Wase 17

Mai Vakacegu Vei Ira na Tamata ni Kalou

1, 2. E via tautauvata vakacava na ituvaki e tu kina edaidai na kawatamata kei ira e ravuti ira na cagilaba?

KAYA mada ni ravuta na nomu vanua e dua na cagilaba kaukaua. E bale na nomu vale, qai ca kece na ka o taukena. Sa lailai mai na kakana. E vaka me leqataki sara na kemu ituvaki. Ia o kidacala ga sa yaco mai na iyaya ni vakacoko. Dua na ka na levu ni kakana kei na isulu. E tara sara e dua na nomu vale vou. Sa na dua na ka na nomu vakavinavinaka vei koya e vakarautaka mai na ka oqori.

² E via vaka oqo e dua na ka e yaco tiko nikua. Na nodrau vukitani o Atama kei Ivi e vaka na cagi kaukaua oya e leqa sara kina vakalevu na kawatamata. Sa mai sega na itikotiko Parataisi ni kawatamata. Mai na gauna oya, e sega ni rawa vei ira na matanitu vakatamata me ra vakarautaka na ivakaruru me ra taqomaki kina na tamata mai na ivalu, basulawa, kei na veivakalolomataki. E dina ni tu na lotu, ia e vuqa era waloloi vakayalo. Mai na rai vakayalo, e vakarautaka tiko o Jiova ena gauna oqo na kakana, isulu, kei na vanua ni vakaruru. E vakayacora tiko vakacava oya?

“NA DAUVEIQARAVI YALO DINA KA VUKU”

3. E vakarautaka vakacava vua na kawatamata o Jiova na nona isolisoli, eda kila vakacava?

³ Ni veivotayaki na iyaya ni vakacoko, ena dau taurivaki e dua na matailawalawa. Oqo tale ga na sala e dau vakarautaka kina o Jiova na isolisoli vakayalo me baleti ira na nona tamata. Me kena ivakaraitaki, ena rauta na 1,500 na yabaki, era okati voli kina na Isireli me ra “ivavakoso i Jiova.” Dau maliwai ira tu e dua na matailawalawa me ra na vakadewa yani na Lawa ni Kalou. (1 Veigauna 28:8, NW; 2 Veigauna 17:7-9) E tauyavutaka na isoqosoqo vakarisito o Jiova ena imatai ni senitiuri S.K. Era duriduri sara na ivavakoso, ra qai cicivaki ena veidusimaki ni dua na ilawalawa dauvakatulewa era lewena na yapositolo kei na qase. (Cakacaka 15:22-31) Edaidai tale ga, e taurivaka tiko o Jiova e dua na mata­ilawa­lawa me dusimaki ira kina na nona tamata. Eda kila vakacava oqo?

4. O cei sara mada na “dauveiqaravi yalo dina ka vuku” ena noda gauna oqo, e vakarautaki tiko vakacava na isolisoli vakayalo ni Kalou?

⁴ E kaya o Jisu ni na dua na “dauveiqaravi yalo dina ka vuku” ena vakarautaka tiko na “kakana e na kena gauna dodonu” me baleti ira na nona imuri, oya ena gauna me sa tiko kina vakatui o koya ena Matanitu ni Kalou. (Maciu 24:45-47, VV) O cei na “dauveiqaravi” oqo ni sa vakatikori oti mai lomalagi o Jisu me Tui ena 1914? Sega ni o ira na italatala ni veivanua vakarisito. E laurai ga vakalevu ni o ira oqo era vakani ira voli na nodra ivavakoso ena ile vakapolitiki me tokoni kina na nodra dui matanitu ena imatai ni ivalu levu. Ia na kakana dina vakayalo me veivotayaki ena kena gauna dodonu a kune ni tiko vei ira na ilawalawa lotu Vakarisito dina era lumuti ena yalo tabu ni Kalou, era lewe ni “qele-ni-sipi lailai” a cavuta o Jisu. (Luke 12:32) Era vunautaka na Matanitu ni Kalou, sega ni matanitu vakatamata, na lotu Vakarisito lumuti. Ra qai mai tomani koya na “dauveiqaravi” lumuti ena sokalou dina ena veiyabaki emuri e vica na milioni na ‘so tani tale na sipi’ era muria na ivalavala dodonu. (Joni 10:16) Na Kalou e vakayagataki koya tiko na ‘dauveiqaravi yalodina’ kei na kena iLawalawa Dauvakatulewa me dusimaki ira na nona tamata tuvai matau me ra vakarautaka na isolisoli vakayalo vei ira kece era vinakata, oya na kakana, isulu, kei na vanua me ra vakaruru kina.

