O Cei me Tawasei Keda Mai na Loloma ni Kalou?

“Eda sa dau loloma ni sa lomani keda taumada na Kalou.”​—1 JONI 4:19, VV.

1, 2. (a) Na cava e bibi kina na noda kila nida lomani? (b) Na loloma i cei eda vinakata vakalevu?

E BIBI vakacava vei iko na nomu kila ni o lomani? Eda vinakata kece meda lomani, me tekivu mai na noda gone me yacova nida qase. O sa raica na gone e roqota voli o tinana? Veitalia se cava e yaco tiko ena gauna oya, ni raica ga na gone na matadredredre nei tinana, e vakilai na nona lomavakacegu baleta ni roqoti koya tiko o tinana e dau lomani koya. Se o se nanuma tiko na gauna dredre o tubucake tiko kina ni o se gone? (1 Cesalonaika 2:7) So na gauna o veilecayaki ni sega ni matata vei iko na ka o cakava tiko se na ka o vinakata, ia o marautaka ga ni rau lomani iko voli na nomu itubutubu! O sega li ni vakavinavinakataka na nodrau dau sauma na nomu taro rau qai walia nomu leqa? Io, eda vinakata kece meda lomani ena gauna taucoko ni noda bula. Na loloma oqori e vakadeitaka vei keda nida yaga.

² Nodrau dau lomani keda na noda itubutubu e vukei keda meda yalomatua. Ia, e bibi cake ina noda tubu vakayalo kei na noda lomavakacegu na noda vakadeitaka ni lomani keda tiko na Tamada vakalomalagi o Jiova. De so beka na dau wili ivoladraudrau oqo era sega ni susugi vinaka vei ira na nodra itubutubu. Ke o dua vei ira, kua ni yalolailai. Ke rau sega mada ga ni a lomani iko na nomu itubutubu, ena sosomitaka oqori na loloma ni Kalou.

3. E vakadeitaka vakacava o Jiova na nona lomani ira na nona tamata?

³ E vakaraitaka o Jiova ena gusu i Aisea nona parofita ni rawa me “guilecavi” luvena e vakasucuma tiko o tina, ia ena sega ni guilecavi ira na nona tamata o Jiova. (Aisea 49:15) E kaya tale ga o Tevita: “Ni sa laivi au na tamaqu kei na tinaqu, ena qai keveti au cake ko Jiova.” (Same 27:10) E veivakacegui dina oya! Se bula cava o sotava tiko, ke o sa yalataki iko vua na Kalou o Jiova, mo kila tiko ni uasivi cake na nona lomani iko mai na nodra lomani iko na tamata!

Tudei Ena Loloma ni Kalou

4. E vakadeitaki vakacava na loloma ni Kalou vei ira na lotu Vakarisito ena imatai ni senitiuri?

⁴ O tekivu vakila ena gauna cava na loloma i Jiova? De veika o sotava e viavia tautauvata kei na ka era sotava na lotu Vakarisito ena imatai ni senitiuri. E vakamacalataka na ika5 ni wase ni ivola i Paula vei ira mai Roma na nodra mai kila na loloma i Jiova na tamata ivalavala ca era meca tu ni Kalou e liu. Eda wilika ena tikina e 5: “Sa sovaraki ki na yaloda na loloma ni Kalou ni sa soli vei keda na Yalo Tabu.” E kuria ena tikina e 8 o Paula: “Na Kalou sa vakatakila na nona loloma vei keda, ni sa mate na Karisito me nodai sosomi ni da sa tamata ca.”

5. O mai vakila vakacava na levu ni loloma ni Kalou?

⁵ E vaka kina ena gauna o rogoca kina na ka dina mai na Vosa ni Kalou o qai tekivu vakabauta, ena gauna oya o sa vakila kina na cakacaka ni yalo i Jiova e lomamu. O tekivu kila kina na levu ni loloma i Jiova ena nona tala mai na Luvena lomani me mate ena vukumu. A vukei iko o Jiova mo kila na levu ni nona lomana na kawatamata. O sega beka ni vakavinavinakataka nomu mai kila ni dina ga o sucukaya mai na ivalavala ca o qai yawaka tu na Kalou, ia e qai vakadonui keda ga o Jiova meda rawata tale na bula tawamudu? A sega beka ni vakavuna oya mo lomani Jiova?​—Roma 5:10.

