E Noda Turaga Cecere O Jiova!
“Au sa vakararavi oti vua na Turaga [“Cecere,” NW] ko Jiova.”—SAME 73:28.
1. A vakatauvatana ina cava o Paula na ka a vola ena 1 Korinica 7:31?
A SE tukuna makawa na yapositolo o Paula “ni sa veisau tiko o vuravura.” (1 Kor. 7:31) E vakatauvatana o koya na vuravura ina dua na buturara e caka tiko kina na drama. Eso vei ira na vakaitavi ena drama qo era vakaivukivuki me vaka na tamata ca qai so tale me vaka na tamata vinaka, e caka qori ni veiveisau tiko na ituvaki e dramataki.
2, 3. (a) E rawa ni vakatauvatani ina cava na kena saqati na veiliutaki cecere i Jiova? (b) Na taro cava soti eda na veivosakitaka?
2 E vakayacori tiko nikua na drama bibi duadua da qai vakaitavi kece kina! Na drama qo e baleta na kena vakadinadinataki na dodonu ni nona veiliutaki cecere na Kalou o Jiova. E rawa ni vakatauvatani qori ena dua na ituvaki e rairai yaco tiko ena dua na vanua. E veiliutaki tiko kina e dua na matanitu e vakadonui vakalawa qai veiliutaki vinaka tiko. Ia e tiko tale ga ena vanua qori e dua na isoqosoqo e dauveivorati, e kilai ena veidabui, ivalavala kaukaua, kei na veivakamatei. Na isoqosoqo e dauveivorati qo e saqata na veiliutaki ni matanitu e vakadonui vakalawa, e vakatovolea tale ga na nodra yalodina na lewenivanua ina nodra matanitu.
3 E dua tale ga na ituvaki va qo e yaco tiko e vuravura. E tiko na matanitu e dodonu ga me veiliutaki, e liutaka tiko “na Turaga [“Cecere,” NW] ko Jiova.” (Same 71:5) Ia e leqataki tale tiko ga nikua na noda bula na kawatamata ni tiko e dua na isoqosoqo e dauveivorati e kena iliuliu “na Vunica.” (1 Joni 5:19) E saqata na veiliutaki ni matanitu ni Kalou, e vakatovolea tale tiko ga na nodra yalodina na kawatamata ena nona veiliutaki cecere na Kalou. E yaco vakacava na ituvaki qo? Na cava e vakatara tiko kina na Kalou me yaco qori? Na cava eda rawa ni cakava me baleta na ituvaki oya?
Usutu ni Drama
4. E veisemati e rua na usutu e okati ena drama e yaco tiko e vuravura. Na usutu cava oya?
4 E veisemati e rua na usutu e okati ena drama e yaco tiko e vuravura: oya na veiliutaki cecere i Jiova kei na yalodina ni kawatamata. E cavuti vakalevu o Jiova ena iVolatabu me “Turaga [Cecere].” Me kena ivakaraitaki, na nona nuitaki Jiova vakaoti na daunisame e lagata kina: “Au sa vakararavi oti vua na Turaga [Cecere] ko Jiova.” (Same 73:28) E tiko gona na vuna vinaka me vakabauti kina ni Turaga Cecere Duadua na Kalou o Jiova.—Tani. 7:22.
5. Na cava meda tokona kina na nona veiliutaki cecere o Jiova?
5 Na Kalou o Jiova e Dauveibuli, oya na vuna e Cecere Duadua kina ena lomalagi kei na vuravura. (Wilika Vakatakila 4:11.) O Jiova tale ga e noda Turaganilewa, noda Vunilawa, qai noda Tui. (Aisea 33:22) Ni buli keda na Kalou qai vakatau vua na noda bula, meda okati koya gona me noda Turaga Cecere. Ke da dau vakananuma na ‘nona vakataudeitaka o Jiova na nona itikotiko vakaturaga mai lomalagi; kei na nona lewa na ka kece ga ena nona matanitu,’ ena uqeti keda tiko ga qori meda tokona na nona itutu cecere.—Same 103:19; Caka. 4:24.
