“Ni Bobula i Jiova”

1. Veidutaitaka na rai e takalevu me baleta na bobula kei na kena e tiko ena Roma 12:11.

E LEVU era nanuma ni bobula e tiko kina na vakasama ni dua e vakararawataki vakalevu, vakalolomataki, qai dau caka vua na veika tawadodonu. Ia e duidui na noda bobula vua na Kalou. E tukuni ena Vosa uqeti vaKalou ni okati kina na noda yalorawarawa ni qarava e dua na Turaga dauloloma. A vakamasuti ira mada ga na lotu vaKarisito ena imatai ni senitiuri na yapositolo o Paula mera “bobula i Jiova.” Kena ibalebale e uqeti ira tiko ena veiqaravi tabu, e yavutaki ena nodra lomana na Kalou. (Roma 12:11) Na cava mada e okati ena veivakabobulataki qori? Na cava meda cakava meda kua ni vakabobulataki vei Setani kei na nona vuravura? Eda na vakalougatataki vakacava nida yalodina meda veiqaravi me vaka na bobula vei Jiova?

“AU SA LOMANA NA NOQU TURAGA”

2. (a) Na cava ena rairai vakavuna me tomana tiko ga e dua na bobula Iperiu na nona veiqaravi? (b) Na cava e vakaibalebaletaka na kena cula na daligana na bobula?

² Eda vulica ena Lawa a solia na Kalou vei Isireli na ka e gadrevi me rawa nida bobula i Jiova. Ena ikavitu ni yabaki ni nona veiqaravi e dua na bobula Iperiu, sa na rawa ni sereki. (Lako 21:2) Ia ke lomana dina nona turaga qai vinakata me qaravi koya ena vo ni nona bula, a vakarautaka o Jiova e dua na ituvatuva vakasakiti. Ena vinakati vua na nona turaga me kauti nona bobula ina katuba se duru ni sogo qai cula basika na daligana na bobula ena icula. (Lako 21:5, 6) Na ka e vakasakiti kina na ituvatuva qo ni vakayagataki kina na daliga. Ena vosa vakaIperiu ni talairawarawa, e dau vakaibalebaletaki ena vakarorogo. Kena ibalebale na bobula yalorawarawa qori, e vinakata me talairawarawa tiko ga me qaravi nona turaga. E vukei keda qori meda raica vakabibi na ka e okati ena noda yalayala vei Jiova, qori na noda yalorawarawa meda talairawarawa baleta nida lomana na Kalou.

3. Na cava na yavu ni noda yalataki keda vua na Kalou?

³ Nida vakarau papitaiso meda dua na lotu vaKarisito, eda sa vakatulewataka meda qaravi Jiova meda nona bobula. Eda yalataki keda vei Jiova baleta nida vinakata meda talairawarawa vua da qai via cakava na lomana. E sega ni dua e vakasaurarataki keda kina. O ira mada ga na itabagone era papitaiso, e nodra vakatulewa sara ga mera yalataka na nodra bula vei Jiova, era sega ni cakava qori ena nodra via vakamarautaki ira na nodra itubutubu. Na loloma e yavu ni nona via yalataki koya e dua na lotu vaKarisito vua na Turaga vakalomalagi o Jiova. E vola na yapositolo o Joni: “Qo na ibalebale ni noda lomana na Kalou, meda muria na nona ivunau.”—1 Joni 5:3.

GALALA, IA SE BOBULA TIKO GA

4. Na cava e vinakati me rawa nida “bobula ina ivalavala dodonu”?

⁴ Eda vakavinavinakataka na ka e cakava vei keda o Jiova me rawa nida nona bobula! Na noda vakabauta na isoro ni veivoli i Karisito e rawa kina nida sereki mai na ivau ni ivalavala ca. Eda sega ni uasivi, ia eda vakatulewataka meda talairawarawa vei Jiova kei Jisu. Qori na ka e vakamatatataka o Paula ena dua na nona ivola: “Ni okati kemuni moni mate ena vuku ni ivalavala ca, ia moni bula moni qarava na Kalou ena vuku i Karisito Jisu.” Oti sa qai vakarota: “E vakaevei, oni kila tiko ni kevaka oni vakabobulataki kemuni vua e dua moni talairawarawa vua, oni sa nona bobula ni oni talairawarawa vua, se moni bobula ina ivalavala ca qai kena itinitini na mate, se moni talairawarawa qai kena itinitini na nomuni okati moni yalododonu? Me vakavinavinakataki na Kalou ni oni a bobula ina ivalavala ca, ia oni talairawarawa mai vu ni lomamuni ena ivakavuvuli oni vakavulici kina. Io, ena gauna oni sereki kina mai na ivalavala ca, oni sa bobula ina ivalavala dodonu.” (Roma 6:11, 16-18) Dikeva ni vakayagataka na yapositolo na vosa “talairawarawa mai vu ni lomamuni.” Io nida yalayala vei Jiova, eda sa “bobula ina ivalavala dodonu.”