6. Na cava e vakavuna meda yawaki Jiova kina ena so na gauna?

⁶ Ni o sa raica na loloma i Tamamu vakalomalagi, o veisautaka me vinaka na ivakarau ni nomu bula me vakadonui iko kina o koya, o yalataka sara na nomu bula vua. O sa veiwekani voleka kei na Kalou. Ia, o dau vakila ni so na gauna e vaka o yawaki Jiova? E rawa ni yacovi keda oya. Ia kua ni guilecava ni o Jiova e sega ni dau veisau. Na loloma i Jiova e vaka na dei ni matanisiga, e sega ni oti rawa na katakata e solia kei na kena vakararamataki vuravura. (Malakai 3:6; Jemesa 1:17) Ia eda rawa ni veisau ena so na gauna o keda. Ni cowiri na vuravura, e butobuto na kena veimama. Ke da cowiri se vakanadakuya tale ga na Kalou ena so na gauna, ena rawa ni vakaleqa na noda veiwekani kei koya. Eda na walia vakacava na ituvaki oqo?

7. E vukei keda vakacava na noda liaci keda meda tu ga kina ena loloma ni Kalou?

⁷ Ke da vakila ni vaka e luluqa noda lomani Jiova, meda tarogi keda: ‘Au vakawaletaka beka na loloma ni Kalou? Au sa vakanadakuya tiko beka na Kalou bula dau loloma, baleta ni sa malumalumu tiko noqu vakabauta? Au sa vakaliuca tiko beka na “veika vakayago” mai na “veika vakayalo”?’ (Roma 8:5-8; Iperiu 3:12) Ke da sa yawaki Jiova, e dodonu meda veisau meda veiwekani voleka tale kei koya. E uqeti keda o Jemesa: “Toro voleka yani vua na Kalou, ka na toro voleka mai vei kemudou ko koya.” (Jemesa 4:8) Muria na vosa i Juta: “Koi kemudou sa lomani, dou veivakatataki kemudou cake vakai kemudou e na nomudou vakabauta savasava sara, dou masu ga e na Yalo Tabu, dou maroroi kemudou mo dou tu ga e na loloma ni Kalou.”​—Juta 20, 21.

Sega ni Tarova na Loloma ni Kalou na Veisau ni iTuvaki

8. Na veiveisau cava e rawa ni yacovi keda?

⁸ E dau veiveisau vakalevu na ka eda sotava ena vuravura oqo. E tukuna o Tui Solomoni ni dau yacovi keda “na ka e tawanamaki.” (Dauvunau 9:11, NW) E rawa ni veisau vakasauri na ivakarau ni noda bula. E rawa nida bulabula vinaka tu nikua, ia eda tauvimate bibi nimataka. E rawa ni dei vinaka tu na noda cakacaka, ia ena siga e tarava eda sa sega ni vakacakacakataki. E rawa ni mate vakasauri e dua eda lomana. E rawa nira bula marau voli na lotu Vakarisito ena dua na matanitu, ia e rawa ni vakasauri na nodra vakacacani. E rawa ni dua e beitaki keda vakailasu, da mani vakacacani sara kina. Io, e rui veilecayaki se sega ni dei na ivakarau ni noda bula.​—Jemesa 4:13-15.

9. Na cava e yaga kina me vakasamataki e dua na iwase ni Roma wase e 8?

⁹ Ni yacovi keda vakasauri e dua na ka rarawa, e rawa meda nanuma ni sa sega ni kauaitaki keda se sega ni lomani keda na Kalou. Ni rawa ni yacovi keda kece na ituvaki oqori, e vinaka meda vakasamataka vinaka na vosa ni veivakacegui i Paula ena Roma wase e 8. A volai na ivola oqo vei ira na lotu Vakarisito lumuti. Ia, era okati tale ga kina na so tani tale na sipi, o ira era sa vakadonui mera weka ni Kalou, me vakataki Eparama ni se bera na gauna vakarisito.​—Roma 4:20-22; Jemesa 2:21-23.

