Nuitaki Jiova, Qai Yaloqaqa

“Nuitaki Jiova; mo yaloqaqa qai raica me kaukaua na lomamu. Io, nuitaki Jiova.”—SAME 27:14, NW.

1. Na cava e bibi kina na inuinui, e vakayagataki vakacava na vosa oqo ena iVolatabu?

NA INUINUI e vaka na cina ramase. E vukei keda meda rai basikata na veivakatovolei eda sotava tiko da qai valuta na veika e tu mai liu ena yaloqaqa kei na reki. O Jiova duadua ga e rawa ni solia vei keda na inuinui e dei, na inuinui e vakaraitaka vei keda ena nona Vosa. (2 Timoci 3:16) Na vosa na “inuinui,” “nuitaka,” kei na “vakanuinuitaka” e kunei vakavicavata ena iVolatabu. E dau vakaibalebaletaki ina ka vinaka e namaki, kei na inaki ni ka e namaki.a Na inuinui oqori e uasivi sara mai na ka e divi wale ga, baleta na ka e divi ena rawa ni sega na kena yavu se sega ni vakayacori.

2. E yaga vakacava na inuinui ena nona bula o Jisu?

² Ni sotava o Jisu na veivakatovolei kei na veika rarawa, a raibasikata o koya na rarawa e sotava baleta ni nuitaki Jiova tiko ga. “E na vuku ni marau e waraki koya tu, a sega kina ni maduataka na mate e na kauveilatai ka sa dabe tiko kina edaidai e na liga i matau ni i tikotiko vakaturaga ni Kalou.” (Iperiu 12:2, VV) Ni vakaliuca tu ga na dodonu ni veiliutaki i Jiova kei na vakarokorokotaki ni yacana, oqo e vakavuna me yalodina tu ga o Jisu veitalia se cava e mani yaco vua.

3. Na cava e itavi ni inuinui ena noda bula na tamata ni Kalou?

³ E vakaraitaka o Tui Tevita na nodrau lako vata na inuinui kei na yaloqaqa ena nona kaya: “Nuitaki Jiova; mo yaloqaqa qai raica me kaukaua na lomamu. Io, nuitaki Jiova.” (Same 27:14, NW) Kevaka eda vinakata me kaukaua vinaka tiko ga na lomada, ena vinakati me qaqaco vinaka tiko noda vakanuinui me qai dei vinaka tale tiko ga e lomada. Oqo ena vukei keda meda vakataki Jisu nida yaloqaqa da qai gugumatua ena cakacaka e lesia vei ira nona tisaipeli. (Maciu 24:14; 28:19, 20, VV) Sa rauta me cavuti vata na inuinui kei na vakabauta kei na loloma, na itovo e vakatakilakilataki ira na tamata ni Kalou.—1 Korinica 13:13.

‘E Tubucake Beka Nomu Vakanuinui’?

4. Na cava era vakanamata tu kina na lotu Vakarisito lumuti kei ira na nodra itokani ‘so tani tale na sipi’?

⁴ Era sa vakanamata tu na tamata ni Kalou ina veigauna vinaka. O ira na lotu Vakarisito lumuti era vakanamata tu mera lai veiqaravi vata kei Karisito mai lomalagi, ia o ira na ‘so tani tale na sipi’ era vakanamata tu mera ‘sereki mai na veivakabobulataki ina rusa ra qai lalaga tu qai vakaiukuukutaki vata kei ira na luve ni Kalou’ era tiko e vuravura. (Joni 10:16; Roma 8:19-21; Filipai 3:20) Na ‘lalaga e vakaiukuukutaki’ oqo e okati kina na nodra sereki mai na ivalavala ca kei na kena itotogi. Io, ni dau solia o Jiova “nai solisoli vinaka kecega kei nai solisoli kecega e yaga,” ena solia o koya na veika e yaga dina vei ira na nona tamata yalodina.—Jemesa 1:17; Aisea 25:8.

