Sega ni Rawa ni Maroroi Kua Gona ni Vakamaumautaka
E VAKALUSI ilavo na vakalusi gauna. Oqori e dua na ivosavosa e dau vakayagataki vakalevu. Na vuna e tukuni kina oqori baleta ni rau ka talei ruarua na ilavo kei na gauna. Ia ena dua tale na yasana erau duidui sara. Ena sala cava? E sega ni rawa ni maroroi na gauna me qai vakayagataki vakamalua, ia e rawa nida cakava oqori ena ilavo, kakana, waiwai se so tale na ka. Ena matewale ke da saga meda maroroya tu na gauna eda sega ni vakayagataka. Cava ena yaco kevaka eda moce me walu na aua, oti, da qai saga ni maroroya na vo ni gauna ena dua taucoko na siga oya, meda kua ni cakava kina e dua na ka? Na aua e sega ni vakayagataki oqori sa maumau, sa na sega ni lesu tale mai.
E rawa ni vakatauvatani na gauna kei na dua na uciwai levu e drodro vinaka. Na wai ena drodro tiko ga i liu, ena sega ni suka i muri. Sega ni rawa nida tarova, se meda vakayagataka na wai kece e drodro sobu mai. O ira gona na tamata ena veisenitiuri sa sivi era a vakaduria e batiniwai na iqaqi e tosoya na wai. Na igu ni wai e tosoya mai na iqaqi, ena lewa na yavala ni iqaqi vatu, ivaro ni kau kei na ituki ni kaukamea. E vaka tale ga kina nomu rawa ni lewa na gauna, e sega ni rawa ni o maroroya, ia e rawa ni o vakayagataka mo vakayacora kina na cakacaka vinaka. Me rawati oqo, e rua na ka me qarauni—na lokuyara kei na veika e dau veivakaosoosotaki. Meda dikeva mada na kena imatai, na lokuyara.
Kua ni Lokuyara
E dua na ivosavosa kilai levu e kaya, Kua ni lokuca me qai caka ni mataka na ka o rawa ni cakava nikua. Ia e so era sega ni muria na ivakasala oqori. Ke dua na nodra itavi e dredre toka, era nanuma ni kena iwali vinaka ga me lokuyarataki na kena caka. E kaya e dua na ivolavosa ni vosa “lokuyara” e kena ibalebale, “vakaberabera, lomawele, vakadaroi ni dua na ka e dodonu me caka.” O koya e dau lokuyara sa vaka e matau vua me dau biuta vakatikitiki na ka e rawa ni cakava ena gauna ga oya. Ni nuiqawaqawataka na levu ni nona cakacaka, e kunea na lomavakacegu ena nona biuta vakatikitiki na cakacaka, me se marautaka mada na gauna galala oqori me yacova ni tarabi tale mai na nuiqawaqawa.
So na gauna eda sotava na ituvaki e vinakati kina meda vakadaroya na vakayacori ni so na noda cakacaka se noda cakacaka kece. Kena ikuri, o keda kece ena so na gauna eda na vinakata meda cegu mada ena ka eda cakava e veisiga. Na Luve sara mada ga ni Kalou a cakava oqo. E dau ogaoga o Jisu ena nona cakacaka vakavunau, ia e vakatikitikitaka na gauna me vakacegu kina kei ratou na nona tisaipeli. (Marika 6:31, 32) Na cegu lekaleka vaka oqo e yaga dina. Ia, na lokuyara e duatani, e dau veivakaleqai. Dikeva mada e dua na kena ivakaraitaki.
Sa vo ga e tolu na macawa vua e dua na gonevuli me vakarautaka kina nona veitarogi ena veika vakafika. Levu sara na ka me na railesuva ena ivola kei na veika a vakavola ena lesoni oqo. E vakila na nuiqawaqawa. Mani coriti ena dai ni lokuyara. Na gauna me vuli lesoni kina e sara retioyaloyalo. Ena veisiga yadua e vakadaroya na ka e dodonu me cakava me na rawata kina nona veitarogi. Sa qai dabe me vuli lesoni ena iotioti ni bogi ena nona railesuva na veika a vakavola me baleta na lesoni oya.
