“Qo Sara ga na Gauna Vinaka”

“Raica! Qo sara ga na gauna vinaka. Qo na siga ni veivakabulai.”​—2 KOR. 6:2.

1. Na cava meda kila kina na cakacaka bibi duadua meda cakava ena loma ni dua na gauna?

“SA DUI vagauna na ka kecega, ka sa dui vakasiga na ka kece sa caka e ruku i lomalagi.” (Dauv. 3:​1) A tukuna tiko e keri o Solomoni ni bibi me kilai na gauna vinaka duadua me caka kina e dua na ka yaga​—se mani teitei, gade, veika vakabisinisi, se na noda veivosaki kei ira tale na so. Ia e bibi tale ga me kilai na cakacaka bibi duadua meda cakava ena loma ni dua na gauna. Kena ibalebale ga qo, me matata tiko vei keda na ka meda vakaliuca.

2. Eda kila vakacava ni kila o Jisu na bibi ni gauna a bula donuya ni vunau voli e vuravura?

² Ni bula voli e vuravura o Jisu, a kila na bibi ni gauna a bula donuya kei na ka e vinakati me cakava. Ni matata tiko vua na ka me vakaliuca, a kila ni oya sara ga na gauna a namaki tu mai vakabalavu me vakayacori kina e levu na parofisai me baleta na Mesaia. (1 Pita 1:​11; Vkta. 19:10) E tiko na ka me cakava me vakatakila kina ni o koya na Mesaia yalataki. A vinakati me vunautaka vinaka sara na ka dina me baleta na Matanitu ni Kalou, qai kumuni ira era na veiliutaki kei koya ena matanitu oya. E kotora o Jisu na yavu mera muria na ivavakoso vaKarisito era vakayacora na cakacaka vakavunau kei na veivakatisaipelitaki me yacova na iyalayala kei vuravura.​—Mari. 1:​15.

3. A uqeti Jisu vakacava na nona kila na bibi ni gauna e bula donuya?

³ Na nona kila na bibi ni gauna a bula donuya a uqeti koya sara ga me gumatua ni cakava na loma i Tamana. A tukuna vei ratou na nona tisaipeli: “E levu dina na ka me tamusuki, ia era lewe lailai ga na tamata cakacaka. Ni kerea gona na Turaga ni tatamusuki me tala mai eso tale na tamata cakacaka ina nona tatamusuki.” (Luke 10:2; Mala. 4:​5, 6) Ni digi ratou oti na le 12 o Jisu, a digi ira tale e le 70, a vakamatatataka na ka mera cakava qai talai ira mera lai vunautaka na itukutuku veiuqeti qo: “Sa voleka na matanitu vakalomalagi.” Ia eda wilika me baleti Jisu: “Ni vakavulici iratou oti na tinikarua nona tisaipeli, e biubiu sara  . .  me lai vunau, me veivakavulici tale ga ena so tale na koro.”​—Maciu 10:​5-7; 11:1; Luke 10:1.

4. A vakatotomuri Karisito vakacava o Paula?

⁴ E ivakaraitaki uasivi vei ira na nona imuri o Jisu ena nona gugumatua kei na nona dina ena nona ilesilesi. Qori na ka a vakaibalebaletaka na yapositolo o Paula ni uqeti ira na tacina: “Moni vakatotomuri au, me vaka ga na noqu vakatotomuri Karisito.” (1 Kor. 11:1) A vakatotomuri Karisito vakacava o Paula? E bibi duadua na nona solia na nona vinaka kece ena vunautaki ni itukutuku vinaka. Eda wilika ena ivola i Paula vei ira na ivavakoso na matavosa va qo, “ni kua ni mokusiga ena nomuni cakacaka,” “ni bobula i Jiova,” “ni dau vakaitavi vakalevu ena cakacaka ni Turaga,” “se mani cava oni cakava, ni cakava mai vu ni lomamuni me vaka oni cakava tiko vei Jiova.” (Roma 12:11; 1 Kor. 15:58; Kolo. 3:​23) A sega ni guilecava o Paula na nodrau sota kei na Turaga o Jisu Karisito ena gaunisala i Tamasiko kei na vosa i Jisu a rairai tukuna vua o Ananaiasa: “[Au] sa digitaka oti na tagane qo me tukuna na yacaqu ina veimatanitu, vei ira tale ga na tui kei ira na luvei Isireli.”​—Caka. 9:​15; Roma 1:​1, 5; Kala. 1:​16.

