Na Cava Mo Cakava ni O sa “Kila na Kalou”?
“Oni sa kila na Kalou.”—KALA. 4:9.
1. Na cava me muria kina na pailate na lisi ni ka me dikeva ni bera na vuka?
O IRA na pailate era dau vukataka na waqavuka vinaka duadua me bau buli, e tiko na lisi ni ka mera dikeva ena waqavuka ni bera na vuka, e rawa ni sivia na 30 na ka mera dikeva. Ke ra sega ni muria vinaka na lisi ena gauna kece ni bera na vuka, sa vakarawarawataka sara tiko ga o pailate na kena yaco na vakacalaka. O kila na pailate vakacava era dau uqeti mera dikeva vinaka na lisi qori ena gauna kece era vuka kina? Io, o ira na pailate sa dede voli mai na nodra vuka! Na pailate sa dede na nona vuka e rawa ni wele, qai sega ni muria vakamatailalai na ka kece me dikeva ni se bera na vuka.
2. Na lisi cava e vakatututaki meda vakayagataka na lotu vaKarisito?
2 Me vakataki ira ga na pailate era dau qaqarauni, o rawa ni vakayagataka tale ga e dua na lisi mo vakadeitaka kina ni na sega ni voca na nomu vakabauta ni basika na ituvaki dredre. Ke o se qai papitaiso ga se o qaravi Jiova voli mai me vica vata na yabaki, e bibi mo dikeva wasoma na titobu ni nomu vakabauta kei na ivakarau ni nomu qarava na Kalou o Jiova. Ke o sega ni cakava wasoma o qai sega ni qacoya qori, o na vakaleqai vakayalo. E vakasalataki keda na iVolatabu: “Me qaqarauni o koya e nanuma ni sa tudei tu, de qai bale.”—1 Kor. 10:12.
3. Na cava a vinakati mera cakava na lotu vaKarisito mai Kalatia?
3 A vinakati vei ira na lotu vaKarisito mai Kalatia mera dikeva na titobu ni nodra vakabauta, mera vakamareqeta tale ga na nodra sereki vakayalo. Ena vuku ni isoro i Jisu, e rawa kina vei ira era vakabauti koya mera kila na Kalou ena sala vakasakiti duadua—a rawa sara ga nira luve ni Kalou! (Kala. 4:9) Me rawa nira dei tiko ga ena veiwekani vakasakiti qori, ena vinakati vei ira mai Kalatia mera cata na ivakavuvuli vakaJiu e surevaki kina mera muria na Lawa a soli vei Mosese. O ira mada ga na kai Veimatanitu era tawacili ena ivavakoso era sega ni bau vauci ena Lawa! A vinakati ruarua vei ira na Jiu kei ira na kai Veimatanitu mera toso vakayalo. Qori e wili kina na nodra kila nira na sega ni okati mera yalododonu ena nodra muria na Lawa a soli vei Mosese.
ITEKITEKIVU NI NODA KILA NA KALOU
4, 5. A veivakasalataki ena cava o Paula vei ira mai Kalatia, e bibi vakacava qori vei keda nikua?
4 A tiko na inaki ni kena volatukutukutaki na nona ivakasala na yapositolo o Paula vei ira e Kalatia: me vukei ira na lotu vaKarisito dina ena itabagauna cava ga mera kua ni vakanadakuya na ka dina ena iVolatabu mera lesuva na ka era sa biuta tu yani. O Jiova e uqeta na yapositolo o Paula me uqeti ira na ivavakoso mai Kalatia kei ira kece na nona dauveiqaravi mera tudei.
5 E vinaka meda dau vakasamataka lesu na sala eda sereki kina mai na veivakabobulataki vakayalo, kei na noda dua na iVakadinadina i Jiova. E rua na taro qo ena vukei keda meda cakava qori: O se nanuma tiko na ikalawa o cakava mo rawata kina na ivakatagedegede ni papitaiso? O se nanuma tiko na sala o mai kila kina na Kalou qai kilai iko o koya, mo rawa ni marautaka na veisereki dina vakayalo?
6. Na lisi cava eda na veivosakitaka?
6 Eda muria kece e ciwa na ikalawa. Na ikalawa qori e vaka na lisi vakayalo meda dikevi keda kina, era tuvani toka ena kato “iKalawa o Cakava mo Papitaiso Qai Toso Tiko ga Vakayalo.” Na noda vakasamataka wasoma na ciwa na ikalawa qori ena vakaukauataki keda meda kua ni lesuva na veika vakavuravura. Ena sega ni sotava na vakacalaka na pailate sa dede na nona vuka qai dau qaqarauni ena nona dikeva e liu na nona lisi. O na rawa tale ga ni veiqaravi tiko ga ena yalodina ke o dau railesuva na lisi vakayalo mo dikevi iko kina.