10, 11. (a)Na cava era dau beitaki ira kina na tamata ni Kalou na meca? (b) Na cava e sega ni bibi kina vei ira na lotu Vakarisito na veibeitaki oqori?

¹⁰ Wilika na Roma 8:31-34. E taroga o Paula: “Kevaka sa totaki keda na Kalou, o cei me noda meca?” E noda meca o Setani kei na nona vuravura ca oqo. E rawa nira beitaki keda vakailasu na meca ena mataveilewai. So na itubutubu lotu Vakarisito era beitaki nira cati luvedra baleta era sega ni vakatara me soli vei luvedra na veiqaravi vakavuniwai e sega ni vakatara na lawa ni Kalou se ra sega ni vakatarai luvedra mera vakaitavi ena veisoqo ni lotu butobuto. (Cakacaka 15:28, 29; 2 Korinica 6:14-16) E so na lotu Vakarisito yalodina era beitaki vakailasu mera dau saqata na matanitu baleta nira sega ni veivakamatei ena ivalu se sega ni vakaitavi ena politiki. (Joni 17:16) So na dauveitusaqati era vakauta na itukutuku lasu ena veisala ni vakauitukutuku, era bau lai tini beitaki ira vakailasu na iVakadinadina i Jiova nira lotu rerevaki.

¹¹ Ia kua ni guilecava ni a tukuni ena nodra gauna na yapositolo: “Keitou sa kila sa vosavakacacataki na lotu tani oqo e na veivanua kecega.” (Cakacaka 28:22) Ia e sega ni ka bibi na vosa ni veivakacacani. Na Kalou ena vakadonui ira na lotu Vakarisito dina nira vakabauta na isoro i Karisito. E rawa vakacava me tagutuva nona lomani ira na qaravi koya o Jiova ni sa solia oti mai na nona isolisoli uasivi duadua, na Luvena lomani? (1 Joni 4:10) Sa dau taqomaki keda tiko na lotu Vakarisito o Karisito me tekivu mai na gauna e vakaturi kina mai na mate me lai tiko ena liga imatau ni Kalou. O cei e rawa ni vakalewa na veitaqomaki i Karisito, se rawa ni vakacala na lewa e tauca na Kalou vei ira na nona tamata yalodina? E sega ni dua!​—Aisea 50:8, 9; Iperiu 4:15, 16.

12, 13. (a) Na ituvaki cava soti eda sotava ena sega ni tawasei keda mai na loloma ni Kalou? (b) Na cava e inaki ni Tevoro ena nona vakararawataki keda? (c) Na cava era na qaqa ga kina na lotu Vakarisito?

¹² Wilika na Roma 8:35-37. Ke da sega ni vakavuna ga o keda, e rawa tale beka ni dua na tamata se dua na ka me tawasei keda mai na loloma i Jiova kei na Luvena, o Karisito Jisu? E rawa ni vakaleqai keda na lotu Vakarisito o Setani ni vakayagataki ira na nona mata e vuravura. Ena senitiuri sa dromu era vakacacani vakalevu na tacida tagane kei na yalewa ena levu na vanua. Era leqa tu vakailavo na tacida ena so na vanua. E so era kolaiciba ena viakana se lailai na isulu veiganiti era taukena. Na cava na inaki ni Tevoro ena nona vakadredretaka na nodra bula? E dua na kena inaki oya me vakayalolailaitaki ira mera kua kina ni sokalou vei Jiova. E vinakata o Setani meda vakabauta ni sa batabata na loloma ni Kalou vei keda. Ia, e dina beka oya?

¹³ Me vakataki Paula, o koya e lavetaka na Same 44:22, eda vulica tale ga na Vosa volai ni Kalou. Eda kila rawa kina na nona “sipi” nida sotava tiko na leqa ena vuku ga ni yaca ni Kalou. E vauca tale ga na vakacerecerei ni yaca ni Kalou kei na nona dodonu me veiliutaki. Ena vuku gona ni ka bibi oqo e vakatara tiko kina na Kalou meda vakatovolei, e sega ni baleta ni sega ni lomani keda. Se ituvaki dredre cava eda sotakaya, meda kila tiko ni se sega ni veisau na nona lomani keda na nona tamata na Kalou. Ke da mani vakadrukai eda na qaqa ga kevaka eda yalodina tiko. Eda na kaukaua tiko baleta ni dei tiko ga na nona lomani keda na Kalou.

