“A Cava na Ka Dina?”

OQO na taro a tarogi Jisu kina ena veivakaisini na kovana ni Roma o Ponitio Pailato. A sega dina ni via kila na kena isau, a sega tale ga ni sauma o Jisu. De dua a nanuma o Pailato ni dredre me kilai na ka dina.​—Joni 18:38.

Na rai cala vaka oqo e tu vei ira e levu nikua, okati kina o ira na iliuliu ni lotu, ira na dauveivakavulici, kei ira na daunipolitiki. Era vakabauta ni ka dina​—vakabibi na itovo kei na ka dina vakayalo​—e sega ni duadua tu ga, e levu qai veiveisau. Kena ibalebale oqo ni vakatau sara ga vua na tamata yadua na ka e dodonu kei na ka e cala. (Aisea 5:​20, 21) Kena ibalebale tale ga ni sa madra vei ira na itovo kei na ivalavala e dau raici tu vakabibi ena veigauna sa oti.

Ena vinaka meda vakasamataka na vosa i Jisu a vakavuna nona taro o Pailato. A tukuna o Jisu: “A ka oqo ka’u sa sucu mai kina, ia na ka oqo ka’u sa lako mai kina ki vuravura oqo, me’u dautukuna na ka dina.” (Joni 18:37) A sega ni vakabauta o Jisu ni buawa na ka dina se dredre ni kilai. A yalataka vei ira nona tisaipeli: “Dou na kila na ka dina, ia na ka dina ena sereki kemudou.”​—Joni 8:​32.

Ena kilai mada vakacava na ka dina oqo? Dua na gauna a tukuna o Jisu ena nona masu vua na Kalou: “Sa ka dina na nomuni vosa.” (Joni 17:17) Na iVolatabu e uqeti vakalou na kena volai, e vakatakila na ka dina me dusimaki keda kei na inuinui dei ni veigauna mai muri​—na bula tawamudu.​—2 Timoci 3:​15-​17.

A sega ni via vulica na ka dina oya o Pailato. Vakacava o iko? O rawa ni taroga e dua na iVakadinadina i Jiova me baleta na “ka dina” a vakavulica o Jisu. Era na marau ni vakamacalataka vei kemuni.