Rogoca o Jiova na Noda Tagi

“Sa vakaraici ira na tamata yalododonu ko Jiova, ka sa qara tu na daligana ki na nodra masu [“tagi,” NW].”​—SAME 34:​15.

1, 2. (a) Na cava era vakila tu e levu nikua? (b) Na cava eda sega ni kurabuitaka kina qo?

O RARAWA tiko beka ena gauna qo? Ke vaka kina, o sega ni rarawa duadua tiko. Levu ra lomabibitaka tu na veika ni nodra bula ni veisiga ena ituvaki ca ni vuravura qo. E so era sa oca mai, ra nanuma nira na sega ni rawa ni vosota tiko ga. Era vakila na rarawa vata ga a lomoci Tevita ni a vola: “Au sa malumalumu ka musulaki sara: au a vutugu ni sa daurarawa na yaloqu. Sa ceguoca na lomaqu, sa yali tani na noqu kaukauwa: na rai ni mataqu talega, sa takali vei au.”​—Same 38:​8, 10.

² Eda sega ni kurabuitaka na lotu Vakarisito dina na leqa e dau yaco ena noda bula. Eda kila ni tiki ni ivakatakilakila ni nona tiko tawarairai o Jisu na “ka rarawa.” (Mari. 13:8; Maciu 24:3) Na vosa taumada e vakadewataki me “ka rarawa” e dusia na rarawa mosimosi e vakila e dua na yalewa ena gauna ni vakasucu. E vakamacalataka donu sara ga na ka mosimosi eda sotava voli ena “gauna cacamatua” qo e “lewalewai dredre”!​—2 Tim. 3:​1, NW.

Kila Vinaka o Jiova na Noda Rarawa

3. Na cava eda kila vinaka tu na dausokalou i Jiova?

³ Eda kila vinaka na dausokalou i Jiova ni na tarai keda tale ga na ka rarawa, ena rairai ca sara na ituvaki ni toso na gauna. Eda sotava tiko na kawatamata na ituvaki rarawataki, kena ikuri ni tiko na ‘noda meca, na tevoro’ e saga sara tiko vakaukaua me vakaleqa noda vakabauta. (1 Pita 5:8) Ena rawarawa sara me tiko vei keda na rai i Tevita: “Sa vakamavoataka na yaloqu na vosa ca; ka’u sa bibi sara: ia ka’u sa rai voli me lomani au e dua, ka sa segai; me so talega me vakacegui au, ka sa sega e dua ka’u kunea”!​—Same 69:20.

4. Na cava ena vakacegui keda ena gauna eda rarawa kina?

⁴ Kena ibalebale beka qo ni sega na nona inuinui o Tevita? Sega, e tiko na nona inuinui, ni cavuta tarava ena same oya: “Ni sa rogoci ira na dravudravua ko Jiova, ka sega ni beci ira na nona era sa vesuki.” (Same 69:33) Ena so na gauna, eda vakila nida vesuki ena lomaocaoca se na rarawa me vaka ga nona vesu tu e dua na kaivesu. Kena irairai ni so era na sega ga ni kila vinaka na keda ituvaki. Ia me vakataki Tevita, eda lomavakacegu nida nuidei ni kila vinaka o Jiova na noda rarawa.​—Same 34:15.

5. Na cava e vakabauta dei tu o Tui Solomoni?

⁵ Vakamatatataka na ka dina qori o Solomoni na luvei Tevita ena gauna a vakatabui kina na valenisoro e Jerusalemi. (Wilika 2 Veigauna 6:​29-​31.) A masuti Jiova me rogoca nodra masu na yalomalumalumu era tagi vua baleta ‘na ca [bibivoro] ni lomadra kei na nodra rarawa.’ Ena rogoca beka na Kalou na nodra masu nira rarawa tu? Vakaraitaka o Solomoni ni vakabauta dei tu ni na sega wale ga ni rogoca o Jiova, ia ena cakava sara ga kina e dua na ka. Na vuna? E kila vinaka o Jiova “na lomadra kecega na luve ni tamata.”

