“Moni Dokai Ira Era Cakacaka Vakaukaua ena Kemuni Maliwa”

“Moni dokai ira era cakacaka vakaukaua ena kemuni maliwa, o ira era vakatawai kemuni ena cakacaka ni Turaga, o ira era dau vakasalataki kemuni.”—1 CES. 5:12.

1, 2. (a) Ena imatai ni ivola i Paula vei ira e Cesalonaika, na cava e yaco tiko ena ivavakoso? (b) Na cava a uqeti ira kina e Cesalonaika o Paula mera cakava?

VAKASAMATAKA mada ke o dua vei ira na lewe ni ivavakoso ena imatai ni senitiuri e Cesalonaika, qo e dua vei ira na ivavakoso a tauyavutaki taumada e Urope. E vakayagataka o Paula e levu na gauna me uqeti ira na mataveitacini e kea. A rairai lesi ira na tagane matua mera veivakatawani me vaka ga e dau caka ena so tale na ivavakoso. (Caka. 14:23) Ni tauyavutaki oti na ivavakoso, era vakasoqoni ira na ilawalawa dauvakacaca o ira na Jiu, mera cemuri rau kina o Paula kei Sailasa mai na siti. Era nanuma kina na lotu vaKarisito e kea nira sa biu wale tu, de dua era rere sara ga.

² E macala ga ni kauai sara o Paula ena gauna e biubiu mai kina ena ivavakoso vou o Cesalonaika. A via lesu tale, ia a ‘vakalatilati vua o Setani.’ A mani talai Timoci me vakayaloqaqataki ira na ivavakoso e kea. (1 Ces. 2:18; 3:2) Ni lesu mai o Timoci, a vinaka na irogorogo e kauta mai. Qori e uqeti Paula sara ga me vola e dua na ivola vei ira e Cesalonaika. E dua vei ira na ka a uqeti ira kina o Paula, oya mera ‘dokai ira na ivakatawa.’—Wilika 1 Cesalonaika 5:12, 13.

3. Na cava mera dokai ira kina vakalevu na tagane matua na lotu vaKarisito e Cesalonaika?

³ O ira na lesi mera ivakatawa e Cesalonaika era sega ni vakataki Paula kei ira na nona itokani vakacakacaka baleta nira se qai lesi vou ga na ivakatawa qo. Era se sega tale ga ni dede ena dina me vakataki ira na qase ni ivavakoso e Jerusalemi. Kuria qori, e se bera mada ga ni dua na yabaki na tauyavu ni ivavakoso! Ia e se vinakati tiko ga vei ira na lewe ni ivavakoso mera vakavinavinakataki ira na tagane matua ena nodra “cakacaka vakaukaua,” kei na nodra ‘vakatawana’ ra qai ‘veivakasalataki’ tiko ena ivavakoso. Io, e veiganiti gona mera ‘dokai vakalevu [na tagane matua] ra qai lomani.’ Na veiuqeti qo e salamuria mai na nona tukuna o Paula ‘mera dau veiyaloni.’ Ke o tu sara ga e Cesalonaika, vakacava o na vakavinavinakataka vakalevu na nodra cakacaka vakaukaua na qase? O dau raici ira vakacava na “isolisoli tamata” e vakarautaka na Kalou ena ivavakoso ena vuku i Karisito?—Efeso 4:8.

“Cakacaka Vakaukaua”

4, 5. Na cava era cakacaka vakaukaua kina na tagane matua ena gauna i Paula mera veivakavulici ena ivavakoso, na cava e va tale ga kina qori nikua?

