O Jiova e Vakarautaki Ira na iVakatawa ni Nona Qelenisipi

“Sa solia na vuku ko Jiova; sa lako mai na gusuna na kila ka kei na yalomatua.”​—VOSA VAKAIBALEBALE 2:6.

1, 2. Na cava era tadolova kina na tacida tagane papitaiso e so na itavi ni veiqaravi ena ivavakoso?

“DUA na ka na noqu marau niu sa lesi meu qase ni ivavakoso,” e kaya o Nick, e sa vitu na yabaki nona veiqaravi tiko vaqase. “Na ilesilesi oqo au na rawa sara ga kina ni vakarabailevutaka noqu veiqaravi vei Jiova. Au vakila niu dinau vakalevu tu vua ena vuku ni veika vinaka e cakava vei au. Au vinakata tale ga meu vukei ira na lewe ni ivavakoso ena kena levu au rawata, me vaka ga na nodra a vukei au na qase.” Ia, e dina ni marau, a via lomaleqa tale ga. Na cava e lomaleqataka? “Au se qai yabaki 20 vakacaca ena gauna au lesi kina,” e tomana o Nick, “O koya gona, au dau leqataka seu na rawata na cakacaka ni veivakatawani se sega. Baleta au kila ni ivakatawa maqosa e dodonu me matua vakayalo, me levu tale ga na ka e kila.”

² E levu sara na vuna mera marau kina o ira e lesia o Jiova mera qarava na nona qelenisipi. E dua na vuna a vakaraitaka na yapositolo o Paula vei ira na qase e Efeso ena nona cavuta vei ira na vosa i Jisu ni kaya: “Sa kalougata [“marau,” NW] vakalevu cake me da solia na ka, ka sega soti na noda dau ciqoma na ka.” (Cakacaka 20:​35, VV) Nodra yaco mera dauveiqaravi se qase e so na tagane papitaiso ena ivavakoso e dolava e so tale na sala vei ira mera soli ira kina ena cakacaka i Jiova kei na nona ivavakoso. Me kena ivakaraitaki, era yaga vakalevu na dauveiqaravi ni rawa nira vukei ira na qase ena so na itavi. Era qarava tale ga na dauveiqaravi oqo e so na cakacaka e kania vakalevu na gauna, ia e yaga ena ivavakoso. Nodra vakaitavitaki ira ena itavi bibi oqo e vu mai na nodra lomana na Kalou kei ira na wekadra.​​—Marika 12:​30, 31.

3. Na cava ena sega kina ni lomadra e so mera tadolova na isausau ni veiqaravi ena ivavakoso?

³ Vakacava ke dua na tacida tagane lotu Vakarisito e sega ni via tadolova na isausau me dauveiqaravi se qase ni ivavakoso ena nona nanuma ni sega ni ganiti koya? Me vakataki Nick, ena lomalomarua beka ena nona nanuma ni sega ni matua, sega tale ga vua na kila me dua kina na ivakatawa maqosa. O iko beka e dua na tagane o sa papitaiso, qai vaka tale ga oqo na nomu nanuma? Sa rauta mo kauai ena tikina oqo, baleta ni o Jiova ena tarogi ira na ivakatawa era lesi ena ivakarau ni nodra qaravi ira na nona sipi. A kaya o Jisu: “Na tamata e soli vakalevu vua na ka e na namaki tale ga mai vua e levu na ka; ia ko koya e soli vakalevu cake vua na ka, e na levu cake vaka kina na ka era namaka na tamata mai vua.”​​—Luke 12:​48, VV.

4. E dau vukei ira vakacava na ivakatawa o Jiova mera qarava na nodra itavi?

⁴ E namaka beka o Jiova vei ira e lesi ira mera qase se dauveiqaravi ni ivavakoso mera cola vakataki ira na nodra itavi? Sega sara! E vakarautaka o koya e so na veivuke mera cola rawa kina na nodra itavi, me vuavuaivinaka tale ga kina nodra cakacaka. Me vaka eda sa veivosakitaka ena ulutaga sa oti, e solia vei ira o Jiova na yalona tabu. Nodra vuataka na vua ni yalo tabu oqori e rawa kina vei ira mera qarava vinaka na qelenisipi. (Cakacaka 20:28; Kalatia 5:​22, 23) Kena ikuri, e solia tale ga vei ira o Jiova na vuku, kila ka, kei na yalomatua. (Vosa Vakaibalebale 2:6) E vakayacora vakacava oqo? Meda veivosakitaka mada e tolu na sala e vakarautaki ira kina e so o Jiova, qai lesi ira mera qaravi ira na nona sipi.