5. Na cava eda na valuta tiko e veigauna, cava na vuna?

⁵ Ia e tiko eso na ka e rawa ni vakadredretaka na noda dina ena noda yalayala. E rua na ka eda na saga meda valuta tiko. Kena imatai, na ka sara ga a saga voli o Paula me valuta. E vola: “E vu dina mai lomaqu noqu marautaka na lawa ni Kalou, au qai raica ni dua tale na lawa e tiko ena veitikiniyagoqu e veivala tiko kei na lawa ni noqu vakasama qai vakabobulataki au ina lawa ni ivalavala ca e tiko ena veitikiniyagoqu.” (Roma 7:22, 23) Na ivalavala ca eda sucu kaya mai e dau vakamalumalumutaki keda. Koya gona, eda na valuta tiko e veigauna na noda malumalumu. E vakamasuti keda na yapositolo o Pita: “Ni oni sa galala, moni kua ni raica na nomuni galala me iulubale ni nomuni caka ca, moni vaka ga na tamata dauveiqaravi ni Kalou.”—1 Pita 2:16.

6, 7. Na cava e cakava o Setani ena vuravura qo me rawa ni rairai vinaka?

⁶ Qo na ikarua ni ka eda na valuta tiko, na nodra veivakamuai e vuravura na timoni. O Setani e iliuliu ni vuravura, e taketetaki keda ena nona vakayagataka na nona ivadi me rawa nida tawayalodina vei Jiova kei Jisu. E saga me vakabobulataki keda ena nona temaki keda meda vakamalumalumu ena veivakamuai ca. (Wilika Efeso 6:11, 12.) Dua na sala e cakava kina qori o Setani, oya na nona boroya na nona vuravura me rairai vinaka, me veirawai. E veivakasalataki na yapositolo o Joni: “O koya e lomani vuravura, ena sega ni lomani koya o Tamada; baleta na ka kece e tu e vuravura—na gagadre ni yago, gagadre ni mata kei na nona dokadokataka e dua na ka e taukena—e sega ni vu mai vua na Tamada, e vu ga e vuravura.”—1 Joni 2:15, 16.

⁷ E takalevu e vuravura na yalo ni via rawaka. E veiuqeti o Setani mera vakabauta na tamata ni vakavu marau na ilavo. Dua na ka na levu ni sitoa lelevu sa tu nikua. Na kena dau kacivaki na ivoli e vakabibitaka na ivakarau ni bula e taukeni kina na iyau kei na ka ni veivakamarautaki. O ira na tabana ni gade era dau tuvanaka na gade ena veivanua totoka, da qai gole vata kei ira era vakavuravura na nodra rai. Io na ka kece e tu e vuravura e uqeti keda meda veisautaka na noda ivakarau ni bula me salavata kei na kena e vuravura.

8, 9. Na ka rerevaki cava e rawa nida vakabobulataki kina, na vuna?

⁸ Era muria na ivakarau ni rai ni vuravura eso na lotu vaKarisito ena imatai ni senitiuri, a vakasalataki ira o Pita: “Era taleitaka mera vakaceguya na nodra gagadre vakayago ena siga. Era vaka na duka kei na ca e veitakavi, era vakacegui ira ena nodra marau vakalialia kei na nodra ivakavuvuli veivakacalai nira kanavata tiko kei kemuni. Era cavuta na vosa viavialevu e tawayaga, ena gagadre ni yagodra kei na nodra ivalavala vakasisila era bacani ira kina era se qai drovaki ira tiko na dau caka ca. Era yalataka na bula galala, ia o ira mada ga era bobula tu ena ka ca. Ni o koya e rawai vua e dua tale e sa bobula vei koya.”—2 Pita 2:13, 18, 19.

⁹ Ni dua e vakaceguya nona “gagadre ni mata” e sega ni kena ibalebale sa galala o koya. Ia sa na vakabobulataki vua na iliuliu tawaraici ni vuravura qo o Setani na Tevoro. (1 Joni 5:19) E vakarerevaki dina nida vakabobulataki ena domodomoiyau—qori na veivakabobulataki e dredre meda drotani mai kina.

CAKACAKA MARAUTAKI DUADUA

10, 11. O cei nikua e taketetaki ira vakalevu o Setani, e rawa ni vakaleqai ira vakacava na ivakarau ni vuli e vuravura?