14. E vakadeitaka vakacava o Paula ni na dei tiko ga na loloma ni Kalou vei ira na lotu Vakarisito era sotava na veika dredre?

¹⁴ Wilika na Roma 8:38, 39. E vakadeitaka vakacava o Paula ni na sega ni dua na ka me tawasei ira na lotu Vakarisito mai na loloma ni Kalou? Na veika e sotava o Paula ena cakacaka vakavunau e vakadeitaka vua ni na sega ni tarova nona lomani keda na Kalou na veika eda sotava. (2 Korinica 11:23-27; Filipai 4:13) A kila tale ga o Paula na inaki i Jiova kei na veika a cakava ena vukudra na nona tamata. Sa cavuka beka na loloma ni Kalou vei ira na qaravi koya ena yalodina era sa mate? Sega! E nanumi ira tiko ga na Kalou na tamata yalodina era sa mate, ena vakaturi ira mai na mate ena kena gauna.​—Luke 20:37, 38; 1 Korinica 15:22-26.

15, 16. Cavuta e so na ka ena sega ni vakaleqa na nona lomani ira nona tamata yalodina na Kalou.

¹⁵ Se leqa cava eda na sotakaya ena gauna oqo, na vakacalaka, na tauvimate, se na leqa vakailavo, ena sega ga ni tarova na nona lomani ira na nona tamata na Kalou. O ira na agilosi kaukaua mada ga, me vakataki Setani na agilosi talaidredre, era na sega ni moica rawa na Kalou me tarova nona lomani ira na nona dauveiqaravi yalodina. (Jope 2:3) E rawa vei ira na veimatanitu mera tarova na nodra cakacaka, balati ira e valeniveivesu, vakacacani ira, se sevaki ira na tamata ni Kalou. (1 Korinica 4:13) Nodra cati keda na veimatanitu ena rawa ni uqeti ira e so na tamata mera saqati keda, ia ena sega ga ni veisautaki koya na Turaga Sau ni lomalagi kei vuravura me biuti keda.

¹⁶ Nida lotu Vakarisito, meda kua ni rerevaka na ka e vakatoka o Paula me “veika sa yaco edaidai,” na veika e yaco tiko se ituvaki ni vuravura oqo, “se na veika ena yaco emuri,” me rawa ni tagutuva na nona lomani ira na nona tamata na Kalou. Dina ga nira na valuti keda na veika kaukaua e lomalagi kei vuravura era noda meca, ia ena vakacegui keda tiko ga na loloma ni Kalou. E tukuna o Paula ni na sega ni vakaleqa na loloma ni Kalou “na ka cecere, se na ka titobu.” Io, e sega ni rawa ina dua na ka e vakayalolailaitaki keda, se dua na ka e rawa ni vakamalumalumutaki keda, me tawasei keda mai na loloma ni Kalou; se me bau dua na ka e buli me rawa ni vakaleqa na nona veiwekani na Dauveibuli kei ira na nona tamata yalodina. E sega ni oti rawa na loloma ni Kalou; e sega ni mudu.​—1 Korinica 13:8.

Maroroya me Tawamudu na Loloma ni Kalou

17. (a)Na cava e vinaka kina na loloma ni Kalou “ka ca na bula”? (b) Eda vakaraitaka vakacava ni uasivi cake vei keda na loloma ni Kalou?

