O Ira na iVakatawa ni Qelenisipi

ENA nona cakacaka vakaitalatala e vuravura o Jisu, e vakaraitaka ni o koya “na ivakatawa vinaka.” (Joni 10:11) Ena gauna e raici ira kina na ilala levu era muri koya voli, e “lomani ira nira suivotu qai biu wale tu me vaka na sipi e sega na kena ivakatawa.” (Maciu 9:36) E raica o Pita kei ratou na vo ni yapositolo na yalololoma i Jisu. E duidui sara o Jisu vei ira na ivakatawa lasu kei Isireli, nira vakawaleni ira vakalevu na qelenisipi, vakavuna mera talabusese na sipi, ra qai waloloi vakayalo! (Isik. 34:7, 8) Na ivakaraitaki vinaka ni veivakavulici i Jisu kei na nona karoni ira na sipi me yacova ni solia nona bula ena vukudra, eratou vulica kina na yapositolo na sala mera vukei kina na vakabauta mera lesu vei Jiova, “na ivakatawanisipi kei na ivakatawa ni [nodra] bula.”—1 Pita 2:25.

² Ni vosa tiko o Jisu vei Pita ena dua na gauna, a vakamacalataka na bibi ni nodra vakani kei na nodra vakatawani na sipi. (Joni 21:15-17) E rairai tarai Pita sara ga na vosa i Jisu, e muri sa qai vakamasuti ira na qase ena imatai ni senitiuri: “Moni vakatawa na qelenisipi ni Kalou oni lesi moni karona, ni kua ni qarava ena voraki, ena yalo ga e vinakata ena mata ni Kalou, me kua ena yalokocokoco, ena yalo ga e marautaka, ni kua ni vakacolasau vei ira e taukeni ira na Kalou, moni nodra ivakaraitaki ga na qelenisipi.” (1 Pita 5:1-3) Na vosa i Pita e baleti ira tale ga na ivakatawa ena ivavakoso nikua. Nira vakatotomuri Jisu na qase, era na yalorawarawa qai makutu ni qaravi ira na sipi, mera ivakaraitaki, mera liu sara tiko ga ena nodra qaravi Jiova.—Iper. 13:7.

³ Meda vakavinavinakataki ira na ivakatawa e lesi ira na yalo tabu mera veiqaravi ena ivavakoso. E yaga vakalevu na nodra veiqaravi. Kena ivakaraitaki, era dau veivakayaloqaqataki na ivakatawa, ra qai kauaitaki ira kece ena ivavakoso. E veimacawa, era dau solia nodra vinaka taucoko ena soqoni vakaivavakoso, na vanua eda vakabulabulataki kina vakayalo. (Roma 12:8) Eda vakila na bula vakacegu ena nodra taqomaka tiko na qelenisipi mai na ka e rawa ni veivakaleqai, me vakataki ira na tamata ca. (Aisea 32:2; Taito 1:9-11) Nodra liu sara tiko ga ena cakacaka vakaitalatala e uqeti keda meda gumatua tiko ga ni vunautaka e veivula na itukutuku vinaka. (Iper. 13:15-17) E vakarautaka o Jiova na veika me vakayaloqaqataki kina na ivavakoso ni vakayagataki ira na “isolisoli tamata” qo.—Efeso 4:8, 11, 12.

IVAKATAGEDEGEDE ME YACOVA NA IVAKATAWA

⁴ Ena qaravi vinaka na ivavakoso ke ra lesi mera ivakatawa o ira era rawata na ivakatagedegede vakaivolatabu. E rawa ni qai tukuni ni lesi ira na yalo tabu ke ra yacova na kena ivakatagedegede. (Caka. 20:28) E toka sara i cake na ivakatagedegede mera rawata na ivakatawa lotu vaKarisito, ni bibi na itavi ni ivakatawa. Ia e sega ni cecere tale vakasivia na ivakatagedegede qo me dredre kina ni sauva e dua na tagane lotu vaKarisito e lomani Jiova dina, qai vinakata me vakayagataki koya na Kalou. E dodonu me laurai nira bulataka na idusidusi ena iVolatabu ena veika kece era cakava e veisiga.

⁵ Ena imatai ni nona ivola na yapositolo o Paula vei Timoci kei na nona ivola vei Taito, a vakamacalataka kina na ivakatagedegede vakaivolatabu mera yacova na ivakatawa. E kaya na 1 Timoci 3:1-7: “Ke dua e via qarava na itavi vakaivakatawa, e sa vinakata tiko na cakacaka vinaka. E dodonu gona me kua ni beitaki ena dua na ka na ivakatawa, me dua ga na watina, me lewai koya vinaka, me yalomatua, me kua ni yakusurasura nona bula, me dau veikauaitaki, me yacova na ivakatagedegede ni veivakavulici, me kua ni daumateni, me kua ni voravora, ia me yalorawarawa, me kua ni dauveiba, me kua ni dau lomana na ilavo, me lewa vinaka nona vuvale, mera talairawarawa vua na luvena ra qai dokai koya (ke dua e sega ni qarava rawa nona vuvale, ena qai qarava vakacava na ivavakoso ni Kalou?), me kua ni se qai tisaipeli vou, de dokadoka qai tau vua na itotogi e sa tau vua na Tevoro. Kena ikuri, me vinaka na kena irogorogo vei ira e taudaku, me kua kina ni vosavakacacataki se coko ena dai ni Tevoro.”

