O ‘Vakawakana Qai Dei ena Yavu’?

O SA bau raica e dua na vunikau levu e suaigelegele ena kaukaua ni cagi? E tataba na cagi qori, e sega ga ni vakabalea rawa. Na vuna? Ni kaukaua qai ti na wakana e loma ni qele. Eda rawa ni vaka na vunikau ya. Nida valuta tiko na ituvaki dredre eso, eda rawa tale ga ni tudei ke ‘ti na wakada qai dei ena yavu.’ (Efeso 3:14-17, NW) Na cava mada na yavu qori?

E tukuna na Vosa ni Kalou ni o “Jisu Karisito sa kenai vakadei e na tutu-ni-vale” ni ivavakoso vaKarisito. (Efeso 2:20; 1 Kor. 3:11) Eda uqeti na lotu vaKarisito meda ‘ia tiko na ivalavala sa vinaka vua, meda tauyavutaki da qai tara cake vua, eda vakataudeitaki ena noda vakabauta.’ Ke da cakava qori, eda na vosota na ka dredre cava ga e vakatovolei kina noda vakabauta—wili kina na “vosa veicavilaki” e yavutaki ena ka ‘e sega ni yaga qai lasu.’​—Kolo. 2:4-8.

‘Kena Raraba, Balavu, Titobu, kei na Kena Cecere’

Ena rawa vakacava me ‘ti na wakada’ qai ‘vakataudeitaki ena noda vakabauta’? Dua oya, me vaka ga na kau e ti na wakana e loma ni qele, me vaka tale ga qori noda vulica vagumatua na Vosa ni Kalou. E vinakata o Jiova meda “kila vata kei ira kecega era sa lotu, se cava na kena raraba, kei na kena balavu, kei na kena titobu, kei na kena cecere” na ka dina. (Efeso 3:18) Me kua ni lomavakacegu na lotu vaKarisito ni sa kila rawa ga na ka, me sa rauti koya tu ga na “ivakavuvuli rawarawa wale” ena Vosa ni Kalou. (Iper. 5:12, NW; 6:1) Ia o keda yadudua e dodonu meda vakatitobutaka noda kila na ka dina vakaivolatabu.​—Vkai. 2:1-5.

E sega ni kena ibalebale qori ni na ‘ti na wakada qai dei ena yavu’ ke levu na ka eda kila. O Setani mada ga a kila na lewe ni iVolatabu. Ena vinakati tale eso na ka. Meda “kila na loloma i Karisito, o koya sa uasivi cake e na ka e kilai rawa.” (Efeso 3:19) Ia nida vulica na iVolatabu ena noda lomani Jiova kei na noda taleitaka na ka dina, ena vakatitobutaka noda kilaka vakaivolatabu, ena vaqaqacotaka na noda vakabauta.​—Kolo. 2:2.

Vakatovolea Nomu Kilaka

Vakacava mo vakatovolea sara ga nomu kila eso na ivakavuvuli dina ena iVolatabu? Ni o cakava qori ena uqeti iko mo gumatua tiko ga ni vulica na iVolatabu. Kena ivakaraitaki, wilika na itekitekivu ni nona ivola na yapositolo o Paula vei ira e Efeso. (Raica na kato ‘Vei Ira e Efeso.’) Ni o wilika na tikina kece qori, taroga sara, ‘Au taura rawa na ibalebale ni malanivosa vakaivolatabu era kala toka ena kato?’ Meda dikeva yadudua mada.

Lesi Eliu “Qai Tauyavutaki Emuri ko Vuravura”

A vola o Paula vei ira na tacina lotu vaKarisito: “Ni sa lesi keda eliu [na Kalou] me da vakabau me da luvena e na vuku i Jisu Karisito.” A nakita o Jiova me na kauti ira eso na tamata mera lewe ni nona vuvale uasivi vakalomalagi. O ira qori era na veiliutaki vakatui, vakabete tale ga kei Karisito. (Roma 8:19-23; Vkta. 5:9, 10) Ena nona vakalewa o Setani na dodonu ni veiliutaki i Jiova, a tukuna kina ni ibulibuli kece ni Kalou e sega tu na kedra yaga. E veiganiti gona nona digitaka o Jiova na lewenivuvale qori mera kauta tani na ca kece e vuravura, wili kina o koya e vakavuna tiko na ca o Setani na Tevoro! Ia a sega ni lewa makawa tu o Jiova o cei mera lai bula e lomalagi mera luvena vakacabecabe. E lalawataka ga ni dua na ilawalawa tamata era na veiliutaki kei Karisito i lomalagi.​—Vkta. 14:3, 4.

Na “vuravura” cava e tukuna tiko o Paula ena nona vola vei ira nona itokani lotu vaKarisito, nira lewe ni dua na ilawalawa digitaki ni bera ni “tauyavutaki emuri ko vuravura”? Sega ni vakaibalebaletaka tiko o koya ina gauna e se bera ni buli kina na vuravura se na tamata. Ke va qori, ena sega sara ga ni laurai kina na lewadodonu. E rawa vakacava me rau na tarogi o Atama kei Ivi ena nodrau ivalavala ke sa lewa rawa tu na Kalou ni rau na cakaca ni bera mada ga ni buli rau? Ia gauna cava ga a vakatulewataka kina o Jiova me vakadodonutaka na veivorati, ena nodrau tokoni Setani o Atama kei Ivi me ratou vorata kina na veiliutaki ni Kalou? A cakava qori o Jiova ni oti ga nodrau talaidredre na imatai ni noda itubutubu, oya ni bera ni basika na kawatamata ivalavala ca mera na vakabulai.