Ra Vakarautaki Vei Ira na iVakatawa Matua

5. Na cava erau ivakatawanisipi maqosa kina o Pita kei Joni?

⁵ Ni rau mai vosa o Pita kei Joni vei ira na lewe ni Sanadrini, era a okati rau na lewe ni mataveilewai oya me rau “tamata sega ni vuli ka lewe ni vanua wale ga.” Sega ni kena ibalebale ni rau a sega ni kila na wilivola kei na volavola, erau a sega ga ni vuli ena nodra koronivuli ni veivakarautaki na rapai. Ia, e vakadinadinataki ena veivakavulici i Pita, Joni, kei ira na vo ni tisaipeli na nodra maqosa, ra vakarorogo kina e levu, yaco sara mera vakabauta na Vosa ni Kalou. Era “lewe ni vanua wale ga” o ira oqo, ia e rawa vakacava mera maqosa sara ena veivakavulici? Nira sa rogoci Pita oti kei Joni na lewe ni mataveilewai ra raica tale ga na nodrau doudou, “era sa qai vakasamataka ni rau a dau tiko vata kei Jisu.” (Cakacaka 4:​1-4, 13, VV) E sega ni vakabekataki ni vakadoudoutaki rau na yalo tabu ni Kalou. (Cakacaka 1:8) Ia, e macala tale ga​​—vei ira sara mada ga na turaganilewa mataboko vakayalo oya​​—ni a vakarautaki rau vinaka sara ga na tagane oqo o Jisu. Ni se bula vata voli kei iratou nona yapositolo e vuravura, e dau vakavulici iratou ena sala mera kumuni kina o ira era vaka na sipi, kei na sala mera na vakatawani kina nira sa na yaco mera lewe ni qelenisipi.​​—Maciu 11:29; 20:​24-​28; 1 Pita 5:4.

6. Erau ivakaraitaki vakacava o Jisu kei Paula ena nodrau dau veivakarautaki?

⁶ Ni sa vakaturi oti o Jisu, se tomana tiko ga nona vakarautaki ira e sa lesia mera ivakatawanisipi. (Vakatakila 1:1; 2:1–​3:​22) Me kena ivakaraitaki, a digitaki Paula sara ga qai raica na nona vakarautaki me ivakatawa. (Cakacaka 22:​6-​10) E marautaka sara ga o Paula na veivuke a caka vua, mai vakadewataka sara yani na ka e vulica vei ira e so tale na qase. (Cakacaka 20:​17-​35) Kena ivakaraitaki, e solia vakalevu na nona gauna kei na nona igu ena nona vakarautaki Timoci me yacova ni sa dua o koya na “tamata daucakacaka” ni Kalou, qai “sega e dua na ka me madua kina.” (2 Timoci 2:​15) Yaco me rau veitokani dredre sara. E vola o Paula ni o Timoci e vaka na luvena ‘ena nona dau cakacaka vata kei koya ena itukutuku vinaka.’ (Filipai 2:​22) E sega ni inaki i Paula me tuberi Timoci se dua tale me nona tisaipeli. A nona inaki ga me vakauqeti ira na vakabauta mera ‘vakamurimuri koya me vaka ga na nona vakamurimuri Karisito.’​​—1 Korinica 11:1.

7, 8. (a) Na ivakaraitaki cava e dusia na yaga ni nodra vakatotomuri Jisu kei Paula na qase? (b) Gauna cava mera sa tekivu vakarautaki kina o ira e rawa nira dauveiqaravi se qase ni ivavakoso?

⁷ Me vakataki Jisu kei Paula, e vuavuaivinaka tale ga na nodra sasaga na ivakatawa matua era vakaliuliu mera vakarautaki ira na tagane era sa papitaiso. Dikeva mada oqo na ka a yacovi Chad. A susugi mai na dua na vuvale era dui lotu na lewena, ia se qai lesi ga me dua na qase ni ivavakoso. E kaya o koya: “Vica na yabaki nodra vukei au toka e vica na qase meu toso vakayalo. Era kauaitaki au vakalevu baleta ni tawavakabauta o tamaqu, era okati au sara ga meu luvedra. Era vakayagataka nodra gauna mera tuberi au ena cakacaka vakaitalatala, e muri e qai vakavulici au sara ga e dua na qase meu qarava na itavi e lesi vei au ena ivavakoso.”