⁴ Era “cakacaka vakaukaua” tiko vakacava na tagane matua e Cesalonaika ni oti na nodra talai Paula kei Sailasa i Peria? E macala ga nira vakatotomuri Paula nira veivakavulici ena ivavakoso ena nodra vakayagataka na iVolatabu. ‘Era dau marautaka beka na lotu vaKarisito mai Cesalonaika na Vosa ni Kalou?’ de dua o na dau vakasamataka qori. Na iVolatabu mada ga e tukuna ni o ira mai Peria “era yalorawarawa vakalevu . . . ni vakatauvatani kei ira mai Cesalonaika . . . [nira] dikeva na iVolatabu e veisiga.” (Caka. 17:11) Na tikinivolatabu qori e vosa raraba tiko vei ira na Jiu mai Cesalonaika, sega ni o ira na lotu vaKarisito. O ira sa mai vakabauta era ‘sega ni raica na vosa ni Kalou me vosa ni tamata, ia era vakabauta ga ni vosa dina ni Kalou.’ (1 Ces. 2:13) Kena irairai nira cakacaka vakaukaua na tagane matua mera veivakavulici ena ivavakoso.

⁵ E vakarautaka tiko nikua na dauveiqaravi yalodina e vuku na ‘kakana ena kena gauna donu.’ (Maciu 24:45) Ena nona veidusimaki na dauveiqaravi, era cakacaka vakaukaua kina na qase ni ivavakoso mera vakani ira vakayalo na lewe ni ivavakoso. E levu ena ivavakoso e tiko na nodra ivola vakaivolatabu, e tiko tale ga ena so na vosa na Watch Tower Publication Index kei na Watchtower Library ena CD-ROM. Mera vakacegui vakayalo na ivavakoso, era vakayagataka kina na qase e levu na gauna ena kena vakarautaki na nodra itavi ena soqoni me rawa ni laulau na ka era talaucaka mai. O bau vakasamataka tu na levu ni gauna era vakayagataka na qase mera vakarautaka kina na nodra itavi ena soqoni kei na noda soqo cokovata?

6, 7. (a) Na ivakaraitaki cava i Paula era vakatotomuria na tagane matua e Cesalonaika? (b) Na cava e rairai dredre kina nikua mera vakatotomuri Paula na qase ni ivavakoso?

⁶ Era nanuma na tagane matua e Cesalonaika na ivakaraitaki vinaka i Paula ena nona dau vakatawani ira na qelenisipi. A sega ni cakava ga qori baleta ni nona itavi. Me vaka ga e vakamacalataki ena ulutaga sa oti, o Paula e dau ‘yalololoma me vaka na tina e vakasucuma na luvena qai karona.’ (Wilika 1 Cesalonaika 2:7, 8.) A yalorawarawa mada ga me ‘solia na nona bula’! Nira veivakatawani tiko na tagane matua, a vinakati mera vakatotomuri Paula sara ga.

⁷ Era na vakatotomuri Paula nikua na ivakatawa vaKarisito ena nodra karoni ira na qelenisipi. E macala ga ni so na sipi e sega nira dau yalovinaka, ra qai sega ni dau veikauaitaki. Ia era na saga tiko ga na qase mera lewa vinaka, ra qai “kune ka vinaka” vei ira na tacidra. (Vkai. 16:20) Era sega ni uasivi na qase ni ivavakoso, ena sega ni rawarawa kina me donu tiko ga na nodra rai me baleti ira na tacidra. Ia e veiganiti mera vakacaucautaki nira saga mera ivakatawa vinaka ena ruku ni veiliutaki i Karisito kei na nodra saga mera lomani ira kece na tacidra.

8, 9. Na cava eso na ka era cakava na qase ni vavakoso nikua ‘mera yadravi keda tiko’ kina?

⁸ E tiko na vuna meda “yalorawarawa” kina vei ira na qase. Me vaka ga e tukuna o Paula, ‘nira yadravi keda tiko.’ (Iper. 13:17) Na matavosa qori eda lai nanuma kina e dua na ivakatawa ni sipi e bolea me kua ni moce me taqomaki ira kina na nona qelenisipi. Nikua tale ga era rairai sega ni moce vinaka na qase nira vukei ira na tacidra era tautauvimate, lomabibi se vakaleqai vakayalo. Me kena ivakaraitaki, o ira na tacida era lewe ni Komiti Veitaratara kei na Valenibula era na vakayadrati ena lomaloma ni bogi mera lai raica e dua e vinakata na veiqaravi vakavuniwai. Eda vakavinavinakataka na nodra veiqaravi ena gauna eda sotava kina na ituvaki va qori!

