Me Yaga Vei Iko na Veidutaitaki ni Ka — Watchtower LAIBRI ENA INTERNET

Me Yaga Vei Iko na Veidutaitaki ni Ka

Vakacava o vakabauta ni o Jisu a Qasenivuli levu duadua a bau bula? De dua o dau via vakatotomuria na iwalewale ni nona veivakavulici, me vaka na nona dau vakayagataka na taro kei na vosavakatautauvata. Ia vakacava o kila ni dau veidutaitaka vakalevu na ka o Jisu ena gauna e veivakavulici kina?

E levu era dau veidutaitaka na ka nira veivosaki. De dua o dau cakava tale ga qori, ia o sega ni vakasamataka tu. O na rairai kaya, “Eratou tukuna ni dreu kece na vuata, ia qo era se vou.” Se, “A dau gone mamadua tu e liu, ia qo sa rawa ni veimaliwai.”

Nida veidutaitaka e dua na ka, eda na tukuna e liu e dua na ka dina se dua na vakasama, oti eda na qai veidutaitaka qori ena noda vakayagataka eso na vosa me vaka na ia, ga se e dua tale na yasana. Se da na rairai veidutaitaka na ka ena noda tukuna eso tale na itukutuku. E kena ivakarau ga meda dau vosa va ya, ena rawa tale ga ni matata vei ira na so na ka eda kaya tiko.

Ke sega mada ga ni takalevu ena so na vosa se itovo vakavanua na kena dau veidutaitaki na ka, eda kila ni tiko na kena yaga. Na vuna? Nira volai sara ga ena Vosa uqeti vakalou. E dau veidutaitaka vakalevu na ka o Jisu. Vakasamataka mada qo: “Ni waqa na cina, ena sega ni biu ena ruku ni sova, ena biu ga ena kena itutu.” “Ni kua ni nanuma niu mai tababokoca na Lawa kei na ka era vola na Parofita. Au mai vakayacora ga.” “Oni rogoca ni a tukuni, ‘Mo kua ni veibutakoci.’ Ia au kaya vei kemuni ni o koya e vakaraica tiko ga na yalewa . . . ” “Oni rogoca ni a tukuni, ‘Me isau ni mata na mata, me isau ni bati na bati.’ Ia au kaya vei kemuni: kua ni veisausaumitaka na ca; ke dua e sabaka na balumu imatau, solia tale ga vua na balumu imawi.”—Maciu 5:15, 17, 27, 28, 38, 39.

Eso tale na ivola ena iVolatabu era veidutaitaki kina na ka. E rawa ni o kila vinaka kina e dua na vakasama se vakabibitaka vinaka kina e dua na ka. Ke o dua na itubutubu, vakasamataka mada na kena veidutaitaki qo: “Kemuni na tama, ni kua ni vakacudrui ira na luvemuni, ni tuberi ira tiko ga ena ivakavuvuli kei na ivakasala i Jiova.” (Efeso 6:4) Ke vola ga vakadodonu na yapositolo o Paula ni vinakati vua na tama (se tina) me tuberi luvena ena sala ni Kalou, ena rairai ka vakayalomatua qori qai dina. Ia e sa qai matata na vakasama ni biu na matavosa “kua ni vakacudrui ira na luvemuni, ni tuberi ira tiko ga ena ivakavuvuli kei na ivakasala i Jiova.”

A qai vola e muri o Paula ena wase tiko ga oya: “Nida sega ni veivala wale ga kei ira era vakalewe ra qai vakadra, ia eda veivala kei ira . . . na yalo ca tawarairai ena veiyasana vakalomalagi.” (Efeso 6:12) Na kena veidutaitaki qori, o na rairai kila kina ni na vinakati mo vala vakaukaua. Eda sega ni vala wale ga kei ira na tamata; ia eda veivala tale ga kei ira na kabula ca vakayalo.

YAGA NI KENA VEIDUTAITAKI NA KA

O na kunea ena Efeso e levu tale na sala e dau veidutaitaka kina na ka o Paula. Nida vakasamataka qori ena rawa ni vukei keda meda kila na ka e tukuna tiko o Paula, ena matata tale ga na ka meda cakava.

De dua o na taleitaka qai yaga vakalevu vei iko mo raica na kato ena tabana e 4 kei na 5 era veidutaitaki tiko kina eso na ka ena Efeso wase 4 kei na 5. Ni o vakawilika yadudua tiko, vakasamataka na nomu bula. E vinaka mo taroga: ‘E vakacava tu na noqu itovo? Cava au na cakava keu tu ena ituvaki va qo? Na tikina cava ena ka e veidutaitaki tiko era na raica eso ni baleti au sara ga?’ Ke o siqema ni dua na ka e veidutaitaki tiko o raica ni dodonu mo cakacaka kina, saga sara mo cakava qori. Me yaga vei iko na ka e veidutaitaki qori.