⁶ E vola o Paula vei Taito: “Au a biuti iko tiko mai Kiriti mo vakadodonutaka kina eso na leqa e kea, mo lesi ira tale ga na qase ena koro yadua me vaka au vakaroti iko kina: ke dua na tagane e sega ni beitaki ena dua na ka, e dua ga na watina, mera vakabauta na luvena, me kua ni torosobu na nodra itovo se ra murilomadra. Me vaka ni dauniyau ni Kalou, me kua ni beitaki ena dua na ka na ivakatawa, me kua ni dau nanumi koya ga, me kua ni dau yalototolo, me kua ni dau mateni, me kua ni dau voravora, me kua ni kocokoco ena nona qara na sala me rawaka kina, ia me dau veikauaitaki, me vinakata na ka dodonu, me yalomatua, me yalododonu, me yalodina, me dau lewai koya vinaka, me taura matua na vosa dina ena nona veivakavulici me maqosa tale ga kina, me rawa ni veivakauqeti ena ivakavuvuli dina, me vunauci ira tale ga era saqata.”—Taito 1:5-9.

⁷ Ena rairai dredre me rawati na ivakatagedegede vakaivolatabu me baleta na itavi ni ivakatawa, ia mera kua ni tu suka na tagane lotu vaKarisito mera tadolova. Nira vakaraitaka na ivakatawa na ivakarau ni bula savasava vaKarisito, era sa uqeti ira tale eso ena ivavakoso mera vakatotomuri ira. E vola o Paula ni o ira na “isolisoli tamata” e vakarautaki ira na Kalou “mera vakadodonutaki kina na yalosavasava, me qaravi kina na ivavakoso, me buli cake kina na yago i Karisito, me rawa nida duavata kece ena vakabauta kei na noda kila dina na Luve ni Kalou, meda tamatabula, meda yacova taucoko sara na ivakarau ni bula i Karisito.”—Efeso 4:8, 12, 13.

⁸ Era sega ni lesi mera ivakatawa na gone se dua se qai tisaipeli vou. Mera lesi ga o ira sa matau ena bula vaKarisito, era lomana dina na ivavakoso, e titobu tale ga nodra kila na iVolatabu. Era doudou na ivakatawa mera vosa ra qai vakadodonutaki ira na cala. Qo ena taqomaka na qelenisipi mai vei ira na dauveivakaleqai. (Aisea 32:2) E dodonu me laurai votu nodra matua vakayalo na ivakatawa ena ivavakoso kei na nodra kauaitaka dina na qelenisipi ni Kalou.

⁹ O ira era rawata na ivakatagedegede mera lesi mera ivakatawa, ena laurai ena nodra bula e veisiga na yalomatua. Ke ra vakawati, e dodonu mera muria tiko na ivakatagedegede vaKarisito me baleta na bula vakawati, oya me dua ga na watidra, ra qai lewa vinaka nodra vuvale. Ke ra tiko ena vakabauta na luvedra, era talairawarawa vua ra qai dokai koya, e sega ni torosobu na nodra itovo se ra murilomadra, ena rawarawa vei ira ena ivavakoso mera kere ivakasala se veidusimaki vei ira na ivakatawa ena ka e vauca na bula vakavuvale kei na bula vaKarisito. Ena sega tale ga ni beitaki ena dua na ka na ivakatawa, qai vinaka na kena irogorogo vei ira e taudaku. E sega ni dua na ka era beitaki kina me vakarogorogocataka na ivavakoso. E sega ni rawa ni lesi ke vunauci oti ga ena dua na cala bibi. Era na uqeti na lewe ni ivavakoso mera vakatotomuria na nona ivakaraitaki vinaka, era na marautaka tale ga na nodra veikaroni vakayalo na ivakatawa.—1 Kor. 11:1; 16:15, 16.

¹⁰ Era sauva na tagane qo na ivakatagedegede mera veiqaravi ena ivavakoso vaKarisito, me vaka ga era cakava na qase ni Isireli e tukuni nira “vuku, nuitaki qai turaga yalomatua.” (Vkru. 1:13) Era ivalavala ca tale ga na qase, ia era kilai ena ivavakoso kei na itikotiko ni dodonu na nodra ivalavala, era doka na Kalou, qai laurai ena nodra bula nira muria na ivakavuvuli vakaivolatabu. Era doudou mera vosa ena ivavakoso nira sega ni beitaki ena dua na ka.—Roma 3:23.

¹¹ O ira na tagane era yacova na ivakatagedegede vakaivakatawa era na lewai ira vinaka. Me laurai qo ena ka era cakava kei na nodra veimaliwai. Era sega ni yalododonu vakasivia. Ia e veiraurau nodra ivakarau ni bula, ra qai lewa matau. Ena kilai na nodra lewai ira vinaka ena ka e vauca na kana, gunu, gade, ka era dau vakaogai ira kina, kei na ka ni veivakamarautaki era digia. Era na lewai ira vinaka ena ka e vauca na gunuvi ni yaqona ni valagi se yaqona ni Viti, mera kua kina ni beitaki ena mateni se daumateni. Ni dua e gunu sivia, sa na sega vua na lewa matau, sega tale ga ni qarava rawa na bula vakayalo ni ivavakoso.

¹² Na tagane e veiqaravi ena ivavakoso e dodonu me dau tuvatuva maqosa. Ena laurai qori ena kena irairai, savasava ni nona vale kei na ka e cakava e veisiga. Ena sega ni dau lokuyara, ni raica na veika e vinakati me caka, ena lalawataka sara. Ena muria na ivakavuvuli vakalou.

