O cei e raici koya, ia ena sala cava?
2. (a) Ni sa na lesu mai na Karisito, e vei na vanua e kauti ira kina na nona imuri lumuti, oka tale tiko ga kina o iratou na nona i apositolo, me ra laki bula kina? (b) Era na vakayagodra vakacava mai kea?
2 Ena sega ni mai bula e vuravura na Karisito ena nona lesu mai. O ira ga era na lewa vakatui vata kei koya era na kau cake me ra laki bula kei koya mai lomalagi. A tukuna o Jisu vei iratou na nona i apositolo: “Au na lako tale mai, ka kauti kemudou vei au; mo dou tiko talega e na vanua ka’u sa tiko kina.” (Joni 14:3) Ni sa na lesu mai na Karisito, era na vuki me ra kabula vakayalo o ira na kau cake ki lomalagi, era na qai raici Karisito ena yagona vakayalo vakaiukuuku. (1 Korinica 15:44) Era na raica li na vo ni kawatamata era sega ni lako ki lomalagi na lesu mai i Karisito?
VUNA E SEGA NI LESU MAI KINA VAKATAMATA
3. Na ivakadinadina cava vaka iVolatabu e vakaraitaka ni ra na sega ni raici Karisito tale na tamata?
3 Ena bogi tiko ga o ya, a qai tukuna vei iratou na nona i apositolo o Jisu: “E na dede vakalailai ga sa na sega ni raici au tale ko vuravura.” (Joni 14:19, VV) Na “vuravura,” e vakaibalebaletaka na kawatamata. E kainaka gona vakamatata e ke o Jisu ni kevaka e sa na lako oti ki lomalagi, sa na sega ni qai raici koya tale vakadua o ira e vuravura. A vola na i apositolo o Paula: “E dina ga keitou a dokai Karisito e na vuku ni ka vakayago, ia keitou sa qai sega tale ni dokai koya kina.”—2 Korinica 5:16.
4. Na cava e vakaraitaka ni na lesu mai o Karisito me vaka e dua na kabula vakayalo kaukauwa e tawarairai?
4 Ia e vuqa era vakabauta ni na lesu mai o Karisito ena yago vata ga a vakamatei kina, ena qai raici koya o ira kece na bula tu e vuravura. E kaya ga na iVolatabu ni na lesu vakaiukuuku mai na Karisito kei ira kece na agilosi, ena tiko tale ga o koya “e na nonai tikotiko vakaturaga sa vakaiukuuku.” (Maciu 25:31) Ke me lako mai o Jisu me mai tiko vakatamata ena i tikotiko vakaturaga e vuravura, sa na lolovira tale vei ira na agilosi. Ia e uasivi ira kece na luve vakayalo oqo ni Kalou o koya ena kaukauwa kei na i ukuuku levu ena nona lako mai. Ena tawarairai gona me vakataki ira ga na agilosi.—Filipai 2:8-11.
5. Ena vuku ni cava ena sega kina ni rawa vei Karisito me lesu mai ena yago vakatamata?
5 Ena yasana kadua, a gadrevi vei Jisu me vakalolovirataki koya me mai tamata ena 1,900 vakacaca na yabaki sa oti. A gadrevi me solia na nona bula vakatamata e taucoko me keda i voli. E vaka oqo na nona vakamacalataka na ka oqo o Jisu: “Na madrai ka’u na solia sa lewequ, o koya ka’u na solia me bula kina ko ira na kai vuravura.” (Joni 6:51) A solia gona na yagona o Jisu me i soro ena vuku ni kawatamata. Ena vakacava sara mada na balavu ni kena mana tiko na i soro o ya? E sauma na i apositolo o Paula: “Eda sa vakasavasavataki kece mai na noda i valavala ca e na i soro sa vakacabora ga vakadua me baleti keda kece na tamata.” (Iperiu 10:10, VV) Ni sa solia oti na Karisito na yagona me bula kina o vuravura, ena sega ni rawa vua me taura lesu me tamata tale. Oqori gona na vuna ena sega ni lesu rawa tale mai kina o koya ena yago vata ga a sa cabora oti vakadua.
