Lomavakacegu ni o Bulataka na iVakavuvuli ena iVolatabu

O SA na rairai raica na nona lokini vinaka toka e dua na pusi, qai davo welewelei no​​—e ivakaraitaki ni lomavakacegu. Ena totoka dina ke da tu ena ituvaki oqo ena noda vakila na lomavakacegu! Ia, e levu e dredre mera kunea na vakacegu, kevaka mada ga era kunea ena lekaleka wale. Na cava na vuna?

Ni vakavuqa eda na caka cala nida tamata ivalavala ca, da qai vosota tale ga na nodra malumalumu na tani. Kena ikuri, eda bula tu oqo ena gauna e vakatoka na iVolatabu me “iotioti ni veisiga,” ena vakatakilakilataka na “gauna cacamatua, [qai] lewalewai dredre.” (2 Timoci 3:​1-5, NW) Kevaka mada ga eda vakila na lomavakacegu nida se gone, e levu vei keda eda vakila na tarabi ni “gauna cacamatua, lewalewai dredre” oqo. E rawa beka nida lomavakacegu nikua?

Dikeva ni iVolatabu e kaya ni gauna cacamatua oqo ena lewalewai dredre, ia eda na rawa ni vosota. Eda na vosota rawa nida bulataka na ivakavuvuli ena iVolatabu. Eda na sega beka ni walia kece noda leqa, ia eda na bau vakila toka na lomavakacegu. Meda dikeva mada e tolu na ivakavuvuli ena iVolatabu.

Me Donu na Noda Rai

Meda lomavakacegu, e dodonu meda kila ni vakaiyalayala ga na ka eda cakava vaka kina o ira na tani. Ena nona ivola vei ira na kai Roma, e kaya na yapositolo o Paula: “Sai valavala ca ko ira kecega na tamata, ka ra sega ni yacova na ka e vakarokorokotaki kina na Kalou.” (Roma 3:​23) Eda sega ni katuma rawa e levu na tikina me baleta na lagilagi i Jiova. Dua na kena ivakaraitaki, oya na ka e volai tu ena Vakatekivu 1:​31: “Sa vakaraica na Kalou na ka kecega sa bulia ko koya, ka raica, sa ka vinaka sara.” Ni vakananuma lesu o Jiova na veika sa cakava oti, e rawa ni kaya ena veigauna kece ni ‘sa vinaka sara.’ Ia e sega ni rawa vua na tamata me kaya oqo ena ka e cakava. Na imatai ni ikalawa ni noda lomavakacegu, oya meda kila ni vakaiyalayala na ka eda rawa ni cakava. Ia, e dua tale na ka e gadrevi. E vinakati meda kila da qai ciqoma na rai i Jiova.

Na vosa vakirisi e vakadewataki me “i valavala ca” e tauri mai na dua na vosa e kena ibalebale me calata na takete. (Roma 3:​9, VV) Me vakamatatataka na tikina oqo: Raitayaloyalotaka mada na nona sasaga e dua na turaga me rawata na icocovi ena nona vanataka na gasau ni dakaititi me lauta na takete. Ena vanataka ga e tolu na gasau ni dakaititi. E vanataka na kena imatai qai calata ena dua na mita. Na kena ikarua e bau vinaka toka ni a calata ena 30 na sedimita. Ena nona maqosa taucoko a vanataka na iotioti ni gasau ia e calata ga ena rua na sedimita. Sa bau vovoleka sara, ia e se calata ga na takete.

O keda kece eda vakataki koya na turaga dauvanataki dakaititi oya, e rarawa ni calata na takete. So na gauna e kena irairai nida calata vakalevu na takete. So tale na gauna eda volekata sara ia eda se calata ga. Eda rarawa baleta nida sasaga vakaukaua, ia e sega sara ni vinaka. Meda dikevi koya tale mada na dauvanataki dakaititi oya.