6. Eda na vosota vakacava na lomaocaoca? Na vuna?

⁶ Meda dau masu tale ga vei Jiova me baleta na ‘ca [bibivoro] ni lomada kei na noda rarawa,’ oya na ka eda rarawataka tiko. Me vakaukauataki keda na noda kila ni kauaitaki keda o Jiova qai kila vinaka na noda rarawa. E vakadeitaka qori na yapositolo o Pita, e kaya: “Dou biuta vei koya na nomudou lomaocaoca kecega, ni sa daunanumi kemudou ko koya.” (1 Pita 5:7) E kauaitaka o Jiova na ka e dau yaco ena noda bula. A vakabibitaka o Jisu na nona veikauaitaki vakayalololoma o Jiova ni kaya: “Sa sega li ni volitaki na separo e rua e na dua na facigi? ia ka sega e dua vei rau ena lutu walega ki na qele, me tabogo vua na Tamamudou. A sa wiliki vakaaduaga na drau ni ulumudou. O koya mo dou qai kakua ni rere: dou sa uasivi cake vei ira na separo e vuqa.”​—Maciu 10:​29-​31.

Dau Nuitaka na Veivakacegui i Jiova

7. Na cava meda nuidei kina?

⁷ Meda nuidei ni sega wale ga ni vinakata o Jiova me vakacegui keda nida rarawa, ia e tu sara ga vua na kaukaua me cakava vaka kina. “A nodai drodro kei na noda kaukauwa na Kalou, sa voleka sara me vukei keda ni da sa rarawa.” (Same 34:​15-​18; 46:1) E dau veivakacegui vakacava na Kalou? Raica mada na 1 Korinica 10:​13, VV: “E sega ni dua na veivakatovolei ka sa yacovi kemuni me dua tani mai na kena e dau yaco ki na tamata. Sa yalo dina na Kalou, ka na sega ni laiva me sivia na nomuni kaukauwa na ka ko ni vakatovolei kina; e na solia ko koya e na gauna ni veivakatovolei na sala mo ni dro bula rawa kina kei na kaukauwa mo ni vosota kina.” De dua ena cakava e so na veiveisau o Jiova me seavu kina na noda rarawa, se na vakaukauataki keda meda vosota ga. Se mani sala cava e vakayagataka o Jiova, sega ni vakabekataki ni na vakacegui keda dina.

8. Na cava meda cakava me qai vakacegui keda kina o Jiova?

⁸ Na cava meda cakava me qai vakacegui keda kina o Jiova? Eda vakasalataki: “Dou biuta vei koya na nomudou lomaocaoca kecega.” E tukuni tiko e ke ni vaka sara ga eda solia vua na noda lomaocaoca kei na noda leqa kece me qai colata tiko. Meda saga meda kua ni dau lomaocaoca ia meda vosota tiko ga, da qai vakararavitaka vua na ka eda gadreva. (Maciu 6:​25-​32) Eda na qai vakararavi ga vua ke da yalomalumalumu, da qai sega ni nuitaka ga na noda kaukaua kei na noda vuku. Kevaka eda vakamalumalumu ena “ruku ni liga kaukauwa ni Kalou,” eda sa vakaraitaka ni yalani na ka eda rawata. (Wilika 1 Pita 5:6.) Noda vakamalumalumu ena vakaukauataki keda meda vosota na ka kece e vakatara tiko o Jiova me yaco. Eda na rairai vinakata me wali totolo sara ga na noda leqa ia meda nuitaka ni kila vinaka na Kalou na gauna kei na sala veiganiti me na vueti keda kina.​—Same 54:7; Aisea 41:10.