5. E yaco vakacava me ‘tubucake na noda vakanuinui’?

⁵ E vakacava na levu ni kena yaga ina noda bula na inuinui ni lotu Vakarisito? Eda wilika ena Roma 15:13 (VV): “Ia me vakasinaiti kemuni mada ga na Kalou, na vu ni noda vakanuinui, e na marau kece ga kei na vakacegu e na vuku ni nomuni vakabauti koya, me na tubu cake tiko ga kina na nomuni vakanuinui e na kaukauwa ni Yalo Tabu.” Io, e sega ni rawa ni vakatauvatani na inuinui kei na waqa ni kadrala ena vanua butobuto, ia e vaka ga na serau ni matanisiga ena mataka baleta ni solia na bula vakacegu, marau, na yaloqaqa, qai vakainaki tale ga kina na noda bula. Ena ‘tubucake na noda vakanuinui’ nida vakabauta na vosa volai ni Kalou qai sobuti keda tale ga na yalona tabu. E kaya na Roma 15:4 (VV): “Ni veika kece e volai e na i Vola Tabu sa volai me da vakatavulici kina, me noda kina na i nuinui sa rawa e na vosota kei na vei vakayaloqaqataki sa solia vei keda na i Vola Tabu.” Meda dui tarogi keda mada: ‘E serau vinaka tiko beka na noqu inuinui baleta niu vulica vinaka tiko na iVolatabu au qai dau wilika e veisiga? Au dau masuta vakalevu na yalona tabu na Kalou?’—Luke 11:13.

6. Me serau vinaka tiko ga na noda inuinui, na cava meda qarauna?

⁶ A vakaukauataki Jisu, na noda iVakaraitaki, na nona vakararavi ina Vosa ni Kalou. Ke da vakatotomuri koya, eda na sega ni ‘oca qai waicala na lomada.’ (Iperiu 12:3) E macala tale ga ni kevaka ena buawa ina noda vakasama kei na lomada na noda inuinui e solia na Kalou baleta ni sa gole tani na veika eda vakaliuca ina veika beka vakayago se isausau vakavuravura, oqo ena vakavuna na noda oca vakayalo da qai sega ni yaloqaqa. Ke vaka oya na ka eda sa vakaliuca, ena rawa ni ‘kasa na noda vakabauta.’ (1 Timoci 1:19) Ena yasana kadua, kevaka e dei na noda inuinui, ena kaukaua na noda vakabauta.

Gadrevi na iNuinui me Kaukaua na Vakabauta

7. E yaga vakacava na inuinui ina vakabauta?

⁷ E kaya na iVolatabu: “Na vakabauta sa i koya na noda vakadinata ni na yaco na veika eda nuitaka, na noda kila ni ra tu dina na veika eda sega ni raica.” (Iperiu 11:1, VV) O koya gona, na inuinui e sega wale ga ni tiki lailai ni vakabauta; e tiki bibi sara ga ni vakabauta. Vakasamataki Eparama mada. Rau sa sivita kei watina o Sera na yabaki ni vakaluveni ena gauna e yalataka kina vei rau o Jiova ni na dua na nodrau kawa. (Vakatekivu 17:15-17) E ciqoma vakacava oya o Eparama? “Sa vakabauta ka vakanuinui ko Eparaama ni a se sega na ka me vakanuinuitaka ka sa yaco kina me ‘tamadra na veimatanitu e vuqa.’” (Roma 4:18, VV) Io, na inuinui i Eparama e solia na Kalou e vakavuna me vakabauta dei kina ni na vakaluveni. E yaco tale ga na nona vakabauta oya me serau qai kaukaua na nona inuinui. E bau vakavuna tale ga me rau yaloqaqa o Eparama kei Sera me rau biuta na nodrau vale kei ira na wekadrau me rau lai tiko voli ga ena valelaca e vanua tani ena vo ni nodrau bula!

8. E vaqaqacotaka vakacava na noda inuinui na noda vosota tiko?

⁸ E kaukaua na inuinui i Eparama baleta ni talairawarawa tiko ga vei Jiova, dina ga ni dredre ena so na gauna. (Vakatekivu 22:2, 12) Kevaka tale ga eda talairawarawa vei Jiova da qai vosota tiko ena nona cakacaka, e rawa nida nuitaka na keda icocovi. Na “dauvosota,” e vola o Paula, e rawa kina nida “vakadeitaki,” qai vaqaqacotaka na noda inuinui, “na i nuinui oqo e na sega ni vakamaduataki keda.” (Roma 5:4, 5, VV) Oya na vuna e vola kina o Paula: “Keitou sa vinakata mo dou dui gugumatua vakakina, mo dou vakanuinui matua sara kina ka me yacova nai vakataotioti.” (Iperiu 6:11) Na rai vaka oqori e yavutaki ena noda veiwekani voleka kei Jiova ena vukei keda meda yaloqaqa nida sotava na veika dredre da qai marau tale tiko ga.

