Me Io Ga na Nomu Io

“Me Io ga na Io, me Sega na Sega.”​—MACIU 5:37.

O RAWA NI SAUMA?

Na cava a tukuna o Jisu me baleta na bubului?

Na cava e ivakaraitaki vinaka kina o Jisu ena nona dina tiko ga ena ka e tukuna?

Ena gauna cava e dodonu kina me Io ga na noda Io?

1. Na cava a tukuna o Jisu me baleta na bubului, na cava na vuna?

E SEGA ni gadrevi meda bubului na lotu vaKarisito dina, baleta nida talairawarawa ena ka e tukuna o Jisu: “Me Io ga na Io.” A vakaibalebaletaka tiko o koya meda daudina ena ka eda tukuna. A tekivuna na ivakaro ya ena nona kaya: “Mo kua ni bubului wale.” A tukuna qori baleta ni sega ni taleitaka na kena sa ivakarau tu ni nodra bula e levu mera bubuluitaka e dua na ka, ia e sega sara ga ni nodra inaki mera cakava. O ira qori era sega ni tukuna ga Io se Sega, era via bubului sara ga mera vakaraitaka kina na ka era na cakava. Na ka era cakava qori e vakaraitaka nira sega ni nuitaki, sa rawai ira sara tiko ga na “Vunica.”​—Wilika Maciu 5:33-37.

2. Vakamacalataka na vuna e sega ni cala kina ena so na gauna meda bubului.

2 A sega ni tukuna o Jisu ni cala na bubului. Eda vulica ena ulutaga sa oti na nodrau bubului ena so na ka bibi na Kalou o Jiova kei na nona tamata yalodina o Eparama. E tukuna tale ga na Lawa ni Kalou ni dodonu me caka na bubului me wali kina eso na veileti. (Lako 22:10, 11; Tiko 5:21, 22) De na gadrevi vua e dua na lotu vaKarisito e vakadinadina ina mataveilewai me bubuluitaka ni na tukuna na ka dina. Ena so na gauna ena rairai nanuma e dua na lotu vaKarisito me bubului me vakadeitaka kina ni na cakava dina e dua na ka, se ni tukuna tiko na ka dina me baleta e dua na leqa. O Jisu mada ga a sega ni saqata na nona vakarota na bete levu me bubului, a tukuna ga na ka dina vei ira na lewe ni Sanadrini era Jiu. (Maciu 26:63, 64) A sega ni gadrevi vei Jisu me bubului vua e dua. Ia me vakaraitaka ni nuitaki na ka e tukuna, e dau kaya: “Au tukuna vakadodonu vei kemudou [kena ibalebale, ‘E dina, e dina’].” (Joni 1:51; 13:16, 20, 21, 38) Meda raica mada eso tale na ka eda rawa ni vulica vei Jisu, Paula kei na so tale e dau Io ga na nodra Io.

JISU​—IVAKARAITAKI UASIVI

3. Na cava a yalataka o Jisu ena nona masu vua na Kalou, na cava e qai cakava o Tamana?

3 “Raica! Au lako mai . . . meu cakava na nomuni inaki, na Kalou.” (Iper. 10:7) A cavuta o Jisu na vosa bibi qori ena gauna e soli koya kina vua na Kalou me cakava na ka kece e parofisaitaki me baleta na Kawa yalataki, wili kina na nona ‘qaqia na bukubukuniyavana’ o Setani. (Vkte. 3:15) E sega ni dua tale na tamata e bau bole me cakava na itavi bibi qori. A tukuna sara ga mai lomalagi o Jiova na nona nuitaka vakaoti na Luvena, e dina ga ni sega ni tukuna vei Jisu me bubuluitaka ni na dina ena ka e tukuna.​—Luke 3:21, 22.

4. A vakaraitaka vakacava o Jisu ni Io ga na nona Io?

4 A dau vakayacora o Jisu na ka e vunautaka ena nona vakadeitaka me Io ga na nona Io. A sega ni vakalaiva e dua na ka me vakawelei koya ena itavi a lesia vua o Tamana, oya me vunautaka na itukutuku vinaka ni Matanitu ni Kalou, me vakatisaipelitaki ira tale ga e vagolea vua o Jiova. (Joni 6:44) Na nona daudina o Jisu ena ka e tukuna e vakadeitaki ena vosa kilai levu qo ena iVolatabu: “Se mani levu vakacava na ka e yalataka na Kalou, era Io kece ga ena vuku i luvena.” (2 Kor. 1:20) Io, e ivakaraitaki uasivi o Jisu ena nona vakayacora sara ga na ka e yalataka vei Tamana. Meda raica mada qo e dua a saga ena nona vinaka taucoko me vakatotomuri Jisu.