9. Na icolacola cava a vinakata o Tevita me biuta vei Jiova?

⁹ Nanuma na vosa i Tevita ena Same 55:22: “Mo biuta vei Jiova na nomui colacola bibi, ena tokoni iko ko koya: ena sega ni laivi ira na yalododonu me ra vakayavalataki e na dua na gauna.” A vola qori o Tevita ena gauna a rarawa voli kina vakalevu. (Same 55:4) E tukuni ni a vola na same qo ena gauna a bukia kina na luvena o Apisalome na kena vere me suguta kina nona itutu vakatui. A veretaki koya tale ga o Eitofeli, na nona daunivakasala nuitaki. Mani biuti Jerusalemi o Tevita ni vaqara bula. (2 Sam. 15:​12-​14) Ena gauna mada ga e sotava kina na veika rarawa oya, e nuitaki Jiova tiko ga qai sega ni matewale nona vakanuinui.

10. Na cava meda cakava nida sotava na rarawa?

¹⁰ Me vakataki Tevita, e bibi meda talaucaka na lomada vei Jiova me baleta na ka rarawa eda sotava tiko. Vakasamataka mada na vosa veivakauqeti ni yapositolo o Paula me baleta na tikina qo. (Wilika Filipai 4:​6, 7.) Na cava na yaga ni masu vagumatua va qori? ‘Na vakacegu ni Kalou, sa uasivia na ka kecega e kilai rawa, ena vakataudeitaka na yaloda kei na lomada e na vuku i Karisito Jisu.’

11. Ena taqomaka vakacava na lomada kei na noda vakasama “na vakacegu ni Kalou”?

¹¹ Ena veisautaka beka na masu na ituvaki eda sotava tiko? De na veisau ia e bibi meda nanuma tiko ni o Jiova ena sega ni sauma tu ga noda masu ena sala eda vinakata. Ia e yaga na masu baleta ni na vakataudeitaka na noda vakasama meda kua ni luvuci ena levu ni rarawa. Ena vakataudeitaki keda “na vakacegu ni Kalou” ena gauna eda lomabibi kina. Me vaka ga e dua na mataivalu e lesi me taqomaka na koro mera kua ni ravuta na meca voravora, “na vakacegu ni Kalou” ena taqomaka na lomada kei na noda vakasama. Ni sobuti keda, eda na sega ni lomalomarua, taqataqaya, cala noda rai, eda na sega tale ga ni dau vakatulewa vakariri se vakatulewa cala.​—Same 145:18.

12. Vakamacalataka eda na vakila vakacava na vakacegu ni vakasama.

¹² Eda na vakila vakacava na vakacegu ni vakasama nida rarawa tiko? Vakasamataka mada e dua na ivakaraitaki e via tautauvata kei na ituvaki eda dau sotava. E dau voravora nona itovo qai dau veibeci nona vosa e dua na manidia. E dredre gona me cakacaka kei koya e dua nona tamata cakacaka. Dua na gauna e veivosaki na tamata cakacaka qo kei na itaukei sara ga ni kabani. E turaga yalovinaka, e yalorawarawa tale ga. Mani vakadeitaka vua na tamata cakacaka oya ni kila vinaka na ituvaki e yaco, qai vakaraitaka ni sa vakarau biu tani mai na itutu oya na manidia. Ena vakacava na nona rai na tamata cakacaka oya? Nona vakabauta na vosa ni veivakadeitaki oya kei nona kila na ka sa vakarau yaco ena vakaukauataki koya me vosota tiko ga, dina ni na yaco e so tale na ka dredre ni bera ni qai wali na ituvaki oya. Meda nuidei tale ga ni kila vinaka o Jiova na rarawa eda sotava tiko. E vakadeitaka tale ga o koya ni sa na vakarau ‘biu laivi na tui ni vuravura qo.’ (Joni 12:31) Sega li ni veivakacegui na vosa qo?

