Me Vakarauta ga na Ka Eda Namaka, da Qai Marautaka

“AU SA calata tale!” Sa vakavica beka nomu dau cavuta na vosa ya ni o sega ni vakaotia na ka o nanuma mo vakayacora? Ena rairai tukuna beka qori e dua na tinanigone baleta ni oca se leqataka tu na veika e gadreva na luvena se qai sucu ga, qai sega ni lomavakacegu kina ni sega ni qarava vinaka nona itavi vakayalo. Dua tale na lotu vaKarisito ena rairai nanuma ni vakaiyalayala ga na ka e rawa ni cakava ena vuku ni nona isususu qai nanuma ni sega ni yaga ena ivavakoso. Ena rairai yalolailai e dua na iVakadinadina qase ni sega ni vakaitavi vakalevu ena cakacaka Vakaitalatala me vaka a dau cakava ena gauna e se tu kina vua na kaukaua kei na igu. E kaya o Christiane, “au dau luluvu sara ga ni’u rogoca na ivunau era uqeti kina e so mera painia,” baleta na ituvaki e sotava tiko o koya ena nona vuvale e lailai kina na gauna me vakayagataka ena qaravi Jiova.

Na cava eda rawa ni cakava ke da sotava na ituvaki qori? Na cava era cakava e so na lotu vaKarisito me donu kina na nodra rai me baleta na ituvaki va qori? Na cava e yaga kina me vakarauta ga na ka eda namaka?

Meda Yalorawarawa

E vakaraitaka na yapositolo o Paula na sala meda marau tiko kina: “Dou reki tikoga vua na Turaga: au sa kaya tale, Dou reki. Me kilai nomudou yalomalumalumu [“yalorawarawa,” NW] vei ira na tamata kecega.” (Fpai. 4:​4, 5) Nida vinakata gona meda marau qai lomavakacegu ena noda qarava na Kalou, e dodonu meda yalorawarawa me veiraurau na ka eda namaka, qai salavata kei na ka eda rawata kei na keda ituvaki. Ke da tekia e so na isausau e dredre sara, eda na lomaocaoca dina. Ena yasana adua, meda qarauna meda kua ni yalorawarawa vakasivia, se meda vakaiulubaletaka na noda malumalumu meda vakawaletaka kina vakasivia na cakacaka vakaitalatala vaKarisito.

Se mani ituvaki cava eda sotava, e vinakata ga o Jiova meda qaravi koya ena noda vinaka taucoko​—meda qaravi koya sara ga mai vu ni lomada. (Kolo. 3:​23, 24) Ke da sega ni qaravi Jiova ena noda vinaka taucoko, e vaka ga eda sega ni vakayacora noda vosa ni yalayala. (Roma 12:1) Kena ikuri, eda na sega ni vakila kina na lomavakacegu, na marau, vaka kina e so tale na ka ni veivakalougatataki e salavata na noda qaravi Jiova mai vu ni lomada.​—Vkai. 10:22.

Na vosa “yalorawarawa” e vakadewataki ena iVolatabu e okati kina na veikauaitaki. (Jeme. 3:​17.) E rawa ni tukuni tale ga vua e dua e sega ni yalododonu sivia se yalodredre. Koya gona, ke da yalorawarawa, eda na raica me veiraurau na noda rai me baleta na keda ituvaki. Ena dredre beka qori? E so ena dredre vei ira na rai qori, ia era dau veikauaitaki. Kena ivakaraitaki, ke dua na nomu itokani voleka e rairai oca tu ga ni sa sivia na ka e cakava, sega li nida na vukei koya me raica ni ka vakayalomatua me cakava e so na veiveisau ena nona bula? Koya gona, e dodonu tale ga meda kila ni vakaiyalayala ga na noda kaukaua, da qai liaca ke sa sivia tale na ka eda cakava tiko, ni sega ni salavata kei na keda ituvaki.​—Vkai. 11:17.

E ka ni bolebole toka me veiraurau na noda rai me baleta na ka eda rawa ni cakava, vakabibi ke ra susugi keda o ira na itubutubu era dau lavaka vakasivia vei keda na ka. So era nanuma ni gauna ra se gone kina a vinakati mera dau cakava e levu na ka, se mera vinaka cake me rawa ni lomani ira kina na nodra itubutubu. Ke a va ya na noda isususu, ena rairai cala na noda nanuma me baleta na nona raici keda o Jiova. E lomani keda o Jiova baleta ni vu mai lomada noda qaravi koya. E vakadeitaka na Vosa ni Kalou, ni o Jiova e ‘kila vinaka na keda ibulibuli; sa nanuma ga ni da sa kuvu-ni-soso.” (Same 103:​14) E lomani keda o Jiova nida gumatua na qaravi koya, dina ni kila vinaka tu ni vakaiyalayala na noda kaukaua. Na noda kila ni sega ni yalodredre na Kalou, ena uqeti keda meda yalomalumalumu, da qai kila tale ga ni vakaiyalayala na ka eda rawata.​—Maika 6:8.