SEGA NI KAU CAKE KI LOMALAGI NA YAGONA VAKATAMATA
6. Ena vuku ni cava era vakabauta kina e vuqa ni a kauta na Karisito na yagona vakatamata ki lomalagi?
6 Ia e vuqa era vakabauta ni a kauta ki lomalagi na Karisito na yagona vakatamata. Era kaya ni gauna sa vakaturi kina mai na mate na Karisito, sa yali mai na i bulubulu na yagona vakatamata. (Marika 16:5-7) Ni oti tale ga na nona mate, a rairai o Jisu vei ira na nona tisaipeli ena yago vakatamata me vakaraitaka ni sa bula. A bau vakatarai Tomasi tale ga na i apositolo me daramaka na ligana ki na sarisarina me rawa ni vakabauta kina o Tomasi ni sa vakaturi dina. (Joni 20:24-27) E sega li nivakadinadinataka oqo ni a vakaturi mai na mate o Karisito ena yago vata ga a vakamatei kina?
7. Na cava e vakadinadinataka ni a lako ki lomalagi na Karisito ena yago vakayalo?
7 E sega ni vaka kina. E matata sara na ka e kaya na iVolatabu: “Ni a sa vakararawataki oti tale ga vakadua e na vuku ni i valavala ca ko Karisito . . . ni a vakamatei vakayago ia sa vakabulai vakayalo.” (1 Pita 3:18, VV) E sega ni bula rawa mai lomalagi na tamata vakalewe vakadra. E kaya na iVolatabu me baleta na veivakaturi ki na bula vakalomalagi: “Ni sa tei, sa yago dina ni tamata; ni sa vakaturi cake tale, sa qai yago vakayalo. . . . sa dredre ni rawata na matanitu ni Kalou na yago sa vakalewe ka vakadra.” (1 Korinica 15:44-50) O ira ga na yago vakayalo era na bula rawa mai lomalagi.
8. Na cava a yaco ki na yago vakatamata i Karisito?
8 Ia, qai vakaevei ga na yago vakatamata i Jisu? A sega li ni ratou raica na tisaipeli ni sa lala na nona i bulubulu? Io, e dina, baleta ni a sa kauta tani na yago i Jisu na Kalou. Na cava na vuna e cakava kina oqo na Kalou? E vakayacori kina na ka sa volai tu ena iVolatabu. (Same 16:10; Cakacaka 2:31) E raica gona na Kalou ni ganita me kauta laivi na yago i Jisu, me vaka a vakayacora e liu o koya ki na yago i Mosese. (Vakarua 34:5, 6) Ke me a biu tale tu ga ena i bulubulu na yago, ke ratou a sega tale ga ni vakabauta na tisaipeli i Jisu ni sa vakaturi mai na mate, ni se lailai sara na nodratou kilaka vakayalo ena gauna o ya.
9. A rawa vakacava vei Tomasi me daramaka na ligana ki na mavoa ena yago vakamataliataki i Jisu ena nona sa vakaturi oti?
9 Ia ni a daramaka rawa o Tomasi na ligana ki na sarisari i Jisu, e sega li ni vakaraitaka o ya ni a vakaturi mai na mate o Jisu ena yago vata ga a vakoti kina ki na kau ni veivakararawataki? E sega, ni a vakamataliataki koya ga o Jisu, se vukici koya ki na yago vakatamata me vaka era a dau cakava na agilosi. A taurivaka o koya na yago e tu kina na we ni mavoa me rawa ni vakadinati koya kina o Tomasi. A vaka sara ga na tamata o koya, ni a rawa vua me kana, me gunu tale ga, me vakataki iratou ga na agilosi a vakani iratou o Eparama.—Vakatekivu 18:8; Iperiu 13:2.