¹⁷ E bibi vakacava vei iko na loloma ni Kalou? O bau vakataki Tevita, ni vola: “Ni sa vinaka na nomuni loloma ka ca na bula, ena vakavinavinaka kina vei kemuni na tebenigusuqu. Ka’u na vosavinakataki kemuni vakaoqo ni’u sa bula tiko: ka’u na dodoka cake na ligaqu e na yacamuni”? (Same 63:3, 4) E bau dua beka na ka ena noda bula ena vuravura oqo me uasivia na noda marautaka na loloma ni Kalou kei na noda veitokani kei koya? Me kena ivakaraitaki, e uasivi beka na noda saga e dua na cakacaka sau levu mai na lomavakacegu kei na marau eda rawata nida veiwekani voleka kei na Kalou? (Luke 12:15) E so na lotu Vakarisito era vakasaurarataki mera biuti Jiova, ke sega era na vakamatei. E yaco oqo vei ira na iVakadinadina i Jiova ena nodra keba ni veivakararawataki na Nazi ena iKarua ni iValu Levu. Qai vakavo ga e le vica, era bolea na tacida lotu Vakarisito mera mate baleta nira via vakarurugi tiko ga ena loloma ni Kalou. E rawa meda bula tawamudu o keda na tiko dei ena loloma ni Kalou, na ka e sega ni rawa ni solia vei keda na vuravura oqo. (Marika 8:34-36) Ia e so tale na ka e okati ena bula tawamudu.

18. Na cava e rui taleitaki kina na bula tawamudu?

¹⁸ Eda na sega ni bula tawamudu ke sega o Jiova, ia vakasamataka mada se cava e yaga ni bula dede ke sega na noda Dauveibuli. Ena galili qai sega ni vakainaki. E solia o Jiova e dua na cakacaka yaga vei ira nona tamata ena iotioti ni veisiga oqo. E rawa nida vakabauta ni gauna e solia kina na bula tawamudu na Kalou vakainaki, o Jiova, eda na sega ni taqea rawa na levu ni cakacaka eda na lai vulica meda na cakava. (Dauvunau 3:11) Ke mani vakacava sara na levu ni ka eda na lai vulica ena gauna tawamudu oya, eda na sega ga ni kila taucoko na “titobu ni nona vutu ni vuku [na Kalou] kei na nona yalomatua.”​—Roma 11:33.

E Lomani Kemudou na Tamaqu

19. Na veivakadeitaki cava e solia o Jisu Karisito vei iratou na nona tisaipeli?

¹⁹ Ena 14 Naisani, 33 S.K., na iotioti ni bogi a tiko kina kei iratou na 11 na nona yapositolo yalodina, a vakadreti iratou o Jisu me baleta na veika eratou na qai sotava. Eratou dau tiko vata kei Jisu ena gauna e vakatovolei kina, eratou vakila tale ga na nona lomani iratou. (Luke 22:28, 30; Joni 1:16; 13:1) Ena gauna oqori e vakadeitaka kina vei iratou: “[E] lomani kemudou na Tamaqu.” (Joni 16:27) Na vosa oya e vukei iratou sara ga na tisaipeli me ratou kila ni lomani iratou dina na tamadratou vakalomalagi.

20. Na cava o nakita mo cakava tiko ga, na cava o nuitaka?

²⁰ E levu ena gauna oqo era sa yalodina voli mai ena nodra qaravi Jiova ena vicasagavulu na yabaki. Ni bera ni cava na ivakarau ni veika oqo, eda na sotava e levu tale na veivakatovolei. Me kua ni vakavuna nomu vakatitiqataka na nona lomani iko na Kalou na veika dredre o na sotava. E rui bibi mo kila deivaki tiko ni o Jiova e lomani iko dina. (Jemesa 5:11) Meda dui cakava tiko mada ga na noda itavi nida muria tiko ena yalodina na nona ivakaro. (Joni 15:8-10) Meda vakacaucautaka tiko mada ga na yacana ena veigauna kece. Meda toro volekati Jiova tiko ga ena masu kei na noda vulica nona Vosa. Se cava ena mani yaco nimataka, ke da saga vakaukaua tiko ga meda vakamarautaki Jiova, eda na lomavakacegu baleta nida kila ni lomani keda tiko ga.​—2 Pita 3:14.

O na Sauma Vakacava?

• Me veiraurau noda bula vakayalo kei na ka eda gadreva, eda na vinakata na loloma i cei?

• Na cava soti ena sega ni vakavuna me tagutuva o Jiova nona lomani ira nona tamata?

• Na cava e ‘ca kina na bula’ ni vakatauvatani kei na nona lomani keda o Jiova?

[iYaloyalo ena tabana e 13]

Nida vakila nida yawaka na loloma ni Kalou, meda cakava kina e dua na ka

[iYaloyalo ena tabana e 15]

E kila o Paula na vu ni nona vakacacani