Nona Vakaturi o Jisu e Rawati Kina na Bula!

NA NONA vakaturi o Jisu e sega ni dua wale ga na ituvaki a yaco ena gauna makawa, ia e yaga dina vei keda nikua. A vakamacalataka qori na yapositolo o Paula ena nona vola: “Sa vakaturi mai na mate na Karisito me kedra isevu na mate tu. E vakavuna na mate e dua na tamata, na nodra vakaturi tale ga na mate e rawati ena vuku ni dua na tamata. Era mate tiko na tamata kece ena vuku i Atama, ena bula vaka kina na tamata kece ena vuku i Karisito.”—1 Korinica 15:20-22.

A vakaturi o Jisu ena ika16 ni Naisani, 33 S.K., qori na siga era dau cabora kina na Jiu vua na Kalou o Jiova e veiyabaki na isevu ni vuata ena tikina tabu ni valenisoro e Jerusalemi. Nona vakatokai Jisu o Paula me isevu, e tukuna tiko ni so tale era na vakaturi.

A qai vakamacalataka tarava o Paula na yaga ni nona vakaturi o Jisu. E kaya: “E vakavuna na mate e dua na tamata, na nodra vakaturi tale ga na mate e rawati ena vuku ni dua na tamata.” Eda na mate kece ena vuku ni ivalavala ca a vakadewa mai o Atama. Ia na nona cabora o Jisu na nona bula uasivi me keda ivoli, e dolava na sala meda vakaturi kina, me rawa nida sereki mai na bobula ni ivalavala ca kei na mate. A tinia o Paula ena Roma 6:23: “Na isau ni ivalavala ca na mate, ia na iloloma ni Kalou na bula tawamudu ena vuku i Karisito Jisu na noda Turaga.”

A vakamacalataka o Jisu na vuna e yaga kina vei keda na nona mate kei na nona vakaturi. A tukuni koya tiko ga ena nona kaya: “Ena lauvako . . . na Luve ni tamata, mera bula tawamudu kina o ira kece na vakabauti koya. Na levu ni nona lomani vuravura na Kalou e solia kina na Luvena e duabau ga e bulia, mera kua ni rusa o ira era vakabauti koya, mera rawata ga na bula tawamudu.”—Joni 3:14-16.

Raitayaloyalotaka mada na bula tawamudu e sega ni vakilai tale kina na mosi, rarawa se na lomabibi! (Vakatakila 21:3, 4) E dua dina na inuinui totoka! A tukuna e dua na daunivakadidike: “Ni dua e raica na ibulubulu ena rawa ni vakasamataka ni lekaleka wale na bula, ia na veivakaturi e vakadeitaka ni lekaleka wale na mate.” Io, na nona vakaturi o Jisu e rawati kina na bula!