‘Ni Vakaisulu ena Vosota Vakadede’

“Ni vakaisulu e na dauloloma . . . kei na dauvosota vakadede.”​—KOLOSA 3:12, VV.

1. Tukuna e dua na ivakaraitaki totoka ni vosota vakadede.

O RÉGIS, e vakaitikotiko ena cevaira kei Varanise, e papitaiso me iVakadinadina i Jiova ena 1952. E saga voli mai ena vica na yabaki o watina yalewa me tarovi Régis ena nona qaravi Jiova. E saga me vakacabotetaka na taya ni nona motovai me tarova na nona lako ina soqoni. Dua na gauna e muri Régis ni vunautaka voli na itukutuku vinaka ni Matanitu ni Kalou e veivale me lai veiwalitaki koya. Ia e vosota vakadede o Régis na veitusaqati kece e sotava. E ivakaraitaki totoka dina o Régis vei keda kece na lotu Vakarisito, baleta ni namaka o Jiova meda dau vosota vakadede na qaravi koya nida veitaratara kei ira na tani.

2. Na cava na ibalebale dina ni ‘vosota vakadede’ ena vosa vakirisi? Na vakasama cava e dusia?

² Na vosa vakirisi ni “vosota vakadede” e kena ibalebale na “yalo balavu.” Na iVolatabu Vakaviti e vakadewataka vakatini na vosa oqo me “vosota vakadede,” vakarua me “dauvosota vakadede,” vakarua me “vosota vakalevu.” Na vosa vakaiperiu kei na vosa vakirisi ni ‘vosota vakadede’ e rawa ni kedrau ibalebale na vosovoso se yalovosota, kei na vakaberai ni cudru.

3. E duidui vakacava na nodra raica na lotu Vakarisito na vosota vakadede mai vei ira na kai Kirisi ena imatai ni senitiuri?

³ Era sega ni raica na kai Kirisi na vosota vakadede me ivalavala vinaka. Na vosa oqo e sega ni kune ena nodra ivakavuvuli na Sitoike. E kaya na daudigova na iVolatabu o William Barclay, na vosota vakadede “e kena veibasai ni nodra ivalavala na kai Kirisi,” nira sega ni dau “vosota na vosa e veivakacacani, se ka e caka vei ira.” E kaya tale: “Vei ira na kai Kirisi, na tamata e kaukaua e dau sauma na ca. Na lotu Vakarisito e kaukaua e sega ni via cakava na ka oya, dina ga ni rawa ni vakayacora.” Era rairai vakabauta na kai Kirisi ni vosota vakadede e ivakatakilakila ni malumalumu, ia me vaka ena veika tale e so, “sa vuku cake na sesewa ni Kalou mai na nodra vuku na tamata, ka sa kaukauwa cake na malumalumu ni Kalou mai na nodra kaukauwa na tamata.”​—1 Korinica 1:25, VV.

iVakaraitaki i Jisu ni Vosota Vakadede

4, 5. Na ivakaraitaki vakasakiti cava ni vosota vakadede e vakaraitaka o Jisu?

⁴ E taravi Jiova toka ga na ivakaraitaki uasivi ni nona vosota vakadede o Jisu. E vakasakiti na vosota i Jisu ena gauna e sotava vakalevu kina na veika dredre. E parofisaitaki me baleti koya: “Sa vakasaurarataki, ka sa vakamalumalumu ga ko koya, ia sa sega ni vosa mai ko koya; me vaka na lami sa tuberi me vakamatei, ka vaka na sipi sa galu e na mata i koya sa kotiva, sa galu vakakina ko koya.”​—Aisea 53:7.

⁵ E vakasakiti na nona vosota vakadede voli o Jisu ena nona cakacaka vakavunau e vuravura. A vosota na nodra taro veivakaisini na nona meca kei na nodra veivakacudrui na tusaqati koya. (Maciu 22:15-46; 1 Pita 2:23) A vosoti iratou nona tisaipeli, okati kina na nodratou dau veiletitaka se o cei e levu cake vei iratou. (Marika 9:33-37; 10:35-45; Luke 22:24-27) E vakasakiti tale ga na nona veivosoti o Jisu ena bogi e volitaki kina rau qai moce tale o Pita kei Joni ni tukuni vei rau me rau “yadra tiko.”​—Maciu 26:36-41, VV.

