Vakavulici Luvemu me Veidokai

E TUKUNA e dua na ivosavosa vakaJamani: “O koya e taura e ligana na isala, ena lakova na vanua kece ga.” Ena levu na vanua, e ivakaraitaki ni vakarokoroko na nona luvata na nona isala e dua ni curu i vale se ni vakabula vua e dua tale, qai dau dokai ni cakava qori. Na ibalebale gona ni ivosavosa e tukuni e cake, oya nira na lomani ra qai taleitaki vakalevu o ira era vakaitovo.

E dau tarai ira dina e levu na nodra vakaitovo na gone! E kaya e dua na ivakatawa ni tabacakacaka mai Honduras e dau cakacaka vata kei ira na dautukutuku e duidui na nodra yabaki ena vunau e veivale: “Ni vakatauvatani kei na noqu ivakamacala, au vakadinadinataka ni dau tarai taukeinivale cake na nona itovo na gone e vakavulici vinaka qai dauveidokai.”

Ni sa qai takalevu ga nikua na veibeci, e vinaka qai yaga gona na noda kila na ka meda cakava vei ira tale na so. E bibi sara ni tukuna na iVolatabu meda ‘vakaitovotaka na itovo e salavata kei na itukutuku vinaka i Karisito.’ (Fpai. 1:​27; 2 Tim. 3:​1-5) E bibi mera vakavulici na gone mera dauveidokai. Era rawa ni vakavulici vakacava me kua ni vakarairai ga na nodra veidokai, ia me vu sara ga mai lomadra?a

Vuli ena iVakaraitaki

Era dau vuli na gone ena nodra vakatotomuria na nodra ivakaraitaki eso tale. E dua gona na sala vinaka mera vakavulici luvedra kina na itubutubu mera vakaitovo, oya mera vakaitovo sara ga o ira. (Vkru. 6:​6, 7) E sega ni rauta mo vakamacalataka ga vei luvemu ni bibi me vakaitovo. Ia e bibi sara me lakovata na nomu ivakamacala kei na nomu ivakaraitaki vinaka.

Vakasamataka mada na ivakaraitaki i Paulini,b a susugi ratou duaduaga o tinadratou e lotu vaKarisito. E ivakarau sara ga ni nona bula me dauveidokai. Na cava na vuna? E kaya: “O nana sara ga e dauveidokai, e sega gona ni dredre me keitou dauveidokai na gone.” O Walter e dua tale na lotu vaKarisito, e dau vakavulici rau na luvenatagane me rau dokai tinadrau e sega ni vakabauta. E tukuna: “Au dau saga meu veivakavulici ena noqu ivakaraitaki me rau dokai tinadrau, e sega vakadua ni veibeci na noqu ivosavosa vua.” A vakavulici rau tiko ga na luvenatagane o Walter ena Vosa ni Kalou, qai masuta na veivuke i Jiova. E dua vei rau na gone sa veiqaravi tiko ena valenivolavola ni tabana, e dua tale e painia. Erau lomani rau ruarua na nodrau itubutubu na gone, rau dokai rau tale ga.

E kaya na iVolatabu: “Ni Kalou ni vakacegu na Kalou, e dau maqosa na nona ituvatuva.” (1 Kor. 14:33) Na ka kece e cakava o Jiova e tuvanaki vakamaqosa. Meda saga na lotu vaKarisito meda vakatotomuria na itovo qori i Jiova qai tuvanaki vakamaqosa na ka e vale. Eso na itubutubu era dau vakavulici luvedra mera cakava na nodra idavodavo e veisiga ra qai lai vuli, mera biuta vinaka na nodra isulu, ra veivuke tale ga ena cakacaka ni vale. Ke ra raica na gone ni maqosa qai savasava eso tale na rumu ni vale, era na rairai raica tale ga me savasava na nodra rumu kei na nodra iyaya.

Na cava na rai nei luvemu me baleta na ka e vulica e koronivuli? E dau vakavinavinakataka na ka e cakava tiko ena vukuna o qasenivuli? Vakacava o iko na itubutubu, o dau vakaraitaka na nomu vakavinavinaka? Ena vakatotomuria o luvemu na nomu rai me baleta na nona ka ni vuli kei ira na qasenivuli. De vinaka mo uqeti koya me dau vakavinavinakataki ira na nona qasenivuli. Na noda vakavinavinakataka na veika e caka ena vukuda, e sala vinaka meda vakaraitaka kina na veidokai, se mani vei qasenivuli, vuniwai, taukeinisitoa, se o cei ga eda sotava. (Luke 17:​15, 16) Mera vakavinavinakataki na itabagone lotu vaKarisito era kilai tani vei ira na nodra icaba e koronivuli nira vakaitovo ra qai dauveidokai.

Mera ivakaraitaki vinaka ena itovo na lewe ni ivavakoso vaKarisito. E matalau dina nida raica na nodra vakarokoroko na itabagone ena ivavakoso nira dau tukuna “kerekere” kei na “vinaka”! Nira dokai Jiova na uabula ena nodra vakarorogo ena veivakavulici ena gauna ni soqoni, era na uqeti tale ga na gone mera vakatotomuri ira. Nira raica na gone na iwalewale vinaka e dau vakaraitaki kina ena Kingdom Hall na itovo vinaka, era na rawa ni vulica mera dokai ira era tiko veitikivi. Kena ivakaraitaki, e sa vulica o Andrew e yabaki va me tukuna, “Tilou” ni kalawaci ira na uabula.

