E Tiko Vei Iko na “Yalo Tabu sa Vu ni Ka Dina”?

“[O] Tamaqu . . . ena qai solia vei kemudou e dua tale na Dauveivakacegui, me tiko ga kei kemudou ka sega ni mudu; a yalo tabu sa vu ni ka dina.”​—JONI 14:​16, 17.

1. Na cava na itukutuku bibi i Jisu vei iratou na nona tisaipeli ena iotioti ni vica na aua a tiko kina kei iratou ena tabavale e cake?

“TURAGA, ko ni sa lako kivei?” Oqori e dua na taro eratou tarogi Jisu kina na yapositolo ena iotioti ni vica na aua eratou veimaliwai tiko kina ena dua na tabavale e cake mai Jerusalemi. (Joni 13:​36) Ni toso na nodratou veivosaki, a kaya sara o Jisu ni sa na vakarau biubiu me suka vei Tamana. (Joni 14:28; 16:28) Sa na sega ni tiko vakayago tale kei iratou me vakavulici iratou, me sauma na nodratou vakatataro. A vakacegui iratou ga ena nona kaya: “Ka’u na masuti Tamaqu, ena qai solia vei kemudou e dua tale na Dauveivakacegui [se, dauveivuke], me tiko ga kei kemudou ka sega ni mudu.”​—Joni 14:​16, raica na iVolatabu ena Vakavakadewa Vou.

2. Na cava a yalataka o Jisu ni na vakauta lesu vei iratou na nona tisaipeli?

² A vakamatatataka o Jisu se cava na dau veivakacegui oya, ena yaga tale ga vakacava vei iratou na nona tisaipeli. A kaya vei iratou: “Ka’u a sega ni tukuna eliu vei kemudou na veika oqo, e na vuku ni’u a tiko vata kei kemudou. Ia ka’u sa qai lako yani vei koya sa talai au mai. . . . E yaga vei kemudou me’u lako yani: ni na sega ni lako mai vei kemudou na Dauveivakacegui, kevaka ka’u sa sega ni lako yani: ia kevaka ka’u sa lako yani, ka’u na talai koya kivei kemudou. . . . Ni sa lako mai ko koya, na Yalo Tabu na vu ni ka dina, ena tuberi kemudou ki na ka kecega e dina.”​—Joni 16:​4, 5, 7, 13.

3. (a) Ni naica era ciqoma kina na lotu Vakarisito taumada na “yalo tabu sa vu ni ka dina”? (b) Na cava e dua na sala bibi a ‘dauveivuke’ kina vei ira na yalo tabu?

³ Sa qai vakadinadinataki na vosa ni yalayala oqo ena Penitiko 33 S.K. E kaya kina na yapositolo o Pita: “Ko Jisu oqo sa vakatura cake na Kalou, ka sai vakadinadina ni ka oqo koi keitou kecega. Ia ni sa kau cake e na liga i matau ni Kalou, ka rawata ko koya maivei Tamana na Yalo Tabu ka yalataki, sa qai sovaraka mai na ka oqo, dou sa qai raica ka rogoca.” (Cakacaka 2:​32, 33) Eda na qai raica malua ni levu sara na ka era rawata na lotu Vakarisito taumada ni sa sovaraki vei ira na yalo tabu ena Penitiko. Ia a yalataka o Jisu ni “yalo tabu sa vu ni ka dina” ena ‘vakalesuya tale vei iratou me ratou nanuma na ka kece ga a dau tukuna vei iratou.’ (Joni 14:​26, VV) Ena vakalesui tale ena nodratou vakasama na cakacaka vakaitalatala i Jisu kei na veika a vakavuvulitaka, bau kina na vosa sara ga a cavuta, me ratou qai vola kece oya. Ena yaga vakalevu oqo vua na yapositolo o Joni sa kena turaga sara, ni sa na vola na nona Kosipeli ena icavacava ni imatai ni senitiuri S.K. E wili tiko ena itukutuku oya na ivakasala talei i Jisu ni sa tekivutaka na iVakananumi ni nona mate.​—Joni, wase e 13-​17.

