“Dou Lako Mai Vei Au, . . . Ka’u na Vakacegui Kemudou”

Na Soqoni e Veivakauqeti ena Loloma kei na Cakacaka Vinaka

MAI Toronto i Tokyo, mai Moscow i Montevideo​—vakavica ena dua na macawa e vica na milioni na iVakadinadina i Jiova kei na nodra itokani era tabili yani vakalevu ina vanua ni sokalou. Oqo era okati kina na ulunivuvale era oca tu mai ena cakacaka, marama vakawati kei na tina daucakacaka era veitomani kei na luvedra, o ira na gonevuli, o ira na sa qase, na yada, na luveniyali, kei ira na gadreva tu na vakacegu.

E duidui na sala ni veilakoyaki era vakayagataka na iVakadinadina i Jiova​—mai na sitimanivanua totolo ina manumanu na asa, na sitima ni lomaniqele era osota na pasidia kei na lori. E so era qalova na uciwai e tu kina na korokotaile, e so tale era vosota na osooso ni gaunisala ena siti lelevu. Na cava era sasaga kina vakaukaua o ira oqo?

Na vuna levu oya, ni nodra tiko ena soqoni vakarisito kei na nodra vakaitavi e tiki bibi ni nodra sokalou vei Jiova. (Iperiu 13:15) Na yapositolo o Paula e tukuna e dua tale na vuna, ena nona vola: “Me da sa vakasamataka tale ga na sala me da dui veivakauqeti kina e na loloma kei na cakacaka vinaka. Me da sa kakua ni vakaweleweletaka na sosoqoni vata, . . . me da sa dui veivakayaloqaqataki ga, ka me vagumatuataki cake sara ni ko ni sa raica ni sa roro voleka tiko mai na Siga ni Turaga.” (Iperiu 10:​24, 25, VV) E tokaruataka o Paula na ka a vakila na daunisame o Tevita, ni lagata: “Au a reki ni ra kaya vei au, tou mai lako ki na vale i Jiova.”​—Same 122:1.

Na cava era marautaka kina na lotu Vakarisito na lako ina soqoni? E sega nira lai vakararai wale tu ga, ia e dua na sala mera veikilai kina vakavinaka. Qai vakabibi ni soqoni vaka oqo e vakaraitaka nodra veiuqeti ena veilomani kei na cakacaka vinaka. Oqo na ka e veivakauqeti kina na soqoni. Na soqoni vakarisito tale ga e dua vei ira na sala e vakayacora kina o Jisu na nona parofisai: “Dou lako mai vei au, . . . ka’u na vakacegui kemudou.”​—Maciu 11:28.

E Vanua ni Vakacegu kei na Veikauaitaki

E tiko na vuna vinaka e vakabulabulataki ira kina na iVakadinadina i Jiova na soqoni. Na soqoni e vakarautaki kina na kakana vakayalo ena kena gauna dodonu mai vei koya “na dauveiqaravi yalo dina ka vuku.” (Maciu 24:​45, VV) E vakarautaki ira tale ga na dauveiqaravi i Jiova mera qasenivuli maqosa qai gugumatua ni Vosa ni Kalou. Kuria oya, e kune ena valenisoqoni na ilawalawa era veilomani, dau veikauaitaki qai dau veinanumi, era tu vakarau mera veivuke qai veivakacegui ena gauna ni rarawa.​—2 Korinica 7:​5-7.

Oqo na veika a vakila o Phillis, e dua na yada a leqa na watina ni se qai yabaki walu e dua na luvena, e dua tale e yabaki lima. Ni vakamacalataka na veivakabulabulataki ni soqoni vakarisito vei koya kei rau na luvena, e kaya: “E veivakacegui na lako ina valenisoqoni baleta nira vakaraitaka kina na mataveitacini na nodra veilomani kei na veinanumi ena nodra mokoti keda, na nodra veiuqeti vakaivolatabu kei na nodra vakatavitavi keda. Au na via tu ga kina ena veigauna kece.”​—1 Cesalonaika 5:​14.

Ni sele oti o Marie, e kaya o vuniwai ni na taura toka e ono na macawa me na qai bula vinaka. Ena vica na macawa e vakabulabula tiko kina, e sega ni rawa vei Marie me lako ina soqoni. E raica na nona vuniwai ni sa sega ni mamarau me vaka e liu. A vakayaloqaqataki koya me lako ina soqoni. A sauma o Marie ni na sega ni vakatarai koya o watina, e sega ni rau vakabauta vata, me lako ina soqoni baleta ni leqataka na nona bula. A vola o vuniwai e dua na ivola, a “vakaroti” Marie kina me lako ina valenisoqoni me lai vakayaloqaqataki qai vakaukauataki tale ga. E qai tinia o Marie: “Niu lakova ga na imatai ni soqoni, au vakila sara ga niu sa vinaka. Au kana, au moce vakavinaka ena bogi, au sega ni gunuva wasoma na wainimate ni mosi, au sa mata mamarau tale!”​—Vosa Vakaibalebale 16:24.

Na totoka ni veimaliwai ena soqoni vakarisito era vakila tale ga o ira na tani. E dua na gonevuli ni univesiti e dikevi ira na iVakadinadina i Jiova ena dua na nona lesoni me baleta na veimaliwai ena soqoni. E vola ena nona vakadidike: “Nodra kidavaki au . . . e veivakadrukai dina. . . . Era kilai tani na iVakadinadina i Jiova e nodra matamamarau, ni oqori sara ga na ka au vakila e bibi duadua ena veimaliwai.”​—1 Korinica 14:25.

E kunei ga ena ivavakoso vakarisito na vakacegu vakayalo ena vuravura ca eda bula tu kina oqo. E vanua ni vakacegu kei na veilomani. Kevaka o tiko ena soqoni, o na qai vakila na dina ni vosa ni daunisame: “Raica, na kena yaga kei na kena matavinaka, ni ra sa tiko vakayalovata na veiwekani!”​—Same 133:​1.

[Kato/iYaloyalo ena tabana e 25]

VAKACEGUI NODRA GAGADRE

E yaga vakacava vei ira na didivara na soqoni vaKarisito? Na iVakadinadina i Jiova e veiyasa i vuravura era sa tauyavutaka tiko na nodra ivavakoso na vosa vagalu. Ena yabaki 13 sa oti, e 27 na ivavakoso oqo qai 43 na iwasewase lalai era tauyavu e Mereke. Ena rauta na 40 tale na vanua, e kune kina e 140 na nodra ivavakoso na vosa vagalu. E vakarautaki na ivola vakarisito ena vidio ina 13 na vosa vagalu.

Oqo e dua na sala e vakarautaka na ivavakoso vakarisito mera vakacaucautaki Jiova kina na didivara. O Odile, e lotu Katolika e liu mai Varanise, e dau yalobibi vakalevu qai dau vakasamataka me vakamatei koya, e vakavinavinakataka na veivakavulici e ciqoma mai na iVolatabu ena soqoni vakarisito. A kaya: “Au sa bulabula vinaka, au marau tale ga. Na ka e bibi duadua niu sa kunea na ka dina. Sa qai vakainaki vei au na bula.”