O se Nanuma Tiko?

O taleitaka na ka o vakawilika ena itabataba ni Vale ni Vakatawa era se qai taba wale ga oqo? Ia raica mada ke rawa mo sauma e vica na taro oqo:

• Eda kila vakacava ni parofisai me baleta na “lomalagi vou kei na vuravura vou” ena Aisea 65:​17-19 e sega ni baleta ga na nodra sereki na Jiu mai na tiko bobula?

Baleta ni rau dusia tiko na yapositolo o Pita kei Joni, ena nodrau a volavola ena imatai ni senitiuri S.K. me baleta na veigauna mai muri, e okati kina na veivakalougatataki era na qai muri mai. (2 Pita 3:13; Vakatakila 21:​1-4)​—4/15, taqana e 10-12.

• E vu beka mai vei na itukuni makawa vakirisi me baleti ira na kaloutamata voravora?

Kena irairai nira a vakaikuritaki me vakatanitaka na ka dina a yaco ni se bera na Waluvu nira a vukica na yagodra e so na agilosi mera yago vakatamata era qai bulataka na ivalavala kaukaua kei na itovo vakasisila e vuravura. (Vakatekivu 6:​1, 2)​—4/15, taqana e 27.

• Na cava e so na leqa era na qarauna na lotu Vakarisito matua ena soqo ni vakamau?

E vinaka me kua na kosakosa, na kena e dau vu mai ke vakasausataki na yaqona ni valagi, lako vata na ivakatagi karakaravisa kei na danisi vakalialia. E sega ni dodonu mera tiko ena kana magiti ni vakamau o ira era sega ni sureti, vakavo ga ke dolavi raraba na veisureti. E dodonu me digitaka o tagane vakamau e so na lotu Vakarisito nuitaki me cicivaka na soqo mera raica me tini vinaka na soqo ena kena gauna veiganiti.​—5/1, taqana e 19-22.

• Na cava e vakaturi tiko ni tukuni ena Same 128:3 ni o ira na luvemu era na “vaka na olive [se, “coke ni olive,” NW]” era wavolita na nomu teveli?

Dau vakavuqa mera cadra na coke vovou ni olive mai vuna. Ke sa sega ni vua rawa na vuniolive baleta ni sa qase, era na qai tubu mai e vica na coke mera wavolita na vuna. E vaka kina, na nodra marautaka na itubutubu nira raici luvedra nira duavata voli kei ira ena qaravi Jiova.​—5/15, taqana e 27.

• Na vinaka cava soti era na rawata na gone mai na vuvale eratou duavata qai veilomani?

E yavutaki kina na dokai ni veiliutaki, rokovi ni veika dodonu, kei na veimaliwai vinaka kei ira na tani. Ena vakarawarawataka tale ga vei ira na gone mera veitokani voleka kei na Kalou.​—6/1, taqana e 18.

• Ena dua na vanua vakaesia, na cava era cakava me vakabibitaki kina ni lotu Vakarisito kece era veitacini?

Era uqeti na ivavakoso kece mera kakua ni vakayagataka na kedra icavuti e baleta na nodra itutu. Ia, nira veitacini kece, mera veikacivi ga ena ‘taciqu’ se ‘ganequ.’​—6/15, taqana e 21, 22.

• Era vakayagataka beka na iVakadinadina i Jiova na wainimate e buli mai ena dra?

Keimami vakabauta ni ivakasala vakaivolatabu me ‘tabu na dra’ ena vakatabui kina na tauri dra taucoko se dua vei ira na kena iwasewase lelevu (plasma, red cells, white cells, kei na platelets). (Cakacaka 15:​28, 29) Me baleta na kena tauri e so na iwasewase lalai ni dra, era na vakatulewa kina na lotu Vakarisito yadua, me yavutaki ena ka e kaya na iVolatabu kei na nona veiwekani kei na Kalou.​—6/15, taqana e 29-31.

• E rawa beka ni kunei na lomavakacegu dina nikua?

Io. Ena nona wili iVolatabu e dua, e sa vakalaivi Jisu Karisito tiko kina me tuberi koya ina sala ni sokalou savasava kei na bula vakacegu e vakamacalataki ena Aisea 32:18. Kena ikuri, ni o ira era vakila na bula vakacegu ena gauna oqo e rawa nira vakila tu ga oqori e vuravura me tawamudu, me vaka e yalataka na Same 37:​11, 29.​—7/1, taqana e 7.

• Na cava na itavi nei George Young ena ivolatukutuku ni cakacaka vakalou ni gauna oqo?

Me vakatekivu ena 1917, e vakadeitaka ni dua o koya e dau vakacila rarama ni itukutuku vinaka ni Matanitu ni Kalou ena levu na vanua. E cakacaka kina vakaitalatala e Canada, ena yatu yanuyanu ena Caribbean, e Brazil kei na veivanua tale e so e Sauca Amerika kei Amerika e Loma, e Sipeni, e Potukali, ena veivanua vakarusia me yaco sara e Mereke.​—7/1, taqana e 22-27.

• Na cava e vakaibalebaletaka na 1 Korinica 15:29 (NW) ni kaya me baleti ira e so, “era papitaiso ena papitaiso e kena inaki mera mate kina”?

Oqo e baleti ira na lotu Vakarisito nira sa lumuti ena yalo tabu, era sa soli ira ina dua na ivakarau ni bula era na lai mate kina, oti mera na qai vakaturi ina bula vakalomalagi.​—7/15, taqana e 17.

• Na cava a cakava tiko na yapositolo o Paula ena veiyabaki e sega ni cavuti kina?

E kena irairai ni a veivuke tiko ena kena tauyavutaki se vakaukauataki na veivavakoso mai Siria kei Sisilia. E vuqa na veika dredre era volatukutukutaki ena 2 Korinica 11:​23-27 era a yaco ena gauna oqo, e vakaraitaka ni a ogaoga sara tiko kina vakalevu o koya ena cakacaka vakaitalatala.​—7/15, taqana e 26, 27.

• Na cava ena vukei keda meda kua kina ni namaka vakasivia na ka?

Nanuma tiko ni o Jiova e kila vinaka na keda ituvaki. Ena vukei keda na masu eda cabora vua me dodonu kina na noda vakasama, e vakaraitaka tale ga na noda yalomalumalumu. E dua tale na sala eda vukei kina nida kere ivakasala mai vua e dua noda itokani matua.​—8/1, taqana e 29, 30.