Se o rawa ni vakayagataka na kato qori ena nomu sokalou vakavuvale. E rawa ni ratou wilika e liu na lewe ni nomu vuvale na ka era veidutaitaki tiko kina. Rawa ni kauta cake mai e dua vei kemudou na imatai ni tikina e veidutaitaki tiko, qai laivi ira na vo ni lewenivuvale mera kilakila mai na ikarua ni tikina e veidutaitaki tiko. Qori ena rawa ni marautaki kina na nomudou veivosaki vakavuvale me baleta na sala e rawa ni yaga kina na ikarua ni tikina e veidutaitaki tiko. Io, na kena dikevi va qori na ka era veidutaitaki ena rawa ni yaga vei ira na qase kei ira na gone mera muria na itovo vaKarisito ena vuvale se so tale na vanua.

Ni o sa kila vinaka na yaga ni kena dau veidutaitaki na ka, o na rairai kila vinaka sara na kena era tu ena iVolatabu, de dua ena yaga tale ga vakalevu ena nomu cakacaka vakaitalatala. Kena ivakaraitaki, o na rawa ni kaya vua e dua na itaukeinivale: “Era kaya e levu ni bula tale tiko e dua na ka ni mate na tamata, ia raica mada na ka e kaya na Vosa ni Kalou.” Se o na rawa ni taroga e dua na vuli iVolatabu: “E levu era vakaitikotiko eke era vakabauta ni o Jiova kei Jisu erau le dua ga; ia na cava daru raica ena iVolatabu? Na cava mada nomu nanuma?”

Io, e levu na ka era veidutaitaki ena iVolatabu era yaga vei keda, eda na rawa tale ga ni lako vata kina kei na Kalou. Eda rawa ni veidutaitaka tale ga na ka meda vukea kina eso tale mera kila na ka dina ena iVolatabu.

[iYaloyalo ena tabana e 3]

[Chart ena tabana e 4, 5]

Eso na ka e Veidutaitaki ena Efeso Wase 4 kei na 5

Saga mo vakayagataka na kato qo ena nomudou sokalou vakavuvale!

“Meda kua kina ni . . . veikauyaki . . . ena ilawaki ni tamata, kei na nodra ivadi qaseqase mera veivakacalai kina.”—4:14.

“Ia ena noda tukuna na ka dina, me uqeti keda tiko ga na noda loloma meda tubu cake kina ena ka kece, meda duavata kei koya na uluda, na Karisito.”—4:15.

“Ni butobuto nodra [na veimatanitu] vakasama . . ena vuku ni nodra sesewa kei na nodra lomaqa.”—4:18, 19.

“Ia e duatani na ka oni vulica vei Karisito, vakavo ke oni a sega ni rogoci koya vinaka ena gauna oni vakavulici kina.”—4:20, 21

“Dodonu moni biuta tani na tamata makawa ni salavata kei na nomuni itovo makawa.”—4:22.

“Moni qai vakavoui ena igu e lewa na nomuni vakasama, ni dodonu moni tokara na tamata vou.”—4:23, 24.

“Me muduka nona butako o koya e butako tiko.”—4:28.

“Me cakacaka ga vakaukaua, me vakaitavitaka na ligana ena cakacaka yaga.”—4:28.

“Me kua ni lako mai gusumuni e dua na vosa vakasisila.”—4:29.

“Na vosa ga e vinaka qai veivakayaloqaqataki.”—4:29.

“Me kau tani vei kemuni na yaloca, na cudrucudru, na yalokatakata, na karakara, na vosavakacaca kei na ka ca kece va ya.”—.

“Ia moni veilomani, ni veinanumi, ni yalorawarawa moni veivosoti.”—4:32.

“Me kua mada ga ni cavuti ena kemuni maliwa na veidauci, na ka tawasavasava ena kena veimataqali, se kocokoco.”—5:3.

“Ia moni vakavinavinaka.”—.

“Oni a butobuto tu e liu.”—5:8.

“Ia qo oni sa rarama ena nomuni duavata kei na Turaga.”—5:8.

“Kua ni tokoni ira ena cakacaka tawayaga e salavata kei na butobuto.”—5:11.

“Ia ni vunauci ira ga.”—5:11.

“O koya gona, ni qarauna na nomuni ilakolako, ni kua ni vakataki ira na lialia.”—5:15.

“Ni vakataki ira ga na vuku, ni volia na gauna me nomuni.”—5:5:15, 16.

“O koya gona, ni kua ni yalodredre.”——5:17.

“Ni saga moni kila tiko ga se cava na loma i Jiova.”—5:17.

“Ni kua tale ga ni mateni ena waini, ni dau yaco kina na itovo velavela.”—5:18.

“Ia moni vakasinaiti ga ena yalo tabu.”—5:18.

“Me taura kina na ivavakoso ena kena totoka kece, e sega ni takava e dua na duka se sanuki se dua na ka va qori.”—5:27.

“Ia e dodonu me savasava, me kua ni vakamelei.”—5:27.

“E sega ni dua na tagane e cata na yagona.”—5:29.

“Ia ena vakania qai karona me vaka ga nona karona na ivavakoso na Karisito.”—5:29.

[iYaloyalo]

[iYlaoyalo]

[iYaloyalo]

[iYaloyalo ena tabana e 6]

O kila na ikarua ni tikina e veidutaitaki?