13. Na cava e bibi me salavata kei na noda masu?

¹³ Sa rauta beka ga noda masu vei Jiova me baleta na leqa eda sotava tiko? Sega, ena vinakati meda cakava e so tale na ka. E bibi me na salavata na ka eda cakava kei na ka eda masulaka. Ena gauna a tala kina e so o Tui Saula mera lai vakamatei Tevita ena nona vale, a masulaka o Tevita: “Mo ni vakabulai au, na noqu Kalou, maivei ira na noqu meca: mo ni vakarurugi au maivei ira era sa tu cake kivei au. Vakabulai au maivei ira na daucaka cala, ka vakabulai au mai na tamata dauveivakamatei.” (Same 59:​1, 2) A sega ni masu wale ga o Tevita, ia a muria tale ga na ivakasala i watina qai dro bula. (1 Sam. 19:​11, 12) Meda masu tale ga vei Jiova me solia vei keda na vuku meda dau vosota kina na rarawa, se me bau vakavinakataka na keda ituvaki qori.​—Jeme. 1:5.

Na Kaukaua Meda na Vosota Kina

14. Na cava ena uqeti keda meda vosota tiko ga na rarawa?

¹⁴ De dua ena sega ni wali totolo na noda rarawa. Ena rairai taura toka na gauna na noda rarawa tiko. Ke vaka kina, na cava ena uqeti keda meda vosota tiko ga? Kena imatai, meda nanuma tiko nida na vakaraitaka noda lomani Jiova ena noda yalodina na qaravi koya​—dina nida rarawa tiko. (Caka. 14:22) Nanuma na nona beitaki Jope o Setani: “Sa sega li ni yaga vei Jope na nona rerevaka na Kalou? Ko ni sa sega beka ni viribaiti koya, kei na nona vale, kei na nona ka kece e na veiyasana kecega? ko ni sa vakalougatataka na cakacaka ni ligana, ka sa tubu kina me ka levu na nonai yau e na vanua. Ia mo dodoka mada na ligamuni, ka tara na nona ka kecega, ena qai vosavakacacataki kemuni ki matamuni.” (Jope 1:​9-​11) Nona yalodina tiko ga o Jope e vakalasuya kina na veibeitaki i Setani. Eda na vakavotuya tale ga ni dau lasulasu o Setani ke da vosota tiko ga na ituvaki rarawa eda dau sotava. Ena qai vakaukauataka noda inuinui kei na noda nuitaki Jiova.​—Jeme. 1:4.

15. Na ivakaraitaki cava e so ena vakaukauataki keda?

¹⁵ Kena ikarua, nanuma tiko ni ‘sa vakayacori tale ga na ka rarawa vei ira na wekamudou [tacimudou] era sa tiko voli e vuravura oqo.’ (1 Pita 5:9) O koya gona, “e sega ni dua na veivakatovolei ka sa yacovi kemuni me dua tani mai na kena e dau yaco ki na tamata.” (1 Kor. 10:​13, VV) Ena vakaukauataki keda qai vakayaloqaqataki keda na noda vakasamataka vakatitobu na nodra ivakaraitaki vinaka e so tale, kua ga nida nanuma tiko vakasivia na leqa e bikai keda voli. (1 Ces. 1:​5-7; Ipe. 12:1) Tikica na gauna meda dau vakasamataka kina nodra ivakaraitaki o ira eda kila nira yalodina voli ena nodra vosota tiko na rarawa mosimosi. Eda dau vakekeli beka meda dikeva kina na italanoa ni nodra bula e so era a sotava na ka rarawa e via tautauvata kei na kena eda sotava? Sega ni vakabekataki ni na vakaukauataki keda na nodra ivakaraitaki.

16. E dau vakaukauataki keda vakacava na Kalou ena rarawa kece eda sotava?

¹⁶ Kena ikatolu, nanuma tiko ni o Jiova e “Tama dauloloma, na Kalou sa sega ni mudu rawa na nona veivakacegui. Sa vakacegui keda ko koya e na noda rarawa kece ga, ka sa rawa kina vei keda me da vakacegui ira era sota kaya na veimataqali leqa kece ga, e na veivakacegui ga eda sa rawata mai vua na Kalou.” (2 Kor. 1:​3, 4, VV) Ena vaka sara ga e mai tu volekati keda na Kalou me vakaukauataki keda, sega wale ga ena ka rarawa eda sotava tiko ena gauna qo ia “e na noda rarawa kece ga.” Ena uqeti keda meda vakacegui ira tale e so nira “sota kaya na veimataqali leqa [rarawa] kece ga.” E vakadinadinataka sara ga o Paula ni dina na vosa qo.​—2 Kor. 4:​8, 9; 11:​23-​27.