Sa vuki vakamalua me lako, a rarawa dina ni a vinakata sara ga na icocovi. Vakasauri ga, a kacivi koya na turaga a lewa tiko na veisisivi oya qai solia vua e dua na icocovi, e kaya: “Au via solia oqo vei iko baleta niu taleitaki iko, au raica tale ga na nomu sasaga vakaukaua.” Sa dua na ka nona marau na turaga dauvanataki dakaititi oqo!

E marau dina! Era na marau vakatale ga oqori o ira kece era ciqoma na “[i]solisoli” ni bula tawamudu e solia na Kalou. (Roma 6:​23) O koya gona, nira sa na bula tawamudu ena vinaka na veika kece era cakava​​—era na sega ni calata tale na takete. Era na lomavakacegu dina. Ia ena gauna mada ga oqo, ke tiko vei keda na rai oqori, eda na lomavakacegu ena ka eda cakava kei na ka era cakava na tani.

Ka Kece e Taura na Gauna

Eda kila ni ka kece e taura na gauna. Sega li ni o vakila ni via dredre toka mo lomavakacegu ke sega ni yaco totolo na ka o namaka tiko, se na kena sa rui balavu tale na ituvaki ca o sotava tiko? Ia, e so era lomavakacegu ga nira sotava na ituvaki vaka oqo. Dikeva mada na ivakaraitaki i Jisu.

Ni bera ni bula e vuravura o Jisu, a ivakaraitaki vinaka ni talairawarawa mai lomalagi. Ia, sa qai “vulica na talairawarawa” e vuravura. Ena sala cava? “Mai na veika rarawa e sota kaya.” A dau raica tu ga o Jisu na yaco ni veika rarawa, ia se sega ni bau sotava. Ni mai bula e vuravura, vakauasivi ni oti nona papitaiso ena uciwai na Joritani me yacova nona mate e Kolikoca, e sotava sara e levu na ituvaki dredre. Eda sega ni kila na veika matailalai me baleta nona vulica na talairawarawa, ia eda kila ni a taura na gauna na nona “vakarautaki.”​​—Iperiu 5:​8, 9, VV.

A rawa ni yalodina o Jisu baleta ni a vakasamataka vakabibi na “marau sa viritu e matana,” oya na icocovi ni nona talairawarawa. (Iperiu 12:2) Ia, so na gauna a dau “cabora . . . na kerekere, kei na masumasu, kei na tagi vakararawa, ni sa vakawai na matana.” (Iperiu 5:​7) Eda dau masu tale ga vaka oqo ena so na gauna. Ia, e raica vakacava o Jiova na tikina oqo? Na tikinivolatabu vata ga oya e vakaraitaka ni a ‘rogoca’ o Jiova na masu i Jisu. Ena vukei keda vaka kina na Kalou. Baleta?

Ni kila o Jiova ni vakaiyalayala na ka eda rawa ni cakava, ena vukei keda gona. Na tamata kece e vakaiyalayala ga na ka e rawa ni vosota. Era dau kaya mai Benin, e Aferika: “Ni sa sivia tale na wai ena rawa sara mada ga ni luvu na boto.” O Jiova e kila vinaka cake vei keda na ka e rawa nida vosota. E vakarautaka gona vakayalololoma na ka “me da vinakati kina, me da lomani talega ka vukei e na gauna e yaga kina.” (Iperiu 4:​16) O Jiova a vakayacora oqori vei Jisu vaka kina vei ira e levu tale. Dikeva mada na sala a vakila kina o Monika na veivuke ni Kalou.

O Monika e dua na goneyalewa bulabula qai dau mamarau. Ena 1968, ni se qai yabaki 20 vakacaca, a kurabui ni kila ni tauvi koya na multiple sclerosis, na mate oqo e dau tini paralasi kina e dua na iwase ni yago. Oqo e veisautaka vakadua na nona bula, a gadrevi tale ga e levu na veiveisau ena nona cakacaka vakaitalatala vakatabakidua. Kila o Monika ni na dua na gauna balavu ena tauvi koya tiko kina na mate oqo. Ni oti e 16 na yabaki, e kaya: “Se sega ga na iwali ni kequ mate, qai kena irairai ni na vaka tu ga oqo me yacova ni sa vakavoui na ka kece ena ituvaki vou ni Kalou.” E kaya ni sega ni rawarawa na ituvaki e sotava voli: “Dina ga nira kaya na noqu itokani niu dau rairai mamarau tu ga qai yalodei, . . . ia era kila na noqu itokani voleka niu dau tagi ena so na gauna.”