6. Na cava na ibalebale ni yalodina?
6 Meda tokona na nona veiliutaki cecere o Jiova, e dodonu meda yalodina tiko ga vua. Na “yalodina” e kena ibalebale me vinaka na itovo qai taucoko na veiqaravi. O koya e yalodina e tabucala qai yalododonu. A va sara ga qori na peteriaki o Jope.—Jope 1:1.
iTekitekivu ni Drama
7, 8. A saqata vakacava o Setani na dodonu ni veiliutaki cecere i Jiova?
7 Ena rauta na 6,000 na yabaki sa oti, e dua na agilosi a saqata na dodonu ni nona veiliutaki cecere o Jiova. Ni nanumi koya ga, a vinakata kina na dauveivorati qo me sokaloutaki, qai laurai qo ena ka a tukuna kei na ka a cakava. A mani temaki rau na imatai ni veiwatini o Atama kei Ivi me rau tawayalodina ena veiliutaki cecere ni Kalou, qai saga me vakarogorogocataka na yaca i Jiova ena nona tukuna vei rau na vuda ni lasutaki rau na Kalou. (Wilika Vakatekivu 3:1-5.) A yaco na dauveivorati qo me Meca levu, Setani (Dauveivorati), na Tevoro (Dauvosavakacaca), gata (dauveivakacalai), qai gata levu (dauveibasuraki).—Vkta. 12:9.
8 A vakavuna ga vakataki koya o Setani me meca ni Kalou. Na cava ena cakava na Turaga Cecere o Jiova ena ituvaki qo? Vakacava, e sa na totolo ga na nona vakarusai ratou na dauveivorati—o Setani, Atama, kei Ivi? E tu sara ga vua na kaukaua me cakava qori, ke sa vakadinadinataki kina ni kaukaua duadua, ena dina tale ga kina o Jiova ena ka a tukuna me baleta na itotogi ena tau ke sega ni muri na nona lawa. Ia na cava ga a sega ni veivakarusai kina o Jiova ena gauna ga a yaco kina na veivorati?
9. Na cava a vakalewa o Setani?
9 Ena nona lasu o Setani kei na nona vakavuna me rau vakanadakuya na Kalou o Atama kei Ivi, e sa vakalewa sara tiko ga kina na dodonu ni nona vinakata o Jiova mera talairawarawa vua na kawatamata. Ni vakavuna me rau talaidredre na imatai ni veiwatini, e sa vakalewa kina na nodra yalodina na ibulibuli kece. E dau yalodina o Jope ina veiliutaki cecere i Jiova, qai laurai ena ka a sotava ni tukuna o Setani ni rawa ni vagolei ira tani kece na tamata mera kua ni qarava na Kalou.—Jope 2:1-5.
10. Ni sega ni veivakarusai totolo qai sega ni vakaraitaka ena ivakatekivu ni dodonu ga me veiliutaki, na cava e sa vakatara kina o Jiova me caka?
10 Ni sega ni veivakarusai totolo o Jiova qai sega ni vakaraitaka sara ena ivakatekivu ni dodonu ga me veiliutaki, a vakatara kina o Jiova me vakadinadinataka o Setani na nona ile. E solia tale ga vei keda na Kalou na gauna meda vakaraitaka kina na noda yalodina ina nona veiliutaki. Ia na cava e yaco ena veisenitiuri sa oti? E sa tauyavutaka o Setani e dua na isoqosoqo kaukaua e dauveivorati. Ia ena qai vakarusa ga ena dua na gauna o Jiova na isoqosoqo oya kei na Tevoro, ena qai vakadinadinataka kina na dodonu ni nona veiliutaki cecere. A nuidei o Jiova ni na vinaka na kena irogorogo, oya na vuna a parofisaitaka rawa kina qori ni yaco ga na veivorati ena were o Iteni.—Vkte. 3:15.
