Taro na Dauwiliwili
Na cava e kaya kina na 1 Korinica 10:8 nira balemate e 23,000 na Isireli ena dua na siga ena vuku ni veidauci, ia e cavuti ena Tiko Voli Mai na Lekutu 25:9 nira le 24,000?
E rawa ni tiko e vica na vuna erau sega ni tautauvata kina na iwiliwili ena tikinivolatabu ruarua oqori. Na ivakamacala rawarawa duadua oya ni iwiliwili dina e tiko ena kedrau maliwa na 23,000 kei na 24,000, sa rawa gona kina ni vakayagataki e dua ga vei rau na fika oqori me kena iwiliwili.
Meda raica mada e dua tale na vuna. A cavuta lesu o Paula na kedra itukutuku na Isireli nira tiko voli mai Sitimi me ivakasala vei ira na lotu Vakarisito e Korinica, na koro e kilai ena ivalavala vakasisila. E vola: “Me da kakua ni dauyalewa me vakataka e so vei ira, ka ra sa mate kina e lewe ruasagavulu katolu na udolu e na dua ga na siga.” O Paula e cavuti ira na vakamatei vei Jiova ena vuku ni nodra dauyalewa se veidauci, qai kaya ni kedra iwiliwili e 23,000.—1 Korinica 10:8, VV.
Ia e tukuni ena Tiko Voli Mai na Lekutu wase 25, ni “ra sa kabiti Peali-piori na Isireli: a sa waqa mai na cudru i Jiova vei ira na Isireli.” Sa qai vakaroti Mosese o Jiova me vakamatei “ira kecega era sa turaga vei ira na tamata.” Ia o Mosese a qai vakaroti ira na turaganilewa mera cakava na ivakaro oya. Sa qai ‘mudu ga na mate levu’ ni sa yavala totolo o Finiase me vakamatea na Isireli e kauta yani e dua na yalewa ni Mitiani ina keba. E tini sara na itukutuku oya ena vosa oqo: “Ko ira ka mate e na mate levu, era le rua na oba ka va na udolu.”—Tiko Voli Mai na Lekutu 25:1-9.
Kena irairai nira okati tale ga o “ira kecega era sa turaga vei ira na tamata” ena iwiliwili e cavuti ena Tiko Voli Mai na Lekutu, oqori o ira era vakamatei vei ira na turaganilewa kei ira e vakamatei ira sara ga o Jiova. De dua, e duanaudolu vei ira na turaga oya era balemate ena ligadra na turaganilewa, mani yacova kina na 24,000 na kedra levu na vakamatei. Era cala na turaga oya ena nodra “kabiti Peali-piori,” oqo beka ena nodra veidauci, vakaitavi ena soqo ni marau, se duavata kei ira na cakava na veika oya.
E kaya e dua na ivola ni rawa ni ibalebale ni vosa na “kabiti,” na nona “lai veiyaloni e dua kei na dua tale.” Era sa yalataki ira oti vei Jiova na Isireli, ia nira sa lai “kabiti Peali-piori,” era vakatawayagataka kina nodra veiwekani kei na Kalou. Oti tale e 700 na yabaki, sa qai kaya o Jiova me baleti ira na Isireli ena gusu i Osea na parofita: “Sa ra yaco ki Peali-piori, ka tawasei ira ki na ka e veivakamaduataki; ka ra yaco me ra vakasisila me vaka na ka ko ya era domona.” (Osea 9:10) O ira kece era cakava oya sa dodonu ga mera mate ena lewa ni Kalou. Oqori na vuna e vakadreti ira kina na Isireli o Mosese: “Sa raica ga na matamuni na ka sa cakava ko Jiova e na vuku i Peali-piori: ni sa vakarusai ira kecega na tamata era muri Peali-piori, mai na kemuni maliwa, ko Jiova na nomuni Kalou.”—Vakarua 4:3.