⁹ Era dau cakacaka vakaukaua na qase ni vavakoso era lewe ni Regional Building Committee kei na komiti ni vakacoko mera vukei ira na tacida. E dodonu meda tokoni ira mai vu ni lomada! Dikeva mada na cakacaka ni vakacoko ni oti na Cagilaba o Nargis a tarai Myanmar ena 2008. Me rawa nira yaco na timi ni vakacoko ena ivavakoso o Bothingone, na vanua e vakacaca kina vakalevu na cagilaba ena bucabuca o Irrawaddy, era muria na timi ni vakacoko na vanua e veidavori tu kina na yago mate. Nira raica na mataveitacini e Bothingone na nodra yaco yani na imatai ni timi ni vakacoko, qai tomani ira tale tiko ga yani na ivakatawa ni tabacakacaka e dau sikovi ira tu e liu, na levu ni nodra kurabui era kaya: “Isa! Na noda ivakatawa ni tabacakacaka! Sa vakabulai keda o Jiova!” Vakacava, o dau vakavinavinakataka na nodra cakacaka vakaukaua na qase ni vavakoso ena siga kei na bogi? Eso na qase era lesi mera lewena na komiti e qarava vakatabakidua eso na kisi ni veilewai dredre. Era sega ni tukutukuni ira na qase ena ka era sa rawata, ia o ira na vakila na yaga ni nodra veiqaravi era na marautaka vakalevu.—Maciu 6:2-4.

10. Na itavi cava era qarava na qase e sega ni kilai levu?

¹⁰ E levu tale ga na qase era qarava na ka vakaivola. Me kena ivakaraitaki, na kodineita ni ilawalawa qase e vakarautaka na ituvatuva ni soqoni e veimacawa. Na sekeriteri ni ivavakoso e kumuna na ripote ni veivula kei na ripote ni yabaki. Na ivakatawa ni koronivuli ena vakasamataka vinaka na nona vakarautaka na ituvatuva ni koronivuli. Ni oti e tolu na vula e dau dikevi na akaude ni ivavakoso. Era wilika na qase na ivola mai na valenivolavola ni tabana ra qai muria na veidusimaki me dei tiko ga kina na noda “duavata kece ena vakabauta.” (Efeso 4:3, 13) Na nodra gugumatua gona va qori na qase, e ‘caka kina na ka kece me rakorako, e tuvanaki tale ga vakamatau.’—1 Kor. 14:40.

“Era Vakatawai Kemuni”

11, 12. O cei e ivakatawa ni ivavakoso, na cava e okati kina?

¹¹ E vakamacalataki ira na tagane matua daucakacaka e Cesalonaika o Paula mera ‘vakatawana’ na ivavakoso. (1 Ces. 5:12) E tukuni ira tale ga na qase qori o Paula mera dau “cakacaka vakaukaua.” E sega ni tukuna tiko ga e dua na ‘ivakatawa,’ ia e tukuni ira tiko na tagane matua kece ena ivavakoso. Nikua tale ga, era veivakatawani ena ivavakoso na qase ra qai veivakavulici ena soqoni. Na veisau a caka me vakayagataki na yaca “kodineita ni ilawalawa qase,” ena vukei keda meda raici ira kece na qase nira veiqaravi tiko me vaka e dua na ilawalawa.

¹² Na itavi ni ‘ivakatawa’ ni ivavakoso e sega ni okati wale ga kina na veivakavulici. Na vosa qori e via tautauvata kei na “lewa vinaka” e vakayagataki ena 1 Timoci 3:4. E tukuna o Paula ni dodonu vua na ivakatawa me “lewa vinaka nona vuvale, era talairawarawa vua na luvena ra qai dokai koya.” Na matavosa “lewa vinaka” ena tikinivolatabu qori e sega ni okati wale ga kina na nodra vakavulici na gone, ia e vakaibalebaletaka tale ga na nodra liutaka na vuvale ra qai “talairawarawa vua na luvena.” Io, era liutaka na qase na cakacaka ni ivavakoso, era uqeti keda tale ga meda vakamalumalumu vei Jiova.—1 Tim. 3:5.