11. Na cava era sa cakava e levu ena vuku ni veiliutaki cecere i Jiova?
11 E levu era vakabauta ni dodonu ga me veiliutaki o Jiova ra qai yalodina tiko ga kina ena nona veiliutaki kei na vakalagilagi ni yacana. Era okati tiko eke o Epeli, Inoki, Noa, Eparama, Sera, Mosese, Ruci, Tevita, Jisu, o ira na tisaipeli taumada i Karisito, kei ira na milioni tale vakacaca na tamata yalodina nikua. O ira na dauveiqaravi yalodina qori era vakaitavi sara tiko ga ena nona vakalasui o Setani, kei na nona vakarogorogocataka na yaca i Jiova ena nona beitaka ena dokadoka ni rawa ni vagolei ira tani na tamata kece mera kua ni qarava na Kalou.—Vkai. 27:11.
Kilai Oti tu na ka ena Yaco
12. Eda nuidei vakacava ni na sega ni vakatara tiko ga na Kalou me yaco na veika ca?
12 Eda vakadeitaka ni sa voleka na gauna me vakaraitaka kina o Jiova ni dodonu ga me veiliutaki. Ena sega ni vakalaiva tu ga me yaco na veika ca, eda kila tale ga nida sa bula tiko qo ena iotioti ni veisiga. A vakarusai ira na daucaka ca o Jiova ena gauna a yaco kina na waluvu. A vakarusai Sotoma kei Komora, vaka kina o Fero kei na nona mataivalu. A vakarusai Sisira tale ga kei na nona mataivalu, o Senakaripi kei na nona mataivalu ni Asiria nira vorati koya e Cecere Duadua. (Vkte. 7:1, 23; 19:24, 25; Lako 14:30, 31; Dvei. 4:15, 16; 2 Tui 19:35, 36) Eda nuidei gona ni o Jiova ena sega ni vakatara tiko ga me beci na yacana ra qai vakacacani tiko ga na nona iVakadinadina. Eda sa vakadinadinataka tale ga nikua na ivakatakilakila ni nona tiko o Jisu kei na ivakataotioti ni ituvaki ca e vuravura.—Maciu 24:3.
13. Na cava meda cakava meda kua kina ni vakarusai kei ira na meca i Jiova?
13 Ke da yalodina tiko ga ena veiliutaki cecere i Jiova, eda na sega ni vakarusai vata kei ira na meca ni Kalou. Ia eda na cakava vakacava qori? Ena noda tawasei keda mai na veiliutaki ca i Setani da qai kua ni rerevaka na ka era na cakava vei keda na nona ilala. (Aisea 52:11; Joni 17:16; Caka. 5:29) Qori na sala duadua ga eda rawa ni tokona kina na nona veiliutaki cecere na Tamada vakalomalagi. Eda rawa ni nuitaka tale ga kina nida na vakabulai ena gauna sa na muduka kina o Jiova na vakarogorogocataki ni yacana, qai vakaraitaka ni Turaga Cecere ni lomalagi kei na vuravura.
14. Na cava e vakamacalataki ena so na wase ni iVolatabu?
14 E tu ena iVolatabu taucoko na itukutuku matailalai me baleta na kawatamata kei na veiliutaki cecere i Jiova. Na imatai ni tolu na wase ni iVolatabu e vakamacalataka na kena buli na vuravura kei na valavala ca ni tamata. Ia na tolu na iotioti ni wase e vakamacalataka na sala eda na vakabulai kina. Ia eso tale na wase ni iVolatabu e loma, e vakamacalataka na itukutuku matailalai me baleta na ka a cakava na Turaga Cecere o Jiova me vakayacori kina na nona inaki me baleti keda, na vuravura, kei na lomalagi. Na Vakatekivu e vakamacalataka na sala a basika kina o Setani kei na ca e vuravura. E qai vakamacalataki ena iotioti ni vica na wase ni Vakatakila na sala ena kau laivi kina na ca, na nona vakarusai na Tevoro, kei na kena vakayacori na loma ni Kalou e vuravura me vaka ga e caka tiko mai lomalagi. Io, e vakamacalataki ena iVolatabu na ka e vakavuna na ivalavala ca kei na mate, kei na sala ena kau laivi kina e vuravura. Ena qai sosomitaki qo ena nodra bula mamarau me tawamudu o ira na yalodina.