“KAKANA E NA KENA GAUNA DODONU”

5. E vakacava tu na ituvaki vakayalo kei vuravura edaidai, ia na cava e cakava tiko o Jiova me baleta na ka oqo?

⁵ E kaya o Jisu: “Ena sega ni bula na tamata e na madrai duaduaga, sa bula ga e na vosa kecega sa lako mai na gusu ni Kalou.” (Maciu 4:4) Ia e levu ga era sega ni via rogoca na vosa ni Kalou. Me vaka sa tukuna tu mai na parofita i Jiova o Emosi, ena yaco “na dausiga . . . ena sega ni dausiga ni viakana, se na viagunu wai, ia ni ra mate ga e na via rogoca na vosa i Jiova.” (Emosi 8:11) O ira mada ga na daulotu era waloloi vakayalo. Ia e inaki i Jiova “me bula na tamata kecega, ka mai kila sara nai vakavuvuli dina.” (1 Timoci 2:3, 4) Ena vuku gona ni ka oqo, e vakarautaka kina vakalevu o koya na kakana vakayalo. E vei beka na vanua me na kunei kina?

6. E dau vakani ira vakayalo vakacava na nona tamata o Jiova ena veigauna sa sivi yani?

⁶ Ni dau vakarautaka na kakana vakayalo o Jiova vei ira na nona tamata eliu, ena vakarautaka ga vei ira vakailawalawa. (Aisea 65:13) E dua mada oya na nodra dau vakasoqoni ira na tagane, yalewa, kei na gonelalai na bete ni Isireli me ra vakavulici vakailawalawa ena Lawa ni Kalou. (Vakarua 31:9, 12) Ena imatai ni senitiuri, era tauyavutaka na ivavakoso na lotu Vakarisito ena veidusimaki ni dua na ilawalawa dauvakatulewa, ra qai vakayaco soqoni me ra tuberi, ra vakayaloqaqataki kina na lewenilotu. (Roma 16:5; Filimoni 1, 2) Era muria na ivakarau vata ga oqo na iVakadinadina i Jiova. O ni sureti mo ni tiko ena nodra soqoni kece.

7. Na dau tiko wasoma ena soqoni vakarisito e cakayaco vakacava ena noda kila kei na noda vakabauta?

⁷ E dina ni levu sara na ka o sa na vulica ena nomu vulica vakataki iko na iVolatabu. De sa vukei iko kina e dua. (Cakacaka 8:30-35) Ia e rawa ni vakatauvatani na nomu vakabauta kei na dua na kau ena malai qai mate ke sega ni qaravi vinaka. E gadrevi kina mo vakayagataka na kakana bulabula vakayalo. (1 Timoci 4:6) Na soqoni vakarisito gona e ivurevure ni veivakasalataki e vakarautaki me vakabulabulataki iko vakayalo, me vukei iko tale ga ena nomu kilai koya cake na Kalou ni oqori ena tubu kina nomu vakabauta.​—Kolosa 1:9, 10.

8. Na cava eda uqeti kina meda dau tiko ena nodra soqoni na iVakadinadina i Jiova?

⁸ E dua tale na vuna bibi e yaga kina na soqoni. E vola o Paula: “Me da veivakananumi keda vakai keda me da veivakatakatai me dauloloma kai valavala vinaka: me da kakua ni biuta na vakasoqoni vata.” (Iperiu 10:24, 25) Na vosa vakirisi e vakadewataki eke me “veivakatakatai” e rawa ni kena ibalebale tale ga “me vagatai.” E kaya e dua na ivosavosa vakaivolatabu: “Sa vagatai na kaukamea e na kaukamea: Ia na tamata, sa vagata vakakina na mata ni wekana.” (Vosa Vakaibalebale 27:17) O keda kece e gadrevi meda ‘dau vagatai’ vakawasoma. E rawa ni vakamucuya na noda vakabauta na igu ni vuravura. Nida lakova gona na soqoni vakarisito, sa na rawa vei keda kei ira tale ga era tiko kina meda veivakaukauataki. (Roma 1:11, 12, VV) O ira na lewe ni ivavakoso era muria na veivakadreti i Paula na yapositolo me ra “veivakacegui vakai [ira], ka veivakatataki cake vakai [ira],” ni oya e vagata na noda vakabauta. (1 Cesalonaika 5:11) Na noda dau tiko wasoma ena soqoni vakarisito e ivakadinadina tale ga ni noda lomana na Kalou, e gauna vinaka tale ga meda vakacaucautaki koya kina.​—Same 35:18.