Levu sara na aua e vakayagataka ena vuli lesoni ena bogi oya. Nira sa moce na vo ni lewenivuvale, e vosota na via moce ena nona saga me kasa ena nona vakasama na cakacakataki ni fika vereverea me vaka na equations, cosines, kei na square roots. Ena siga e tarava ni caka na veitarogi, e dredre me kila na taro vaka kina na kena isau ni sa oca nona vakasama. E ca sara na kena maka qai sega ni rawata na nona veitarogi. Ena vulica tale na lesoni vata ga oya qai kena irairai ni na sega ni dewa ina kalasi e tarava.
E laurai e ke na ca ni lokuyara. Ia e dua na ivakavuvuli ena iVolatabu e rawa ni vukei keda meda kua ni muria na ivakaraitaki ni gonevuli oqo. A vola na yapositolo o Paula: “O koya mo dou qai raici kemudou vinaka, mo dou i valavala vakayalomatua, mo dou kakua ni vakataki ira na lialia, mo dou vakataki ira ga na vuku, mo dou volia me nomudou na gauna.” (Efeso 5:15, 16) E vakadreti ira tiko na lotu Vakarisito o Paula mera yalomatuataka nodra vakayagataka nodra gauna ena cakacaka vakayalo era lesi kina, ia na kena ivakavuvuli ena yaga sara vakalevu ena veibasoga tale ni noda bula. Me vaka ni rawa nida vakatulewataka na gauna meda vakayacora kina e dua na cakacaka, eda na raica ni na caka vakavinaka qai oti totolo kevaka eda digia me tekivu ena dua na gauna veiganiti. Oqo e dua na ka era kilai kina na tamata “vuku” me vaka e vakaraitaka na iVolatabu.
Na gauna veiganiti cava e rawa ni vakarautaki koya kina na gonevuli ena veitarogi? De dua e rawa ni cakava ena veibogi me 15 na miniti se sivia, me toso tiko ga kina nona railesuva na veika ena veitarogitaka. Na sala oya ena sega ni yadra sivia ena nona saga me vulica na lesoni taucoko ena dua ga na bogi, ia ena moce ga vakavinaka. Ni qai dabeca na veitarogi e lomavakacegu ni sa vakavakarau tu vakavinaka, e nuidei tale ga ni na rawata na maka vinaka.
O koya gona, ni o lesi mo vakayacora e dua na cakacaka, vakadeitaka na gauna veiganiti mo cakava kina qai cakava sara. Nomu cakava oya o na sega ni coriti ena dai ni lokuyara kei na leqa e kauta vata mai. O na lomavakacegu tale ga ni o raica nomu cakava vakavinaka na nomu itavi. E bibi dina oqo vakauasivi kevaka ena tarai ira tale e so, me vaka na ilesilesi ena ivavakoso vakarisito.
Vakalailaitaka na Veika e Dau Vakaosoosotaki Keda
Me vaka sa cavuti taumada, na ikarua ni ka meda qarauna na veika e dau veivakaosoosotaki. Eda kila ni taura na gauna na kena tuvai, vakayagataki, vakasavasavataki, maroroi, se na kena vakasaqarai na ka. Nida taukena e levu na ka ena gadrevi tale ga e levu na gauna me qaravi kina na veika oqori. Na cakacaka ena dua na rumu se vale e oso kina na iyaya, e vakatuburarawa qai kania vakalevu na gauna ni vakatauvatani kei na rumu e galala qai sega ni kabuwacara. Kena ikuri, na levu ga ni iyaya eda vakumuna ena taura tale ga na gauna meda vaqara ke da via vakayagataka.