13. Na cava e dau taura vakalevu kina na gauna mera vakatulewa na qase nira bose?

¹³ Me rawa nira vakatawa vinaka na qelenisipi, era dau bosea na qase ni ivavakoso na ka e gadrevi ena ivavakoso kei na ka me caka me qaravi vinaka kina na ivavakoso. Ena rairai veiganiti me dua ga na qase ni ivavakoso me vakatulewataka na ka kece me caka. Ia nira muria na nodra ivakaraitaki na ilawalawa dauvakatulewa ena imatai ni senitiuri, na ilawalawa qase nikua era na yalorawarawa mera vakaraitaka na nodra nanuma ena ka e veivosakitaki tiko, nira qara na veidusimaki vakaivolatabu. Era na saga tiko ga me muri na ivakavuvuli vakaivolatabu ena veika e gadrevi ena ivavakoso. E yaga vakalevu qo ena gauna era dui vakavakarau kina ena bose ni qase, era na dikeva na iVolatabu kei na nona veidusimaki na dauveiqaravi yalodina e vuku. E macala gona ni dau taura vakalevu na gauna. E dau yaco tale ga na duidui, me vaka a yaco ena imatai ni senitiuri vei ratou na ilawalawa dauvakatulewa ena nodratou veivosakitaka tiko na veicilivi. A vinakati e levu na gauna kei na vakadidike me ratou duavata kina ena vakatulewa e yavutaki ena iVolatabu.—Caka. 15:2, 6, 7, 12-14, 28.

14. Vakacava, o dau doka na nodra cakacaka ena duavata na ilawalawa qase, na cava na vuna?

¹⁴ Na cava ena rairai yaco ke dua vei ratou na qase e togoraka tiko ga na nona rai se vinakata me muri ga na ka e tukuna? Vakacava ke dua e vakataki Tiotirifi ena imatai ni senitiuri, e dau vakavuna na veisei? (3 Joni 9, 10) Qori ena vakaleqa sara ga na ivavakoso. A saga o Setani me vakaleqa na ivavakoso ena imatai ni senitiuri, e macala ga ni na vinakata me vakaleqa na duavata ni ivavakoso nikua. Ena rairai vakayagataka na yalo ni nanumi keda ga, me vaka na via rogo. Koya gona, ena vinakati vei ira na qase ni ivavakoso mera yalomalumalumu, ra qai cakacaka vata me vaka e dua na yago. Eda doka dina na nodra yalomalumalumu na qase mera cakacaka vata me vaka e dua na yago!

“Era Dau Vakasalataki Kemuni”

15. Na cava na nodra inaki na qase nira vakasalataki ira na tacida?

¹⁵ E mani vakabibitaka o Paula e dua tale na itavi dredre ia e itavi bibi vei ira na tagane matua: oya na nodra vakasalataki na qelenisipi. Ena iVolatabu vaKirisi, o Paula duadua ga e vakayagataka na ivakadewa vaKirisi ni vosa “veivakasalataki.” E rawa ni kena ibalebale me ivakasala kaukaua ia e sega ni dusia ni cati kina e dua. (Caka. 20:31; 2 Ces. 3:15) Me kena ivakaraitaki, e vola o Paula vei ira mai Korinica: “Au sega ni vola na ka qo moni madua kina, meu vunauci kemuni ga ni oni luvequ lomani.” (1 Kor. 4:14) Na inaki ni nona veivakasalataki o Paula, oya ni kauaitaki ira dina eso tale.

