E Rawa ni Vukei Keda na iVolatabu Meda Marau

E DINA ni iVolatabu e sega ni ivola vakavuniwai, ia e vakadeuca na cakayaco ni lomada ena noda bula vakayago kei na noda vakasama​—se mani vinaka se ca. E kaya na iVolatabu: “A loma daumarau sa wai yaga: ia na yalo sa mavoa sai vakamamaca ni sui.” Kuria oya, eda wilika: “Kevaka ko sa gu ca e na siga ni rarawa, sa lailai na nomu kaukauwa.” (Vosa Vakaibalebale 17:22; 24:10) Na guca e rawa ni vakaotia na noda kaukaua, e vakamalumalumutaki keda qai rawa ni veivakaleqai, vakauasivi ke da sega ni via qara veivuke se vakavinakataka na keda ituvaki.

Na yalolailai e rawa tale ga ni vakaleqa na nona bula vakayalo e dua. O ira era dau nanuma ni sega na kedra yaga, e dau yacovi ira vakavuqa na vakasama nira na sega ni rawa vakadua ni veiwekani vinaka kei na Kalou se me vakadonui ira o koya. O Simone, na goneyalewa a cavuti oti ena imatai ni ulutaga, a vakatitiqataka ni “na rawa ni vakadonui koya na Kalou.” Ia, nida dikeva na ka e tukuna na Vosa ni Kalou, na iVolatabu, eda kunea ni Kalou e dau kauaitaki ira dina era saga mera vakamarautaki koya.

E Kauai na Kalou

Na iVolatabu e tukuna vei keda ni “voleka ko Jiova vei ira sa ramusu na yalodra; ka sa vakabulai ira sa dasila na lomadra.” E sega ni cata na Kalou na “yalo sa ramusu, ka bibivoro,” ia e yalataka ga ni na “vakabula na yalo i koya sa yalomalumalumu, ka vakabula na lomadra sa bibivoro.”​—Same 34:18; 51:17; Aisea 57:15.

Ena dua na gauna, o Jisu na Luve ni Kalou a raica ni dodonu me vakadreta vei ratou na nona tisaipeli, ni Kalou e dau raica na nodra vinaka na nona tamata. A vakayagataka o Jisu e dua na vosa vakatautauvata me dusia ni Kalou e kila na nona lutu ina qele e dua na separo​—e dua na ka era okata e levu me sega soti ni bibi. E vakabibitaka tale ga o Jisu ni kila na Kalou na veika matailalai baleti keda, e wilika sara mada ga na drauniuluda. A tinia o Jisu na nona vosa vakatautauvata ena nona kaya: “O koya mo dou qai kakua ni rere: dou sa uasivi cake vei ira na separo e vuqa.” (Maciu 10:​29-​31)a E vakaraitaka o Jisu se mani cava eda nanuma na tamata yadua me baleti keda ga, e ka talei vua na Kalou na tamata e vakabauta. Sa rauta me tukuna vei keda na yapositolo o Pita “ni sega ni dau vakaduiduitaka na tamata na Kalou. Ia sa dau vinakati ira kece ga era dau vakarokorokotaki koya ka dau cakava na ka e dodonu, veitalia ga se mataqali kawa tamata cava era lewena.”​—Cakacaka 10:​34, 35, VV.

Me Donu na Nomu Rai

E uqeta na Vosa ni Kalou me tiko vei keda na rai donu me baleti keda yadua. Ena veiuqeti ni Kalou a vola na yapositolo o Paula: “E na vuku ni loloma sa solia wale mai vei au na Kalou, au sa kaya kina vei kemuni kece sara: Me kakua ni dua vei kemuni me sivia na nona nanuma me baleti koya vaka i koya. Ia me vakarauta ga na nomu vakasama me baleti kemuni ka mo ni dui lewai kemuni vakavinaka me vaka na i vakarau ni vakabauta sa vota vei kemuni yadudua na Kalou.”​—Roma 12:​3, VV.

Me kua gona nida nanumi keda vakasivia nida na dokadoka tale kina; se da taurivaka na rai e duatani sara, oya ni sega na beteda. Ia, e noda inaki meda bucina na rai e donu me baleti keda, oya ni tu na ka eda vinaka kina, ia meda ciqoma tale ga ni na vakaiyalayala na veika eda rawa ni cakava. Ena vakasama oqori, e vakamacalataka kina vaka oqo e dua na marama lotu Vakarisito: “Au sega ni tamata ca; ia au sega tale ga ni uasivi. Me vakataki keda kece, e tiko na yasana au vinaka kina, e tiko tale ga na yasana au ca kina.”

Io, e ka dredre toka na bucini ni rai e donu. Ena rairai ka ni sasaga dina meda cavuraka tani na rai cala sa vakayabaki tu beka vei keda. Ia, ena veivuke ni Kalou eda na rawa ni veisautaka kina na noda itovo vaka kina na noda rai me baleta na bula. Na Vosa ni Kalou e uqeti keda meda cakava oqo. Eda wilika: “E na vuku ni valavala eliu, mo dou biuta tani kina na tamata makawa, o koya sa ca mai e na vuku ni gagadre ca sa veivakaisini; mo dou vakavoui mai e na yalomudou kei na lomamudou; ka mo dou vakaisulu e na tamata vou, o koya sa caka me vaka na Kalou e na yalododonu kei na yalosavasava ni dina.”​—Efeso 4:​22-​24.

Nida saga meda vakavouya ‘na lomada,’ oya na igu e uqeti keda tiko, eda na rawa ni veisautaka sara ga na noda ivakarau ni bula​—mai na dua e dau vakasama cala ina dua e dau donu na nona rai. O Lena, na goneyalewa a cavuti ena imatai ni ulutaga, a raica rawa ni gadrevi taumada vua me cavuraka tani na nona dau nanuma ni sega ni dua e lomani koya se via vukei koya. Oqori duadua na sala ena rawa ni qai veisau kina na nona rai me baleti koya. Na ivakasala yaga cava ena iVolatabu a vukei Lena, Simone, kei ira tale e so mera veisau?