Era kaya e so na kenadau ena sasamaki, ni voleka ni veimama na gauna e dau lusi wale ga ena kena “tosoi na iyaya era kabuwacara tu e lomanivale.” Na ituvaki oqori e via tautauvata ena veibasoga ni bula tale e so. Kevaka gona o via vakayagataka vinaka nomu gauna, raica mada vakavinaka na nomu rumu, vale se lomanibai. E levu beka na iyaya e vakaosooso wale tu, e vakadredretaka nomu veitosoyaki qai kania vakalevu nomu gauna? Ke vaka kina, vakalailaitaka!
De dua ena sega ni rawarawa meda biuta laivi na iyaya eda mareqeta, eda sa sega ni dau vakayagataka. E via vaka sara ga nona biuti keda e dua na noda itokani voleka. Ia o na vakatulewataka vakacava na iyaya mo maroroya se na kena mo biuta laivi? Oqo na nodra ivakasala e so. Kevaka o sa sega ni vakayagataka e dua na iyaya ena dua na yabaki, viritaka laivi. Vakacava ke o tuvakasuka mo viritaka laivi ni sa oti e dua na yabaki? Biuta ena dua na vanua me ono tale na vula. Ena gauna o raica tale kina ni sa oti e dua veimama na yabaki o se sega ga ni vakayagataka, rairai sa na qai rawarawa nomu biuta laivi. Se mani cava ga, saga me vakalailaitaki na iyaya e dau vakaosooso tu ga—mo rawa ni vakayagataka vinaka sara kina na nomu gauna.
Ia na veika e vakaosooso wale tu ga e sega ni yala ga ena veika e tu ena noda vale se vanua ni cakacaka. A tukuna o Jisu me baleta “na lomaocaoca e na vuku ni vuravura oqo, kei nai yau e dauveivakaisini” ena rawa ni “vakaruguta na vosa” ni Kalou qai vakavuna me “sega kina ni vua” e dua na tamata ena vuku ni itukutuku vinaka. (Maciu 13:22) E rawa ni osooso na nona bula e dua ena levu ni ka e taleitaka kei na nona saga me rawata, sa na dredre gona me kunea na gauna veiganiti me baleta na ka e bibi duadua, oya na veika vakayalo. De dua ena vakaleqai koya vakayalo oqo, qai rawa ni tini sara ena nona calata na bula totoka e yalataka na Kalou ena vuravura vou—na vuravura eda rawa ni cakava kina na veika e veivakacegui qai marautaki, me tawamudu.—Aisea 65:17-24; 2 Pita 3:13.
O dau saga beka mo vakacuruma ena nomu ituvatuva na veika kece o nanuma ni dodonu mo cakava—me vaka na kena e vauca na nomu cakacaka saumi, itikotiko, motoka, ilakolako vagade, vakaukaua yago, caka soqo, se so tale na ka o taleitaka? Ke vaka kina, rairai oqo na gauna mo vakasamataka na ka o rawa ni cakava mo vakalailaitaka na veika e dau vakaosooso wale tu, me rawa ni levu na gauna o vakayagataka ena veika vakayalo.
Na gauna e toso i liu me vaka na drodro ni wai. E sega ni rawa ni suka i muri se me maroroi; ni sa tasiri ena sega tale ni lesu mai. Ia, ni muri e so na ivakavuvuli rawarawa ena iVolatabu vaka kina e so na ivukevuke yaga, e rawa nida lewa na gauna e gadrevi meda vakayacora kina “na veika e uasivi sara.” Ena yaga vei keda me tawamudu qai “vakalagilagi ka vakacaucautaki kina na Kalou.”—Filipai 1:10, 11, VV.
[iYaloyalo ena tabana e 8]
Na gauna e vaka na drodro ni wai, e rawa nida lewa meda vakayagataka ena cakacaka vinaka
[iYaloyalo ena tabana e 9]
Na gauna veiganiti cava me vakarautaki koya kina ena nona veitarogi?
[iYaloyalo ena tabana e 10]
Na cakacaka ena vanua e kabuwacara e kania na gauna qai vakatuburarawa tale ga