“Me Vaka Nona Loloma Levu”

Na cava e tukuna kina o Paula ni ituvatuva a cavuti ena imatai ni vica na tikina ena Efeso e yavutaki ena “nona loloma levu [na Kalou]”? A tukuna qori o Paula me vakaraitaka ni sega ga ni dodonu me vakabulai keda o Jiova.

Na kena dina ga ni sega ni dua e ganita me vakabulai. Koya gona nona lomana na kawatamata o Jiova, a vakarautaka e dua na ituvatuva lavotaki meda vakabulai kina. Ke da vakasamataka na keda ituvaki, nida sega ni uasivi qai dau cala, e veiganiti kina na ka e tukuna o Paula ni yavutaki ena loloma levu noda vakabulai.

Na Ka Vuni ni iNaki ni Kalou

Taumada, a sega ni vakaraitaka na Kalou na sala ena vakabulai keda kina ena veivakalolomataki i Setani. E “ka vuni.” (Efeso 3:4, 5) Ni toso na gauna donuya na kena tauyavutaki na ivavakoso vaKarisito, e vakatakila vakamatailalai o Jiova na sala ena vakayacora kina nona inaki taumada vei ira na kawatamata kei na vuravura. “Ni sa oti kecega na gauna sa lokuci,” e tukuna o Paula, e vakarautaka na Kalou “e dua na veiliutaki,” qori e dua na ivakarau ni lewa era na vakaduavatataki kina nona ibulibuli vuku kece.

Na imatai ni cakacaka ni veivakaduavatataki qori a yaco ena Penitiko 33 S.K. Qori na gauna a kumuni ira kina o Jiova na veiliutaki kei Karisito e lomalagi. (Caka. 1:13-15; 2:1-4) Na ikarua ni cakacaka ni veivakaduavatataki, ya nodra soqoni o ira na bula ena parataisi e vuravura ena veiliutaki ni Matanitu vakaMesaia i Karisito. (Vkta. 7:14-17; 21:1-5) Na vosa na “veiliutaki” e sega ni vakaibalebaletaki ena Matanitu vakaMesaia, ni matanitu qori a qai tauyavu ga ena 1914. E dusia ga na nona qarava kei na nona lewa na Kalou na veika e baleta na nona inaki, me vakaduavatataki tale kina o vuravura.

‘Moni Tamatabula ena iVakarau ni Nomuni Vakasama’

Nida vuli vakawasoma, eda na taura matua kina na ‘kena raraba, balavu, titobu, kei na kena cecere’ na ka dina. Ia na ivakarau ni bula osooso nikua ena vakarawarawataka nona sasaga o Setani me vakaleqa noda vuli vakawasoma—se me muduka sara ga. Meda kua ni vakatara me cakava ya. Vakayagataka na “vuku” e solia o Jiova me ‘rawa nida tamatabula ena ivakarau ni noda vakasama.’ (1 Joni 5:20, 1 Kor. 14:20, NW) Meda kila na vuna eda vakabauta kina na ka eda vakabauta, meda vakamacalataka tale ga na ‘vu ni inuinui e tu e lomada.’​—1 Pita 3:15.

Vakasamataka mada ke o tu mai Efeso ena gauna e wiliki kina na imatai ni ivola i Paula. Ena uqeti iko beka na ivola ya mo saga mo matua “ka kila sara na Luve ni Kalou”? (Efeso 4:13, 14) Io ena veiuqeti dina! Koya gona, me uqeti keda mada ga ena gauna qo na vosa i Paula. Nida lomani Jiova dina, salavata kei na noda vulica na kilaka dodonu ena nona Vosa, ena ‘ti na wakada qai dei ena yavu’ i Karisito. Nida cakava qori, eda na vorata na ituvaki dredre kece e vakavuna o Setani ni bera ni vakarusai vakadua na ituvaki ca qo.​—Same 1:1-3; Jere. 17:7, 8.

[Kato/​iYaloyalo ena tabana e 27]

‘Vei Ira e Efeso’

“Me vakarokorokotaki na Kalou, na Tamai koya na noda Turaga ko Jisu Karisito, o koya sa vakalougatataki keda e na ka ni veivakalougatataki vakayalo kecega e na veiyasana vakalomalagi e na vuku i Karisito; me vaka sa digitaki keda eliu e na vukuna, sa qai tauyavutaki emuri ko vuravura, me da yalosavasava ka sega ni cala e matana e na loloma; ni sa lesi keda eliu me da vakabau me da luvena e na vuku i Jisu Karisito, me vaka na nona lewa vakayalovinaka; me dokai kina na kena vinaka ni nona loloma: o koya sa lomani keda kina ko koya e na vukuna na Daulomani: o koya eda sa rawata kina na bula sa voli e na nona dra, io, na vakabokoci ni valavala ca, me vaka na nona loloma levu; o koya sa vakalevutaka sara vei keda ko koya e na vuku kei na yalomatua kecega; ni sa vakatakila vei keda na nona lewa ka vuni tu, me vaka na ka e vinaka vua, ka sa nakita vakai koya ga: me yaco kina na [“nona veiliutaki,” NW] ka sa lewa ko koya ni sa oti kecega na gauna sa lokuci me soqona vata na ka kecega vei Karisito, na veika mai lomalagi, kei na veika e vuravura.”​—Efeso 1:3-10.