10. Na cava e vakaraitaka ni duidui na yago a rairai kina o Jisu?
10 Ni a rairai o Jisu vei Tomasi ena yago e via tautauvata ga kei na kena a vakamatei kina, a duidui tale ga na yago e rairai kina vei ira na Nona imuri. O koya gona o ya, a nanuma kina e liu o Meri na yalewa ni Makitala ni o Jisu na ivakatawa ni were. Ena so tale na gauna, era a sega tu mada ni kilai koya na nona tisaipeli. Ena ituvaki kece oqo, a sega ni vakatakilai koya na kena i rairai, ia na nona vosa ga se ka e cakava.—Joni 20:14-16; 21:6, 7; Luke 24:30, 31.
11, 12. (a) E vakacava na sala a biuti vuravura kina na Karisito? (b) Ena vakacava gona na sala eda namaka ni na lesu mai kina o Jisu?
11 A dau rairai vei ira na nona tisaipeli o Jisu ena yago vakatamata ena loma ni 40 na siga ni sa vakaturi oti. (Cakacaka 1:3) Oti sa qai lako ki lomalagi. Ia era na rairai taroga e so: ‘E sega li ni rau a tukuna na agilosi vei iratou na i apositolo, ni o Karisito “e na lako tale mai e na sala vata ga dou sa raica sa lako kina ki lomalagi”?’ (Cakacaka 1:11, VV) Io, e dina. Ia, erau a kaya “e na sala vata ga,” sega ni yago vata ga. A vakacava gona na sala a biubiu kina o Jisu? A sega ni kilai levu. Eratou kila ga nona i apositolo. A sega ni kila o vuravura.
12 Vakasamataka mada se vakamacalataka vakacava na iVolatabu na sala a biuti iratou kina nona i apositolo o Jisu ena nona lako yani ki lomalagi: ‘Ni ratou se vakaraici koya tu ga yani, sa qai lako mai e dua na o ka tabonaki koya mai na matadratou.’ (Cakacaka 1:9, VV) Ni sa tekivu lako cake gona ki lomalagi o Jisu, sa qai tabonaki koya e dua na o me ratou sega ni raici koya rawa tale kina na i apositolo. Sa tawarairai kina vei iratou o Jisu ena nona sa lako tani yani o ya. Eratou sa sega ni raici koya rawa. Sa qai gole ki lomalagi ena yagona vakayalo. (1 Pita 3:18) O koya gona, ena tawarairai tale ga na nona lesu mai, ni na lesu mai ena yago vakayalo.
RAICI KOYA VAKACAVA NA MATA KECE GA
13. Me na kilai vakacava na vosa, e “na raici koya na matada kecega” ni sa lako mai ena o na Karisito?
13 Eda na kila ga vakacava na vosa e cavuti ena Vakatakila 1:7? A vola kina na i apositolo o Joni: “Raica, sa lako mai ko koya e na o: ka na raici koya na matada kecega, ko ira talega era a suaki koya: ena tagi sara e na vukuna na veimataqali kecega e vuravura.” Na rai e tukuna tiko e ke na iVolatabu, e sega ni rai ena matada, ia ena vakasama ga ni kena siqemi se kilai na ka. Ni sa kila se yalomatuataka na ka e dua, ena kaya beka, ‘O, au sa qai raica rawa.’ Ni volai sara tu ga ena iVolatabu na “mata ni yalomudou.” (Efeso 1:18) O koya gona na vosa, “raici koya na mata kece ga” e kena i balebale ni tamata kece sa ra na yalomatuataka se kila ni sa tiko na Karisito.
14. (a) O cei o ira “era a suaki koya”? (b) Ena vuku ni cava ena levu sara kina na tagi ni ra sa qai kila na tamata kece ni sa tiko o Karisito?