PAULA​—NA TURAGA DAUDINA

5. Na cava eda rawa ni vulica vua na yapositolo o Paula?

5 “Na cava meu cakava Turaga?” (Caka. 22:10) Qori na ka a cavuta o Saula, a qai vakatokai e muri me o Paula ni rairai vua na Turaga o Jisu. A sega ni vinakata o Jisu me vakacacani ira tiko na lotu vaKarisito o Saula. A yalomalumalumu o Saula qai veivutunitaka na ka e cakava, a papitaiso sara, a ciqoma tale ga na itavi lavotaki me vunautaka na itukutuku vinaka me baleti Jisu ena veimatanitu. Me tekivu mai na gauna ya, a vakatokai Jisu tiko ga o Paula me nona “Turaga” qai talairawarawa vua ena gauna taucoko ni nona bula e vuravura. (Caka. 22:6-16; 2 Kor. 4:5; 2 Tim. 4:8) O Paula a sega ni vakataki ira eso a tukuna vei ira o Jisu: “Na cava oni kacivi au kina, ‘Turaga! Turaga!’ ia oni sega ni muria na noqu vosa?” (Luke 6:46) Io, e namaka o Jisu vei ira kece era vakatokai koya me Turaga mera daudina ena ka era tukuna me vakataki koya na yapositolo o Paula.

6, 7. (a) Na cava a nakita kina o Paula me sikovi Korinica ena dua tale na gauna? Na cava e cala kina na nodra tukuna eso ni sega ni nuitaki o Paula? (b) Meda raici ira vakacava era lesi mera liutaki keda?

6 A gumatua o Paula me wasea na itukutuku vinaka ni Matanitu ni Kalou ena yasayasa kece e Esia Lailai kei Urope, e tauyavutaka qai sikova tale e levu na ivavakoso. Ena so na gauna a bubuluitaka ni dina na ka e vola. (Kala. 1:20) Nira beitaki Paula eso mai Korinica ni sega ni nuitaki, e sabaya qori ena nona kaya: “Ni daudina na Kalou, keitou na sega gona ni vakaio, oti me keitou vakasega tale.” (2 Kor. 1:18) Ena gauna e volavola kina qori o Paula sa biubiu mai Efeso, sa yaco tiko e Masitonia ena nona ilakolako i Korinica. A nona inaki taumada me sikovi Korinica tale ni bera ni lako i Masitonia. (2 Kor. 1:15, 16) Ia me vakataki ira ga na ivakatawa dauveilakoyaki nikua, ena rairai veisau ena so na gauna na vanua mera lakova. E tiko na vuna vinaka e caka kina na veisau qori, de dua e basika e dua na ituvaki e vinakati vakatotolo me caka kina e dua na ka. A nakita gona o Paula me sikovi Korinica ena dua tale na gauna ni na yaga ena ivavakoso. Ena sala cava?

7 Sa cakava oti tu o Paula na nona ituvatuva, ia a rogoca ni yaco tiko e dua na leqa ena ivavakoso o Korinica. Era duiyaloyalo na mataveitacini, era vakalaiva tale ga me tiko ga ena ivavakoso e dua e vakayacora tiko na ivalavala dukadukali. (1 Kor. 1:11; 5:1) Me wali na leqa ya, a vunauca na ivavakoso o Korinica ena imatai ni nona ivola vei ira. A sega gona ni soko sara mai Efeso i Korinica, a vinakata o Paula me solia mada na gauna mera muria na tacina vakayalo na nona ivakasala me rawa ni veivakayaloqaqataki kina vakalevu na nona veisiko. Ena ikarua ni nona ivola a tukuna kina o Paula na vuna dina e veisau kina na nona ituvatuva, a vola: “E noqu ivakadinadina na Kalou. Au se sega ni lako yani i Korinica niu sega ni vinakata moni rarawa vakalevu.” (2 Kor. 1:23) Meda kua mada ga ni vakataki ira era vakalewai Paula; ia meda dokai ira era lesi mera liutaki keda. E dodonu ga meda vakatotomuri Paula me vaka na nona vakatotomuri Karisito.​—1 Kor. 11:1; Iper. 13:7.

SO TALE NA IVAKARAITAKI VINAKA

8. Na cava eda vulica vei Repeka?

8 “Au na lako.” (Vkte. 24:58) Qori na ka e tukuna o Repeka vei tinana kei ganena ena nona tu vakarau me biuta na vanua e vakaitikotiko kina ena siga sara ga oya, me lako vata kei na dua erau sega ni veikilai ena sivia na 800 na kilomita, me watina na luvei Eparama o Aisake. (Vkte. 24:50-58) A raica o Repeka me Io ga na nona Io, a wati Aisake vinaka qai yalodina ena nona qarava na Kalou. A bula voli ena valelaca ena vo ni nona bula qai tiko vulagi ena Vanua Yalataki. A vakalougatataki na nona yalodina ni a dua tale ga na tubui Jisu Karisito, na Kawa yalataki.​—Iper. 11:9, 13.