⁸ E macala mai na ivakaraitaki i Chad ni o ira na qase matua era tekivu vakavulica sara ga e dua era kila ni rawa ni dauveiqaravi se qase ni ivavakoso ni bera sara na gauna e rawa ni qai laurai kina ni sa ganita me vakacolati vua e dua na ilesilesi. Baleta na cava? Baleta e vakaraitaka na iVolatabu ni dodonu mera yacova na qase kei na dauveiqaravi ni ivavakoso e dua na ivakatagedegede cecere vakayalo kei na bula savasava, ni bera nira lesi mera veiqaravi. Oqo ena gadrevi kina “me ra vakatovolei mada eliu.”​​—1 Timoci 3:​1-​10.

9. Cava na nodra itavi na ivakatawa matua, ena vuku ni cava?

⁹ E dodonu mera vakarautaki mada e liu na tacida tagane era sa papitaiso ni bera nira qai vakatovolei. Me kena ivakaraitaki: Ke tukuni vua e dua na gonevuli me dabeca e dua na veitarogi dredre ena ka e se sega mada ga ni vulica, ena rawata beka na veitarogi oqo? Kena irairai ni na sega. E dodonu me vakarautaki koya mada, me vulica. Ia, o ira na dauveivakavulici vinaka era kila ni sega ni inaki duadua ga ni vuli me rawati kina na veitarogi, ia me rawa ni lai taurivaka o gonevuli na ka e vulica. O ira tale ga na qase matua era na vukei ira na tagane era sa papitaiso mera bucina na itovo ena gadrevi vei ira era lesi ena ivavakoso. Era na vakayacora oqo ena nodra vakarautaki ira sara ga ena so na ka mera na lai vakaitavi kina mai muri. Oqo ena vakarawarawataka na nodra lesi o ira oqo mera qase se dauveiqaravi, ia vakauasivi mera na lai qaravi ira vinaka na sipi ena gauna era sa na lesi oti kina. (2 Timoci 2:2) E macala ni nodra itavi na tacida papitaiso mera sasaga vakataki ira me rawa nira sauva na isausau ni dauveiqaravi se qase ni ivavakoso. (Taito 1:​5-9) Ia, nodra soli ira na qase matua mera tuberi ira na tacida vaka oqo ena nodra tadolova e so na isausau e sa na vakatotolotaka sara na nodra toso.

10, 11. Na cava sara mada e rawa nira cakava na qase mera vakarautaki ira kina e so mera qarava na itavi ena ivavakoso?

¹⁰ Na cava sara mada e rawa nira cakava na qase mera vakarautaki ira kina na tacida papitaiso mera qarava na itavi ena ivavakoso? Kena imatai, o koya na ivakatawa matua e dodonu sara ga me kauaitaki ira na tacina tagane ena ivavakoso​​—me dau tomani ira ena cakacaka vakavunau, me dau vukei ira tale ga mera maqosa cake ena nodra “wasea vakadodonu nai vakavuvuli dina.” (2 Timoci 2:​15) Me veivosakitaka tale ga kei ira na marau kei na lomavakacegu era na vakila nira veiqaravi, vaka kina ena gauna era covia rawa kina na isausau vakayalo era dau tekia. Me vakaraitaki tale ga vakamatata vei ira na ka mera cakava me rawa kina nira ivakaraitaki vinaka cake vei ira na qelenisipi.​​—1 Pita 5:​3, 5.

¹¹ Ni sa lesi rawa e dua na tacida me dauveiqaravi ni ivavakoso, na ivakatawa matua ena vakavulici koya tiko ga. E kaya o Bruce, e dua e sa veiqaravi voli vaqase me rauta ni 50 na yabaki: “Au dau vinakata meu dabe vata kei na dua na dauveiqaravi ni ivavakoso vou, au qai railesuva vata kei koya e so na idusidusi e dau vakarautaka na dauveiqaravi yalo dina ka vuku. Keirau dau wilika vata tale ga e so na ivakasala matata me baleta na nona ilesilesi, au sa dau qai vinakata meu cakacaka vata kei koya me yacova ni sa matau ena nona qarava na nona itavi.” Ni sa matua cake mai e dua na dauveiqaravi, sa rawa ni tuberi tale ga ena cakacaka ni veivakatawani. E kaya o Bruce: “Ni keirau veitomani kei na dua na dauveiqaravi ni ivavakoso ena veivakatawani, au dau vukei koya ena kena digitaki e so na tikinivolatabu ena vakauqeta na tacida se na vuvale keirau sikova. Nona vulica me vakayagataka na iVolatabu ena sala oqo ena rawa ni yaco kina me dua na ivakatawa vinaka.”​​—Iperiu 4:​12; 5:​14.