4. A vukei ira vakacava na lotu Vakarisito lumuti taumada na “yalo tabu sa vu ni ka dina”?

⁴ A yalataka tale ga o Jisu vei iratou na nona tisaipeli taumada ni na ‘vakavulici iratou ena ka kece ga’ na yalo tabu qai ‘tuberi iratou ina ka kece ga e dina.’ Ena vukei iratou na yalo tabu me ratou yalomatuataka na veika titobu ni iVolatabu, me ratou vakaduavatataki tiko ga kina ena vakasama, kilaka, kei na inaki. (1 Korinica 2:​10; Efeso 4:​3) E vakaukauataki ira gona na lotu Vakarisito taumada oya na yalo tabu mera cakacaka vata me vaka e dua na “dauveiqaravi yalo dina ka vuku,” mera vakarautaka na ‘kakana vakayalo ena kena gauna dodonu’ vei ira yadudua na lotu Vakarisito lumuti.​—Maciu 24:​45, VV.

Vakadinadina na Yalo Tabu

5. (a) Na cava na inuinui vou a dolava o Jisu vei iratou na nona tisaipeli ena bogi ni 14 Naisani, 33 S.K.? (b) Na cava ena vakayacora na yalo tabu me dina kina na yalayala i Jisu?

⁵ Ena bogi ni 14 Naisani, 33 S.K., a vakacila o Jisu vei iratou na nona tisaipeli ni dua na gauna e muri, eratou na lai tiko vata kei koya kei Tamana mai lomalagi. A kaya vei iratou: “Sa vuqa na tikina e na vale nei Tamaqu: kevaka sa sega, au sa tukuna vei kemudou. Ni ka’u sa lako me’u vakarautaka na tikina me nomudou. Ia kevaka ka’u sa lako ka vakarautaka na tikina me nomudou, au na lako tale mai, ka kauti kemudou vei au; mo dou tiko talega e na vanua ka’u sa tiko kina.” (Joni 13:36; 14:​2, 3) Eratou na veiliutaki kei koya ena nona Matanitu. (Luke 22:​28-​30) Ena nodratou ga na inuinui vakalomalagi oqo kevaka eratou ‘vakasucumi ena yalo tabu’ me ratou luve vakayalo ni Kalou, me ratou lumuti tale ga me ratou veiqaravi ena itavi vakatui kei na bete mai lomalagi kei Karisito.​—Joni 3:​5-8; 2 Korinica 1:​21, 22; Taito 3:​5-7; 1 Pita 1:​3, 4; Vakatakila 20:6.

6. (a) A tekivu ni naica na veikacivi ina bula vakalomalagi, ia era le vica era kacivi kina? (b) O ira era kacivi era papitaisotaki ina cava?

⁶ A tekivu na ‘veikacivi ina bula vakalomalagi’ ena Penitiko 33 S.K., qai kena irairai, e mudu ena loma ni veiyabaki ni 1930. (Iperiu 3:1) Era le 144,000 o ira na vakatakilakilataki ena yalo tabu mera lewe i Isireli vakayalo, era “voli mai vei ira na tamata.” (Vakatakila 7:4; 14:​1-4, VV) O ira oqo era papitaisotaki ina yago vakayalo i Karisito, ina nona ivavakoso, vaka kina ina nona mate. (Roma 6:3; 1 Korinica 12:​12, 13, 27; Efeso 1:​22, 23) Nira sa papitaiso oti ena wai ra qai lumuti ena yalo tabu, era tekivu sara ena ivakarau ni bula mera qarava vakatabakidua kina na Kalou me yacova na nodra mate.​—Roma 6:​4, 5.

7. Na cava e kilikili kina mera vakayagataka ga o ira na lotu Vakarisito lumuti na madrai kei na waini vakaivakatakarakara ena iVakananumi?