¹³ Me dau yalorawarawa na ivakatawa. E dodonu me cakacaka vata qai tokoni ratou na vo ni ilawalawa qase. Me kua ni dokadokai koya, ena sega tale ga ni namaka vakasivia na ka vei ira eso tale. Ni yalorawarawa, ena sega ni nanuma ni vinaka cake nona rai vei ratou na vo ni qase. Baleta ena tiko ga eso na ka ena lekata, ia e rawa nira vinaka kina eso tale. Ena yalorawarawa ke dau yavutaka nona vakatulewa ena iVolatabu, qai saga me vakatotomuria na ivakaraitaki i Jisu Karisito. (Fpai. 2:2-8) Ena sega ni dauveiba se voravora na qase, ena veidokai, ena vakaliuci ira na so tale. Ena sega ni dau dre ga nona mua ena nona saga me yaco na lomana se me rogoci na ka e tukuna. Ena sega ni yalototolo, ena saga na bula veiyaloni.

¹⁴ O koya tale ga e yacova na ivakatagedegede me ivakatawa e dodonu me yalomatua. Kena ibalebale ena tauri koya vakamalua, sega ni dau vakatulewa vakariri. Ena kila vinaka na ivakavuvuli i Jiova kei na sala me muri kina. Ena ciqoma na ivakasala kei na veidusimaki. Ena sega tale ga ni veivakaisini.

¹⁵ E uqeti Taito o Paula ni dodonu vua na ivakatawa me vinakata na ka kece ga e vinaka. Me yalododonu me yalodina tale ga. Na itovo qo me laurai ena nona veimaliwai, me tutaka tale ga na ka e dodonu kei na ka e vinaka. Ena dei na nona qaravi Jiova, ena muria tu ga na ivakavuvuli dodonu. Ena maroroya na itukutuku e sega ni dodonu me vakatakilai. Ena dau veikauaitaki dina, ena tu vakarau ni vakuai koya se solia na nona iyau ena vukudra na so tale.—Caka. 20:33-35.

¹⁶ Me yaga nona veiqaravi, e dodonu me rawata na ivakatagedegede ni veivakavulici na ivakatawa. Me vaka e vola o Paula vei Taito, na ivakatawa e dodonu me “taura matua na vosa dina ena nona veivakavulici me maqosa tale ga kina, me rawa ni veivakauqeti ena ivakavuvuli dina, me vunauci ira tale ga era saqata.” (Taito 1:9) E rawa ni vakamacala, vakadinadinataka na ka e tukuna, vakadodonutaka na vakasama cala, vakayagataka na iVolatabu me uqeti ira na vakarorogo, me vaqaqacotaka tale ga nodra vakabauta. Ena vakaraitaka na ivakatawa na ivakarau ni veivakavulici qo ena gauna vinaka kei na gauna ca. (2 Tim. 4:2) Ena yalomalua kei na vosota, ena rawa kina vua me vakadodonutaki koya e cala, se vukei koya e lomalomarua me bulataka na ka e vakabauta. Nona rawa ni veivakavulici ena ivavakoso se nona vakavulica e dua, e vakaraitaka ni sa yacova na ivakatagedegede bibi qo.

¹⁷ E bibi tale ga mera gumatua na qase ena cakacaka vakaitalatala. Nira cakava qori, era sa vakatotomuri Jisu tiko, ni bibi duadua vua na vunautaki ni itukutuku vinaka. E kauaitaki ira na nona tisaipeli o Jisu, e vukei ira mera italatala maqosa. (Mari. 1:38; Luke 8:1) Era osooso na qase, ia ni gu na lomadra mera vakaitavi ena cakacaka vakaitalatala ena uqeti ira ena ivavakoso mera gumatua tale ga. Nira vunau tale ga na qase kei na nodra dui vuvale kei na vo ni mataveitacini, era na “veivakayaloqaqataki.”—Roma 1:11, 12.

¹⁸ Na veika kece qo e rawa ni nanuma kina e dua ni sa rui sivia na ka e vinakati vei ira na ivakatawa. E sega ni dua na ivakatawa e uasivi, ena sega ni taucoko sara nona yacova na ivakatagedegede me baleti ira na ivakatawa e vakamacalataki ena iVolatabu. Ena yasana adua, e sega ni dodonu me sa lai torosobu tale nona lekata e dua vei ira na ivakatagedegede qori de ra qai sega ni dokai koya na ivavakoso ke sa lesi. Eso na qase ena tu vei ira eso na taledi, eso tale era na maqosa ena so tale na ka. Kena ibalebale ni na vakilai ena ilawalawa qase na itovo vinaka kece e vinakati me cicivaki vinaka kina na ivavakoso ni Kalou.

¹⁹ Nira vakatura na qase eso na yaca mera ivakatawa, mera nanuma tiko na nona vosa na yapositolo o Paula: “Au tukuna kina vei kemuni me kua ni dua e sivia na ka e nanuma me baleti koya, me yalomatua ga, me qai salavata na ka e nanuma kei na ivakarau ni vakabauta e solia vua na Kalou.” (Roma 12:3) Mera dau vakamalumalumu na qase. Me kua ni dua e “yalododonu sivia” ni dikeva tiko na nona sa rawa ni lesi e dua ena itavi vaqase se sega. (Dauv. 7:16) Me matata vei ratou na ilawalawa qase na ivakatagedegede vakaivolatabu me rawata e dua me lesi ena itavi vaqase. Mera nanuma na ilawalawa qase ni na tiko ga na malumalumu, mera kua tale ga ni veitovaki se veivakaisini. Ena laurai ena nodra vakatulewa nira doka na ivakatagedegede savasava i Jiova, ena vinaka tale ga kina na ivavakoso. Era na masulaka tale ga na yaca kece era vakatura, ra qai muria na veidusimaki ni yalo tabu ni Kalou. Qo e dua vei ira na itavi bibi e vakacolati vei ira, e dodonu kina mera muria na ivakaro i Paula: “Mo kua sara ni vakatotolotaka nona tabaki e dua e ligamu.”—1 Tim. 5:21, 22.