“Reki e Nai Nuinui”

9. Na cava meda cakava tiko ga me rawa kina nida “reki e nai nuinui”?

⁹ Na inuinui e solia vei keda na Kalou e uasivita na veika kece e rawa ni solia o vuravura. E kaya na Same 37:34 (NW): “Nuitaki Jiova qai muria na nona sala, ena qai laveti iko cake mo taukena na vanua. O na raica na nodra muduki tani na tamata ca.” Io, e dodonu meda “reki e nai nuinui.” (Roma 12:12) Ena rawa ga oqo kevaka e sega ni buawa mai na nomu vakasama na nomu inuinui. O bau dau raitayaloyalotaka na inuinui e solia vei iko na Kalou? O bau dau vakasamataka ni o sa tu e Parataisi, ni o bulabula vinaka, o qai sega ni lomaleqataka e dua na ka, ra qai maliwai iko tu na tamata era lomani iko, oni qai cakava vata tiko na cakacaka e yaga? O dau vakasamataka vakatitobu na iyaloyalo ni Parataisi era tabaki tu ena noda ivola? Na raitayaloyalo vaka oqori e rawa ni vakatauvatani kei na nomu qua na iloilo mo rawa ni raica vinaka kina na veika e tuba. Ke da sega ni dau qua na iloilo, na duka era tu kina ena rawa ni vakavuna meda sega ni raica vakamatata na veika e tuba eda taleitaka. E rawa ni vakavuna meda lai vakasamataka e so tale na ka. Me kua ni yacovi keda oqori!

10. E vakaraitaka vakacava na noda veiwekani vinaka kei Jiova na noda namaka tiko na keda icovi?

¹⁰ Ia, e inaki bibi ga ni noda qaravi Jiova oya na noda lomani koya. (Marika 12:30) E dodonu tale ga meda namaka tiko na keda icovi. E namaka sara ga o Jiova meda cakava vaka kina! E kaya na Iperiu 11:6: “Kevaka sa sega na vakabauta, sa dredre sara me da vinakati: o koya sa torova na Kalou e dodonu me vakabauta ni sa bula ko koya, ni sa saumi ira talega era sa dauvakasaqarai koya.” Na cava e vinakata kina o Jiova meda kilai koya ni dau saumi keda? Baleta ni kevaka eda kilai koya vaka oya eda sa vakaraitaka tiko nida kila vinaka na Tamada vakalomalagi. E daulomasavu, qai lomani ira tale ga na luvena. Eda na sega ni marau qai rawa tale ga nida yalolailai kevaka e sega na noda “[i]nuinui vinaka ni gauna emuri.”—Jeremaia 29:11.

11. E vukei Mosese vakacava me vakatulewa vinaka na inuinui e solia vua na Kalou?

¹¹ O Mosese e ivakaraitaki vinaka ni dua e dei tiko ga ena nona inuinui. Ni vakatokai me “luve i koya na luve ni Fero yalewa,” a tu vei Mosese na kaukaua, na rogo, kei na iyau kei Ijipita. E vakaliuca beka na veika oya se e qaravi Jiova tiko? E digitaka o Mosese me qaravi Jiova. Ena vuku ni cava? Baleta “ni a rai sara tiko ko koya ki na i covi sa wawa tu mai liu.” (Iperiu 11:24-26, VV) Io, e kauaitaka dina o Mosese na inuinui e solia vua o Jiova.

12. E vakatauvatani vakacava na nona inuinui na lotu Vakarisito kei na ivakaruru ni ulu?

¹² E vakatauvatana na yapositolo o Paula na inuinui kei na ivakaruru ni uluda. Na ivakaruru ni uluda vakayalo e taqomaka na noda vakasama, e dau vukei keda meda vakatulewa vinaka, meda vakaliuca na veika e dodonu me vakaliuci, qai vukei keda tale ga meda yalodina tiko. (1 Cesalonaika 5:8) O tokara tiko beka na nomu ivakaruru ni ulu vakatakarakara ena veigauna? Ke vaka kina, o na vakataki Mosese kei Paula, o na sega ni “vakararavi e nai yau sa sega ni tu dei, vua ga na Kalou bula, o koya sa solia vakalevu vei keda na ka kecega eda marau kina.” Dina ni gadrevi meda yaloqaqa ena noda vakanadakuya na noda vakaliuca ga na veika e baleti keda, ia na sasaga oqori e yaga dina! Io, na cava meda saga kina e dua na ka ena sega ni solia vei keda “na bula dina” e waraki ira tiko na nuitaki Jiova ra qai lomani koya tale ga?—1 Timoci 6:17, 19.