⁷ Nira Isireli vakayalo, era wili tiko na lotu Vakarisito lumuti oqo ena veiyalayalati vou e veiyalayalati tiko kina o Jiova kei ira “Isireli ni Kalou.” (Kalatia 6:16; Jeremaia 31:​31-​34) A vakadeitaki na veiyalayalati vou ena dra i Karisito. E cavuta oqo o Jisu ni sa tekivutaka na iVakananumi ni nona mate. E vola o Luke: “A sa taura na madrai, ka vakavinavinaka, ka dovia, ka solia vei ira, ka kaya, Oqo na yagoqu sa soli e na vukumudou; dou cakava oqo mo dou vakananumi au kina. Sa vaka talega kina na bilo, ni sa oti nai vakayakavi, ka vaka, A bilo oqo na veiyalayalati vou e na noqu dra sa liviraki e na vukumudou.” (Luke 22:​19, 20) O ira ga na vo ni 144,000 era se bula tiko e vuravura e kilikili mera vakayagataka na madrai kei na waini vakaivakatakarakara ena iVakananumi ni mate i Karisito.

8. Era kila vakacava na lumuti nira sa kacivi ina bula vakalomalagi?

⁸ Era kila vakacava na lumuti nira kacivi ina bula vakalomalagi? Na yalo tabu ga e vakadinadina vei ira ena sala e sega tale ni lomalomaruataki. A vola na yapositolo o Paula me baleti ira oya: “Ko ira sa liutaki ira na Yalo ni Kalou era sa luve ni Kalou. . . . A Yalo oqo sa vakadinadinataka ki na yaloda ni da sa luve ni Kalou. Ia kevaka eda sa luvena, eda na taukena na veivakalougatataki e maroroya tu ko koya me nodra na nona tamata, ka da na taukena vata tale ga kei Karisito na ka e maroroya tu na Kalou me baleti koya; kevaka e da sa vakaivotavota e na nona vakararawataki na Karisito e da na vakaivotavota tale ga e na nona lagilagi.” (Roma 8:​14-​17, VV) Era na sega tale ni lomalomaruataka na nodra inuinui o ira na kacivi ina bula vakalomalagi baleta ni dau matata vakasigalevu na vakadinadina ni yalo tabu e lomadra. O koya gona, ke ra lomalomaruataka e so na lewe ni ivavakoso se ra kacivi ina bula vakalomalagi se sega, mera kua ga ni vakayagataka na ivakatakarakara ena iVakananumi.

Na Yalo Tabu kei na So Tani Tale na Sipi

9. Na cava na rua na ilawalawa erau cavuti ena Kosipeli kei na Vakatakila?

⁹ Ni a rairai vakasamataka tiko o Jisu ni yalani na kedra iwiliwili na lotu Vakarisito era kacivi mera lewe i Isireli vakayalo, a cavuti ira kina mera “qele-ni-sipi lailai.” Era vakacurumi o ira oqo ina “bai” ni veiyalayalati vou. Ia, a kaya o Jisu ni na soqoni ira tale ga na ‘so tani tale na sipi’ e sega ni kilai na kedra levu. (Luke 12:32; Joni 10:16) O ira na so tani tale na sipi era na soqoni ena gauna ni ivakataotioti era na lewena tiko na “[i] soqosoqo levu” era na vakabulai ni sa yaco “na veivakararawataki levu,” qai nodra inuinui mera bula tawamudu ena vuravura parataisi. Ena raivotu i Joni, donuya na icavacava ni imatai ni senitiuri S.K., erau vakaduiduitaki kina na isoqosoqo levu oqo kei ira na le 144,000 era Isireli vakayalo. (Vakatakila 7:​4, 9, 14) E tiko tale beka ga vei ira na so tani tale na sipi na yalo tabu? Ke vaka kina, e tara vakacava na nodra bula?

10. Na cava na ibalebale ni nodra papitaisotaki na so tani tale na sipi ena ‘yaca ni Tamada, Luvena, kei na yalo tabu’?

¹⁰ Io, e bibi dina na yalo tabu ena nodra bula na so tani tale na sipi. Era vakadinadinataka na nodra yalayala vei Jiova ena nodra papitaisotaki ena ‘yaca ni Tamada, Luvena, kei na yalo tabu.’ (Maciu 28:19) Era ciqoma na veiliutaki cecere i Jiova, ra vakamalumalumu vei Karisito ena nona itutu Vakatui ra raici koya tale ga me nodra iVakabula, ra qai muria sara ena nodra bula na veidusimaki ni yalo tabu se igu yavavala ni Kalou. E veisiga kece, era dau tovolea mera bulataka “na vua ni Yalo Tabu,” oqori “na loloma, na reki, na vakacegu, na vosota vakadede, na yalomalua, na yalololoma, na vakabauta, na yalomalumalumu, nai valavala malua.”​—Kalatia 5:​22, 23.