TOSO TIKO GA VAKAYALO O IRA E KILAI IRA NA KALOU
7. Na ivakarau cava e bibi meda muria, na vuna?
7 Na lisi e dau dikeva na pailate ena vukei koya me kua ni guilecava ni tiko e dua na ivakarau me muria vinaka sara ena gauna kece ni nona vuka. Qori tale ga na ka eda rawa ni cakava, oya meda dikevi keda wasoma kei na ivakarau eda sa muria voli mai ni oti na noda papitaiso. A vola o Paula vei Timoci: “Taura matua tiko ga na ivakarau ni vosa dina o rogoca vei au, ni o vakaraitaka na vakabauta kei na loloma i Karisito Jisu.” (2 Tim. 1:13) Na “vosa dina” qori e tiko ena Vosa ni Kalou. (1 Tim. 6:3) Na ka mada ga e droinitaka vakacaca e dua na kenadau, eda sa rawa ni kila toka kina na ka e via droinitaka. E va tale ga qori na ‘ivakarau ni ka dina,’ e vakamacalataka vakararaba vei keda na ka e vinakata o Jiova meda kila da qai muria sara. Meda raica mada qo na ikalawa eda cakava me lai yaco sara ena noda papitaiso, meda kila kina se vakacava na vinaka ni noda muria na ivakarau ni ka dina.
8, 9. (a) Na cava meda tubu tiko ga kina ena kilaka kei na vakabauta? (b) Tukuna na ivakatautauvata e laurai kina na bibi ni tubu vakayalo kei na vuna me kua ni cegu kina qori.
8 Na imatai ni ikalawa ena noda lisi, oya na rawati ni kilaka. Sa na qai rawa nida bucina na vakabauta. Ia e dodonu meda tubu tiko ga ena kilaka kei na vakabauta. (2 Ces. 1:3) Na tubu e okati kina na kena vakayacori vakalalai na veiveisau. Na “tubu” e kena ibalebale me vakalevutaka se vakarabailevutaka. Ni oti gona na noda papitaiso, ena vinakati meda tubu tiko ga vakayalo, meda kua kina ni tu vakadua.
9 Eda rawa ni vakatauvatana na noda tubu vakayalo ina tubu ni dua na vunikau. Ena rairai tubu e dua na vunikau me lai vakaitamera sara, vakabibi ke titobu se rabailevu na vanua e ti kina na wakana. Kena ivakaraitaki, na balavu ni so na vu ni sitari mai Lepanoni e rawa ni vaka na cere ni vale e taba tinikarua, e kaukaua qai ti na wakana, na tolona tale ga e rawa ni 12 na mita na kena raba. (Sere 5:15) Ni sa cegu na tubu ni sovuna, ena tubu tiko ga na vunikau, ia ena sega ni laurai levu. Ena raba tiko na tolona e veiyabaki, ena ti sobu qai sala na wakana, lai yaco sara me dua na vunikau kaukaua. E va tale ga qori na noda tubu vakayalo na lotu vaKarisito. Ena rairai totolo na noda tubu vakayalo nida se qai vulica na iVolatabu, da papitaiso sara. Era marau na mataveitacini nira raica na noda toso. De dua eda rawata sara na ivakatagedegede meda painia se so tale na itavi dokai. Ni toso tiko na yabaki, sa na rairai sega ni laurai levu na noda tubu tiko ga vakayalo. Ia e bibi meda tubu tiko ga ena vakabauta kei na kilaka, “meda tamatabula, meda yacova taucoko sara na ivakarau ni bula i Karisito.” (Efeso 4:13) Nida cakava qori, e vaka ga nida tubu mai na dua na sorenikau lailai ina dua na vunikau kaukaua qai bulabula, se dua na lotu vaKarisito matua.