9. A dina vakacava ena ka e tukuna o Ruci?

9 “E segai, keirau na lesu vata vakaidina kei iko kivei ira na kai nomu.” (Ruci 1:10) Qori na ka erau tukuna tiko ga na yada ni Moapi o Ruci kei Oripa vua na vugodrau yada o Neomai, sa biubiu tiko mai Moapi me lesu tale i Peceliema. A kerei rau vakavica na vugona o Neomai me rau lesu ina nodrau vanua, mani lesu o Oripa. Ia a tukuna o Ruci ni na Sega ni lesu, mani Sega ni lesu. (Wilika Ruci 1:16, 17.) A dei tiko ga o Ruci me muri Neomai, a biuti ratou tale ga na nona vuvale kei na sokalou lasu mai Moapi. A vosota qai yalodina tiko ga ni qaravi Jiova qai vakalougatataki me dua vei ira na lima ga na marama e cavuti ena ivola ni kawa i Karisito e vola o Maciu.​—Maciu 1:1, 3, 5, 6, 16.

10. Na cava eda vulica vei Aisea?

10 “Koi au oqo; mo ni talai au.” (Aisea 6:8) Ni bera ni tukuna qori, a raica o Aisea e dua na raivotu lagilagi ni dabe tiko o Jiova ena nona idabedabe vakatui ena dela ni valenisoro e Isireli. Ena raivotu qori a rogoca o Aisea ni tukuna o Jiova: “Ko cei me’u tala, ia ko cei ena lako e na vuku i keitou?” A sureta tiko o Jiova e dua me nona matanivanua me vosa vei ira na nona tamata murilomadra. A cakava sara ga o Aisea na ka e tukuna​—e Io ga na nona Io. Ena sivia na 46 na yabaki, a yalodina voli ga ena nona veiqaravi vakaparofita ni vakasavuya na itukutuku bibi ni veivakarusai i Jiova kei na yalayala totoka ni kena vakalesui mai na sokalou dina.

11. (a) Na cava e bibi kina meda daudina ena ka eda tukuna? (b) O cei e volatukutukutaki ena iVolatabu ni ratou ivakaraitaki ca ena nodratou sega ni daudina?

¹¹ Na cava e volatukutukutaka kina o Jiova ena iVolatabu na ivakaraitaki eda sa veivosakitaka mai? E vakacava sara mada na bibi ni noda saga me Io na noda Io? E vakarota vakamatata na iVolatabu ni o ira era “yalayala lasu” e ‘dodonu mera vakamatei.’ (Roma 1:31, 32) E volaitukutukutaki tale ga ena iVolatabu o ira e sega ni Io na nodra Io, me vakataki Fero mai Ijipita, o Tui Setekaia e Juta, kei rau o Ananaiasa kei Safaira. Eratou a sotava kece na leqa, meda vuli gona ena nodratou ivakaraitaki.​—Lako 9:27, 28, 34, 35; Isik. 17:13-15, 19, 20; Caka. 5:1-10.

12. Na cava ena vukei keda meda dina ena ka eda tukuna?

12 Ena “iotioti ni veisiga” qo, eda bula vata tu kei ira era “sega ni yalodina . . . e vakarairai ga na nodra qarava na Kalou, e sega na kena dina.” (2 Tim. 3:1-5) Meda saga sara ga vakaukaua meda kua ni veimaliwai kei ira na ilala ca va qori. Meda veimaliwai ga vakalevu kei ira era dau saga me Io na nodra Io.​—Iper. 10:24, 25.

NA IO BIBI DUADUA

13. Na cava na ka bibi duadua era na vakaio kina na imuri i Jisu Karisito?

13 Na yalayala bibi duadua e rawa ni cakava e dua, oya na nona yalayala vua na Kalou. E tolu na ituvaki era na tarogi kina o ira era via tisaipeli i Jisu ke ra via cakava dina na ka e vinakati mera cakava. (Maciu 16:24) Ena gauna erau na taroga kina e dua e via dautukutuku bera ni papitaiso e rua na qase ni ivavakoso, erau na taroga, “O vinakata dina mo iVakadinadina i Jiova?” Ena dua na gauna e muri ni sa toso vakayalo na tacida qori qai via papitaiso, era na tarogi koya na qase ni ivavakoso, “O sa yalataka nomu bula vei Jiova ena masu?” Ena siga ni papitaiso era na tarogi kece na vakarau papitaiso, “Ena yavu ni soro i Jisu Karisito, o sa veivutunitaka na nomu ivalavala ca, o yalataki iko tale ga vei Jiova mo cakava na lomana?” Era na vakaraitaka e matanalevu o ira na ka vou qori nira vakaio ena nodra yalayala mera qarava na Kalou me tawamudu.