11, 12. (a) Na sala uasivi cava era vakasavasavataki kina na lumuti? (b) Era vakasavasavataki ra qai vakatabui tale ga vakacava na so tani tale na sipi?

¹¹ E dodonu mera ciqoma na Vosa ni Kalou kei na yalona tabu na so tani tale na sipi me vakasavasavataki ira se vakatabui ira. Ia, e duidui na nodra vakasavasavataki o ira oqo mai na nodra vakasavasavataki na lotu Vakarisito lumuti. Era sa vakasavasavataki oti na lumuti, oya ena nodra vakadonui kei na nodra vakatabui mera wati Karisito. (Joni 17:17; 1 Korinica 6:​11; Efeso 5:​23-​27) E cavuti ira na parofita o Taniela mera “yalosavasava i Koya sa cecere sara,” era na veiliutaki vata ena Matanitu ni Kalou kei koya “na Luve ni tamata,” o Karisito Jisu. (Taniela 7:​13, 14, 18, 27) Dua na gauna yani eliu, a vakarogoya o Jiova vei ira na Isireli ena gusudrau o Mosese kei Eroni: “Sai au ko Jiova na nomuni Kalou: o koya mo ni vakasavasavataki kemuni, mo ni savasava; ni’u sa savasava koi au.”​—Vunau ni Soro 11:44.

¹² Na vosa “vakasavasavataki” e dusia “na icakacaka ni kena vakatabui e dua na ka, me wasei tani me taurivaki ena veiqaravi vua na Kalou o Jiova; na ka sa vakatabui.” Se tukuna sara ena 1938 Na Vale ni Vakatawa ni dodonu mera kila tiko na Jionatapi se o ira na so tani tale na sipi “ni na gadrevi mera yalataki ira ra qai vakasavasavataki ira o ira kece na via maliwai ira na ilawalawa levu era na bula e vuravura.” Ena raivotu me baleti ira na isoqosoqo levu ena Vakatakila, e tukuni nira sa “sava nodrai sulu, ka vakavulavulataka e na dra ni Lami,” ra qai qaravi Jiova “e na siga kei na bogi e nona vale-ni-lotu.” (Vakatakila 7:​9, 14, 15) Ni vukei ira na yalo tabu, era saga ena nodra vinaka taucoko na so tani tale na sipi mera yacova na savasava e vinakata vei ira o Jiova.​—2 Korinica 7:1.

Caka Vinaka Vei Ira na Taci Karisito

13, 14. (a) E vakatau na nodra vakabulai na sipi ena cava, me vaka eda raica ena vosa vakatautauvata i Jisu me baleta na sipi kei na me? (b) Ena gauna ni ivakataotioti oqo, era caka vinaka vakacava na so tani tale na sipi vei ira na taci Karisito?

¹³ A vakabibitaka o Jisu na nodra veivolekati na so tani tale na sipi kei na qele ni sipi lailai ena vosa vakatautauvata a cavuta me baleti ira na sipi kei na me, e wili tiko ena nona parofisai me baleta “nai vakataotioti.” A vakaraitaka vakamatata ena vosa vakatautauvata oya na Karisito ni na vakatau sara tiko ga na nodra vakabulai na so tani tale na sipi ena veika era cakava vei ira na lumuti, se vei ira e kaya o Jisu nira ‘tacina.’ A kaya: “E na qai kaya na tui vei ira e na yasana i matau, ‘Ni lako mai, ko i kemuni ka sa vakalougatataki mai vei Tamaqu, mo ni taukena na matanitu sa vakarautaki tu me nomuni mai na i vakatekivu kei vuravura.  . . . ‘Au sa kaya vakaidina vei kemuni, e na nomuni dau cakava na ka oqo vua e dua vei ira na taciqu lalai oqo, ko ni sa cakava vei au.’”​—Maciu 24:3; 25:​31-​34, 40, VV.