VUA NI YALO TABU

²⁰ Ena laurai vei ira na tagane era rawata na ivakatagedegede vakayalo ni dusimaki ira na yalo tabu, era vakaraitaka tale ga na vua ni yalo tabu ena nodra bula. E cavuta o Paula e ciwa na itovo e okati ena vua ni yalo tabu me vaka “na loloma, marau, vakacegu, vosovoso, yalololoma, yalovinaka, vakabauta, yalomalua, lewai koya vinaka.” (Kala. 5:22, 23) Na nodra veiqaravi ena ivavakoso ena vakabulabulataki ira na mataveitacini, ena uqeti ira tale ga mera duavata ena veiqaravi tabu. Ena vakadinadinataki ena ka era cakava kei na vua ni nodra cakacaka nira lesi ena yalo tabu.—Caka. 20:28.

TAGANE ERA UQETA NA DUAVATA

²¹ E bibi mera cakacaka vata na qase me rawa nira uqeta na duavata ena ivavakoso. Era duidui na qase ena levu na ka, ia era na uqeta na duavata ni ilawalawa qase nira veirogorogoci ena veidokai, ke ra sega mada ga ni duavata ena ka kece e veivosakitaki. Ke sega ni beci e dua na yavu vakaivolatabu, e dodonu mera yalorawarawa nira tokona na vakatulewa ni ilawalawa qase. Ni dau vakamalumalumu e dua, ena vakaraitaka ni tiko vua “na vuku mai cake,” ni dau “veiyaloni, e yalorawarawa.” (Jeme. 3:17, 18) Me kua ni nanuma e dua na qase ni uasivi vei ira na vo ni qase, se me rawa ni vosayaco ina ilawalawa qase. Nira cakacaka vata vakailawalawa na qase, era sa cakacaka vata tiko kei Jiova me vinaka kina na ivavakoso.—1 Kor., wase 12; Kolo. 2:19.

TADOLOVA NA ITAVI

²² E dodonu mera vinakata na tagane vaKarisito matua na itavi vakaivakatawa. (1 Tim. 3:1) Ia ena vinakati kina mera sasaga ra qai vakuai ira. Kena ibalebale mera tu vakarau mera qarava na ka era vinakata na mataveitacini, mera kauaitaka na nodra bula vakayalo. Ni dua e vinakata na itavi vakaivakatawa, ena saga me rawata na ivakatagedegede e vakamacalataki ena iVolatabu.

NI VEISAU NA ITUVAKI

²³ E rawa ni tautauvimate se vakaleqai na ituvaki ni yagona e dua na tacida yalodina e veiqaravi vaqase ena dua na gauna balavu. De dua sa tatara na bula vaqase, sega kina ni rawa ni qarava na itavi vakaivakatawa. Se mani ituvaki cava, me dokai qai raici tiko ga ni dua na qase ni ivavakoso. Ni vakaiyalayala na ka e cakava, sega ni kena ibalebale me sa cegu mai na itavi vaqase. Dodonu me dokai vakalevu me vakataki ira na vo ni qase era solia tiko nodra vinaka kece mera vakatawana na qelenisipi.

²⁴ Ke nanuma e dua na tacida me sa cegu mai na itavi vaqase ni vakaiyalayala ga na ka e rawa ni cakava ena vuku ni kena ituvaki, qori me qai vakatau sara ga vua. (1 Pita 5:2) E dodonu meda dokai koya tiko ga. E se yaga tiko ena ivavakoso, ke sa sega mada ga ni lesi ena itavi e dau lesi vei ira na qase.

ITAVI BIBI ENA IVAVAKOSO

²⁵ Levu sara na itavi era qarava na qase ena ivavakoso. Kena ivakaraitaki na kodineita ni ilawalawa qase, na vunivola, na ivakatawa ni cakacaka, na qasenivuli ni Vuli Vale ni Vakatawa, kei na ivakatawa ni Soqoni ni Bula vaKarisito kei na Cakacaka Vakaitalatala. Levu na qase era lesi mera ivakatawa ni iwasewase lailai. Na qase e lesi ena dua na itavi ena qarava toka qori ena loma ni dua na gauna. Ia ke toki, tauvimate, se vakacegui ni sa sega ni rawata na ivakatagedegede vakaivolatabu, sa na lesi e dua tale na qase me qarava na itavi qori. Ena ivavakoso e lailai kina na ivakatawa, de dua ena vinakati me qarava e vica na itavi e dua na ivakatawa, me yacova nira sa rawata eso tale na tacida na ivakatagedegede ni veiqaravi vaqase.

²⁶ Na kodineita ni ilawalawa qase e dau jeameni ena gauna e bose kina na ilawalawa qase. E yalomalumalumu ni cakacaka vata kei ira na vo ni qase ena nodra qaravi na qelenisipi ni Kalou. (Roma 12:10; 1 Pita 5:2, 3) E dodonu me dau tuvatuvanaki vakamaqosa qai gumatua ni qarava nona itavi.—Roma 12:8.