10. Na cava e bibi kina mera toso tiko ga vakayalo o ira na lotu vaKarisito matua?
10 E sega ni dodonu me yala ga e keri na noda tubu. Na noda kilaka e dodonu me vakalevutaki, na noda vakabauta tale ga me vakatitobutaki. Nida cakava qori, eda sa na qai dei ga ena Vosa ni Kalou. (Vkai. 12:3) Qori na ka era sa cakava e levu na mataveitacini ena ivavakoso. Kena ivakaraitaki, e raica e dua na tacida tagane sa sivia na tolusagavulu na yabaki na nona qase ni ivavakoso ni se tubu tiko ga vakayalo. E kaya: “Au sa qai taleitaka ga vakalevu na iVolatabu. Au se kunea tiko ga e levu na sala vovou meu bulataka kina na ivakavuvuli kei na lawa ena iVolatabu. E tubu tale tiko ga na noqu taleitaka na cakacaka vakaitalatala.”
ME TUBU NA NOMU VEITOKANI KEI NA KALOU
11. Eda na kilai Jiova vinaka vakacava ni toso na gauna?
11 Na noda tubu vakayalo e okati kina na noda toro voleka vei Jiova, me noda itokani, me Tamada tale ga. E sega ni vinakata meda nanuma nida tawayaga. E vinakata meda kila nida lomani, nida na taqomaki tale ga me vaka ga e vakila e dua na gone ni mokoti koya na nona itubutubu dauloloma, se na ka eda vakila nida veimaliwai kei na dua na noda itokani dredre. Eda kila ni noda veiwekani kei Jiova e sega ni bucini ena dua na gauna lekaleka. E taura na gauna meda mai kilai koya, da lomani koya tale ga. Mo rawa ni kilai Jiova vinaka, vakadeitaka me tiko na gauna mo wilika kina e veisiga na nona Vosa. Mo wilika tale ga na itabataba kece ni Vale ni Vakatawa kei na Yadra! kei na so tale na ivola vakaivolatabu.
12. Na cava meda cakava me rawa ni kilai keda o Jiova?
12 Era tubu vakayalo na itokani ni Kalou ena nodra dau masu mai vu ni lomadra, kei na nodra vakailala vinaka. (Wilika Malakai 3:16.) O Jiova ‘e rogoca na nodra vakamamasu.’ (1 Pita 3:12) Me vaka ga e dua na itubutubu dauloloma, o Jiova e dau rogoca na noda masu ni kere veivuke. Koya gona, ena vinakati meda “gumatua ena masu.” (Roma 12:12) E gadrevi na veivuke ni Kalou meda rawa ni dua tiko ga kina na lotu vaKarisito matua. Dua na ka na levu ni veitemaki ni vuravura, ena sega ni rawa kina meda vorata ena noda kaukaua ga. Ke da sega ni dau masu vagumatua, eda sa tagutuva na nona rawa ni vakaukauataki keda na Kalou. Vakacava o nanuma ni sa vinaka tiko na ivakarau ni nomu masu, se o nanuma ni dodonu mo vakavinakataka?—Jere. 16:19.
13. Na cava e bibi kina ena noda tubu vakayalo na noda veimaliwai kei ira na tacida vaKarisito?
13 Dua na ka na nona taleitaki ira era “vakararavi vua” o Jiova. Nida sa mai kila gona na Kalou, e vinakati meda dau veimaliwai tiko ga kei ira era kilai koya. (Neumi 1:7) E vutucoqa ena vuravura qo na ituvaki e dau veivakayalolailaitaki, e ka vakayalomatua kina meda dau veimaliwai kei ira na mataveitacini era dau veivakayaloqaqataki. Ena yaga vakacava qori vei keda? Era tiko ena ivavakoso na tacida era na uqeti iko ena ‘veilomani kei na caka vinaka.’ (Iper. 10:24, 25) Na veilomani a tukuna tiko o Paula vei ira na Iperiu ena vakilai ena dua na ilawalawa, dua na itikotiko era sokalou vata na lewena, se dua na ivavakoso. E okati ena loloma qori na noda veimaliwai kei ira na so tale na lotu vaKarisito. Mo dau dikeva gona ena nomu lisi na levu ni nomu dau tiko ena soqoni kei na nomu vakaitavi.