¹⁴ Na vosa “nomuni dau cakava na ka oqo” e dusia tiko na nodra tokoni vakayalololoma na taci Karisito era vakatuburi ena yalo tabu, e cati ira na vuravura i Setani qai balata e so vei ira ina valeniveivesu. Era vinakata tu mera vakasulumi, mera vakani, mera vakacegui tale ga nira tautauvimate. (Maciu 25:​35, 36, VV) Ena gauna ni ivakataotioti me tekivu mai na 1914, era sotava na ituvaki vaka oqo e levu na lumuti. Ia e tokoni ira na nodra itokani yalodina, na so tani tale na sipi, ni uqeti ira kina na yalo tabu. E vakadinadinataki oqo mai na kedra ivolatukutuku na iVakadinadina i Jiova edaidai.

15, 16. (a) Era veivuke vakalevu ena itavi cava na so tani tale na sipi vei ira na taci Karisito e vuravura? (b) Na cava era kaya kina vei ira na so tani tale na sipi na lumuti?

¹⁵ Dua tale na sala era veitokoni kina vakalevu na so tani tale na sipi vei ira na taci Karisito lumuti e vuravura ena gauna ni ivakataotioti. Oqo ena kena vakayacori na nodra ilesilesi vakalou na lumuti me ‘vunautaki na itukutuku vinaka ni matanitu ina vuravura taucoko me ivakadinadina ina veivanua kece ga.’ (Maciu 24:​14, VV; Joni 14:12) Sa lutu sobu tiko ga e veiyabaki na kedra iwiliwili na lumuti e vuravura, ia ena yasana adua, e tubu tiko ga na kedra iwiliwili na so tani tale na sipi me sa vica na milioni. Udolu vakaudolu vei ira oqo era vakaitavi ena kena vunautaki vakatabakidua na itukutuku vinaka​—mera painia se kaulotu​—ra vakatetea na itukutuku vinaka ni Matanitu ni Kalou me “yacova nai yalayala kei vuravura.” (Cakacaka 1:8) E so tale era dau vunautaka na itukutuku vinaka ena kena levu era rawata ra qai dau dodoliga tale ga ena yalomarau mera tokona vakailavo na cakacaka bibi oqo.

¹⁶ Dua na ka nodra marautaka na taci Karisito lumuti na nodra veitokoni na nodra itokani so tani tale na sipi! E vakamacalataki na nodra yalomarau ena ivola Worldwide Security Under the “Prince of Peace,” e vakarautaka na dauveiqaravi yalodina ena 1986. E kaya: “Me tekivu sara mai na iKarua ni iValu Levu, sa vakayacori ga vakalevu na parofisai i Jisu me baleta na ‘ivakataotioti ni ivakarau ni veika’ oqo ena nodra cakacaka ‘na isoqosoqo levu’ ni ‘so tani tale na sipi. . . . Na vakavinavinaka cecekia gona e vakamuai vei ira na ‘isoqosoqo levu’ era cavutu mai na dui vanua kei na duivosa ena vuku ni nodra itavi levu ena kena vakayacori na parofisai i [Jisu] ena Maciu 24:14!”

‘Taura Vata ga na Ka e Yalataki’

17. Era na qai ‘taura vata ga’ vakacava kei ira na lumuti ‘na ka e yalataki’ o ira na tamata yalodina eliu era na vakaturi mera bula e vuravura?

¹⁷ A tauca na vosa oqo na yapositolo o Paula, e dua e lumuti, me baleti ira na tamata yalodina era bula ni se bera ni basika na Karisito: “Ko ira kece ko ya, e dina ga ni ra sa rogo vinaka e na vuku ni nodra vakabauta ia e a sega ga ni yaco dina vei ira na ka e a yalataki. Ni a sa vakarautaka tu na Kalou e dua na ka e vinaka cake me baleti keda [na lumuti]; ko ya me ra na qai taura vata ga kei keda ko ira ko ya na ka e a yalataki.” (Iperiu 11:​35, 39, 40, VV) Ena duanaudolu na yabaki, ena veiqaravi mai lomalagi o Karisito kei ira na 144,000 na tacina lumuti ena nodra itutu vakatui kei na bete mera vakayagataka vei ira e vuravura na yaga ni isoro ni veivoli i Karisito. Ekeri, sa na vinaka vakaoti kina na yagodra kei na nodra vakasama na so tani tale na sipi. Ena sala oqo, era sa na qai ‘taura vata ga’ kina kei ira na lumuti ‘na ka e yalataki.’​—Vakatakila 22:​1, 2.