12. Ena veivuke vakacava na ivakatawa matua vei koya e ivakatawa vou?

¹² Ena yaga tale ga vei ira na ivakatawa vou na veituberi vaka oqo. E kaya o Nick, sa cavuti oti yani: “E yaga vakalevu vei au na nodrau veituberi e rua na qase erau sa matua. O rau na qase oqo erau dau kila vinaka sara ga na ka me caka ena dui ituvaki e basika. Erau dau vakarogoci au vakamalua, rau dau qai kauaitaka na ka au tukuna, veitalia mada ga ke rau sega ni duavata kina. Ka ni vuli levu vei au na noqu dau raica na nodrau yalomalua kei na veidokai ni rau veivosaki se veimaliwai kei ira na lewe ni ivavakoso. Erau vakabibitaka sara ga vei au meu dau vakayagataka vinaka na iVolatabu niu saga meu walia na leqa, vaka kina ena noqu veivakayaloqaqataki.”

Vakarautaki ena Vosa ni Kalou

13. (a) Na cava e gadrevi me rawa kina ni dua e ivakatawa maqosa? (b) Na cava e kaya kina o Jisu: “Sa sega ni noqu na noqui vakavuvuli”?

¹³ E tu ena Vosa ni Kalou na lawa, idusidusi, kei na ivakaraitaki me na “vakarautaki” kina na ivakatawa me ‘cakava na veicakacaka vinaka kece ga.’ (2 Timoci 3:​16, 17, VV) Ena vuli vinaka beka e dua na tacida, ia na nona yaco me ivakatawa maqosa e vakatau ena nona kila vinaka na iVolatabu kei na nona taurivaka. Kena ivakaraitaki ga o Jisu. Sega tale ni dua erau le rua ena kila ka kei na yalomatua, e ivakatawa vuku duadua tale ga me bau bula e vuravura; ia a sega ni vakayagataka na nona vuku ni vakavulici ira na sipi i Jiova. A kaya o koya: “Sa sega ni noqu na noqui vakavuvuli, sa nona ga ka talai au mai.” Na cava e dau vakaliuci Tamana kina o Jisu? E kaya o koya: “O koya sa vosa vakai koya ga, sa vinakata me dokai.”​​—Joni 7:​16, 18.

14. Era na qarauna vakacava na ivakatawa mera kua ni cakava e dua na ka mera dokai ga kina?

¹⁴ O ira na ivakatawa yalodina era na qarauna mera kua ni cakava e dua na ka mera dokai ga kina. Era na sega ni yavutaka nodra ivakasala kei na veivakauqeti ena nodra vuku ga, era na yavutaka ga ena Vosa ni Kalou. Era kila ni itavi ni ivakatawa me vukei ira na sipi mera cakava na “loma ni Turaga” o Karisito, sega ni lomadra na qase. (1 Korinica 2:​14-​16) Me kena ivakaraitaki, ke dua na veiwatini e tatavutuvutu nodrau bula vakawati, vakacava ke qai vukei rau e dua na qase ena nona yavutaka nona ivakasala ena ka e sotava o koya ena nona bula vakawati, sega ni yavutaka ena idusidusi vakaivolatabu e vakarautaka na “dauveiqaravi yalo dina ka vuku”? (Maciu 24:​45, VV) Na nona ivakasala e rawa ni vakabi vakalevu ena itovo vakavanua kei na qiqo ni ka e kila. E macala ni so na itovo vakavanua e sega ni ca, na qase tale ga e veivakasalataki e rawa ni sa dua na itaba, levu tale ga na ka e sotava ena nona bula. Ia, ena yaga vakalevu duadua vei ira na sipi na nodra uqeti mera rogoca na domo i Jisu kei na vosa i Jiova, sega ni vakasama vakatamata se itovo vakavanua.​​—Same 12:6; Vosa Vakaibalebale 3:​5, 6.

Veivakarautaki na “Dauveiqaravi Yalo Dina ka Vuku”

15. Na itavi cava a lesia o Jisu vei koya na “dauveiqaravi yalo dina ka vuku,” na cava e dua na vuna e rawati vinaka kina na nona cakacaka?