Ia, se dredre tiko ga vei ira e so me tiko vei ira na rai qori. Ke va qori na kemu ituvaki, vakacava mo lai kere ivakasala vua e dua na lotu vaKarisito matua e kilai iko vinaka? (Vkai. 27:9) Kena ivakaraitaki, o vinakata beka mo dua na painia tudei? E isausau totoka dina! Vakacava, e dredre tiko beka mo rawata na isausau qori? De dua, o gadreva na veidusimaki mo na bula rawarawa ga kina. Rawa ni o veivosakitaka kei na nomu itokani nuitaki e lotu vaKarisito ke ganiti iko dina ena gauna qo na isausau mo painia tudei, ena vuku ni nomu itavi ena vuvale. Ena vukei iko mo vakalewa nomu ivakarau ni bula me laurai ke o na rawa ni vakalevutaka nomu cakacaka vakaitalatala, kei na veisau e gadrevi mo rawata kina nomu isausau. E rawa tale ga vua na tagane vakawati me vukei watina me cakava e dua na ituvatuva ena ganita na kena ituvaki. Kena ivakaraitaki, e rawa ni vakasalataki watina me vakacegu vinaka ni bera ni tekivu tale e dua na vula me cakacaka kina vakaitalatala. Ena rairai vakaukauataki koya, ena marautaka tale ga kina nona veiqaravi.

Vakasamataka e So na Ka o Rawa ni Cakava

Ena rairai yalana na ka eda cakava ena noda qaravi Jiova na bula vaqase kei na malumalumu vakayago. Ke o dua na itubutubu, o na rairai nanuma ni sega ni yaga na nomu vuli vakataki iko kei na soqoni vaKarisito baleta ni o dau ogaoga vakalevu vei ira na luvemu. Vakacava, e sa lai buawa beka ena so na gauna na isausau o rawa ni tekia baleta ni o sa rui kauaitaka vakasivia na kena vakaiyalayala na ka o rawata?

Ena vica na udolu na yabaki sa oti, a vakaraitaka e dua na Livai ni vinakata me cakava e dua na ka, ia qai sega ni rawa. E nona itavi dokai ena veiyabaki me dau veiqaravi ena valenisoro me rua na macawa. Ia a vinakata ga me tiko dei ena yasa ni icabocabonisoro. (Same 84:​1-3) Cava a uqeti koya me lomavakacegu ena itavi a lesi vua? Kila o koya ni itavi lagilagi dina ke bau veiqaravi mada ga ena dua na siga ena rara ni valenisoro. (Same 84:​4, 5, 10) Ena vakasama vata ya, meda saga gona meda kila, da qai marautaka na ka eda rawa ni cakava. Meda kua ga ni leqataka vakasivia na kena sa vakaiyalayala na ka eda rawata.

Vakasamataki Nerlande mada, e dua na yalewa lotu vaKarisito mai Kenada. E sa dabe tu ga ena idabedabe qiqi, qai vakaiyalayala na ka e rawa ni cakava ena cakacaka vakavunau. Ia a qai veisau nona rai ena gauna e nanuma kina me sa na lai vunau ena dua na vanua ni volivoli e voleka ga ina nona vale. E vakamacalataka: “E dau kele noqu qiqi ena yasa ni dua na idabedabe ena vanua ni volivoli ya. Au dau marautaka na vunau vei ira na mai cegu vakalekaleka ena idabedabe ya.” E lomavakacegu o Nerlande ni vunau ena sala qori.

Me Caka e So na Veisau ke Gadrevi

Ena rairai tasiri e dua na waqa ni soko ke vakarewa na kena laca qai liwa tu na cagi. Ia ke donuya e dua na cagilaba, ena veisautaka na rewa ni laca na kaimua. E dina ni sega ni lewa o koya na liwa ni cagi, ia ena rawa ni muadonu tiko ga na waqa ke cakava e so na veiveisau. E va tale ga qori na noda bula, ni levu na gauna eda sega ni lewa rawa na ituvaki dredre eda sotava. Ia e rawa meda lewa vinaka toka noda bula ke da veisautaka na ivakavakayagataki ni noda kaukaua kei na noda vakasama. Ke da nanuma tiko ni sa duidui sara na keda ituvaki ena gauna qo, eda na lomavakacegu, da qai marau tiko ga ena noda qaravi Jiova.​—Vkai. 11:2.