14. Na taro cava meda dau tarogi keda kina?

14 Ke o se qai papitaiso ga se o sa qarava tu na Kalou ena dua na gauna balavu, ena vinaka mo dau dikevi iko tale qai taroga: ‘Au vakatotomuri Jisu tiko ena noqu dina tiko ga ena ka bibi duadua au vakaio kina ena noqu bula? Au saga tiko ga meu talairawarawa vei Jisu ena noqu raica me bibi duadua ena noqu bula na cakacaka vakavunau kei na veivakatisaipelitaki?’​—Wilika 2 Korinica 13:5.

15. Ena gauna cava e dodonu kina me Io ga na noda Io?

15 Na noda dina ena noda yalayala e kena ibalebale meda yalodina ena so tale na ka bibi. Kena ivakaraitaki: O sa vakawati? Mo dei tiko ga ena vosa ni yalayala bibi o tukuna vei watimu ni o na lomani koya, o na mareqeti koya tale ga. O sainitaka beka e dua na konitaraki se vakalewena e dua na fomu mo vakarabailevutaka nomu veiqaravi ena ivavakoso se na isoqosoqo? Mo vakayacora sara na ka o yalataka. O vakaio beka ena nona veisureti e dua ena ivavakoso e sega sara ni rawati koya mo lai kana ena nona vale? Mo kua ni vakadaroya na veisureti qori mo lako ena dua na veisureti e vinaka cake. Se o yalataka beka vua e dua ena cakacaka vakavunau ni o na sikovi koya tale mo lai vukei koya vakayalo? Me Io sara na nomu Io, ena qai vakalougatataka o Jiova na nomu cakacaka vakaitalatala.​—Wilika Luke 16:10.

VULI VUA NA BETE LEVU KEI NA TUI

16. Ke da sega ni vakayacora na ka eda tukuna, na cava meda cakava?

16 E tukuna na iVolatabu nida ivalavala ca, “eda dau tarabe kece,” vakabibi ena noda vakayagataka na yameda. (Jeme. 3:2) Na cava meda cakava ke da kila nida sega ni vakayacora na ka eda yalataka? Ena Lawa ni Kalou a soli vei ira na Isireli, e dua na ituvatuva vakayalololoma e vakarautaki vei ira era ‘bubului vakatotolo.’ (Vunau 5:4-7, 11) E tiko tale ga e dua na ituvatuva vakayalololoma vei ira na lotu vaKarisito era cakava na cala qori. Ke da vakatusa vei Jiova nida sega ni cakava na ka eda yalataka, ena vosoti keda ena vukuna na noda Bete Levu o Jisu Karisito. (1 Joni 2:1, 2) Me vakadonui keda tiko ga na Kalou, e dodonu meda vakaraitaka na vua ni noda veivutuni ena noda sega ni cakava tale na cala qori, da qai saga ena noda vinaka taucoko meda vakadodonutaka na leqa sa mai yaco ena noda bubului vakatotolo. (Vkai. 6:2, 3) Ena vinaka cake meda vakasama vakavinaka ni bera nida yalataka e dua na ka eda na sega ni vakayacora.​—Wilika Dauvunau 5:2.

17, 18. Na veika totoka cava era vakanamata tu kina o ira era saga me Io ga na nodra Io?

17 Sa dua dina na ka totoka era vakanamata tu kina na dausokaloutaki Jiova era saga tiko ga me Io na nodra Io! O ira na lumuti era le 144,000 sa ra vakanuinui tu ena bula tawamate e lomalagi, era na tokoni Jisu ena nona Matanitu mera “veiliutaki vakatui vata kei koya me duanaudolu na yabaki.” (Vkta. 20:6) Ia vei ira na vica vata tale na milioni, era na vakila ena vuravura parataisi na yaga ni veiliutaki ni Matanitu ni Kalou, e kena Tui o Karisito. Era na vukei ena gauna qori me uasivi tale na yagodra kei na nodra vakasama.​—Vkta. 21:3-5.

18 Ke da yalodina ena iotioti ni veivakatovolei ni cava na duanaudolu na yabaki ni veiliutaki i Jisu, ena sega tale ni dua na vuna meda vakatitiqataka kina na nona vosa e dua tale. (Vkta. 20:7-10) O ira kece era na bula ena gauna qori ena Io ga na nodra Io, qai Sega na nodra Sega. Ena uasivi sara na nodra vakatotomuria na Tamada dauloloma o Jiova, “na Kalou daudina.”​—Same 31:5.