¹⁰ Me vaka ga a cakava ena were o Iteni, nikua o Setani ena taketetaki ira tale ga e lailai na nodra kila. O ira na itabagone era nona takete nabadua. E sega ni marautaka o Setani me raica e dua na itabagone se dua me soli koya me bobula vei Jiova. E vinakata na meca ni Kalou qo meda tawayalodina ena noda yalayala vei Jiova.

¹¹ Meda lesu tale mada vua na bobula a vinakata me cula na daligana. Ena rairai vakila na mosi; ia ena oti yani qori ni toso na gauna, qai laurai tu na ivakatakilakila ni nona via veiqaravi vakabobula. E va tale ga qori nida digia na ivakarau ni bula e duidui mai na kena era muria e levu, e sega ni ka rawarawa qai rawa ni mosimosi dina vua e dua na itabagone. E uqeta o Setani na vakasama ni rawa ni vakacegui keda na cakacaka saumi era tu ena nona vuravura, ia e dodonu meda vakasamataka tiko na lotu vaKarisito ni bibi meda vakaceguya na noda gagadre vakayalo. E vakavulica o Jisu: “Era marau o ira na kila nira gadreva na Kalou.” (Maciu 5:3) O ira na lotu vaKarisito yalayala oti e bibi ena nodra bula na vakayacori ni loma ni Kalou, sega ni loma i Setani. Era marautaka na vunau i Jiova, ra qai vakasamataka vakatitobu ena siga kei na bogi. (Wilika Same 1:1-3.) Ia na levu ni vuli sa caka tu nikua e lailai kina na nodra gauna na dauveiqaravi i Jiova mera dau vakasama vakatitobu ra qai vakaceguya na nodra gagadre vakayalo.

12. Na vakatulewa cava mera cakava e levu na itabagone nikua?

¹² E rawa ni dredre vua na bobula lotu vaKarisito me qarava e dua na turaga e sega ni qaravi Jiova. Ena imatai ni nona ivola vei ira e Korinica, a taroga o Paula: “O kacivi ni o a bula tu?” Sa qai vakasalataki ratou: “Kua ni lomaleqa. Ia ke o rawa ni sereki, sasagataka sara.” (1 Kor. 7:21) Ena vinakati sara ga vua na bobula me sereki. Ena levu na vanua nikua, e dau vakabibitaki mera yacova na lewenivanua e dua na ivakatagedegede ni vuli. Oti sa qai soli vei ira na gonevuli na digidigi. Ke da tomana na noda vuli meda rawata kina e dua na cakacaka vinaka ena vuravura qo, e rawa sara ga ni yalana na noda galala meda veiqaravi vakatabakidua.—Wilika 1 Korinica 7:23.

VULI TOROCAKE SE VULI VINAKA DUADUA?

13. Na vuli vakacava ena yaga vakalevu vei ira na dauveiqaravi ni Kalou?

¹³ E vakasalataki ira na lotu vaKarisito mai Kolosa o Paula: “Ni qarauna: de dua e tagavi kemuni bulabula ena vuku vakavuravura kei na vosa ni veicavilaki e yavutaki ena ivakavuvuli vakatamata kei na ivakavuvuli e vakabibitaki e vuravura, e sega ni salavata kei na ivakavuvuli i Karisito.” (Kolo. 2:8) “Na vuku vakavuravura kei na vosa ni veicavilaki e yavutaki ena ivakavuvuli vakatamata” e laurai sara ga nikua ena ivakavuvuli vakavuravura era vakatavulica e levu na vuli vinaka. E levu na vuli torocake e dau vakabibitaki ga kina na vuli lesoni, sega soti na vuli tara. O ira gona era sa rawata na nodra ivola e sega ni levu se sega sara ga na nodra kila vakacakacaka, ra qai sega ni vakarautaki ira ena veika ena sotavi ena vanua ni cakacaka. Ia eda duidui na dauveiqaravi i Jiova, eda na digitaka na vuli ena rawati kina na kila me rawarawa ga kina na noda bula nida qaravi Kalou. Eda na muria na ivakasala i Paula vei Timoci: “E levu dina na ka ena rawati ena noda qarava na Kalou, ia ena rawati ga ke salavata noda qarava na Kalou kei na noda lomavakacegu ena ka e tu vei keda. O koya gona, ke sa tiko na ka meda kania, na isulu meda tokara, kei na vanua meda tiko kina, meda lomavakacegu.” (1 Tim. 6:6, 8) Eda na sega ni saga na lotu vaKarisito meda vakoroi me qai volai ena yacada na matanivola e vakatakilakilataka na ivakatagedegede ni vuli eda sa yacova. Ia eda na saga meda rawata tiko ga na “ivola ni veivakadeitaki” oya na noda vakaitavi ena kena levu e rawa ena cakacaka vakaitalatala.—Wilika 2 Korinica 3:1-3.