“Qo Sara ga na Gauna Vinaka”

5. Na cava a uqeti Paula me gugumatua ena nona cakacaka vakaitalatala?

⁵ Nida wilika na Cakacaka, e laurai votu kina na nona yaloqaqa kei na nona gugumatua o Paula ena nona cakacaka vakaitalatala. (Caka. 13:​9, 10; 17:​16, 17; 18:5) A kila o Paula na bibi ni gauna a bula donuya ni a kaya: “Raica! Qo sara ga na gauna vinaka. Qo na siga ni veivakabulai.” (2 Kor. 6:2) Ena gauna makawa, na yabaki 537 B.S.K., a gauna vinaka mera lesu kina i nodra vanua o ira na tu vakavesu mai Papiloni. (Aisea 49:​8, 9) Ia na cava a vakaibalebaletaka o Paula? Eda na kila qori nida dikeva na veitikina yavolita.

6, 7. Na itavi dokai cava e lesi vei ira na lotu vaKarisito lumuti nikua? O cei e tokoni ira tiko na lumuti ena gauna qo?

⁶ Ena nona ivola e liu, a tukuna kina o Paula na itavi dokai e soli vua kei ira na nona itokani lotu vaKarisito lumuti. (Wilika 2 Korinica 5:​18-​20.) A tukuna ni lesi ira na Kalou ena dua na itavi bibi, na “itavi ni veivakaduavatataki” mera vakamasuti ira kina na tamata ‘mera duavata tale kei na Kalou.’ Kena ibalebale ga, mera veitokani vinaka tale se ra veiyaloni kei na Kalou.

⁷ Me tekivu mai na veivorati e Iteni, eda sa yawaki Jiova na kawatamata. (Roma 3:​10, 23) Qori e vakavuna na noda sega ni kila na Kalou kei na nona inaki, tini sara ena rarawa kei na mate. A vola o Paula: “Eda kila nira vutugu ra qai rarawa tu na kabuli kece me yacova mai qo.” (Roma 8:​22) Ia e qai uqeti keda na Kalou se “vakamasuti” keda meda lesu vua, se da duavata tale kei koya. Qori na itavi a lesi vei Paula kei ira na nona itokani lotu vaKarisito lumuti ena gauna oya. A ‘gauna vinaka sara ga’ qori mera ‘vakabulai’ kina o ira era vakabauti Jisu. O ira na ‘so tale na sipi’ era tokoni ira tiko na lotu vaKarisito lumuti kece ena nodra vukei na tamata mera vakila na yaga ni “gauna vinaka.”​—Joni 10:16.

8. Na cava e vakasakiti kina na veivakamasuti ni veivakaduavatataki?

⁸ E vakasakiti na veivakamasuti ni veivakaduavatataki baleta ni o keda ga eda vakaleqa na noda veiwekani kei na Kalou ni rau a talaidredre na vuda​—ia a qai vakaliuliu tale na Kalou meda vakaduavatataki vua. (1 Joni 4:​10, 19) A cakava vakacava qori? A kaya o Paula: “[Na] Kalou e vakaduavatataka na vuravura vua ena vuku i Karisito, e sega ni nanuma tiko ga na nodra ivalavala ca, e lesia tale ga vei keitou na vosa ni veivakaduavatataki.”​—2 Kor. 5:​19; Aisea 55:6.

9. A vakaraitaka vakacava o Paula na nona vakavinavinakataka na yalololoma ni Kalou?

⁹ Ena nona vakarautaka o Jiova na isoro ni veivoli, o ira era vakabauta qori e rawa ni vosoti na nodra cala ra qai veitokani vinaka se ra veiyaloni tale kei koya. A talai ira tale ga na nona mata mera vakamasuti ira kece na tamata mera veiyaloni tale kei koya ni se tiko na gauna mera cakava kina qori. (Wilika 1 Timoci 2:​3-6.) Ni kila o Paula na loma ni Kalou kei na bibi ni gauna a bula donuya, a ogaoga kina vakalevu ena “itavi ni veivakaduavatataki.” E se sega ni veisau na loma i Jiova, e se vinakata tiko ga mera veiyaloni tale kei koya o ira era se yawaki koya tu. E se veiganiti tiko ga nikua na vosa i Paula “qo sara ga na gauna vinaka,” “qo na siga ni veivakabulai.” E Kalou yalololoma dina o Jiova qai dau veinanumi!​—Lako 34:​6, 7.

Kua ni “Lecava na Kena iNaki”

10. Ni oti “na siga ni veivakabulai,” na cava era cakava na lotu vaKarisito lumuti ena veigauna sa oti vaka kina nikua?

¹⁰ A yaga e liu na loloma soli wale ni Kalou vei ira era “duavata kei Karisito.” (2 Kor. 5:​17, 18) A “siga ni veivakabulai” vei ira qori na Penitiko 33 S.K. Me tekivu mai na gauna oya, era lesi o ira qori ena itavi ni kena vakarogoi “na vosa ni veivakaduavatataki.” Era se vakayacora tiko ga nikua na ivovo ni lotu vaKarisito lumuti na “itavi ni veivakaduavatataki.” Era kila ni o ratou na va na agilosi a raivotutaka na yapositolo o Joni ‘eratou se tarova matua tiko na va na cagi kei vuravura me kua kina ni liwa na cagi i vuravura.’ Koya gona, qo na “siga ni veivakabulai,” kei ‘na gauna vinaka sara ga.’ (Vkta. 7:​1-3) Qori na vuna me tekivu mai na itekitekivu ni ika20 ni senitiuri, era gugumatua tiko kina na ivovo ni lumuti ena “itavi ni veivakaduavatataki” me yaco sara ina iyalayala kei vuravura.