17. E yaga vakacava na iVolatabu ena noda vosota na ituvaki rarawa?

¹⁷ Kena ikava, na Vosa ni Kalou na iVolatabu e yaga “mei vakavuvuli, me vunauca na ca, me ia kina na vakadodonutaki, me ia kina na vakatavuvuli e na ka e dodonu: me yaco kina na tamata ni Kalou me vakarau tu, ni sa vakarautaki ki nai valavala vinaka kecega.” (2 Tim. 3:​16, 17) Na Vosa ni Kalou e yaga baleta ni vakavulici keda meda “vakarau tu,” meda “vakarautaki ki nai valavala vinaka kecega.” E yaga tale ga baleta nida na vosota kina na ituvaki rarawa. Na vosa taumada e vakadewataki me “vakarau tu” e kena ibalebale “tuvai rawa tu.” Na vosa qo e rairai vakayagataki ena gauna makawa me dusia ni sa tuvai rawa tu ena waqa na ka kece e ganita na soko, se ni cakava e dua na misini na inaki ni ka a buli kina. Koya gona, e vakayagataka nona Vosa o Jiova me vakarautaki keda ena ka kece eda gadreva meda vosota kina na ituvaki cava ga e basika. Oqori na vuna eda na kaya kina, “Ke sa vakatara na Kalou, au na vosota ga ena kaukaua e solia o koya.”

Noda Vakabulai Mai na Rarawa Kece

18. Na cava meda dau vakasamataka meda vosota rawa kina na ka rarawa?

¹⁸ Kena ikalima: Dau vakasamataka na nona sa na vakarau vakabulai keda o Jiova mai na noda rarawa kece. (Same 34:19; 37:​9-​11; 2 Pita 2:9) Ena gauna sa yaco kina qori, eda na sega wale ga ni vakabulai mai na noda rarawa kece ia eda sa na rawa sara ga ni bula tawamudu​—se noda inuinui na bula e lomalagi kei Jisu se bula ena parataisi e vuravura.

19. Rawa vakacava nida vosota tiko ena yalodina?

¹⁹ Me yacova na gauna oya, meda vosota tiko mada ga na rarawa kece eda sotava ena vuravura ca qo. Sa wacava noda vakanamata ina gauna ra sa na oti kina na ka kece qo! (Same 55:​6-8) Meda kua ni guilecava ni na vakadinadinataki ni dau lasu na Tevoro ena noda dau vosota tiko ena yalodina. Me vakayaloqaqataki keda mada ga na noda masu kei na nodra ivakaraitaki na tacida lotu Vakarisito era sotava tiko na ka rarawa e vaka toka na kena eda sotava tiko. Meda vakayagataka vinaka na Vosa ni Kalou meda tu vakarau, da vakarautaki keda tale tu ga. Me kua vakadua ni luluqa noda nuitaka nona veikauaitaki vakayalololoma “na Kalou sa sega ni mudu rawa na nona veivakacegui.” Meda nanuma dei tiko ni “vakaraici ira na tamata yalododonu ko Jiova, ka sa qara tu na daligana ki na nodra masu [“tagi,” NW].”​—Same 34:15.

O Rawa ni Sauma?

• Na cava na rai i Tevita me baleta na rarawa a vakila tu?

• Cava a vakabauta dei tu o Tui Solomoni?

• Na cava ena vakaukauataki keda meda vosota na rarawa kece e vakatara o Jiova?

[iYaloyalo ena tabana e 13]

Vakabauta dei tu o Tui Solomoni ni o Jiova ena vakacegui ira nona tamata era rarawa tiko

[iYaloyalo ena tabana e 15]

A biuta nona icolacola vei Jiova o Tevita ena masu, salavata kei na ka e cakava