14. Ena Filipai 3:8, e raica vakacava o Paula na nona itavi me bobula vua na Kalou kei Karisito?

¹⁴ Vakasamataka mada na yapositolo o Paula. A vakavulici koya o Kamelieli na nodra qasenivuli ni lawa na Jiu. Na vuli qori e rawa ni vakatauvatani kei na vuli ena univesiti nikua. Ia a raica vakacava o Paula na vuli qori kei na nona itavi me bobula vua na Kalou kei Karisito? E vola: “Au okata mera tawayaga na ka kece ena vuku ni kena talei na kilai Karisito Jisu na noqu turaga.” E tomana: “Ena vukuna au bolea meu vakanadakuya na ka kece, au okata mera benu meu veivolekati kina kei Karisito.” (Fpai. 3:8) Na ivakamacala qori e vukei ira na lotu vaKarisito itabagone kei ira na itubutubu era rerevaka na Kalou mera vakatulewataka vinaka na veika e vauca na vuli. (Raica na iyaloyalo.)

YAGA NA VULI UASIVI DUADUA

15, 16. Na vuli cava e vakarautaka na isoqosoqo i Jiova, na cava na kena inaki?

¹⁵ Na cava e dau laurai ena levu na koronivuli ni vuli torocake e veiyasa i vuravura? Sega beka ni dau tekivu mai kina na tiko yavavala vakapolitiki kei na vakabesebese? (Efeso 2:2) Ia na isoqosoqo i Jiova e vakarautaka na vuli uasivi duadua, e caka tale ga ena dua na vanua e kune kina na vakacegu, qori ena ivavakoso vaKarisito. Na Koronivuli ni Vuli Vunau e dau caka e veimacawa, e yaga vei keda yadua. Sa qai tiko na nodra vuli na painia tagane dawai (Koronivuli ni Vuli iVolatabu ni Tagane Dawai) kei na nodra vuli na veiwatini painia (Koronivuli ni Vuli iVolatabu ni Veiwatini). Ena vukei keda na koronivuli va qori meda talairawarawa vei Jiova, na noda Turaga vakalomalagi.

¹⁶ Eda rawa ni vakadidike ena levu na iyau vakayalo ena Watch Tower Publications Index se Watchtower Library ena CD-ROM. Na inaki ni vuli vakalou qori me sokaloutaki kina o Jiova. E vakavulici keda ena sala meda vukei ira na tamata mera duavata tale kei na Kalou. (2 Kor. 5:20) Qori ena uqeti ira tale ga mera veivakavulici.—2 Tim. 2:2.

VAKALOUGATATAKI NA BOBULA

17. Eda na vakalougatataki vakacava nida digia na vuli uasivi duadua?

¹⁷ Ena vosa vakatautauvata i Jisu me baleta na taledi, erau vakacaucautaki e rua na bobula yalodina, rau qai marautaka vata kei na nodrau turaga, mani lesi tale vei rau e levu na itavi. (Wilika Maciu 25:21, 23.) Nida digia na vuli uasivi duadua, eda na marau da qai vakalougatataki. Raica mada qo na ivakaraitaki i Michael. E toso vinaka nona vuli, eratou mani sureti koya na nona qasenivuli me ratou veivosakitaka na nona lai vuli ena univesiti. Ia eratou kurabuitaka nona tukuna ni na lai vuli ena koronivuli ni vuli tara. E lekaleka na gauna ni vuli qori, ni na rawa ni vukei koya ena nona painia tudei. Vakacava e veivutunitaka o Michael na vakatulewa e cakava? E tukuna: “Na vuli vakalou au vulica niu painia—kei na noqu sa dua na qase ni ivavakoso qo—sa bau yaga dina. Na veivakalougatataki kei na itavi dokai au marautaka tu qo e sega ni vakatauvatani kei na ilavo au rawa ni rawata. Dua na ka na noqu marautaka niu a sega ni saga na vuli torocake.”

18. Na cava mo digia kina na vuli uasivi duadua?

¹⁸ Na vuli uasivi duadua e vakavulici keda ena inaki ni Kalou qai vukei keda meda bobula vei Jiova. E vukei keda tale ga meda nuitaka nida na ‘sereki mai na noda vakabobulataki ina ca,’ da qai rawata na “galala lagilagi era vakila tu na luve ni Kalou.” (Roma 8:21) Koya e bibi sara, eda vulica kina na sala vinaka duadua eda rawa ni vakaraitaka kina nida lomani Jiova dina na Turaga vakalomalagi.—Lako 21:5.