11, 12. Era vakaraitaka vakacava na lotu vaKarisito lumuti ena itekivu ni ika20 ni senitiuri nira kila na bibi ni gauna era bula donuya? (Raica na iyaloyalo ena tabana e 15.)

¹¹ Me kena ivakaraitaki, e tukuni ena ivola Jehovah’s Witnesses​—Proclaimers of God’s Kingdom, ena itekitekivu ni ika20 ni senitiuri “a vakabauta dei o C. T. Russell kei ira na nona itokani nira sa donuya tu na gauna ni tatamusuki qai vinakati mera rogoca na tamata na ka dina ena veisereki.” Na cava era qai cakava? Nira kila nira sa donuya tu na gauna ni tatamusuki qai ‘gauna vinaka sara ga’ oya, era sega gona ni lomavakacegu na tacida qori mera veisureti ga ina lotu. Qori na ka sara ga era cakava tu na italatala ni lotu veivanua vaKarisito. Ia era saga na lumuti na iwalewale tale eso mera vunautaka kina na itukutuku vinaka. E dua vei ira na iwalewale qori, na nodra vakayagataka vakavuku na iyaya vovou duadua ena gauna oya me tosoi kina na nodra cakacaka.

¹² Era dau gugumatua na ilawalawa lailai ena gauna oya mera vakatetea na itukutuku vinaka ni Matanitu ni Kalou ena nodra vakayagataka na tikidua, brochure, mekesini, kei na ivola. Era vakarautaka na ivunau kei na ulutaga me tabaki ena udolu vakacaca na niusiveva. Era tuvanaka me vakamacalataki na iVolatabu ena so na porokaramu ni siteseni ni retio ena nodra vanua vaka kina e veiyasa i vuravura. Era vakarautaka ra qai vakayagataka na iyaloyalo e lakovata kei na rorogo, qori ni se bera sara nira cakava na kabani ni iyaloyalo na kena mera sarava na lewenivanua. Na cava e rawati ena nodra gugumatua tiko ga va qori? Nikua, e rauta na le vitu na milioni era sa ciqoma ra kacivaka tale tiko ga na itukutuku: “Moni mai duavata tale kei na Kalou.” E vakaiyalayala ga na ka era kila ra qai le lailai na dauveiqaravi i Jiova ena itekivu ni ika20 ni senitiuri, ia era ivakaraitaki vinaka dina ni gugumatua.

13. Na inaki cava ni Kalou meda raica vakabibi?

¹³ E se veiganiti tiko ga na vosa i Paula “qo sara ga na gauna vinaka.” Eda vakavinavinaka nida sa vakila tale ga na yaga ni loloma soli wale i Jiova, ni solia vei keda na gauna meda rogoca da qai ciqoma na itukutuku ni veivakaduavatataki. Ia e sega ni yala ga e keri na ka eda na cakava nida raica vakabibi na vosa i Paula: “Keitou uqeti kemuni tale ga moni kua ni ciqoma wale ga na loloma soli wale ni Kalou oni qai lecava na kena inaki.” (2 Kor. 6:1) Na inaki ni loloma soli wale ni Kalou, me ‘vakaduavatataki vua na vuravura’ ena vuku i Karisito.​—2 Kor. 5:​19.

14. Na cava sa vakadinadinataki tiko ena levu na vanua?

¹⁴ E dua na iwiliwili levu ni kawatamata e vakamatabokotaki ira tu o Setani, era se yawaka tu na Kalou ra qai sega ni kila na inaki ni nona loloma soli wale. (2 Kor. 4:​3, 4; 1 Joni 5:​19) Ia ni torosobu tiko ga na ituvaki kei vuravura, era lialiaci kina e levu ni tukuni vei ira ni noda yawaka na Kalou e vakavuna na ca kei na rarawa eda sotava. Ena veivanua mada ga e saqati kina na noda cakacaka vakavunau, e levu era sa ciqoma na itukutuku vinaka ra qai saga mera duavata tale kei na Kalou. Qori e vakabibitaka tale vei keda ni qo sara ga na gauna meda gumatua kina ni vakamasuti ira tale na so: “Moni mai duavata tale kei na Kalou.”