Na iVakavuvuli Vakaivolatabu e Uqeta na Marau

“Mo biuta vei Jiova na nomui colacola bibi, ena tokoni iko ko koya.” (Same 55:22) Na kena e bibi taudua oya na masu ni na vukei keda meda kune marau. E kaya o Simone: “Niu yalolailai, au na vakararavi vei Jiova ena noqu kerea na nona veivuke. Ena ituvaki kece au sotava, au vakila kina na nona veivuke kei na nona veidusimaki.” Ni uqeti keda na daunisame meda biuta vei Jiova na noda icolacola bibi, e tukuna tiko o koya ni o Jiova e sega wale ga ni kauaitaki keda, ia e raica ni ganiti keda yadua tale ga na nona veivuke kei na nona veitokoni. Ena bogi ni kanavata ni Lakosivia ena 33 S.K., eratou a rarawataka na tisaipeli i Jisu na nona kaya ni sa vakarau biuti iratou. Sa qai uqeti iratou me ratou masuti Tamana, qai tomana: “Dou kerekere, dou na qai rawata, me levu sara na nomudou marau.”​—Joni 16:​23, 24.

“A ka ni veivakalougatataki vakalevu me soli ka, ka vakalailai ga me taura na ka.” (Cakacaka 20:35) Me vaka ga e vakavulica o Jisu, na solika e dua na sala eda na marau kina. Nida bulataka na ivakavuvuli ni iVolatabu oqo, ena vukei keda meda kauaitaka vakabibi na veika era gadreva na tani, me kua kina nida vakasamataka tu ga ni sega na beteda. Nida dau vukei ira na tani da qai raica nira marautaka, eda na vakila tale ga ni tiko bagi na keda yaga. E vakadinadinataka o Lena ni nona vakaitavi wasoma ena kena kacivaki na itukutuku vinaka ena iVolatabu vei ira na tani e vukei koya ena rua na sala. “iMatai, au vakila ni yacovi au na marau kei na bula vakacegu a cavuta o Jisu,” e kaya o Lena. “Kena ikarua, na nodra tataleitaki e so e vakavuna na noqu marau.” Nida yalorawarawa na soli keda, eda na vakadinadinataka kina na dina ni ka e kaya na Vosa Vakaibalebale 11:25: “Ko koya sa vagunuva na tani ena vagunuvi talega ko koya.”

“Sa ka ca na nodra siga kecega era rarawa tiko: ia ko koya sa reki na lomana, sa kana magiti tikoga.” (Vosa Vakaibalebale 15:15) E tu kece vei keda na galala ni digidigi e vauca na sala eda dikevi keda kina kei na keda ituvaki. Eda na rawa ni vakataki koya e vakavuna ga na nona rarawa ni dau rai cala, se da na digia meda vakataki koya e dau donu na nona rai, sa rauta me “reki na lomana,” qai marau me vaka ni tiko ena dua na kana magiti. E kaya o Simone: “Au dau saga me donu na noqu rai. Au na vakaogai au gona vakalevu ena noqu vuli vakataki au kei na noqu lako ina cakacaka vakavunau, au dau qai masu tale ga. Au dau saga tale ga meu veimaliwai kei ira e vinaka na nodra rai, vaka kina noqu saga meu vukei ira na tani.” Na ivakarau ni yalo oqori e rawati kina na marau dina, me vaka ga e uqeti keda kina na iVolatabu: “Dou marautaki Jiova, ka reki, koi kemudou na yalododonu: dou kaila e na marau, koi kemudou kecega sa yalodina.”​—Same 32:11.

“Sa loloma tiko e na veigauna kece na wekana na tamata, ka sa vaka na tacina e na gauna ni rarawa.” (Vosa Vakaibalebale 17:17) Nida talaucaka na lomada vua e dua eda lomana se vua e dua na daunivakasala nuitaki, ena rawa ni vukei keda meda valuta na nanuma cala, meda vakatikitikitaka, da qai kua ni vakalaiva me rawai keda. Nida vakaraitaka na lomada vua e dua tale, ena rawa ni veivuke me veiganiti qai donu na noda rai. “E dau veivuke vakalevu nida tukuna na lomada,” e kaya o Simone. “Ena gadrevi gona mo tukuna na lomamu vua e dua. Vakavuqa, ni oqori ga na ka e gadrevi me cegu kina na lomada.” Nomu cakava oqori e vukei iko mo vakila na dina ni ka e kaya na vosa vakaibalebale: “Ni sa bibi na loma ni tamata sa vakacuva: ia na vosa vinaka sa vakamarautaka.”​—Vosa Vakaibalebale 12:25.

Na Ka O Rawa ni Cakava

Eda sa dikeva mai e vica ga na ivakavuvuli yaga qai veiganiti ena iVolatabu, e rawa ni vukei keda meda valuta kina na rai cala da qai kunea kina na marau. Ke o dua vei ira na valuta voli na nomu dau nanuma ni sega na betemu, oni uqeti mo ni dikeva vinaka na Vosa ni Kalou, na iVolatabu. Saga mo bucina na rai e donu qai kua ni sivia na ka o namaka me baleti iko se na nomu veiwekani kei na Kalou. E nuitaki ni na dusimaki iko na Vosa ni Kalou ena nomu kune marau ena ka kece o cakava.

[iVakamacala e ra]

[iYaloyalo ena tabana e 7]

Na bulataki ni ivakavuvuli vakaivolatabu e uqeta na marau