“Au na Sega Sara ni Biuti Iko”

13. Na cava e vakadeitaka o Jiova vei ira na nona tamata yalodina?

¹³ O ira na vakanuinui tu ina vuravura makawa oqo e dodonu mera vakasamataka na veika ca qai dredre era sotava tiko baleta sa tubu cake tiko ga na veika “rarawa” e vuravura. (Maciu 24:8) Ia era sega ni rerevaka na veika vaka oqori o ira na nuitaki Jiova. Era ‘tiko vinaka, ra vakacegu, ra qai sega ni rerevaka e dua na ka ca.’ (Vosa Vakaibalebale 1:33) Nira sega ni vakanuinui ina vuravura makawa oqo, era marautaka ga na nodra muria na ivakasala i Paula: “Mo dou kakua ni daukocova nai lavo: ia dou lomavinaka e na ka sa tu vei kemudou: ni sa kaya ko koya, Au na sega sara ni biuti iko, se vakalaivi iko.”—Iperiu 13:5.

14. Ena vuku ni cava mera kua ni kauaitaka kina vakalevu na lotu Vakarisito na veika vakayago mera bula kina?

¹⁴ Na vosa “au na sega sara ga” e vakaraitaka ni sega ni vakabekataki na nona kauaitaki keda na Kalou. E vakadeitaka tale ga o Jisu na nona kauaitaki keda na Kalou, ni kaya: “Dou vakasaqara taumada na matanitu ni Kalou, kei na nona yalododonu: ia ena soli me kenai kuri vei kemudou na ka kecega oqo [na veika vakayago e gadrevi meda bula kina]. O koya mo dou qai kakua ni lomaocaoca e na vuku ni mataka: ena lomaocaoca na mataka e na vuku ni kena ka.” (Maciu 6:33, 34) E kila o Jiova ni sega ni ka rawarawa na qacoya na veika e baleta na Matanitu ni Kalou ena gauna eda qaravi keda tiko kina vakayago. Meda nuitaka gona na nona rawata kei na nona gadreva na Kalou me solia na veika eda gadreva vakayago.—Maciu 6:25-32; 11:28-30.

15. E rawa vakacava me ‘vinaka na matadra’ na lotu Vakarisito?

¹⁵ Eda vakaraitaka nida vakararavi vei Jiova ni ‘vinaka na matada.’ (Maciu 6:22, 23) Na mata e vinaka e kena ibalebale na nona yalodina, savasava na lomana, qai sega ni kocokoco se nanumi koya ga e dua. E sega ni kena ibalebale na vinaka ni matada meda sa lai bula dravudravua sara se meda vakaweleweletaka na noda itavi vakarisito. E kena ibalebale ga meda “yalomatua” nida vakaliuca tiko na cakacaka i Jiova.—2 Timoci 1:7.

16. Na cava erau gadrevi kina na vakabauta kei na yaloqaqa me rawa ni vinaka kina na matada?

¹⁶ Ena vinakati me tu vei keda na vakabauta kei na yaloqaqa me qai rawa ni vinaka na matada. Me kena ivakaraitaki, ke vinakata na itaukei ni cakacaka mo dau cakacaka ena gauna e vakayacori kina na soqoni vakarisito, o na yaloqaqa beka mo vakaliuca tiko ga na veika vakayalo e bibi cake vei iko? Ke dua e vakatitiqataka ni rawa vei Jiova me vakayacora na Nona yalataka me qaravi ira na Nona tamata, sa na qai bukana ga o Setani na vakatitiqa oqori me yacova ni sa sega vakadua ni tiko ena soqoni o koya oya. Io, ke malumalumu na noda vakabauta, ena rawa ni lewa o Setani na veika eda vakaliuca, me sa sega ni lewa o Jiova. Sa na ka vakaloloma dina ke yaco oqori!—2 Korinica 13:5.