“SULUMAKA NA LOLOMA”

9. E ivakaraitaki vakacava ena loloma o Jiova?

⁹ E vola o Paula: “Ni sulumaka na loloma, ni sa ivau uasivi ni duavata.” (Kolosa 3:14, NW) Ena nona lomasoli e solia kina vei keda na isulu oqo o Jiova. Ena sala cava? E rawa ni ra vakavotuya na loloma na lotu Vakarisito baleta ni oya e dua na vua ni yalo tabu i Jiova, e nona isolisoli. (Kalatia 5:22, 23) O Jiova mada ga e vakaraitaka na loloma levu duadua ena nona tala mai na Luvena dua bau ga e vakatubura me rawa nida bula tawamudu kina. (Joni 3:16) Na ivakaraitaki uasivi ni loloma oqo e idusidusi vei keda meda vakaitovo­taki keda tale ga kina. E vola na yapositolo o Joni: “Kevaka sa lomani keda vakaoqo na Kalou, sa dodonu me da veilomani vakai keda.”​—1 Joni 4:11.

10. E yaga vakacava vei keda na noda mai maliwai ira “na veiwekani [kece]”?

¹⁰ E gauna vinaka mo vakaraitaka kina na loloma na nomu dau tiko ena soqoni ena Kingdom Hall. E le levu sara o na sotava ekea. E so vei ira ekea ena totolo sara na nomu taleitaki ira. Io, o ira mada ga era qaravi Jiova ena duidui tu na nodra itovo. De o dau levei ira eliu e sega ni tautauvata tu kei iko na ka era taleitaka, se duidui na nodra ivalavala. Ia era vakaroti ga na lotu Vakarisito me ra “lomani ira na veiwekani [kece].” (1 Pita 2:17) Me nomu sasaga gona mo kilai ira na dau lako yani ina Kingdom Hall​—o ira e duidui vei iko na nodra yabaki ni bula, na nodra ivalavala, kei na nodra ivakatagedegede ni vuli, o ira tale ga na duikaikai. O na rairai kunea ni tamata kece ena dui tu na nodra ivalavala talei.

11. Na cava meda kua ni lomaleqa kina ni duidui tu na nodra itovo na tamata i Jiova?

¹¹ Mo kua ni lomaleqa ke sega ni tautauvata na nodra itovo na lewe ni ivavakoso. Kaya mada ni ra cici tu yani kei na nomu motoka e gaunisala e vuqa tale na motoka kei na lori. E sega ni tautauvata kece na totolo ni nodra cici, e duidui tale ga na vinaka ni kedra ituvaki. E so e yawa sara na vanua era sa lakova mai, e so tale me vakataki iko, era se qai tekivu cici wale ga. E dina ni tu na duidui, ia e duavata tiko ga na gaunisala e cicivi tiko. E vaka tale ga kina na tamata yadua era lewena e dua na ivavakoso. E sega ni tautauvata na totolo ni nodra bucina na itovo vakarisito. E duidui tale ga na ituvaki ni nodra bula vakayago se na ituvaki ni lomadra. E so sa vicavata na yabaki na nodra qaravi Jiova voli mai; e so tale era se qai tekivu wale ga oqo. Ia era lakova kece tiko ga na gaunisala ni bula tawamudu, “[era] duavata sara ena vakasama kei na lewa.” (1 Korinica 1:10, VV) O koya gona, saga mo raica na nodra ivalavala uasivi, sega ni nodra malumalumu na lewe ni ivavakoso. Ni o vakayacora oqori, o na marau kina ni o na vakadinata ni tiko dina kei ira oqori na Kalou. Qai sega li ni o koya oqori na vanua o via tiko tale ga kina?​—1 Korinica 14:25.

12, 13. (a) Na cava o rawa ni cakava ke dua ena ivavakoso e vakacudrui iko? (b) Na cava e bibi kina meda kua ni dau katona tiko ga na ca?

¹² Nida tamata ivalavala ca kece ga, e tiko na gauna ena kaya se cakava kina e dua na ka ena mosi vei iko e dua ena ivavakoso. (Roma 3:23) E dina taucoko na ka e tukuna na tisaipeli o Jemesa: “Ni da sa cala kecega ena ka e vuqa. Kevaka sa sega ni cala e dua ena vosa, sa tamata uasivi sara ko koya.” (Jemesa 3:2) Na cava o na cakava ke dua e vakacudrui iko? E kaya e dua na ivosavosa mai na iVolatabu: “A nona yalomatua na tamata sa vakaberabera kina na nona cudru; ka sa ka e rogo vinaka kina ni sa sega ni cudru­vaka na cala.” (Vosa Vakaibalebale 19:11) Na tamata e yalomatua ena raica vakayalomatua na ka, ena saga me raica se cava e vu dina tiko ni nona vosa cudrucudru beka se vakacudrucudru e dua. E vuqa vei keda eda dau yalomatua sara ni vaka­ulu­bale­taka na noda malumalumu. Vakaevei meda vakayagataka tale ga na noda yalomatua meda kila se cava e vu tiko ni nodra malumalumu na tani, oti oya, da qai vosoti ira kina?​—Maciu 7:1-5; Kolosa 3:13.