6. E yaga vakacava vei Paula na vosota vakadede i Jisu, na cava eda vulica kina?

⁶ A vosota vakadede tiko ga o Jisu ni oti nona mate kei na nona vakaturi. E kila vinaka oqo na yapositolo o Paula, baleta ni dau vakacacani ira na lotu Vakarisito. E vola o Paula: “Sa dina na vosa, a sa yaga me vakabauti vakalevu, ni sa lako mai ki vuravura ko Jisu Karisito me vakabulai ira na tamatai valavala ca; ia koi au, ka’u sa uasivi cake vei ira. Ia e na vuku ga ni ka oqo ka’u a lomani kina, me vakaraitaka ko Jisu Karisito vei au ka uasivi cake na vosota vakalevu sara, me’ui vakarau vei ira era na vakabauti koya emuri me ra bula tawa mudu kina.” (1 Timoci 1:15, 16) Se mani vaka tu e vei na ivakarau ni noda bula e liu, ke da vakabauti Jisu, ena vosoti keda vakadede baleta ni namaka meda vuataka “nai valavala e kilikili kei na veivutuni.” (Cakacaka 26:20; Roma 2:4) E vakaraitaka na itukutuku e vakauta ina vitu na ivavakoso e Esia Lailai ni dina ga e dauvosota vakadede, ia e namaka tale ga meda itovo vinaka.​—Vakatakila, wase e 2 kei na 3.

E Vua ni Yalo Tabu

7. Erau veiwekani vakacava na vosota vakadede kei na yalo tabu?

⁷ Ena ika5 ni wase ni nona ivola vei ira na kai Kalatia, e vakaduiduitaka kina o Paula na cakacaka ni itovo vakayago kei na vua ni yalo tabu. (Kalatia 5:19-23) Ni dua vei ira na itovo i Jiova na vosota vakadede, e vu mai vua na itovo oqo, e vua tale ga ni yalona tabu. (Lako Yani 34:⁠6, 7) E vola sara ga o Paula me ikava ni vua ni yalo tabu ni okati vata kei na “loloma, na reki, na vakacegu . . . , na yalomalua, na yalololoma, na vakabauta, na yalomalumalumu, nai valavala malua.” (Kalatia 5:22, 23) O koya gona, nira vakaraitaka na vosovoso vakalou, se vosota vakadede na nona dauveiqaravi na Kalou, e dusimaki ira tiko na yalo tabu.

8. Na cava ena vukei keda meda vuataka na vua ni yalo tabu, okati kina na vosota vakadede?

⁸ E sega ni kena ibalebale oqo ni dau usuraka o Jiova na yalona tabu vei keda. E dodonu ga meda taleitaka ni ciqoma. (2 Korinica 3:17; Efeso 4:30) Eda vakatara na yalo tabu me lewai keda nida vuataka na vuana ena veika kece eda cakava. Ni oti nona cavuti ira na cakacaka ni itovo vakayago kei na vua ni yalo tabu, e kuria o Paula: “Kevaka eda sa bula e na Yalo Tabu, tou lako voli talega e na Yalo Tabu. Mo dou kakua ni vakaisini kemudou; a Kalou ena sega ni vakalialiai; na ka kecega sa kaburaka na tamata ena tamusuka talega ko ya. Ko koya sa kaburaka na ka ni nonai tovo vakayago, ena tamusuka na rusa mai nai tovo vakayago; ia ko koya sa kaburaka na ka ni Yalo Tabu, ena tamusuka na bula tawa mudu mai na Yalo Tabu.” (Kalatia 5:25; 6:7, 8) Me rawa nida vuataka vinaka na vosota vakadede, ena vinakati tale ga vei keda na lotu Vakarisito meda vuataka na vo ni vua ni yalo tabu.

“Dauvosota Vakadede na Loloma”

9. Na cava e rairai tukuna kina vei ira mai Korinica o Paula ni “dauvosota vakadede na loloma”?

⁹ E vakaraitaka o Paula ni rau veiwekani voleka sara na loloma kei na vosota vakadede, e kaya kina: “Sa dauvosota vakadede na loloma.” (1 Korinica 13:4) E kaya na daudigova na iVolatabu o Albert Barnes ni vakabibitaka na tikina oqo o Paula baleta e yaco tiko na veileti kei na veisisivotaki ena ivavakoso vakarisito e Korinica. (1 Korinica 1:11, 12) E kaya o Barnes: “Na vosa e vakayagataka me sosomitaka [na vosota vakadede] e kena veibasai na vakariri: na vosa cudrucudru, kei na veivakacudrui. E vakaraitaka ga na itovo ni vakasama e VOSOTA VAKABALAVU ena gauna e vakacudrui kina.” E se vinakati tiko ga na loloma kei na vosota vakadede me rawa kina nira veimaliwai vinaka na lewe ni ivavakoso vakarisito.