E tukuna o Monika: “Au sa vulica meu yalovosovoso, meu marautaka tale ga niu bau vakila ni via vinaka na kequ ituvaki. E vakaukauataka noqu veiwekani kei Jiova niu kila ni sega ni rawa vua na tamata me walia na tauvimate. O Jiova ga e rawa ni kauta mai na iwali dina.” Ena veivuke i Jiova, sa rawa ni raica lesu ena lomavakacegu o Monika na nona veiqaravi vakatabakidua voli mai me sivia na 40 na yabaki.

E sega ni rawarawa na ituvaki vaka oqo, me vaka e sotava o Monika. Ia e macala, ni o na lomavakacegu ni o kila ni so na ka ena taura toka na gauna me yaco. Me vakataki Monika, o rawa ni nuidei ni na “vukei” iko o Jiova “e na gauna e yaga kina.”

Kakua ni Veivakatauvatani ​—Kotora na iSausau O Rawa ni Sauva

E sega ni dua o drau tautauvata kaya, ni o keda kece eda duidui. Dua na ivosavosa ena vosa na African Gun e vakavotuya na tikina oqo: “Era sega ni tautauvata kece na balavu ni iqaqalo ni liga.” E ka vakalialia me vakatauvatani e dua na iqaqalo ni liga kei na dua tale. O na sega ni vinakati Jiova me vakatauvatani iko kei na dua tale, ia ena sega tale ga ni cakava. E levu vei keda e dau noda ivalavala meda veivakatauvatani, e rawa ni kauta tani sara ga na lomavakacegu. Dikeva na sala a vakavotuya kina na tikina oqo o Jisu nida wilika na Maciu 20:​1-​16.

E tukuna o Jisu ni a gadreva e dua na “turaga” e so na tamata mera cakacaka ena nona werenivaini. Mani kunea e so era sega ni cakacaka tu qai vakacakacakataki ira ena nona werenivaini “e na mataka caca,” rairai ena 6 na kaloko. Era duavata ena isau ni cakacaka ena gauna oya, me dua na pene ena 12 na aua era cakacaka kina ena dua na siga. Sega ni vakabekataki nira a marautaka nira sa cakacaka rawa, ra qai saumi tale ga ena kena ivakarau dina. E muri, a kunea na turaga e so tale na ilala tagane era sega tu ni cakacaka, sa qai vakacakacakataki ira ena 9 na kaloko ena mataka, 12 ena sigalevu, 3 ena yakavi, bau vaka kina ena 5 ena yakavi. E sega ni dua vei ira oqo me cakacaka ena siga taucoko. Me kedra isau, e yalataka na turaga ni na solia vei ira “na ka e dodonu,” ra mani duavata kina na tamata cakacaka.

Ni sa cava na siga oya, e vakarota na turaga vua na nona tamata me solia na kedra isau na tamata cakacaka. E vakarota mera kacivi kece mai, mera qai saumi e liu o ira a vakacakacakataki e muri. Oqo o ira na cakacaka ga me dua na aua, ia e ka ni kurabui nira saumi ena isau ni dua na siga. Eda rawa ni raitayaloyalotaka na maue e qai yaco. Era nanuma kina o ira na cakacaka ena siga taucoko me 12 na aua ni na levu cake na kedra isau. Ia, a tautauvata ga na ka e soli vei ira.

Era raica vakacava na tikina oqo? “Ia ni ra sa taura, era sa qai didi vua nai taukei ni vale, ka kaya, O ira oqo era sa muri, sa dua bau ga na aua era sa cakacaka kina, ia ko sa vakatautauvatataki keimami kei ira, ia keimami sa colata na kena bibi kei na todra ni siga.”