¹³ Nanuma tiko ga ni dodonu meda vosoti ira eliu na tani kevaka eda gadreva me qai vosoti keda o Jiova. (Maciu 6:9, 12, 14, 15) Kevaka eda vakaitovotaki keda tiko ena ka dina, eda na lomani ira na tani. (1 Joni 1:6, 7; 3:14-16; 4:20, 21) O koya gona, kevaka e tubu e dua na nomudrau veileqaleqati kei na dua tale ena loma ni ivavakoso, valuta na nomu via yaloca tiko ga. Ke o sulumaka na loloma, o na saga mo walia na leqa, o na sega tale ga ni tu vakasuka mo lai kere veivosoti ke o vakavuna na ca.​—Maciu 5:23, 24; 18:15-17.

14. Na itovo cava soti meda sulumaka?

¹⁴ Me okati tale ga ena noda isulu vakayalo e so na itovo e lakolakovata kei na loloma. E vola o Paula: “Mo ni vaka­isulu e na dauloloma, e na yalovinaka e na yalomalumalumu, e na yalomalua kei na dauvosota vakadede.” Era tiki tiko ni itovo vakalou ni “tamata vou” na ivalavala kece oqo, qai kedra isaluaki tu na loloma. (Kolosa 3:10, 12, VV) O na saga beka mo vakasulumi iko vaka oqori? Kevaka o sulumaki iko ena itovo ni loloma vakaveitacini, o sa vakaraitaki iko tiko ni o dua na tisaipeli i Jisu ni a kaya o koya: “A ka oqo era na kila kina na tamata kecega ni dou sa noqu tisaipeli, kevaka dou sa veilomani.”​—Joni 13:35.

VANUA NI VAKACEGU

15. E ivakaruru vakacava na ivavakoso?

¹⁵ E dau ivakaruru tale ga na ivavakoso, e idrodro mo mai vakacegu kina. O na raica ni ra lewena tu na tamata lomadina era saga me ra cakava tiko ga na ka e dodonu ena mata ni Kalou. E vuqa vei ira era sa biuta laivi na ivalavala kei na itovo ca e so o se saga kaukaua tiko oqo mo valuta. (Taito 3:3) E rawa ni ra vukei iko, ni tukuni vei keda meda dau “veivuketaka na [noda] i colacola.” (Kalatia 6:2, VV) Ia e macala ni sasagataki ni bula tawamudu e sega ni nona itavi e dua tale, e nomu sara ga. (Kalatia 6:5; Filipai 2:12) E yaga kina na ivavakoso vakarisito, ni vakarautaka oqori o Jiova meda vukei, meda vakaukauataki tale ga kina. Se mani vakacava sara na levu ni leqa e bikai iko, e tu na ivukevuke yaga o rawa ni vakararavi kina​—oya na ivavakoso era lewena na tamata dau loloma era na tokoni iko ena gauna ni nomu yalobibi se bula leqaleqa.​—Vakatauvatana Luke 10:29-37; Cakacaka 20:35.

16. Era dau veivuke vakacava na qase ni ivavakoso?

¹⁶ E dua na ilawalawa era na tokoni iko sara ga o ira “nai solisoli . . . tamata”​—oqo o ira na lesi ena ivavakoso me ra qase, se ivakatawa, era vakatawa na qelenisipi ena loma e vinakata kei na loma e rekitaka. (Efeso 4:8, 11, 12; Cakacaka 20:28; 1 Pita 5:2, 3) E parofisaitaka o Aisea me baleti ira: “Ena dua na tamata ena vaka nai vunivuni mai na cagi, kei nai vakaruru mai na cava; ena vaka na uciwai e na vanua dravuisiga, ka vaka na yaloyalo ni vatu levu e na vanua dauveivakaocataki.”​—Aisea 32:2.

17. (a) A via veivuke ga vakalevu ena cava o Jisu? (b) Na isolisoli cava a yalataka na Kalou me baleti ira na nona tamata?