“Nuitaki Jiova”

17. Era vakalougatataki vakacava ena gauna oqo o ira na nuitaki Jiova?

¹⁷ E vakaraitaka wasoma na iVolatabu ni o ira na nuitaki Jiova ra qai vakararavi vua era na sega ni vakanuinuikara. (Vosa Vakaibalebale 3:5, 6; Jeremaia 17:7) Dina ni na lailai na veika vakayago era taukena ena so na gauna, ia era raica me sega soti ni bibi oya ni vakatauvatani kei na veivakalougatataki e waraki ira tu. Era vakaraitaka nira “nuitaki Jiova” ra qai nuidei ni na solia vei ira na ka e gadreva na yalodra. (Same 37:4, 34, NW) Oqo na vuna era marau vakalevu kina nikua. “A ka era nuitaka na yalododonu era na rekitaka: ia na ka era nuitaka nai valavala ca ena sega ni yaco.”—Vosa Vakaibalebale 10:28.

18, 19. (a) Na veivakadei cava e solia vei keda o Jiova? (b) Eda biuti Jiova vakacava ina ‘ligada imatau’?

¹⁸ E nuidei na gonetagane lailai ni taura tiko na liga i tamana ni rau lako vata. E vakatale ga kina vei keda nida lako vata kei na Tamada vakalomalagi. “Kakua ni ko rere,” e kaya o Jiova vei Isireli, “ni’u sa tiko vata kei iko . . . ka’u na vukei iko . . . ni sai au ko Jiova na nomu Kalou, ka’u na taura na ligamu i matau, ka kaya vei iko, Mo kakua ni rere; ka’u na vukei iko.”—Aisea 41:10, 13.

¹⁹ E ivakaraitaki dina ni loloma na nona taura na ligada o Jiova! “Au a raici Jiova ni sa tu e mataqu e na veisiga kecega,” e vola o Tevita. “Ka’u na sega ni yavalati, ni sa tu ko koya e na ligaqu i matau.” (Same 16:8) Eda biuti Jiova vakacava ina ‘ligada imatau’? Ena rua na sala oqo. Dua, meda laiva na nona Vosa me dusimaki keda ena veibasoga kece sara ni noda bula; kei na kena ikarua, meda namaka tiko ga na icovi uasivi e vakarautaka vei keda o Jiova. E lagata na daunisame o Esafa: “Ka’u sa tiko ga kei kemuni e na veisiga: o ni sa taura tiko na ligaqu i matau. O ni na tuberi au e na nomuni lewa, ka kauti au emuri ki na vanua vakaiukuuku.” (Same 73:23, 24) Na veivakadeitaki vaka oqori ena vukei keda dina meda sotava na veika e se bera mai ena nuidei.

“Dou sa Qai Voleka ni Vakabulai”

20, 21. Na cava era na sotava na nuitaki Jiova?

²⁰ Ni toso tiko na veisiga, sa qai bibi ga na kena vinakati meda biuti Jiova tiko ga ena ligada imatau. Ni sa tekivu vakarusai na lotu lasu ena dua na gauna lekaleka mai oqo, sa na qai vakila na vuravura i Setani e dua na gauna ni rarawa e se sega ni bau sotava. (Maciu 24:21) Ena kani yatedra na tamata tawavakabauta ena rere. Ia, ena gauna veilecayaki oya, era na marautaka voli ga na tamata yaloqaqa i Jiova na nodra inuinui! “Ni sa vakatekivu me yaco na veika oqo, dou ta cake, ka vagelegelei kemudou; ni dou sa qai voleka ni vakabulai.”—Luke 21:28.

²¹ Meda marautaka tiko mada ga na inuinui e solia vei keda na Kalou, me kua ni vakacalai keda na veika e vakamuai keda cala kina o Setani. Ena gauna vata oqori meda vaqaqacotaka tiko na noda vakabauta, loloma, kei na noda rerevaka na Kalou. Nida cakava oqori, eda na yaloqaqa tiko ga ena noda talairawarawa vei Jiova ena veigauna kece da qai vorata tiko na Tevoro. (Jemesa 4:7, 8) Io, “dou gumatua, ena qai vakaukauwataka na yalomudou ko koya, oi kemudou kecega sa nuitaki Jiova.”—Same 31:24.

[iVakamacala e ra]

O Rawa ni Sauma?

• E vukei Jisu vakacava me yaloqaqa na nona inuinui?

• Rau veivukei vakacava na vakabauta kei na inuinui?

• Erau veivuke vakacava na inuinui kei na vakabauta me yaloqaqa kina na lotu Vakarisito me vakaliuca tiko ga na veika e bibi cake?

• E rawa vakacava vei ira na “nuitaki Jiova” mera sotava na veika e se bera mai ena nuidei?

[iYaloyalo ena tabana e 28]

Se o gone se qase, o rawa ni raitayaloyalotaka nomu sa tiko e Parataisi?