Vakasamataka mada e so na ivakaraitaki. Ke da sa malumalumu, ena vinaka meda kua ni cakacaka vakaukaua ena mataka, meda rawa nida tiko kina ena soqoni ena yakavi. Eda na qai vakila kina na yaga ni noda veimaliwai kei ira na tacida lotu vaKarisito. Ke dredre vua e dua na tina me lai vunau e veivale baleta ni tauvimate na luvena, ena rairai vinaka me sureta e dua na tacida yalewa lotu vaKarisito me lako yani ina nona vale me rau lai vunau ena talevoni ni moce tu na luvena.

Vakacava e dau dredre beka mo vakarautaka na ka ena vulici ena soqoni ena vuku ni kemu ituvaki? Mo raica ga na kena o rawa ni vakarautaka, qai vulica sara vakavinaka. Ke da veisautaka e so noda isausau me ganita na keda ituvaki, ena bulabula tiko ga noda veiqaravi, da qai marau tale ga.

De dua, ena vinakati na sasaga, gadrevi tale ga meda dei ena noda inakinaki, me rawa kina nida veisautaka noda isausau. A gadrevi me rau veisautaka sara ga nodrau lalawa e dua na veiwatini mai Varanise​—o Serge kei Agnès. “Ena gauna keirau kila kina ni sa bukete o Agnès, sa mai veisau vakadua neirau isausau ni via daukaulotu,” e kaya o Serge. Sa rua na luvedrau yalewa, rau gone mamarau, qai bulabula tale ga. Mani vakamacalataka o Serge na nodrau isausau vou vakaveiwatini. E kaya: “Ni keirau sa sega ni veiqaravi rawa e vanuatani, keirau mani nakita me keirau ‘daukaulotu’ ga ena vanua keitou tiko kina. Keirau mani lewena e dua na iwasewase e vosataka e dua tale na vosa.” E yaga beka na nodrau tekia na isausau vou? Tukuna o Serge: “Keirau vakila sara ga na neirau yaga ena ivavakoso.”

E duru ca o Odile​—e dua na tacida yalewa lotu vaKarisito mai Varanise e yabaki 70 vakacaca​—ni tauvi koya na osteoarthritis, qai sega ni rawa ni tucake vakabalavu. E yalolailai baleta ni sega ni rawa ni vunau e veivale ena vuku ni kena ituvaki vakayago. Ia a sega ni soro koso. A veisautaka nona ituvatuva me rawa ni vunau ena talevoni. E kaya: “E rawarawa cake qai marautaki vakalevu, duidui sara ga mai na ka au a nanuma!” E vakabulabulataka tale nona cakacaka vakaitalatala na iwalewale ni vunau qo.

Eda na Kalougata ke Vakarauta ga na Ka Eda Namaka

Eda na sega ni rarawa vakalevu ke veiraurau na noda rai me baleta na ka eda rawa ni cakava. Eda na lomavakacegu ke da tekia ga na isausau eda na rawata, dina ni vakaiyalayala ga na ka eda rawa ni cakava. Eda na marautaka gona na ka eda rawata, veitalia ke lailai sara.​—Kala. 6:4.

Nida sasaga tiko me veiraurau na noda rai me baleta na ka eda rawa ni cakava, eda na kauaitaki ira vakalevu cake na tacida lotu vaKarisito. Eda na kila ni vakaiyalayala na ka era rawata, eda na vakavinavinakataka gona na ka era cakava rawa ena vukuda. Nida cakava qori, eda na uqeta na duavata kei na veinanumi. (1 Pita 3:8) Meda nanuma tiko ni Tama dauloloma o Jiova, ena sega gona ni namaka vakasivia vei keda na ka. Ni veiraurau na ka eda namaka, qai veiganiti na isausau eda tekia, ena vakavu marau na veika vakayalo eda cakava da qai lomavakacegu tale ga kina.

[Tikina bibi ena tabana e 29]

E bibi me veiraurau ga na ka eda namaka, qai vakatau qori ena keda ituvaki kei na ka eda rawa ni cakava. Eda na lomavakacegu kina, da qai marau ena noda qaravi Jiova.

[iYaloyalo ena tabana e 30]

E marau o Nerlande ena nona cakava ga na ka e rawata ena cakacaka vakavunau

[iYaloyalo ena tabana e 31]

Vulica mo “veisautaka na rewa ni laca”

[Credit Line]

© Wave Royalty Free/age fotostock

[iYaloyalo ena tabana e 32]

Yaga vakalevu vei Serge kei Agnès na nodrau tekia na isausau vou