10. (a) E vukei keda vakacava na loloma meda vosota vakadede? E vakasalataki keda kina vakacava na yapositolo o Paula? (b) Na cava e kaya e dua e daudigova na iVolatabu me baleta na vosota vakadede kei na yalodina ni Kalou? (Raica na ivakamacala e ra.)

¹⁰ “Sa dauvosota vakadede na loloma, sa yalovinaka; . . . sa sega ni qara na ka me nona ga, sa sega ni cudrucudru.” O koya gona, e vukei keda meda vosota vakadede na loloma.a (1 Korinica 13:4, 5) Na loloma e vukei keda meda veivosoti da qai nanuma tiko nida tamata ivalavala ca kece, eda dau cala kece, e tiko tale ga na noda dui malumalumu. E vukei keda meda veinanumi da qai veivosoti. E uqeti keda na yapositolo o Paula meda ‘yalomalumalumu ka yalomalua, meda vosota vakadede ka veivosoti vakai keda ena loloma, da qai gumatua sara meda maroroya na lomavata ni yalo tabu nida vauci vata ena veivinakati.’​—Efeso 4:1-3.

11. Na cava e bibi kina mera vosota vakadede na ilawalawa lotu Vakarisito?

¹¹ Era na lomavakacegu ra qai marau e dua na ilawalawa lotu Vakarisito kevaka era vosota vakadede, se era lewe ni dua na ivavakoso, era tiko e Peceli, se e nodra vale na daukaulotu, o ira na dau taravale, se nira tiko ena dua na vuli. Ni duidui na nodra itovo, na ka era taleitaka, na nodra susugi, na ivakatagedegede ni nodra veirokorokovi, kei na bula savasava, e rawa ni yaco na leqa ena so na gauna. E yaco tale ga vaka kina ena vuvale. Oya na vuna e vinakati kina na vosota vakadede. (Vosa Vakaibalebale 14:29; 15:18; 19:11) E vinakati kina vei keda kece meda vosota vakadede da qai nuitaka ni na vinaka cake na ituvaki dredre e sotavi tiko.​—Roma 15:1-6.

Vukei Keda Meda Tudei na Vosota Vakadede

12. Na cava e vinakati kina na vosota vakadede ena gauna e sotavi kina na veika dredre?

¹² Na vosota vakadede e vukei keda meda tudei nida sotava tiko na veika dredre e vaka e sega ni oti rawa, se e se sega ni kune na kena iwali. Oqori na ka e sotava o Régis, e cavuti ena imatai ni parakaravu. E saqati koya voli ena nona qaravi Jiova o watina me vica vata na yabaki. Ia e qai tukuna vua o watina ena matatagitagi ena dua na siga: “Au kila ni ka dina oqo. Vukei au mada. Au via vulica na iVolatabu.” E qai papitaiso o watina me iVakadinadina. E kaya o Régis: “E vakaraitaka oya ni vakalougatataka o Jiova na gauna au sasaga voli kina, ena noqu vosovoso, kei na noqu tudei.” E dolei na nona vosota vakadede o Régis.

13. Na cava e vukei Paula me tudei? E vukei keda vakacava na nona ivakaraitaki meda tudei?

¹³ E ivakaraitaki vinaka ena vosota vakadede na yapositolo o Paula ena imatai ni senitiuri S.K. (2 Korinica 6:3-10; 1 Timoci 1:16) Ni vakarau cava na bula i Paula, e vakaraitaka vua na nona itokani gone o Timoci nira na vakatovolei kece na lotu Vakarisito. E cavuta na nona ivakaraitaki qai vakatura e so na itovo vakarisito ena vukei keda meda tudei. E vola: “Ko sa daumuria na noqui vakavuvuli, na noqui valavala, na noqui naki, na noqu vakabauta, na noqu vosota vakadede, na noqu loloma, na noqu vosota na ca, na veivakacacani, na veivakararawataki; na ka sa yaco vei au mai Anitioki, mai Ikoniona, mai Lisitira; na kena levu ni veivakacacani ka’u a vosota; ia ka sa vakabulai au na Turaga mai na ka kecega oqo. Io, ko ira kecega era na via lotu dina vei Karisito Jisu, era na vakacacataki.” (2 Timoci 3:10-12; Cakacaka 13:49-51; 14:19-22) Me rawa nida tudei, ena vinakati me tu vei keda na vakabauta, loloma, kei na vosota vakadede.