14 O ira era a “suaki” Jisu, era sa mate oti yani e vuravura. Era vakatakarakarataki ira ga era vakacacani ira tiko na imuri i Karisito ena gauna oqo, ia ena nodra cakava oqo, era muria tiko ga kina na nodra i valavala na tamata o ya ena i matai ni senitiuri. (Maciu 25:40, 45) Sa voleka oqo na gauna me na vakarusai ira na tamata ca vaka o ya o Karisito. Sa ra vakasalataki oti ena ka oqo. Ni sa na yaco na veivakarusai oqo era na qai “raica” se kila na veika sa yaco tiko. Ena ka levu dina na nodra tagi!
ENA LAKO TALE BEKA MAI KI VURAVURA NA KARISITO?
15. E dau vakayagataki vakacava na vosa, “lesu”?
15 Na nona lesu e dua e sega ni sa dau kena i balebale tu ga me lako yani ki na dua dina na vanua. Me vaka mada e dua a veilecayaki tu, ena dau tukuni me baleti koya ni ‘sa lesu tale mai na yalona.’ Vakakina vua e dua a dauveiliutaki tu e liu, ena tukuni ni ‘sa lesu tale vua na veiliutaki.’ Ena vakasama vata ga oqo a kaya kina vei Eparama na Kalou: “Au na lesu mai vei iko e na gauna sa lokuci, me vaka na kena gauna, ia ena qai dua na luvena tagane ko Sera.” (Vakatekivu 18:14; 21:1) Na nona lesu mai o Jiova e sega ni kena i balebale ni a lesu dina, ia na nona kauwaitaki Sera ga me vakayacora na ka a yalataka.
16. (a) Ena sala cava e lesu mai kina ki vuravura na Karisito? (b) A lesu mai ena gauna cava na Karisito, na cava sa qai yaco?
16 E vaka kina na nona lesu mai na Karisito, ni na sega ni lesu dina mai ki na vuravura oqo. Ia, e kena i balebale ga ni sa tekivu lewa ena Matanitu ni Kalou, sa qai kauwaitaka mai na vuravura. E sega ni gadrevi sara me biuta tu yani na nona i tikotiko vakaturaga vakalomalagi, me mai vakayacora oqo e vuravura. Eda sa raica mai ena wase sa oti, ni vakaraitaka na ivakadinadina vaka iVolatabu ni a yaco na gauna ni Kalou vei Karisito me lesu mai me qai tekivu lewa ena 1914 S.K. A rogoci kina mai lomalagi na domo oqo: “Sa qai yaco na bula, kei na kaukauwa, kei na matanitu ni noda Kalou, kei na kaukauwa ni nona Karisito.”—Vakatakila 12:10.
17. Ni na tawarairai na nona lesu mai ki vuravura na Karisito, na cava a vakarautaka me da kila kina ni sa lesu mai?
17 Ni tawarairai na nona lesu mai na Karisito, e tu beka na sala me vakadeitaki kina ni sa lesu dina mai? E vaka kina. O Karisito vakataki koya a solia na “i vakatakilakila” rairai me da na kila kina ni sa tiko tawarairai, kei na kena sa voleka na i vakataotioti kei vuravura. Me da raica mada yani na “i vakatakilakila” o ya.
[iYaloyalo ena tabana e 142]
A solia na yagona o Karisito me i soro. Ena sega ni rawa vua me taura lesu me tamata tale
[iYaloyalo ena tabana e 144, 145]
Ni sa vakaturi oti o Jisu, ena vuku ni cava a kilasevati koya kina o Meri na yalewa ni Makitala me ivakatawa ni were?
Ni sa vakaturi oti o Jisu, ena yago cava a tukuna vei Tomasi me daramaka kina na ligana?
[iYaloyalo ena tabana e 147]
Ena lesu mai na Karisito ena sala vata ga a biuti vuravura kina. E vakacava na sala a biubiu kina o koya?