16. Na cava mera nanuma tiko na qase ni ivavakoso nira veivakasalataki?

¹⁶ Mera nanuma tiko na qase ni ivavakoso na bibi ni iwalewale ni nodra veivakasalataki. Era saga mera vakatotomuri Paula ena nona dau yalovinaka, dau loloma qai dau veivuke. (Wilika 1 Cesalonaika 2:11, 12.) E macala ga ni o ira na qase ni ivavakoso era na ‘taurivaka na vosa dina ena nodra veivakavulici mera maqosa tale ga kina, mera veivakauqeti ena ivakavuvuli dina.’—Taito 1:5-9.

17, 18. Na cava mo nanuma tiko ke vakasalataki iko e dua na qase?

¹⁷ E macala ga nira sega ni uasivi na qase ni ivavakoso, era na rairai tukuna tale ga eso na ka era na veivutunitaka e muri. (1 Tui 8:46; Jeme. 3:8) Era kila tale ga na qase ni levu na gauna e sega ni ‘dau marautaki’ na nodra vakadodonutaki na tacida, e ‘vakavu rarawa ga.’(Iper. 12:11) Ni bera gona ni veivakasalataki e dua na qase, ena vakasamataka e liu na ka me tukuna qai masulaka. Ke o vakasalataki, o vakavinavinakataka na nona kauaitaki iko vakayaloloma na qase?

¹⁸ Kaya mada ke tauvi iko tiko e dua na mate, o qai sega ni kila na ka e vakavuna. A mani raica rawa o vuniwai na vu ni mate, ia na ka e tukuna ena dredre toka mo ciqoma. O na rarawataki vuniwai? Sega! Ke vakatututaka mada ga mo sele, o na rairai vakadonuya na veiqaravi qori ni o kila ni na yaga vei iko. Na iwalewale ni nona tukuna o vuniwai na ka me caka vei iko ena rawa ni tarai iko sara ga, ia qori ena vakatau kina na nomu vakatulewa? Sega! Na sala tale ga o vakasalataki kina me kua ni tarova nomu rogoci ira e vakayagataka tiko o Jiova kei Jisu mera vukei iko se taqomaki iko vakayalo.

Vakavinavinakataka na Nona Vakarautaki Ira na Qase o Jiova

19, 20. O na vakavinavinakataka vakacava na “isolisoli tamata”?

¹⁹ Na cava o na cakava ke solia vei iko e dua na iloloma e vakarautaki sara ga me baleti iko? E macala ga o na vakavinavinakataka, qori ena nomu vakayagataka sara ga. O Jiova kei Jisu Karisito erau vakarautaka na “isolisoli tamata” ena vukumu. Dua na sala o na vakavinavinakataka kina na isolisoli qori, oya nomu vakarorogo matua ena ivunau era solia na qase qai saga mo muria sara na ka era talaucaka. O rawa tale ga ni vakaraitaka na nomu vakavinavinakataki ira ena nomu ivakamacala momona ena soqoni. Tokona na cakacaka era liu sara tiko ga kina me vaka na cakacaka vakavunau. Ke o vakila na yaga ni nona ivakasala e dua na qase ni ivavakoso, vakacava mo tukuna vua? Kena ikuri, vakacava mo vakavinavinakataki ira na lewe ni nodra vuvale? Nanuma tiko, me rawa ni gugumatua ena ivavakoso e dua na qase, ena gadrevi mera vakuai ira na lewenivuvale mai na gauna era dau vakayagataka vata.

²⁰ Io, e levu na vuna vinaka meda dokai ira kina na qase, nira cakacaka tiko vakaukaua ena keda maliwa, era vakatawani keda, ra qai veivakasalataki. Na “isolisoli tamata” qo e vakaraitaka dina na loloma levu i Jiova!

O se Nanuma Tiko?

• Na cava mera dokai ira kina vakalevu na ivakatawa ena ivavakoso na lotu vaKarisito e Cesalonaika?

• Na sala cava era cakacaka tiko kina vakaukaua na qase ena nomu ivavakoso?

• E yaga vakacava vei iko na nodra veivakatawani na qase?

• Na cava mo nanuma tiko ke vakasalataki iko e dua na qase?

[iYaloyalo ena tabana e 27]

O dau vakavinavinakataka na nodra dau veivakatawani na qase ena ivavakoso?