²⁷ Na vunivola e qarava na ka vakaivola ni ivavakoso, ena veitaratara kei ratou na ilawalawa qase me baleta na itukutuku se ivola e dau vakau mai. Ke gadrevi, e rawa ni lesi e dua tale na qase se dua na dauveiqaravi matua me vukei koya.

²⁸ Na tuvanaki ni cakacaka vakavunau kei na veika e vauca na cakacaka vakaitalatala e nona itavi na ivakatawa ni cakacaka. Ena sikova na iwasewase yadua ena muanimacawa ena dua na vula. Eso na ivavakoso lalai e tiko ga kina e dua se rua na iwasewase lailai. De dua ena sikova vakarua na iwasewase qori ena dua na yabaki. Ena liutaka na soqoni ni cakacaka vakavunau donuya nona veisiko, ena cakacaka vata kei ira na lewe ni iwasewase lalai ena cakacaka vakaitalatala, ena vukei ira ena nodra veisikovi lesu kei na vuli iVolatabu.

IVAKATAWA NI IWASEWASE LAILAI

²⁹ E itavi dokai ena ivavakoso na ivakatawa ni iwasewase lailai. Qo eso na ka e okati ena nona itavi (1) me kauaitaka nodra bula vakayalo na lewe ni iwasewase ni cakacaka vakavunau; (2) vukei ira yadua na lewe ni iwasewase lailai mera vakaitavi wasoma ena cakacaka vakavunau, mera gugumatua, ra marautaka tale ga; kei na (3) vukei ira qai vakavulici ira na dauveiqaravi ni ivavakoso ena nona iwasewase mera rawata na ivakatagedegede ni veiqaravi ena ivavakoso. Me digitaka na ilawalawa qase na ivakatawa e rawa ni cakava na itavi kece e vauci ena ilesilesi qo.

³⁰ Ni bibi na itavi qo, e dodonu me ivakatawa ni iwasewase lailai na qase. Ena so na ituvaki, rawa ni qarava toka mada e dua na dauveiqaravi ni ivavakoso matua na itavi qori ni bera ni qarava e dua na qase. Na dauveiqaravi ni ivavakoso e liutaka na iwasewase lailai ena vakatokai me dauveiqaravi ni iwasewase lailai. Ia ena muria na nodratou veidusimaki na qase ni qarava tiko na nona itavi.

³¹ Ena liu sara tiko ga ena cakacaka vakavunau na ivakatawa ni iwasewase lailai. Nona tiko wasoma, nona gugumatua kei na nona taleitaka na cakacaka vakavunau ena uqeti ira tale ga na nona iwasewase lailai. Era dau marautaka na dautukutuku na nodra cakacaka vata, ni gauna vinaka mera vakayaloqaqataki kina ra qai vukei. Koya gona ena vinaka me vakarautaki e dua na ituvatuva ni cakacaka vakavunau vakaiwasewase e ganiti ira e levu. (Luke 10:1-16) Me raica na ivakatawa ni iwasewase lailai ni veirauti na yalava ni cakacaka. Ena liutaka na soqoni ni cakacaka vakavunau, ena tuvanaka tale ga nodra cakacaka na dautukutuku ena siga ya. Ke kila ni na sega ni tiko ena cakacaka vakavunau, me kerea rawa e dua tale na qase, se dauveiqaravi ni ivavakoso me qarava nona itavi, me rawa nira dusimaki vinaka na dautukutuku. Ke sega ni tiko e dua na qase se dauveiqaravi, rawa ni kerei e dua na dautukutuku matua.

³² Ena vakavakarau na ivakatawa ni iwasewase lailai ena nona veisiko na ivakatawa ni cakacaka, ena vakarogoya vei ira na nona iwasewase lailai, qai uqeti ira mera nanamaki kina. Nira kila rawa na ituvatuva ni veisiko qori, era na tokona ena nodra vinaka kece.

³³ Ena lailai toka ga na lewe ni iwasewase yadua. Qo ena rawarawa kina vua na ivakatawa ni iwasewase lailai me kilai ira vinaka na nona iwasewase. Ena kauaitaki ira yadua, me vaka na ivakatawanisipi dauloloma. Ena vukei ira yadua, ena uqeti ira mera gumatua ena cakacaka vakavunau, mera tokona na soqoni. Ena gumatua me vukei ira yadua mera kaukaua tiko ga vakayalo. Ena yaga vei ira na tauvimate se yalolailai na nona veisiko. Rawa nira via tadolova na itavi ena ivavakoso eso ke ra uqeti, se vakasalataki ena ka mera cakava. E rawa nira yaga vakalevu sara ena ivavakoso. E levu ga na gauna ena solia na ivakatawa ni iwasewase lailai nona gauna vei ira na lewe ni nona iwasewase. Ia me vaka ni qase ni ivavakoso, e ivakatawa tale ga, ena sega ni guilecavi ira ena ivavakoso. Ena tu vakarau me vukei ira era vinakata na veivuke.—Caka. 20:17, 28.

³⁴ E nona itavi na ivakatawa ni iwasewase lailai me kumuna nodra ripote ni cakacaka vakavunau na dautukutuku ena nona iwasewase. Me qai solia na ripote vua na vunivola. Era na veitokoni ena tikina qo na dautukutuku yadua nira solia totolo na nodra ripote ni cakacaka. Rawa nira solia sara ga vakadodonu nodra ripote vua na ivakatawa ni iwasewase lailai ni cava na vula, se biuta ena kena kato vakarautaki ena Vale ni Soqoni.

