Yavu ni Vuvale Mamarau

Vakavulica na Luvemu iTabagone me Nuitaki Mai Muri

“E liu, au dau marautaka na vosa vei ratou na luvequ tagane. Ni ratou dau rogoca vinaka na ka au tukuna, ratou cakava sara. Ia qo ni ratou sa itabagone, voleka ni ka kece ga keitou veibataka. Eratou sa sega mada ga ni taleitaka na ka e vauca neitou sokalou. Kena ivakaraitaki, ratou dau taroga, ‘E veiganiti dina me tou veivosakitaka na iVolatabu?’ Au a raica ni yaco qo ena vuvale tale eso, ia au sega sara ni bau vakasamataka me yaco tale ga vei keitou, ni ratou a se gone na luvequ.”​—Rusi.a

O SUSUGA tiko e dua na itabagone? Ke vaka kina, o na vakadinadinataka ni qori e gauna talei ena nona tubu o luvemu. Ia e gauna nuiqawaqawataki tale ga. O vakadinata ni dau yaco na ituvaki e toka qo e ra?

▪ A vaka e dua na waqa o luvemu tagane ni se gone, a vesu tu ina wavu​—na wavu ya o iko. E liu, a dau vinakata o luvemu me toka voleka ga vei iko. Ia qo ni sa itabagone, sa vinakata me sere na dali mai na wavu, me sa soko duadua. Ni vinakata o luvemu mo solia vakalevu vua na galala, o na rairai nanuma ni sa via yawaki iko.

▪ A dau talaucaka vei iko na ka kece na luvemu yalewa ni se gone. Ia qo ni sa itabagone, sa talaucaka ga na lomana vei ira na nona itokani.

Ke yaco tiko qori ena nomu vuvale, kua ni totolo sara mo nanuma ni gone be o luvemu, ni na sega ni veisau rawa. Na cava ga e yaco tiko vua? Ena kilai na isau ni taro qori ena noda raica na bibi ni bula vakaitabagone ena nona tubu o luvemu.

Bula Vakaitabagone​—E Gauna Bibi

Na ka kece e cakava e dua na gone ena imatai ni gauna, e tekivu mai na gauna e sucu kina​—na imatai ni kalawa, imatai ni vosa e cavuta, imatai ni siga e koronivuli, kei na levu tale. Era dau marautaka na itubutubu na veika eso era rawata na luvedra, ni vakaraitaka nira sa tubu tiko na gone.

E gauna dredre vei ira na itubutubu nira sa itabagone na luvedra, ia e gauna bibi tale ga. Sa rauta me gauna dredre, vakabibi ke ra raica na itubutubu ni sa solikesu se vakabutubutu ena gauna qo na luvedra a dau talairawarawa tu e liu. Ia e se bibi ga na bula vakaitabagone ena nona tubu e dua. Ena sala cava?

E tukuna na iVolatabu ni dua na gauna, ena “biuta kina na tamana kei tinana na tagane.” (Vakatekivu 2:24) Na bula vakaitabagone e gauna gona ni vakavakarau ina siga marautaki ya, siga rarawataki tale ga ni nomudrau veitalatala. Ni yaco mai na siga ya, sa rawa ni tukuna tale ga o luvemu na vosa i Paula: “Ni’u a gone, au a dauvosa me vaka na gone, au a kila ka me vaka na gone; au a dauvakanananu me vaka na gone; ia ni’u sa yaco me tamata bula, au sa biuta tani na ka vagonegonea.”​—1 Korinica 13:11.

Qori sara ga na ka ena cakava o luvemu ena gauna vakaitabagone. Ena biuta na itovo vagonegonea, qai vulica na itovo ni tamata e matua, e rawa ni qaravi koya ga ni biubiu mai vale. E vakaciriloloma na kena tukuni ena dua na ivola ni gauna vakaitabagone “e gauna ni nodra vakavakarau na itabagone mera veitalatala kei na nodra itubutubu.”

Sa macala ni o na lomatarotarotaka na nona sa rawa ni lewai koya ga o nomu gonetagane se goneyalewa “lailai.” O na rairai taroga:

▪ “Ke sa sega mada ga ni samaka rawa na nona rumu ena gauna qo o luvequ tagane, ena qai rawa vakacava ni samaka e dua na vale?”

▪ “Ke sa sega ni yaco tiko mada ga mai vale ena kena gauna donu o luvequ yalewa, sa na qai wacava sara ke sa cakacaka?”

Ke o lomaleqataka qori, nanuma tiko: Nona lewai koya ga o luvemu e sega ni katuba e rawarawa wale tu ga na nona curuma; ia e dua na ilakolako balavu, ena vakayabaki na nona sasagataka me qai rawata. Ni o raici luvemu tiko ena gauna qo, o kila ni “ka lialia sa vauci e lomana na gone.”​—Vosa Vakaibalebale 22:15.

Ia ke o vakavulici koya vinaka ena nona gauna vakaitabagone, ena tamata matua ni sa uabula, ena ‘vakavulici na lomana me vakaduiduitaka na vinaka mai na ca.’​—Iperiu 5:14, VV.

iVakavuvuli Yaga

Ni o vakavulici luvemu, e bibi mo vukei koya me “yalomatua,” me rawa ni vakatulewa vinaka vakataki koya. (Roma 12:1, NW, 2) E toka e ra eso na ivakavuvuli yaga vakaivolatabu o rawa ni muria.