14. Na cava e tukuni kina ni noda veivutuni kei na noda saumaki e dodonu me caka tiko ga?
14 Me rawa nida dua na lotu vaKarisito, a vinakati meda veivutuni da qai saumaki, se meda gole tani mai na noda ivalavala ca. Na veivutuni e dua na ikalawa eda na cakava tiko ga. Nida sega ni uasivi, e se tiko ga e lomada na ivalavala ca qai vaka e dua na gata e tu vakarau me veikati. (Roma 3:9, 10; 6:12-14) Meda kua ni moceboko, meda kua tale ga ni vakalecalecava na noda malumalumu. Eda kalougata ni o Jiova e dau vosoti keda nida saga tiko meda valuta na noda malumalumu da qai vakayacora na veisau e gadrevi. (Fpai. 2:12; 2 Pita 3:9) Ena vukei keda na noda lewa vinaka na noda vakayagataka na noda gauna kei na noda iyau, da qai kua ni vakaogai keda ena ka e baleti keda ga. E vola e dua na tacida yalewa: “Au susu ena dina, ia niu tubucake tiko sa duatani na noqu rai me baleti Jiova ni vakatauvatani kei na nodra rai e levu. Au nanuma ni dodonu me rerevaki vakalevu o koya, au nanuma tale ga niu na sega ni vakamarautaki koya rawa.” Ni toso na gauna, e raica ni “vakaleqa na nona bula vakayalo” eso na ka e cakava. E kaya: “E sega ni vu ni leqa noqu sega ni lomani Jiova, au sega ga ni kilai koya. Ia dua na ka noqu masu vagumatua, oti au sa qai saumaki.” E tomana: “Au raica ni dusimaki au voli o Jiova me vaka na gone lailai, e vukei au meu vorata yadudua na ituvaki dredre, e vukei au toka vakamalua, qai vakaraitaka na ka e vinakati meu cakava.”
15. Na cava erau kila o Jisu kei Tamana?
15 “Tukuna tiko ga” na itukutuku vinaka. E tukuna qori na agilosi ni Kalou vei Pita kei na so tale na yapositolo ena gauna eratou sereki kina vakacakamana mai valeniveivesu. (Caka. 5:19-21) Io, na noda vakaitavi e veimacawa ena cakacaka vakaitalatala e dua tale na ka meda dau dikeva ena noda lisi. O Jisu kei Tamana erau kila na noda vakabauta kei na noda cakacaka vakaitalatala. (Vkta. 2:19) Me vaka ga e cavuta na qase ni ivavakoso ena dua na parakaravu e liu: “Eda kilai ena noda cakacaka vakaitalatala.”
16. Na cava e vinaka kina meda dau vakasamataka na noda yalayala vei Jiova?
16 Vakasamataka na nomu yalayala. Na ka talei duadua eda marautaka, oya na noda veiwekani kei Jiova. E kilai ira na nona tamata o Jiova. (Wilika Aisea 44:5.) Mo masulaka qai dikeva na vinaka kei na titobu ni nomu veiwekani kei Jiova. Mo nanuma tale ga na tikinisiga bibi o papitaiso kina. Ni o cakava qori, o na sega ni guilecava ni nomu papitaiso e ivakaraitaki ni vakatulewa bibi duadua o bau cakava.
KABITI JIOVA TIKO GA ENA NOMU VOSOTA
17. Na cava e bibi kina na vosota meda rawa ni kabiti Jiova tiko ga?
17 A vakamacalataka o Paula ena nona ivola vei ira e Kalatia ni bibi na vosota. (Kala. 6:9) E bibi tale ga qori vua na lotu vaKarisito ena gauna qo. O na sotava na veika dredre, ia ena vukei iko o Jiova. Masuta tiko ga na yalo tabu. O na lomavakacegu ni sosomitaka o koya na rarawa ena marau, sosomitaki na mosi ena vakacegu. (Maciu 7:7-11) Vakasamataka mada qo: Ke kauaitaki ira na manumanuvuka o Jiova, sa qai wacava sara na nona kauaitaki iko ni o lomani koya, o yalataki iko tale ga vua. (Maciu 10:29-31) Se mani ituvaki dredre cava o sotava, kua ni suka i muri; kua tale ga ni soro. E levu na ka totoka eda rawa ni marautaka baleta ni kilai keda o Jiova!
18. Na cava o via cakava ena gauna qo ni o sa “kila na Kalou”?
18 Ke o se qai kila toka ga qo na Kalou, o sa papitaiso tale ga, na cava tale mo cakava? Saga tiko ga mo kilai Jiova vinaka, mo tubu mo lai matua sara vakayalo. Vakacava ke sa vakayabaki na nomu papitaiso, na cava tale mo cakava? E dodonu tale ga mo vakatitobutaka qai vakalevutaka tiko ga na nomu kilai Jiova. Meda vakavinakataka tiko ga na noda veiwekani kei Jiova. Ni toso tiko na gauna meda dau railesuva na noda lisi vakayalo, meda vakadeitaka kina nida tubu tiko ga ena noda veiwekani kei Jiova, na Tamada dauloloma, noda itokani, e noda Kalou tale ga.—Wilika 2 Korinica 13:5, 6.