KOMITI NI CAKACAKA NI IVAVAKOSO

³⁵ E tiko eso na itavi eratou qarava na Komiti ni Cakacaka ni iVavakoso, qori na kodineita ni ilawalawa qase, na vunivola kei na ivakatawa ni cakacaka. Kena ivakaraitaki, ena vakadonuya na komiti ni cakacaka me vakayagataki na Vale ni Soqoni ena vakamau, vunau ni veibulu, me lewa tale ga na iwasewase lailai mera dui lesi kina na dautukutuku. Ena vakadonuya tale ga na ivolakerekere ni painia tudei kei na painia veivuke, kei na so tale na taba ni veiqaravi va qo. Na komiti ni cakacaka ena muria na nodratou veidusimaki na ilawalawa qase.

³⁶ Na nodra itavi na tacida qo, wili kina na qasenivuli ni Vuli ni Vale ni Vakatawa, na ivakatawa ni Soqoni ni Bula vaKarisito kei na Cakacaka Vakaitalatala, kei na vo ni ilawalawa qase, e dau vakamatatataki mai na valenivolavola ni tabana.

³⁷ Ena bose wasoma na ilawalawa qase mera veivosakitaka na veika e vauca na toso vakayalo ni ivavakoso. Me ikuri ni nodratou bose na qase donuya nona veisiko na ivakatawa ni tabacakacaka, me dua tale na bose ni oti e tolu na vula nona veisiko na ivakatawa ni tabacakacaka. Sa macala tu ga ni na basika mai ena so na gauna eso na ka e vinakati me veivosakitaki vakatotolo.

MO DAU VAKAMALUMALUMU

³⁸ Era sega ni uasivi na ivakatawa, ia e dodonu mera vakamalumalumu na lewe ni ivavakoso vei ira, qori e nona ituvatuva sara ga o Jiova. Era na dui saumitaro vei Jiova na ivakatawa ena nodra qarava na nodra itavi, nira matataki koya kei na nona veiliutaki. E tukuni ena Iperiu 13:17: “Moni talairawarawa vei ira era liutaki kemuni tiko moni vakamalumalumu tale ga, nira yadravi kemuni tiko ra qai saumitaro kina, me rawa nira veiqaravi ena marau sega ena rarawa, ni na sega ni yaga qo vei kemuni.” O Jiova e dau vakayagataka na yalona tabu me lesi ira na tagane mera veiqaravi, ena vakayagataka tale ga na yalo tabu qori me vakacegui ira na ivakatawa era sega ni vakaraitaka na itovo e okati ena vua ni yalo tabu, qai sega ni salavata kei na ivakatagedegede vakaivolatabu.

³⁹ Meda vakavinavinakataka mada ga na cakacaka levu era cakava tiko na ivakatawa ena ivavakoso kei na nodra ivakaraitaki vinaka. Ena nona volavola o Paula ina ivavakoso mai Cesalonaika, e uqeti ira na mataveitacini: “Keitou kerei kemuni raveitacini moni dokai ira na cakacaka vakaukaua ena kemuni maliwa, o ira na vakatawai kemuni ena cakacaka ni Turaga, o ira na dau vakasalataki kemuni, moni dokai ira vakalevu ni lomani ira ena vuku ni nodra cakacaka.” (1 Ces. 5:12, 13) Na nodra cakacaka vagumatua na ivakatawa ena ivavakoso e vakarawarawataka noda qarava na Kalou, eda marautaka tale ga. Ena imatai ni ivola i Paula vei Timoci, a cavuta na rai dodonu me tiko vei ira ena ivavakoso me baleti ira na ivakatawa ena nona kaya: “Mera rokovi vakalevu na qase era qarava vinaka na nodra itavi, vakabibi o ira na gumatua ena nodra tukuna kei na nodra vakavulica na vosa ni Kalou.”—1 Tim. 5:17.

SO TALE NA ITAVI BIBI ENA ISOQOSOQO

⁴⁰ Ena so na gauna, era dau lesi eso na qase mera iLawalawa Dauveisiko e Valenibula. Eso tale era veiqaravi ena Komiti Veitaratara kei na Valenibula, era sikovi ira na vuniwai kei na valenibula, mera veivosakitaka na sala e rawa nira qaravi tiko ga kina na iVakadinadina i Jiova ni sega ni vakayagataki na dra. Eso tale na qase era tokona na Matanitu ni Kalou nira veivuke ena tara Vale ni Soqoni se veiqaravi ena Komiti ni Vale ni Soqoni Lelevu se komiti e cicivaka na soqo ni veiwasewase. Eda marautaka kece na nodra cakacaka vakaukaua kei na nodra soli ira vakarawarawa na tacida qori mera veiqaravi. Io, eda “vakamareqeti ira tale ga na tagane” va qori.—Fpai. 2:29.

IVAKATAWA NI TABACAKACAKA

⁴¹ E tuvanaka na iLawalawa Dauvakatulewa na nodra lesi eso na qase matua mera ivakatawa ni tabacakacaka. O ira qo e lesi ira na valenivolavola ni tabana mera dau sikova na ivavakoso kece ena dua na tabacakacaka, era dau veisiko vakarua ena dua na yabaki. E tiko tale ga na gauna era na sikovi ira kina na painia ena yalava tu yawa. Era vakarautaka vinaka nodra ituvatuva ni veisiko ra qai tukuna rawa ena ivavakoso ni se vo levu na gauna me rawa ni yaga na veisiko.