Ia o koya na turaga, e duidui sara nona rai. A tukuna ni a soli vei ira na ka era veivosakitaka mera na saumi kina, a sega ni lailai. Vei ira na kena vo, a vakatulewataka me saumi ira ena isau ni dua taucoko na siga, kena irairai nira a sega sara ga ni namaka. Na kena dina, ni a saumi ga vei ira na ka era veivosakitaka; ia e vuqa vei ira era a sega ni namaka me levu na kedra isau. Kena itinitini, a qai taroga na turaga: “Sa sega beka ni tara me’u veitaliataka na noqu ka?”

Kaya mada ke ra saumi e liu na cakacaka ena siga taucoko, oti oya mera lako sara. Ke ra a lomavakacegu kina. Ia, era a sega ni lomavakacegu nira raica ni tautauvata na kedra isau kei ira era a sega ni cakacaka ena siga taucoko. E vakacudrui ira sara ga, yaco sara mera didivaki koya na turaga, o koya era a vakavinavinakataka taumada ni a vakacakacakataki ira.

E vakavotuya oqo na ka e dau yacovi keda ena gauna eda veivakatauvatani kina. Ke o vakasamataka vakabibi na nomu veiwekani kei Jiova, o qai vakavinavinakataka na nona vakalougatataki iko, o na lomavakacegu. Kua ni vakatauvatana na kemu ituvaki kei na kedra ituvaki na tani. Ke laurai ni cakava o Jiova vei ira na tani e so tale na ka, mo rekitaka qai marau vata kei ira.

Ia, o Jiova e namaka mo cakava e dua na ka. Na cava oya? E kaya na Kalatia 6:​4: “Me lewa deivaka na nona cakacaka na tamata yadua, e na qai rekitaki koya e na vuku i koya ga.” E laurai ena tikina oqo ni dodonu mo kotora na isausau o rawa ni sauva. Lalawataka na ka o rawa ni cakava, oti oya qai cakava sara. Ke rawarawa na isausau o kotora, o qai sauva rawa, sa vuna vinaka oqo mo ‘reki’ kina. O na vakila na lomavakacegu.

O na Tauca na Kena Yaga

Kevaka eda bulataka na tolu na ivakavuvuli ena iVolatabu eda sa dikeva mai, ena vukei keda meda lomavakacegu, dina ga nida bula tu ena iotioti ni veisiga da qai tamata ivalavala ca. Ena nomu wili iVolatabu e veisiga, vakacava mo vaqara e so na ivakavuvuli era vakamacalataki vakadodonu se ra tu ena italanoa kei na vosa vakatautauvata?

Ke o sega ni lomavakacegu tiko, saga mo kila na cava e vakavuna. Oti oya, vaqara sara na veivakavuvuli ena iVolatabu e rawa ni vukea na kemu ituvaki. Me kena ivakaraitaki, o rawa ni raica na ivola na “All Scripture Is Inspired of God and Beneficial”a ena tabana e 110-11. E veivosakitaki kina na Vosa Vakaibalebale, o na kunea ena ruku ni 12 na ulutaga e dua na iwase levu ni ivakasala kei na ivakavuvuli ena iVolatabu. E ivukevuke vinaka tale ga na Watch Tower Publications Indexb kei na Watchtower Library ena CD-ROM.c Ni o vakayagataki rau vakawasoma, ena rawarawa sara mo kunea na ivakavuvuli ena iVolatabu e ganiti iko.

Sa voleka na gauna ena solia kina o Jiova vei ira e ganiti ira na bula tawamudu ena vuravura parataisi. Sa na qai taucoko sara kina na nodra lomavakacegu.

[iVakamacala e ra]

[Tikina bibi ena tabana e 12]

“Sai valavala ca ko ira kecega na tamata, ka ra sega ni yacova na ka e vakarokorokotaki kina na Kalou.”​—Roma 3:23

[Tikina bibi ena tabana e 13]

O Jisu “a vulica na talairawarawa mai na veika rarawa e sota kaya.”​—Iperiu 5:​8, 9, VV

[Tikina bibi ena tabana e 15]

“Ena qai rekitaki koya e na vuku i koya ga ka segai e na vukuna na tani.”​—Kalatia 6:4