15. Ni sa oti na drama me baleta na veiliutaki, na cava meda cakava meda vakila kina na kena yaga?
15 Sa voleka me veisau vakadua na ituvaki kei vuravura. Me vaka ga na kena dau biu sobu na ilatilati ni oti e dua na drama, e sa na vakarau oti tale ga na drama me baleta na veiliutaki a vakayacori voli mai me vica na senitiuri. Ni kau laivi o Setani mai na buturara ena nona vakarusai, sa na qai vakayacori dina na loma ni Kalou. Ia me rawa ni yaga vei keda qori kei na veivakalougatataki e sa parofisaitaki tu ena Vosa ni Kalou, meda tokona sara ga qo na nona veiliutaki cecere o Jiova. Meda kua ni lomalomarua tale tiko. Ke da via tukuna: ‘E totaki au o Jiova,’ ia meda tiko ga ena nona yasana.—Same 118:6, 7.
Eda Rawa ni Yalodina Tiko Ga!
16. Na cava eda rawa ni vakadeitaka kina ni rawa nida yalodina tiko ga vua na Kalou?
16 E rawa nida tokona na nona veiliutaki cecere o Jiova da qai yalodina tiko ga, ni tukuna na yapositolo o Paula: “E sega ni dua na veivakatovolei e yacovi kemuni me duatani mai na kena era dau sotava na kena vo. Ia e dau dina na Kalou ena nona vosa, oya ni na sega ni vakalaiva moni sotava na ka ni veivakatovolei oni na sega ni taqea rawa. Ni oni vakatovolei, ena vakarautaka tale ga na sala moni vosota rawa kina.” (1 Kor. 10:13) Ena ka e cavuta o Paula, na cava e vakavuna na veivakatovolei, ena vukei keda kina vakacava na Kalou?
17-19. (a) Na veivakatovolei cava soti era rawai kina na Isireli ena vanualiwa? (b) Na cava eda rawa ni yalodina tiko ga kina vei Jiova?
17 Me vaka ga e vakadinadinataki ena ka era sotava na Isireli ena vanualiwa, e rawa nida ‘vakatovolei’ ena ituvaki eda dau sotava meda beca kina na lawa ni Kalou. (Wilika 1 Korinica 10:6-10.) A rawa vei ira na Isireli mera vorata na veivakatovolei, ia era garova ga na ‘ka e kauta mai na leqa,’ dina ni a vakarautaka vakacakamana vei ira o Jiova na toa kila me dua na vula. E dua na gauna balavu era sega ni kana lewenimanumanu tiko kina, ia e sa veirauti toka na mana a vakarautaka tiko vei ira na Kalou mera kania. Ia era rawai nira vakatovolei mera kocova na kena kumuni na toa kila.—Tiko 11:19, 20, 31-35.
18 Ia ni se bera mada ga qori, era qaravi matakau na Isireli ena nodra sokaloutaka na luve ni bulumakau ra qai vakaitavi ena marau vakasisila ena gauna a soli tiko kina na Lawa vei Mosese ena Ulunivanua o Saineai. Ena gauna ga a yali kina na nodra iliuliu era raica e matadra, era sega ni qaqarauni na Isireli. (Lako 32:1, 6) Nira voleka sara ga ni curu ina Vanua Yalataki, era bacani ira e levu na Isireli na yalewa ni Moapi ena veiyacovi vakasisila. E vakavuna mera mate kina e udolu vakacaca na Isireli. (Tiko 25:1, 9) Eso na gauna era dau vosakudrukudru na Isireli, ra qai vosa beci koya sara na Kalou kei Mosese ena dua na gauna! (Tiko 21:5) Era vosakudrukudrutaka mada ga ni a sega ni donu na nodratou vakarusai na dauveivorati, qori o Kora, o Tecani, Epairami kei na so tale na nodratou ilala. Era mani vakarusai kina e le 14,700 na Isireli ena dua na mate a vakavuna na Kalou.—Tiko 16:41, 49.