⁴² Ena liu sara ga na kodineita ni ilawalawa qase me tuvanaka na veika e vauca na veisiko, me veivakabulabulataki vei ira ena ivavakoso. (Roma 1:11, 12) Ni sa taura na kodineita ni ilawalawa qase na itukutuku ni nona veisiko na ivakatawa ni tabacakacaka kei na veika ena vinakata o koya kei na watina (ke vakawati), ena veitaratara sara kei na vica na mataveitacini ena ivavakoso me vakarautaki na icili, kei na so tale na ka e vinakata. Ena vakadeitaka me kilai ena ivavakoso na ituvatuva ni veisiko, me kila tale ga na ivakatawa ni tabacakacaka.

⁴³ Ena veitaratara na ivakatawa ni tabacakacaka kei na kodineita ni ilawalawa qase ena ka e vauca na tuvanaki ni soqoni vaka kina na cakacaka vakavunau ena macawa ni veisiko. Na veika e tuvanaki ena salavata kei na ka e vakatura na ivakatawa ni tabacakacaka kei na veidusimaki mai na valenivolavola ni tabana. E dodonu mera kila rawa tu na mataveitacini na gauna ni soqoni vakaivavakoso, bose ni painia, bose ni qase kei na dauveiqaravi ni ivavakoso, na vanua kei na gauna ena vakayacori kina na sota ni cakacaka vakavunau.

⁴⁴ Ena dikeva na ivakatawa ni tabacakacaka ena yakavi ni Tusiti na Kad ni Dautukutuku ni iVavakoso, ivolatukutuku ni iwiliwili e dau tiko ena soqoni, na mape ni yalava e cakacakataki kei na akaude. Ena kila kina na veika e gadrevi ena ivavakoso, kei na sala me vukei ira kina era lesi mera qarava na tabana qo. Me raica na kodineita ni ilawalawa qase ni sa tu kece na ivolatukutuku me dikeva na ivakatawa ni tabacakacaka.

⁴⁵ Ena gauna ni veisiko, ena saga na ivakatawa ni tabacakacaka me veivosaki yadua kei ira ena ivavakoso ena soqoni, ena cakacaka vakavunau, ena gauna ni kana, kei na so tale. Kena ikuri, ena bose vata kei ira na qase kei na dauveiqaravi ni ivavakoso ni veivosakitaka na ivakasala vakaivolatabu, eso na vakatutu, ena vakayaloqaqataki ira tale ga mera qarava vinaka na nodra itavi nira vakatawani ira tiko na qelenisipi. (Vkai. 27:23; Caka. 20:26-32; 1 Tim. 4:11-16) E bose vata tale ga kei ira na painia me vakayaloqaqataki ira ena nodra cakacaka, me raica tale ga na sala e rawa ni vukei ira kina ke ra sotava tiko eso na ituvaki dredre ena cakacaka vakaitalatala.

⁴⁶ Ke tiko eso na ka e dodonu me dikevi, e rawa ni veivuke kina na ivakatawa ni tabacakacaka. Ke sega ni qaravi vakaoti ena macawa ni veisiko, e rawa ni vukei ratou na qase kei na so tale mera vakekeli ena idusidusi vakaivolatabu. Ke vinakati na veivuke ni valenivolavola ni tabana, me vakauta na ivakatawa ni tabacakacaka kei ratou na qase e dua na ripote matata ina valenivolavola ni tabana.

⁴⁷ Ni sikova na ivavakoso na ivakatawa ni tabacakacaka, ena dau tiko ena soqoni kece. Ena rawa ni veisau qo ena so na gauna me salavata kei na idusidusi mai na valenivolavola ni tabana. Ena vosa ena so na ulutaga e vakarautaki me veiuqeti, veivakavulici, me vakayaloqaqataka tale ga na ivavakoso. Ena saga me uqeta na veilomani kei na yalo ni vakavinavinaka vei Jiova, Jisu Karisito, kei na isoqosoqo.

⁴⁸ Dua na inaki levu ni nona veisiko na ivakatawa ni tabacakacaka me uqeti ira na dautukutuku mera gumatua ena cakacaka vakavunau, me vakarautaka tale ga na vakatutu ena yaga vei ira. De dua e rawa nira veisautaka nodra ituvatuva e levu ena ivavakoso mera vakaitavi vakalevu kina ena cakacaka vakavunau ena macawa ni veisiko. E rawa nira painia veivuke ena macawa ni veisiko. Ke so era via cakacaka kei koya se watina, mera vola na yacadra. Ena yaga tale ga vakalevu na nomu sureta na ivakatawa ni tabacakacaka se watina ina nomu vuli iVolatabu se veisikovi lesu. Oni vakacaucautaki ena nomuni dau veitokoni ena macawa ni veisiko.—Vkai. 27:17.