¹⁷ E ka vakaloloma dina ni a sega tu vei ira na iliuliu ni lotu na yalo ni veikaroni ena gauna a bula tu kina e vuravura o Jisu. E mositi koya dina na kedra ituvaki na tamata, a vinakata kina vakalevu me vukei ira vakayalo. E rui lomani ira o Jisu ni ra “sa malumalumu, ka biu wale tu, me vaka na sipi sa sega na nodrai vakatawa.” (Maciu 9:36) Na tikina oqo e vakamacalataka vinaka na kedra ituvaki e vuqa edaidai era sota kaya tu na rarawa mosimosi qai sega ni dua e tu me vukei ira se vakacegui ira vakayalo! Ia o ira na tamata i Jiova e tu na ivurevure me ra vukei kina vakayalo, ni a yalataka o koya: “[Au] na lesia eso me nodrai vakatawa era na vakani ira: ka ra na sega ni rere tale, se taqaya, se yali.”​—Jeremaia 23:4.

18. Na cava meda torova kina e dua na qase ke da vinakata na veivuke vakayalo?

¹⁸ Saga mo kilai ira na qase era lesi ena ivavakoso. Sa dede sara na nodra veikilai mai kei na Kalou qai laurai ena nodra bula na yaga ni veikilai oqo, ni ra sa rawata na ivakatagedegede gadrevi me baleti ira na ivakatawa e volai tu ena iVolatabu. (1 Timoci 3:1-7; Taito 1:5-9) Kua ni tu vakasuka ni to­rova e dua vei ira ke o vinakata na veivuke vakayalo mo valuta kina na ivalavala se itovo e veisaqasaqa kei na ka e vinakata na Kalou. O na raica ni o ira na qase era muria na veivakadreti i Paula: “Vakacegui ira era sa yalolailai, vukei ira era sa malumalumu, dauvosoti ira kecega na tamata.”​—1 Cesalonaika 2:7, 8; 5:14.

MAI VAKACEGU VATA KEI IRA NA TAMATA I JIOVA

19. Era vakalougatataki vakacava o ira na qara me ra mai vakacegu ena isoqosoqo i Jiova?

¹⁹ E dina ni sega ni vinaka na ituvaki ena gauna oqo, e vakarautaka ga vei keda o Jiova na isolisoli vakayalo me vaka na kakana, isulu, kei na vanua meda vakaruru kina. E macala ni na waraki ga na vuravura vou e yalataka na Kalou, oya na parataisi vakayago, me qai vakilai kina na vinaka ni bula vakayago. Ia o ira era lewena tiko na isoqosoqo i Jiova era sa marautaka tiko ena gauna oqo na vakacegu ena parataisi vakayalo. E parofisaitaki ira o Isikeli: “Era na tiko vinaka ga, ka na sega e dua me vakarerei ira.”​—Isikeli 34:28; Same 4:8.

20. Ena sosomitaka vakacava o Jiova na veika eda na vakayalia beka nida mai sokalou vua?

²⁰ Dua na ka na noda vakavinavinaka ni lomani keda o Jiova ena nona vakarautaka na isolisoli vakayalo me baleti keda mai na nona Vosa kei na nona isoqosoqo! Mo vakavolekati iko vei ira na tamata ni Kalou. Kua ni madua ena ka era na nanuma beka na nomu itokani se wekamu ni o sa mai vulica tiko oqo na ka mo kilai koya kina na Kalou. De na ca vei ira e so ni o sa dau veimaliwai kei ira na iVakadinadina i Jiova, o qai lakova tale tiko ga na soqoni ena Kingdom Hall. Ia ena sosomitaka vinaka o Jiova na ka kece eda na vakayalia nida mai sokaloutaki koya. (Malakai 3:10) E kaya tale ga o Jisu: “Sa sega e dua na tamata sa biuta na vale, se na veitacini, se na ganena, se na tamana, se na tinana, se na luvena, se na vanua, e na vukuqu, kei na vuku ni tukutuku-vinaka, me qai sega ni saumi, ena rawata yadrau e na bula oqo, na veivale, kei na veitacini, kei na ganena, kei na tinana, kei na luvena, kei na vanua, kei na veivakacacani talega; ia e na ­gauna maimuri, na bula tawa mudu.” (Marika 10:29, 30) Io, se mani cava o na biuta laivi tu yani, se mani dredre vakacava na ka o vosota, ni o mai maliwai ira na tamata ni Kalou o na rawata na vakacegu vakayalo kei na veiwekani marautaki.

O SE NANUMA TIKO?

O cei na “dauveiqaravi yalo dina ka vuku”?

Na cava soti e vakarautaka o Jiova meda vakani kina vakayalo?

E rawa ni ra vukei keda vakacava na lewe ni ivavakoso vakarisito?

[iYaloyalo ena tabana e 165]