¹⁵ Na ivakatawa o Pita, Joni, kei Paula eratou lewe kece ni ilawalawa e vakatoka o Jisu na “dauveiqaravi yalo dina ka vuku.” Na ilawalawa oqo era lewena kece na taci Jisu e vuravura era lumuti ena yalo tabu, ra qai nuitaka mera lai veiliutaki vata kei Karisito i lomalagi. (Vakatakila 5:​9, 10) Ena iotioti ni veisiga oqo, e sa lutu sobu sara tiko ga na kedra iwiliwili na taci Jisu era se vo e vuravura. Ia, e sa qai rabailevu ga na vakayacori ni cakacaka e lesia o Jisu mera cakava ni bera na ivakataotioti, oya na vunautaki ni itukutuku vinaka ni Matanitu ni Kalou. E vakasakiti tale ga na vuavuaivinaka ni nodra cakacaka! Era rawata vakacava oqo? Dua na vuna ena nodra sa vakavulici ira na lewe ni ‘so tani tale na sipi’ mera tomani ira ena cakacaka vakavunau kei na veivakavulici. (Joni 10:16; Maciu 24:14; 25:40) Nikua, e levu ga na cakacaka e sa qarava tiko na ilawalawa levu oqo.

16. Na cava e vakarautaka na “dauveiqaravi yalo dina ka vuku” mera vakarautaki kina na ivakatawa era lesi?

¹⁶ Sala cava e veivakarautaki tiko kina na “dauveiqaravi yalo dina ka vuku”? Ena imatai ni senitiuri, era a lesi e so mera matataka na “dauveiqaravi yalo dina ka vuku” qai vakacolati vei ira mera raica na nodra vakarautaki kei na nodra lesi na ivakatawa ena veivavakoso. O ira na ivakatawa oqo e sa qai nodra itavi mera vakavulici ira na vo ni qelenisipi. (1 Korinica 4:​17) E vaka tale ga oqori ena gauna oqo. Na “dauveiqaravi yalo dina ka vuku” e sa lesia na iLawalawa Dauvakatulewa​​—era lewena e vica na lumuti​—me nona mata. E dua na itavi ni iLawalawa Dauvakatulewa me vakarautaki ira na dauveiqaravi ni ivavakoso kei na qase ena vicavata na udolu na ivavakoso e veiyasa i vuravura. Kena ikuri, e tuvanaka na iLawalawa Dauvakatulewa e so na vuli mera vakarautaki kina na lewe ni Komiti ni Tabana, ivakatawa dauveilakoyaki, qase, kei na dauveiqaravi ni ivavakoso, ena sala mera qarava vinaka kina na qelenisipi. E so tale na idusidusi e dau vakarautaki ena so na ivola e dau vakau yani, ena ulutaga e dau tabaki ena Vale ni Vakatawa, kei na ivola tale e so me vaka na iSoqosoqo e Cakava na Loma i Jiova.a

17. (a) E vakaraitaka vakacava o Jisu na nona nuitaka na “dauveiqaravi yalo dina ka vuku”? (b) Era na vakaraitaka vakacava na ivakatawa vakayalo nira nuitaka na “dauveiqaravi yalo dina ka vuku”?

¹⁷ E laurai na nona nuitaka o Jisu na “dauveiqaravi yalo dina ka vuku” ena nona lesia “me lewa na nona ka kecega”​​—oqo e okati kina na nona veika vakayalo kece e vuravura. (Maciu 24:47) Era vakaraitaka tale ga na ivakatawa era lesi nira nuitaka na “dauveiqaravi yalo dina ka vuku” ena nodra muria na veidusimaki e vakarautaka na iLawalawa Dauvakatulewa. Io, nira vakaitavi na ivakatawa ena nodra vakarautaki e so tale, nira vakalaiva me vakarautaki ira na Vosa ni Kalou, nira muria tale ga na veivakarautaki ni “dauveiqaravi yalo dina ka vuku,” sa ra vakatetea tiko kina na duavata ena kedra maliwa na qelenisipi. Eda vakavinavinaka vei Jiova ena nona sa vakarautaki ira vinaka sara ga na tagane era kauaitaki ira dina na lewe ni ivavakoso!

[iVakamacala e ra]

O na Sauma Vakacava?

• Na cava era cakava na ivakatawa matua mera vakarautaki ira kina e so tale?

• Na cava era qarauna kina na ivakatawa mera kua ni vakavulica na ka ga e tu e lomadra?

• Era vakaraitaka vakacava na ivakatawa na nodra nuitaka na “dauveiqaravi yalo dina ka vuku,” ena vuku ni cava?

[iYaloyalo ena tabana e 25]

Era vakaitavi na qase lotu Vakarisito ena nodra vakarautaki na cauravou ena ivavakoso

[iYaloyalo ena tabana e 26]

Levu sara na ka e cakava na “dauveiqaravi yalo dina ka vuku” me vakarautaki ira kina na qase