18. (a) Nira raica ga na veika dina e tukuna na iVolatabu, na tikina bibi cava era na siqema na so tani tale na sipi? (b) Na inuinui cava era waraka tu na so tani tale na sipi nira sa na ‘vakaraitaki mai na luve ni Kalou’?

¹⁸ Nira mai kila na so tani tale na sipi na ivakavuvuli vakaivolatabu era sa vakamacalataki oti mai, era raica rawa na vuna era vakabibitaki kina ena iVolatabu Vakirisi Vakarisito o Karisito kei ira na tacina lumuti, vaka kina na nodra itavi levu ena kena vakayacori na inaki i Jiova. Era na okata kina na so tani tale na sipi me itavi dokai mera tokoni koya na dauveiqaravi lumuti ena sala cava ga e rawa, ra qai waraka voli ena gauna vata oqori ‘mera vakaraitaki mai o ira na luve ni Kalou’ ena Amaketoni, vaka kina ena duanaudolu na yabaki. Mera nanamaki tiko ni dua na siga era “na sereki . . . me kakua tale kina ni luca se vuca rawa e dua na ka, ka me vakaivotavota e na nodra galala lagilagi na luve ni Kalou.”​—Roma 8:​19-​21, VV.

Vakaduavatataki ena Yalo Tabu ena iVakananumi

19. Na cava e sa vakayacora “na yalo tabu sa vu ni ka dina” vei ira na lumuti kei na nodra itokani, ia era na vakaduavatataki tiko ena inaki cava ena yakavi ni 28 Maji?

¹⁹ Ena iotioti ni nona masu ena bogi ni 14 Naisani, 33 S.K., a masulaka oqo o Jisu: “Me ra dua bau kecega; me vaka edaru sa dua bau, Tamaqu, me ra dua bau kei kedaru: me vakadinata ko vuravura ni kemuni sa talai au mai.” (Joni 17:​20, 21) Ena nona loloma a tala mai kina na Luvena na Kalou me solia na nona bula mera vakabulai kina na lumuti kei na kawatamata dau talairawarawa. (1 Joni 2:​2) Sa mai vakaduavatataki ira na taci Karisito kei na nodra itokani “na yalo tabu sa vu ni ka dina.” Ena yakavi ni 28 Maji, ni sa dromu na matanisiga, erau na sota na ilawalawa ruarua me rau vakananuma na mate i Karisito kei na ka kece sa vakayacora ena vukudrau o Jiova ena yavu ni isoro i koya na Luvena lomani, o Karisito Jisu. Na nodra tiko ena soqo bibi oya ena vaqaqacotaka na nodra duavata, qai uqeti ira mera cakava tiko ga na loma ni Kalou, mera vakadinadinataka kina nira marautaka mera maliwai ira na tamata e lomani ira o Jiova.

Me Railesuvi

• A vakau ni naica vei ira na lotu Vakarisito taumada “na yalo tabu sa vu ni ka dina”? A yaco me “dauveivuke” vakacava?

• Era kila vakacava na lumuti nira sa kacivi ina bula vakalomalagi?

• Ena sala cava soti e dau cakacaka kina vei ira na so tani tale na sipi na yalo ni Kalou?

• Era caka vinaka vakacava vei ira na taci Karisito na so tani tale na sipi, ia ena sala cava era na qai ‘taura vata ga’ kina kei ira na lumuti ‘na ka e yalataki’?

[iYaloyalo ena tabana e 21]

A sovaraki vei ira na tisaipeli ena Penitiko 33 S.K. “na yalo tabu sa vu ni ka dina”

[iYaloyalo ena tabana e 23]

Era caka vinaka vei ira na taci Karisito na so tani tale na sipi nira tokoni ira ena nodra ilesilesi vakalou me baleta na cakacaka vakavunau