LESONI 28
Vakavinavinakataka na ka e Cakava o Jiova kei Jisu
Vakacava ke lolomataka vei iko o nomu itokani e dua na iloloma talei? Macala ga ni o na marautaka, o na via vakaraitaka vua nomu itokani ni o vakavinavinakataka. O Jiova kei Jisu erau solia vei keda na iloloma uasivi duadua. Na cava na iloloma qori? Eda na vakaraitaka vakacava nida vakavinavinakataka?
1. Cava e dua na sala eda vakavinavinakataka kina na ka erau cakava na Kalou kei Karisito?
E yalataka na iVolatabu ni o ira na “vakaraitaka nodra vakabauti [Jisu]” era na bula tawamudu. (Joni 3:16) Na cava na ibalebale ni noda vakaraitaka na vakabauta? E sega ni okati wale ga kina noda vakabauti Jisu. Ena laurai tale ga noda vakabauta ena ivakarau ni noda vakatulewa kei na ka eda dau cakava. (Jemesa 2:17) Ni laurai noda vakabauta ena ka eda cakava kei na ka eda tukuna, eda na vaqaqacotaka noda veiwekani kei Jisu kei na Tamana, o Jiova.—Wilika Joni 14:21.
2. Na soqo bibi cava eda rawa ni vakaraitaka kina noda vakavinavinakataki Jiova kei Jisu?
Ena yakavi ni bera ni mate o Jisu, e tukuna vei ratou nona imuri e dua tale na sala e rawa ni ratou vakavinavinakataka kina nona isoro. E tauyavutaka e dua na soqo bibi, e vakatoka na iVolatabu me “iVakayakavi ni Turaga,” e kilai tale ga me iVakananumi ni Mate i Karisito. (1 Korinica 11:20) Na cava e tauyavutaka kina qori o Jisu? Me ratou kua kina ni guilecava nona yapositolo kei ira na lotu vaKarisito era na qai muri mai, ni a solia nona bula ena vukuda. E tukuna o Jisu me baleta na soqo qo: “Dou dau cakava qo mo dou vakananumi au kina.” (Luke 22:19) Ni o tiko ena iVakananumi, o vakaraitaka ni o vakavinavinakataka na nodrau loloma levu o Jiova kei Jisu.
VAKEKELI
Dikeva eso tale na sala o rawa ni vakavinavinakataka kina nodrau loloma levu o Jiova kei Jisu. Dikeva tale ga na bibi ni iVakananumi ni mate i Karisito.
3. Eda na vakaraitaka vakacava noda vakavinavinaka?
Kaya mada ke dua e vakabulai iko mo kua ni luvu. Vakacava o na guilecava na ka e cakava? Se o na raica tale eso na sala mo vakavinavinakataki koya kina?
O Jiova ga e vu ni noda bula. Wilika 1 Joni 4:8-10, qai veivosakitaka na taro qo:
Na cava e iloloma talei kina na isoro i Jisu?
Na cava nomu rai ena ka erau cakava vei iko o Jiova kei Jisu?
Eda na vakavinavinakataka vakacava na ka erau cakava o Jiova kei Jisu? Wilika 2 Korinica 5:15 kei na 1 Joni 4:11; 5:3. Ni wiliki oti na tikinivolatabu yadua, veivosakitaka na taro qo:
Ena tikinivolatabu qori, eda na vakaraitaka vakacava noda vakavinavinaka?
4. Vakatotomuri Jisu
Dua tale na sala eda vakaraitaka kina noda vakavinavinaka, ya noda vakatotomuri Jisu. Wilika 1 Pita 2:21, qai veivosakitaka na taro qo:
Na cava eso na sala o rawa ni vakatotomuria voleka kina na weniyava i Jisu?
E taleitaka o Jisu na Vosa ni Kalou, e vunautaka na itukutuku vinaka, e vukei ira tale ga na tamata
5. Tiko ena iVakananumi ni Mate i Karisito
Mo rawa ni kila na ka e yaco ena imatai ni iVakayakavi ni Turaga, wilika Luke 22:14, 19, 20, qai veivosakitaka na taro qo:
Na cava e yaco ena iVakayakavi ni Turaga?
Na cava e vakatakarakarataka na madrai kei na waini?—Raica na tikina e 19 kei na 20.
E vinakata o Jisu vei ratou nona tisaipeli me ratou vakananuma vakadua e veiyabaki na nona mate ena iVakayakavi ni Turaga. Ya na vuna era na soqo kina na iVakadinadina i Jiova e veiyabaki, mera vakananuma na mate i Karisito me vaka ga e vakarota. Mo kila na bibi ni soqo qo, sarava na VIDIO, qai veivosakitaka na taro qo.
Na cava e dau caka ena iVakananumi?
Na madrai kei na waini e ivakatakarakara ga. Na madrai e vakatakarakarataka na yago uasivi i Jisu e cabora ena vukuda. Na waini e vakatakarakarataka na nona dra
KA ERA KAYA ESO: “Bibi ga meda vakabauti Jisu ke da via bula.”
O na vakayagataka vakacava na Joni 3:16 kei na Jemesa 2:17 ni levu tale tu na ka e vinakati?
KA O VULICA
Eda na vakavinavinakataka na ka e cakava o Jisu nida vakaraitaka noda vakabauti koya, da qai tiko tale ga ena iVakananumi ni nona mate.
Railesuvi
Na cava na kena ibalebale meda vakaraitaka noda vakabauti Jisu?
O na via vakaraitaka vakacava nomu vakavinavinakataki Jiova kei Jisu?
Cava e bibi kina mo tiko ena iVakananumi ni Mate i Karisito?
IKURI
E uqeti keda vakacava na mate i Karisito?
Mo kila eso tale na ka me baleta na vakabauta kei na sala meda vakaraitaka kina.
“Vakaraitaka na Nomu Vakabauta na Yalayala i Jiova” (Na Vale ni Vakatawa, Okotova 2016)
Ena italanoa qo “E Savasava na Noqu Lewaeloma, sa Vakainaki na Noqu Bula, Au Marau Tale Ga,” raica na kena yaga vua e dua na marama na isoro i Karisito.
“E Veisautaka na Bula na iVolatabu” (Na Vale ni Vakatawa, 1 Okosita, 2011)
Dikeva na vuna era na vakayagataka ga kina e le vica na madrai kei na waini ena iVakananumi.