Dou Veivakatataki Cake Vakai Kemudou
1 A solia nona vinaka kece na yapositolo o Paula me vakaukauataki ira kina na vakabauta vata. (Caka. 14:19-22) Eda kauaitaka tale ga na ituvaki dredre era sotava tu na tacida, da qai via vukei ira. E vakaraitaka na iVolatabu ni dodonu vei keda kece meda kauaitaki ira tale e so, oqo e sega wale ga ni nodra itavi na qase ni ivavakoso. (Roma 15:1, 2) E rua na sala eda rawa ni muria kina na ivakasala vakayalololoma oqo: “Mo dou qai ia na veivakacegui vakai kemudou, ka veivakatataki cake vakai kemudou.”—1 Ces. 5:11.
2 Kauaitaka na Nodra Gagadre e So Tale: A cavuti ena Vosa ni Kalou ni “sa dauoga sara” o Tokasa “e na cakacaka vinaka, kei na cakacaka loloma.” (Caka. 9:36, 39) E kauaitaki ira na gadreva dina tu na veivuke, qai dau vukei ira kina. E ivakaraitaki vinaka dina vei keda! O na rairai rogoca ni vinakata e dua e sa qase me vukei ena nona ilakolako ina soqoni. Se dua na painia e sega ni dua me rau cakacaka vakavunau vata ena dua na yakavi ena loma ni macawa. Ke o raica ni gadrevi na veivuke, o qai lomasoli mo veivuke, o sa na uqeti koya sara tiko ga na tacida oya!
3 Veitalanoataki ni Ka Vakayalo: E rawa nida uqeti ira na tacida ena ka eda tukuna. (Efeso 4:29) E kaya e dua e sa dede na nona veiqaravi tu vaqase: “Ke o via veivakauqeti, talanoataka na veika vakayalo. Mo tekivuna e dua na veivosaki e veiuqeti, o rawa ni taroga e dua ga na taro rawarawa, me vaka, ‘O lako mai vakacava ina dina?’ ” Vakaraitaka na nomu kauaitaki ira na itabagone ena ivavakoso. Kauaitaki ira era dau yalolailai kei ira na dau mamadua. (Vkai. 12:25) Kua ni vakatara na veitalanoataki ni ka ni veivakalasai vakavuravura me vakaruguta na nomu veitalanoataka na ka vakayalo kei ira eda vakabauta vata.—Roma 1:11, 12.
4 Na cava eda rawa ni kaya meda veivakatataki cake kina? O raica beka ena nomu wili iVolatabu se na nomu vuli vakataki iko e dua na yavu vakaivolatabu e vakatitobutaka na nomu lomani Jiova? E uqeti iko beka e dua na ka o rogoca ena vunau soqovi levu se ena vulici ni Vale ni Vakatawa? Se tarai iko beka e dua na vakasavuirogorogo e vakaukauataka nomu vakabauta? Ke o vakamareqeta na ka vakayalo, ena veiuqeti na nomu veitalanoa kei ira tale e so.—Vkai. 2:1; Luke 6:45.
5 Nida dau veivuke da qai vakayagataka vakayalomatua na yameda, eda na veivakatataki cake tiko ga kina.—Vkai. 12:18.