Vakaisulu Ena Vosota Vakadede

14. E vakatauvatana ina cava o Paula na itovo vakalou me vaka na vosota vakadede? Na ivakasala cava e solia vei ira na lotu Vakarisito mai Kolosa?

¹⁴ E vakatauvatana na yapositolo o Paula na vosota vakadede kei na itovo vakalou tale e so ina isulu e sulumaka na lotu Vakarisito ni sa luvata tani na vei itovo e vakatokai me “tamata makawa.” (Kolosa 3:5-10) E vola: “O koya mo dou qai vakaisulu me vaka dou sa nona digitaki na Kalou, oi kemudou sa yalosavasava ka daulomani, e na yalo dauloloma, e na yalovinaka, e na yalomalumalumu, e na yalomalua, e na dauvosota vakadede: dou veivosoti vakai kemudou, ka kakua ni veicudruvi, kevaka sa dua na ka sa rarawa kina e dua: me vaka sa sega ni cudruvi kemudou na Karisito, mo dou vaka talega kina. Ia me liu e na ka kecega oqo na dauloloma, o koya sai vau vinaka sara.”​—Kolosa 3:12-14.

15. Na cava ena yaco ke ra ‘vakaisulu’ na lotu Vakarisito ena vosota vakadede kei na vei itovo vakalou tale e so?

¹⁵ Nira ‘vakaisulu’ na lewe ni ivavakoso ena yalo dau loloma, ena yalovinaka, ena yalomalumalumu, ena yalomalua, ena dauvosota vakadede, kei na loloma, era na walia rawa na nodra leqa ra qai toso vata tiko ga ena cakava na cakacaka i Jiova. Mera uasivi sara ena vosota vakadede na ivakatawa lotu Vakarisito. So na gauna era na vunauca e dua na lotu Vakarisito, ia me nanumi ni tiko e vica na kena icakacaka. E vakamacalataka na kena icakacaka vinaka duadua o Paula ni vola vei Timoci: “Vunauci ira sa cala, mo dau vakarota tiko e nai vakavuvuli ka vosota vakalevu sara.” (2 Timoci 4:2) Io, mera vosoti vakadede tiko ga, ra lomani, ra qai dokai na sipi i Jiova.​—Maciu 7:12; 11:28; Cakacaka 20:28, 29; Roma 12:10.

“Dauvosoti Ira Kecega na Tamata”

16. Na cava e rawa ni yaco ke da “dauvosoti ira kecega na tamata”?

¹⁶ E dodonu ga meda “dauvosoti ira kecega na tamata” baleta ni dau vosoti keda vakadede o Jiova. (1 Cesalonaika 5:14) E kena ibalebale meda dauvosoti ira na wekada era sega ni iVakadinadina, o ira eda tiko veitikivi, o ira eda cakacaka vata, kei ira eda kalasi vata e koronivuli. Era vosota rawa na veivakaduiduitaki ena loma ni vica na yabaki e so na iVakadinadina, nira vakalialiai se ra tusaqati vei ira na nodra itokani vakacakacaka se nodra icaba e koronivuli. (Kolosa 4:5, 6) E vola na yapositolo o Pita: “Me vinaka tiko ga na nomuni i vakarau e na kedra maliwa na tawa lotu, ke mani yaco me ra beitaki kemuni me vaka na tamata caka cala, me ra raica na nomuni cakacaka vinaka ka vakalagilagia na Kalou e na siga e na lesu tale mai kina.”​—1 Pita 2:12, VV.

17. Eda na vakadamurimuria vakacava na loloma kei na vosota vakadede i Jiova? Ena vuku ni cava meda vakadamurimuri koya kina?

¹⁷ Era na vakabulai e vica vata na milioni baleta ni dau vosota vakadede o Jiova. (2 Pita 3:9, 15) Ke da vakatotomuria na loloma kei na vosota vakadede i Jiova, eda na vosota tiko na noda vunautaka na itukutuku vinaka ni Matanitu ni Kalou, eda na vulici ira tale ga e so mera talairawarawa ina nona veiliutaki o Karisito ena Matanitu. (Maciu 28:18-20; Marika 13:10) Ke da tarova na noda vunau, ena vaka eda via yalana na vosota vakadede i Jiova, nida sega ga ni raica rawa na kena inaki, oya mera vukei na tamata mera veivutuni.​—Roma 2:4.