19 Era rawa ni vorata na Isireli na veivakatovolei e se qai cavuti ga oya. Ia era rawai ena veivakatovolei nira sa sega ni nuitaki Jiova, ra guilecavi koya tale ga, na nona dau karoni ira kei na nona ivalavala dodonu. Me vaka ga e laurai ena nodra ivakaraitaki na Isireli, eda sega ni vulagi ena veivakatovolei eda dau sotava. Ke da saga vagumatua meda vorata na veivakatovolei da qai nuitaka na nona veivuke na Kalou, eda na rawa ni yalodina tiko ga. Eda rawa ni vakadeitaka qo baleta “e dau dina na Kalou,” ena sega tale ga ni vakalaiva meda ‘vakatovolei ena ka eda sega ni taqea rawa.’ O Jiova ena sega ni biuti keda ena dua na ituvaki e kila ni na dredre kina meda cakava na lomana.—Same 94:14.
20, 21. E ‘vakarautaka vakacava vei keda na sala’ na Kalou nida vakatovolei?
20 ‘Ena vakarautaka na sala’ o Jiova me vakaukauataki keda kina meda vorata na veivakatovolei. Me kena ivakaraitaki, o ira na dauveitusaqati era na rawa ni vakayacora eso na ivalavala kaukaua meda cakitaka kina na noda vakabauta. Eda rawa ni temaki ena ituvaki qo meda sa vakamalumalumu ga me kua nida mokulaki tale, vakararawataki se vakamatei sara. Ia na vosa veiuqeti i Paula ena 1 Korinica 10:13 e vakadeitaka ni na lekaleka ga na veivakatovolei eda dau sotava. Nida vakatovolei, ena sega ni vakatara o Jiova me yacova sara na kena ivakatagedegede meda tawayalodina kina vua. E rawa ni vakaukauataka na Kalou na noda vakabauta qai vakaukauataki keda vakayalo me rawa nida yalodina tiko ga.
21 Ena vakaukauataki keda o Jiova ni vakayagataka na yalona tabu. Nida vakatovolei e dau vakalesuya mai vei keda na yalo tabu qori na ivakavuvuli vakalou e yaga meda tudei tiko ga kina, meda kua ni rawai ena ca. (Joni 14:26) Dua na ivakavuvuli yaga e vauca na ile ni veiliutaki cecere i Jiova kei na noda yalodina na tamata. Na kena matata vei ira e levu na ivakavuvuli qo e dua na sala e vakaukauataki ira kina o Jiova mera yalodina tiko ga, ra qai vosota na veivakatovolei cava ga veitalia sara ke ra mani mate kina. Ena vakaukauataki keda tale ga va qo o Jiova. Bau vakayagataki ira sara mada ga na nona agilosi, era nona dauveiqaravi, mera vukei keda, nira ‘talai mai mera qaravi ira era na rawata na icovi ni bula.’ (Iper. 1:14) Ena vakamacalataki ena ulutaga e tarava ni o ira ga na yalodina era na vakadonui me nodra itavi dokai mera cuqena me tawamudu na veiliutaki cecere ni Kalou. Eda na wili tale ga ena itavi dokai qori ke da rokova duadua ga na noda Turaga Cecere o Jiova.
O na Sauma Vakacava?
• Na cava meda okati Jiova kina me noda Turaga Cecere?
• Na cava na ibalebale ni noda yalodina tiko ga vua na Kalou?
• Eda kila vakacava ni sa na voleka na gauna me vakaraitaka kina o Jiova ni dodonu ga me veiliutaki?
• Nida vakasamataka na 1 Korinica 10:13, na cava eda rawa ni yalodina tiko ga kina?
[iYaloyalo ena tabana e 24]
A vakavuna o Setani na nodrau tawayalodina vei Jiova o Atama kei Ivi
[iYaloyalo ena tabana e 26]
Mo vakadeitaka mo tokona na nona veiliutaki cecere o Jiova