Na sala cava tale era rawa ni vukei luvedra kina na itubutubu mera vulica na itovo vinaka? E dodonu qai rawa tale ga nira tuvanaka na gauna mera vakavulici luvedra kina ena levu na ivakaraitaki vakaivolatabu.​—Roma 15:4.

Veivakavulici ena iVakaraitaki Vakaivolatabu

Kena irairai ni a vakavulici Samuela o tinana me cuva vei Ilai na Bete Levu. A rairai yabaki tolu se va o Samuela ena gauna a kauti koya kina o tinana ena valenisoro. (1 Sam. 1:​28) De vinaka mo vakatovotovotaka kei luvemu eso na vosa ni veikidavaki me vaka na “yadra vinaka” se “bula vinaka.” Me vakataki Samuela, e rawa ni ‘taleitaki luvemu o Jiova kei ira tale ga na tamata.’​—1 Sam. 2:​26.

E vinaka mo tukuna na ivakaraitaki vakaivolatabu e laurai kina na duidui ni veidokai kei na veibeci. Kena ivakaraitaki, a via raici Ilaija na parofita o Easaia na tui tawayalodina e Isireli, mani tala e ‘dua na nodra iliuliu na le 50 na sotia kei na nona le 50’ me lai kauti koya mai. A vakasaurarataki Ilaija na iliuliu oya me rau lesu vata. Qori e sega ni ivalavala me vosa kina e dua vua e matataka na Kalou. Na cava a tukuna o Ilaija? A kaya: “Kevaka ka’u sa tamata ni Kalou, me lako sobu mai lomalagi na buka waqa, ka kani iko kei ira na nomu le limasagavulu.” Qori sara ga na ka a yaco dina. “A sa lako sobu mai lomalagi na buka waqa, a sa kani koya kei ira na nona le limasagavulu.”​—2 Tui 1:​9, 10.

A talai vei Ilaija na ikarua ni iliuliu ni le limasagavulu. A saga tale ga me vakasaurarataki Ilaija me rau lesu vata, mani lako sobu tale mai lomalagi na buka waqa. Ia a veidokai na ikatolu ni iliuliu ni le 50 a lai raici Ilaija. A sega ni vakasaurarataki Ilaija, ia a tekiduru qai vakamamasu: “O iko na tamata ni Kalou, me ka talei e matamu na noqu bula, kei na nodra bula na nomu tamata e le limasagavulu oqo: raica, sa lako sobu mai lomalagi na buka waqa, ka kani rau na turaga ni le limasagavulu erau liu mai, kei na nodrau yayalimasagavulu: ia oqo, me ka talei e matamu na noqu bula.” Ena masuta beka na parofita ni Kalou na buka waqa me yameca e dua a rairai rere, ia a vosa ena veidokai? Dravusakulukulu! A tukuna ga vei Ilaija na agilosi i Jiova me lako vata kei na iliuliu oya. (2 Tui 1:​11-​15) E sega beka ni vakaraitaka qori na bibi ni veidokai?

Ena gauna era vesuka kina na yapositolo o Paula ena valenisoro na sotia ni Roma, a sega ni bau nanuma ni tu vua na dodonu me vosa. Ia a taroga ena veidokai vua na nodra iliuliu na sotia: “Rawa niu tukuna vei kemuni e dua na ka?” Ni a veidokai o Paula, a soli kina vua na gauna me vakamacala.​—Caka. 21:​37-​40.

A sabaki na matai Jisu ena gauna a veilewaitaki kina. Ia a kila na sala dodonu me sauma kina: “Ke cala na ka au tukuna, tukuna mai na ka e cala, ia keu tukuna tiko na ka dina, na cava o sabaki au kina?” E sega ni dua a kunea na ka me vakacala kina na vosa i Jisu.​—Joni 18:​22, 23.

E volatukutukutaki ena Vosa ni Kalou na ivakaraitaki ni ka eda rawa ni tukuna se cakava nida vunauci, ni gadrevi tale ga meda vakatusa ena veidokai na noda cala se dua na ka eda vakawalena. (Vkte. 41:​9-​13; Caka. 8:​20-​24) Kena ivakaraitaki, a kere veivosoti vei Tevita o Apikali ena veibeci nei watina o Nepali. A lolomataka tale ga e levu na kakana. Ni qoroya vakalevu o Tevita na ka e cakava o Apikali, a kauti koya me watina ena gauna a mate kina o Nepali.​—1 Sam. 25:​23-​41.

Vakavulici luvemu me dauveidokai se mani kena inaki me vakaitovo kina o luvemu se me dauveidokai ena gauna mada ga e dredre kina. Ni caka qori, sa ‘serau tiko kina na noda cina mera raica na tamata, qai vakalagilagi kina na Tamada mai lomalagi.’​—Maciu 5:​16.

[iVakamacala e ra]