Filipai 4:5: “Me kilai na nomudou yalomalumalumu [“yalorawarawa,” NW] vei ira na tamata kecega.” Kaya mada ke o sega ni vakadonuya na kerekere nei luvemu itabagone me vakabalavutaki nona gauna ni gade. Sa qai tukuna vakacudrucudru vei iko o koya, “Au sega ni gonelailai!” Kua ni totolo mo tukuna lesu, “Nomu ivukivuki e vaka na gonelailai,” ia vakasamataka mada qo: O ira na itabagone era dau vinakata vakalevu na galala era se sega ni rawa ni vakayagataka vinaka. Ena yasana adua, o na rairai sega ni solia kece na galala o rawa ni solia. So na gauna, ena rairai vinaka mo cakava mada ga na ka e vinakata o luvemu se bau vakasamataka mada ga na ka e nanuma.

TOVOLEA MADA QO: Vola e dua se rua na ka o rawa ni solia tale kina vakalailai na galala vei luvemu itabagone. Tukuna vua ni o via vakatovolea se vakayagataka vakacava na galala qori. Ke vakayagataka vinaka, ena rawa ni soli tale eso na galala vua. Ke sega, ena vakalailaitaki se kau tani na galala ya.​—Maciu 25:21.

Kolosa 3:21, VV: “Kemuni na i tubutubu, mo ni kakua ni dau vakacudrui ira na luvemuni, de ra na qai dadatuvu kina.” So na itubutubu era via lewa na ka kece e cakava na luvedra itabagone. E rawa sara ga nira sogoti koya toka e vale, mera lewa kina na ka e cakava. Era digitaka vua na nona itokani, ra qai dau rogoca lo na nona vosa ena talevoni. Na ivukivuki va qori ena vakacudruya ga na luvemu itabagone. Ena via dro ke o sogoti koya toka ga e vale; na levu ga ni nomu vakalewai ira na nona itokani, na levu tale ga ni nona taleitaki ira; ke o dau rogoca lo nona vosa ena talevoni, ena saga eso tale na sala ni veivosaki mo kua ni kila. Na levu ga ni nomu via lewai luvemu, na levu tale ga ni nona vakaunona se na nona be. Ke o vakatulewataka vua na ka taucoko ni se tiko e vale, ena sega ni rawa ni vakatulewa ni biubiu.

TOVOLEA MADA QO: Ni drau veitalanoa tale kei luvemu me baleta e dua na ka e kauai kina, vukei koya me vakasamataka se na vakacava na kena irogorogo ena ka e vakatulewataka. Kaya mada ke baleta na nona itokani, kua ni vakalelewa, ia taroga: “Vakacava ke vesu o [yacana] ni beca na lawa? O na raici kina vakacava?” Me kila o luvemu ni nona vakatulewa ena vinaka se ca kina na kena irogorogo.​—Vosa Vakaibalebale 11:17, 22; 20:11.

Efeso 6:4: “Dou kakua ni vakacudrui ira na nomudou gone: ia dou vakavulici ira e na vunau kei nai vakavuvuli ni Turaga.” Na vosa “vakavuvuli” e rabailevu. E sega ni rauta mo vakamacala ga, ia e bibi me tara na lomai luvemu na ka e tukuni vua me rawa ni uqeti koya ena ka e cakava. Qori e bibi sara ni sa itabagone o luvemu. E kaya o Andre e dua na tama, “Ni tubu cake tiko o luvemu, veisautaka na iwalewale ni nomu veivakavulici, drau dau veivosaki, kua ni vosa tu ga.”​—2 Timoci 3:14.

TOVOLEA MADA QO: Ke basika e dua na ka e bibi mo drau veivosakitaka, tukuna vei luvemu me itubutubu mada o koya, o iko mo luvena. Ena vakasalataki iko vakacava ke o luvena. Tukuna vua me vakekeli me tokona se vakacala na nona nanuma. Drau qai veivosaki tale ena loma ga ni dua na macawa.

Kalatia 6:7: “Na ka kecega sa kaburaka na tamata ena tamusuka talega ko ya.” E rawa ni vakavulici tale ga o luvemu ena itotogi​—rawa ni o tukuna vua me lako ina nona rumu se vakatabuya nona cakava eso na ka e dau taleitaka. Ena vuli vakalevu o luvemu ke vakila sara ga na itinitini ca ni ka e cakava.​—Vosa Vakaibalebale 6:27.

TOVOLEA MADA QO: Kua ni sauma na nona dinau, se soli ulubale ena vukuna vei qasenivuli ke sega ni gumatua ena nona ka ni vuli. Laiva me sotava na ca ni nona vakatulewa, na ka e vulica kina ena yaga tawamudu vua.

Oni rairai diva na itubutubu me totolo qai rawarawa na veisau ni nodra bula na luvemuni, mai na itabagone ina uabula. Ka ni rarawa ni sega ni dau va ya. Ia na gauna vakaitabagone e se gauna vinaka ga mo “vakatavulica na gone e na sala e dodonu me lako kina.” (Vosa Vakaibalebale 22:6) Ke muri na ivakavuvuli vakaivolatabu, ena dei qai marau na vuvale.

[iVakamacala e ra]

TAROGA . . .

Ena rawa ni cakava qo na luvequ itabagone ke sa biubiu e vale?

▪ muria dei na ituvatuva e vauca nona sokalou

▪ digidigi, qai vakatulewa vinaka

▪ veimaliwai vinaka kei ira tale na so

▪ lewa vinaka nona bula

▪ vakayagataka vakayalomatua na nona ilavo

▪ samaka na vale, me savasava tu ga

▪ saga me cakava vakataki koya na ka

[iYaloyalo ena tabana e 24]

Ke o raica ni sa nuitaki o luvemu itabagone, vakacava o rawa ni solia vua eso tale na galala?