18. Na cava e masulaka o Paula me yaco vei ira na kai Kolosa?

¹⁸ E vola o Paula vei ira na lotu Vakarisito e Kolosa, mai Esia Lailai: “E na vuku ni ka oqo koi keirau talega, sa vakatekivu vata kei na siga keirau a rogoca kina, keirau sa sega ni mudu kina ni masulaki kemudou, ka masu mo dou vakasinaiti e na nomudou kila na lomana, e na yalomatua kei na vuku vakayalo kecega; mo dou ia nai valavala e kilikili kei ira sa nona na Turaga [se, “o Jiova,” NW], me vinakata kecega ko koya, mo dou vakavuana tiko e na cakacaka vinaka kecega, me tubu cake talega na nomudou kila na Kalou; mo dou kaukauwa mai e na kaukauwa kecega, me vaka na nona kaukauwa vakaidina, me tubu na vosota kecega kei na vosota vakadede e na marau.”​—Kolosa 1:9-11.

19, 20. (a) E rawa vakacava me sega ni vakatovolea na noda vakabauta na vosota vakadede i Jiova? (b) Na cava e yaga ni noda vosota vakadede?

¹⁹ Ena sega ni vakatovolea na noda vakabauta na nona vosota vakadede tiko o Jiova kevaka eda ‘vakasinaiti ena noda kila na lomana,’ ni “vinakata me bula na tamata kecega, ka mai kila sara nai vakavuvuli dina.” (1 Timoci 2:4) Eda na “vakavuana tiko e na cakacaka vinaka kecega,” vakauasivi ena noda vunautaka ‘na itukutuku vinaka ni Matanitu ni Kalou.’ (Maciu 24:14) Ke da yalodina tiko ena noda cakava na loma i Jiova, ena vukei keda meda “kaukauwa mai e na kaukauwa kecega,” me rawa kina ni tu vei keda “na vosota kecega kei na vosota vakadede e na marau.” Kevaka eda cakava oya, eda na ‘ia na ivalavala e kilikili kei Jiova,’ eda na lomavakacegu tale ga baleta nida sa cakava tiko na ka e “vinakata kecega ko koya.”

²⁰ Meda nanuma dei tiko na inaki kei na yaga ni nona vosota vakadede o Jiova. Ena rawa kina meda vakabulai ra qai vakabulai tale ga o ira na rogoca na noda vunau kei na noda veivakavulici. (1 Timoci 4:16) Nida vuataka na vua ni yalo tabu na loloma, yalomalua, yalololoma, yalomalumalumu, kei na ivalavala malua, ena rawa kina nida marautaka na noda vosota vakadede. Ena rawa kina meda veimaliwai vinaka kei ira na lewe ni noda vuvale vaka kina o ira na tacida ena loma ni ivavakoso. Ena vukei keda tale ga na vosota vakadede meda vosoti ira na noda itokani vakacakacaka kei na noda icaba e koronivuli. Ni vakainaki na noda vosota vakadede, mera vakabulai kina na caka cala da qai vakalagilagia kina na Kalou e dau vosota vakadede o Jiova.

[iVakamacala e ra]

Vakamacalataka Mada

• Ena sala cava so e ivakaraitaki vinaka kina ni vosota vakadede o Karisito?

• Na cava ena vukei keda meda vosota vakadede?

• E vukei ira vakacava na vuvale, na ilawalawa lotu Vakarisito, kei ira na qase ni ivavakoso na vosota vakadede?

• E vukei keda vakacava kei ira na tani na noda vosota vakadede?

[iYaloyalo ena tabana e 15]

E vosoti ira nona tisaipeli o Jisu ena gauna mada ga e rarawa kina

[iYaloyalo ena tabana e 16]

Era uqeti na ivakatawa lotu Vakarisito mera ivakaraitaki ena nodra vosoti ira vakadede na tacidra

[iYaloyalo ena tabana e 17]

Ke da vakatotomuria na loloma kei na vosota vakadede i Jiova, eda na vunautaka tiko ga na itukutuku vinaka

[iYaloyalo ena tabana e 18]

E masulaka o Paula mera “vosota vakadede e na marau” na lotu Vakarisito