15. Eda sega ni vunautaka na ka ga era taleitaka na tamata, ia na itukutuku cava ga eda dau kacivaka?

¹⁵ E sega ni noda itavi ga meda lai tukuna vei ira na tamata mera qarava na Kalou me vukei ira kina ena nodra leqa, me vinaka tale ga na nodra bula. Qori sara ga na vu ni nodra lai lotu eso, ra qai vakaceguya na veimatalotu na nodra gagadre. (2 Tim. 4:​3, 4) Qori e sega ni inaki ni noda cakacaka vakaitalatala. Na itukutuku vinaka eda kacivaka e baleta na loloma i Jiova, e tu vakarau kina me vosota na noda cala ena vuku i Karisito. E rawa kina vei ira e levu mera veivolekati tale kei na Kalou ra qai duavata tale kei koya. (Roma 5:​10; 8:​32) Ia sa voleka sara ni cava na vosa i Paula “qo sara ga na gauna vinaka.”

“Me Uqeti Kemuni ga na Yalo Tabu”

16. A rawa vakacava ni yaloqaqa qai vosota o Paula?

¹⁶ Ena vakalevutaki vakacava na noda gumatuataka na sokalou dina da qai dei tiko ga kina? Eso era dau mamadua ga qai galugalu, ena rairai dredre kina na nodra talaucaka na lomadra se ra veimaliwai. Ia e vinaka meda nanuma tiko ni gugumatua e sega ni kena ibalebale na nomu vakaraitaka e taudaku na ka e tu e lomamu se na nomu taleitaka na ka o cakava; e sega tale ga ni vakatau ena nomu itovo. A tukuna o Paula na sala me vakalevutaki kina na noda gugumatua da qai dei tiko ga kina ni uqeti ira na nona itokani lotu vaKarisito: “Me uqeti kemuni ga na yalo tabu.” (Roma 12:11) A veivuke vakalevu na yalo tabu i Jiova ena nona yaloqaqa kei na nona vosota na yapositolo ena cakacaka vakavunau. A gugumatua tiko ga o Paula me sivia e 30 na yabaki, qori me tekivu mai na nona digitaki koya o Jisu me yacova sara na iotioti ni gauna a bala kina e valeniveivesu qai lai vakamatei sara e Roma. A nuitaka tiko ga na Kalou o Paula ni dau vakaukauataki koya na yalona tabu ena gauna e gadreva kina. A vola: “Au rawata na ka kece ena vuku i koya e vakaukauataki au.” (Fpai. 4:​13) Ena yaga dina na noda vakatotomuria na ivakaraitaki i Paula!

17. Eda na ‘uqeti vakacava ena yalo tabu’?

¹⁷ Na vosa e vakadewataki me “uqeti” e kena ibalebale “buebue.” (Kingdom Interlinear) Me buebue tiko ga na wai, e dodonu me vakatakatai tiko ga. Me ‘uqeti keda tale ga na yalo tabu,’ e bibi me dusimaki keda tiko ga na yalo tabu ni Kalou. Me rawa qori, meda vakayagataka na isolisoli kece e vakarautaka o Jiova meda vakaukauataki kina vakayalo. E okati e keri na noda raica vakabibi na noda sokalou vakavuvale vaka kina ena ivavakoso​—me wasoma na noda vuli vakataki keda, vakavuvale tale ga, na noda masu, kei na noda soqoni kei ira na tacida vaKarisito. Qori sara ga na “buka” e gadrevi meda “buebue” tiko ga kina, me ‘uqeti keda tiko ga kina na yalo tabu.’​—Wilika Cakacaka 4:​20; 18:25.

18. Nida lotu vaKarisito papitaiso, na cava e noda inakinaki vakatabakidua?

¹⁸ O koya e gugumatua e soli koya sara ga vakatabakidua ena nona inakinaki, qai sega ni rawarawa na nona vakawelei se vakayalolailaitaki me kua ni cakava kina na nona inakinaki. Nida lotu vaKarisito papitaiso, e noda inakinaki vakatabakidua meda cakava na ka kece e tukuna o Jiova me vaka ga a cakava o Jisu. (Iper. 10:7) Nikua, e inaki i Jiova mera duavata tale kei koya na tamata ena kena levu ga e rawa. Me vakataki rau o Jisu kei Paula, meda gugumatua mada ga ena cakacaka e rui bibi me vakatotolotaki nikua.

O se Nanuma Tiko?

• Na “itavi ni veivakaduavatataki” cava a lesi vei Paula kei ira na vo ni lotu vaKarisito lumuti?

• Era vakaraitaka vakacava na ivovo ni lumuti nira raica vakabibi na vosa i Paula “qo sara ga na gauna vinaka”?

• E rawa vakacava meda ‘uqeti ena yalo tabu’ na italatala vaKarisito?

[iYaloyalo ena tabana e 12]

A sega ni guilecava o Paula na nodrau sota kei na Turaga o Jisu Karisito