⁴⁹ E dau caka e veiyabaki e rua na soqo ni tabacakacaka. E nona itavi na ivakatawa ni tabacakacaka me tuvanaka na rua na soqo qo. Ena lesia e rua me rau cicivaka: ovasia ni soqo kei na nona ivukevuke. Erau na cakacaka vakavoleka kei na ivakatawa ni tabacakacaka ena vakarautaki ni soqo. Sa na qai galala na ivakatawa ni tabacakacaka me kauaitaka vakatabakidua na porokaramu ni soqo. Ena lesia tale ga na ivakatawa ni tabacakacaka eso na tagane matua mera veiqaravi ena so tale na tabana. Ena raica tale ga me dua e dikeva na akaude ni tabacakacaka ena gauna sa na oti kina na soqo. Dua vei rau na soqo ni tabacakacaka qori ena mata mai kina e dua mai na valenivolavola ni tabana. Me vaka ni veiyawaki eso na tabacakacaka se sega ni veirauti na vanua ni soqo, e wasewasei kina vakalalai na tabacakacaka qai caka na soqo ena wasewase yadua qori.

⁵⁰ Ni cava na vula, ena vakauta na ivakatawa ni tabacakacaka nona ripote ina valenivolavola ni tabana. Na valenivolavola ni tabana ena solia vua na ivakatawa ni tabacakacaka na levu ni ilavo e vakayagataka ena loma ni dua na vula ena ka e vauca nona veitosoyaki, kakana, icili, kei na veika tale eso e qarava rawa tiko kina nona cakacaka, ke ra sega ni sauma na ivavakoso. Era nuidei tu na ivakatawa ni tabacakacaka ni na vakarautaki na ka era gadreva vakayago ke ra vakaliuca tiko ga na Matanitu i Jiova, me vaka a yalataka o Jisu. (Luke 12:31) E dodonu mera raica vakabibi na ivavakoso na nodra itavi mera kauaitaki ira na qase qo, nira soli ira mera veiqaravi.—3 Joni 5-8.

KOMITI NI TABANA

⁵¹ E dau lesi e tolu se sivia na tacida matua mera lewe ni Komiti ni Tabana ena valenivolavola ni tabana ni iVakadinadina i Jiova e veiyasa i vuravura mera qarava na cakacaka vakavunau ena nodra dui vanua, se veimatanitu era qarava na kena cakacaka. Dua vei ratou na komiti ena lesi me Kodineita ni Komiti ni Tabana.

⁵² Eratou raica na Komiti ni Tabana na veika kece e baleta na ivavakoso ena yalava e qarava na valenivolavola. Eratou qarava na komiti na vunautaki ni itukutuku vinaka ni Matanitu ni Kalou ena yalava eratou veiqaravi kina. Na Komiti ni Tabana e raici ira tale ga na daukaulotu era veiqaravi voli ena yalava, wili kina o ira na painia lavotaki, painia tudei, kei na painia veivuke. Ni vakayacori na soqo ni tabacakacaka se soqo ni veiwasewase, o ira na tacida qo era na raica “na ka kece e caka me rakorako qai tuvanaki vakamatau.”—1 Kor. 14:40.

⁵³ Ena so na vanua, era dau qarava na cakacaka na Komiti ni Tabana mai na duatani tale na matanitu, ia ena lesi tale ga na kena Komiti ni Vanua. Qo e vakarawarawataka na qaravi ni cakacaka ena vanua e veiqaravi kina na Komiti ni Vanua. Na komiti qo e qarava na cakacaka e Peceli kei na valenivolavola, e ciqoma na ivola kece e vakau yani kei na ripote, e qarava tale ga na veika e vauca na cakacaka vakavunau. Erau cakacaka vakavoleka na Komiti ni Vanua kei na Komiti ni Tabana me vakatetei tiko ga kina na itukutuku vinaka ni Matanitu ni Kalou.

⁵⁴ Na iLawalawa Dauvakatulewa e lesia na Komiti ni Tabana kei na Komiti ni Vanua.

MATA MAI NA VALENIVOLAVOLA LIU

⁵⁵ E tiko na gauna e dau lesia na iLawalawa Dauvakatulewa eso na tacida matua mera sikova na valenivolavola ni tabana ena veiyasa i vuravura. O ira na tacida qo era dau vakatokai mera mata mai na valenivolavola liu. E nodra itavi mera uqeti ira na vuvale e Peceli, mera vukei ira na Komiti ni Tabana ena so na leqa se taro era na via taroga me baleta na cakacaka vakavunau kei na veivakatisaipelitaki. Ena sota kei ira na vica na ivakatawa ni tabacakacaka, so tale ga na gauna ena sota kei ira na daukaulotu. Era na veivosakitaka na leqa kei na veika era gadreva, era na veivakayaloqaqataki ena ka e vauca nodra itavi bibi duadua, na vunautaki ni itukutuku ni Matanitu ni Kalou kei na nodra veivakatisaipelitaki.

⁵⁶ Ena via raica tale ga na mata mai na valenivolavola liu na ka sa rawati ena yalava, vakabibi na veika e vauca na vunau kei na cakacaka ni ivavakoso. Ke levu na gauna, e rawa ni sikova na valenivolavola ni vakadewa tuyawa. Ena vakaitavi tale ga ena cakacaka vakavunau ke rawa.

VEIQARAVI ENA YALOLOLOMA

⁵⁷ E yaga vakalevu na nodra gugumatua kei na nodra veiqaravi ena yalololoma na tagane matua. Nida vakamalumalumu tiko ga vei ira era lesi mera qaravi ira na qelenisipi, eda na duavata kei na Ulu ni ivavakoso, o Karisito Jisu. (1 Kor. 16:15-18; Efeso 1:22, 23) Ni yaco qori, ena sobuta na yalo tabu ni Kalou na ivavakoso kece e vuravura raraba, ena dusimaka tale ga na cakacaka na Vosa ni Kalou.—Same 119:105.